Ko sē Toe Ma‵taku Lāua i te Gataga

I TAUSAGA ki tua ifo o te 1970, ne kamata o tali‵tonu a Gary mo Karen me ko pili mai a te gataga o te lalolagi. Telā ne olo atu lāua ki tua mai te fa‵kai lasi ki te fa‵kai foliki kae ne ma‵nako lāua o fakatoka a mea katoa e manakogina ne lāua. Ne ma‵nako ke ‵sao lāua.

Ke maua a mea e manakogina, ne ‵togi ne lāua a tusi, ‵kau atu ki fono, kae fai‵pati atu ki tino e tokouke. Ne ‵toki ne lāua se fatoaga vesiapolo mo lakau fai fuaga e 50. Ne fakaputu ne lāua a fuaga mo mea fai galuega. Ne tauloto ne lāua a te ‵tokiga mo te tausiga o mea‵kai. Ne akoako ne se taugasoa o lāua a te auala e tausi faka‵lei ei a meafasi. Ne iloa ne Karen o filifili a lakau mo aka o lakau i te vao ko te mea ke mafai o kai ne lāua māfai ko seai ne nisi meakai. Ne iloa ne Gary a te auala e maua ei a oela mai te lakau ko te corn, te faitega o se ogaumu mai te fiti, mo te fale telā e se manakogina o faite ki mea fai galuega e uke.

“Ona ko tulaga ma‵sei o te lalolagi i te taimi tenā,” ko muna a Karen, “ne talitonu au me ko pili mai a te gataga o te olaga tenei.” E fakamatala mai a Gary, penei: “E pelā mo nisi talavou, ne taumafai au o fakagata a te loto fenua, te taua i Vietnam, mo faifaiga sē fakamaoni. Kae ne kamata au o loto vāivāi. E foliga mai ki a au me e olo atu a tino i te auala telā e iku atu ki te fakaseaiga.”

“I te po e tasi,” ko muna a Gary, “ne avanoa au, telā puke ei taku Tusi Tapu kae faitau mai te Mataio ki te Fakaasiga. Ne faitau faeloa ne au i po e fa. I te suā taeao, ne fai atu au ki a Karen: “Ko ‵nofo nei tatou i aso fakaoti. Ko pili nei o gasuesue te Atua o faka‵ma a te lalolagi. E ‵tau o ‵sala ne tāua a tino kolā ka ‵sao atu i ei. Ne kamata o ‵kau atu a Gary mo Karen ki lotu kese‵kese, o sala atu ki tino kolā e fakatoka mō te gataga.

Fakamuli ifo, ne talai atu se Molimau a Ieova ki a lāua, kae ne kamata ei se akoga faka-te-Tusi Tapu. “Ne fiafia ‵ki eiloa au,” ko pati a Karen, “me ne fakamatala faka‵lei mai ne te Tusi Tapu ki a au. Ne salasala faeloa au ki te munatonu e uiga ki te taimi o te gataga, kae nei la ko maua ne au. E isi eiloa se fakamoemoega mautinoa mō aso mai mua. A ko te ‵toe mea tāua, me ko oti ne kamata o maua ne au se va fakataugasoa mo toku Tamana faka-te-lagi, te Mafuaga mo te Atua o te lagi mo te lalolagi.”

E fai mai a Gary, penei: “Ko lavea ne au a te aoga o toku olaga. I te taimi ne sukesuke ei au ki te Tusi Tapu, ne seki mafai o taofi aka ne au. Ne faitau au ki valoaga i te Tusi Tapu, sukesuke ki fakamaoniga me ka oko tonu mai eiloa, kae fakatalitonu aka ne au me ko pili o gasuesue a te Atua. Ne mafaufau au penei: ‘E ‵tau mo tino o toka, e se mō fakalavelave ‵tupu fakafuasei, kae mō te ola telā e manako te Atua ke maua ne tatou.’ ” Ne maua ne Gary mo Karen se kilokiloga ‵lei e uiga ki aso mai mua. I lo te manava‵se ki te gataga o te lalolagi, ko tali‵tonu nei lāua me ka ave keatea ne te Atua a fakalavelave o tino kae toe fakafoki mai a te lalolagi ki te palataiso.

Ne a mea ko fai nei ne Gary mo Karen, mai tua o se 25 tausaga? E fai mai a Karen: “E ati aka faeloa ne au a toku alofa mō Ieova te Atua mo toku fakatuanaki ki a ia, kae taumafai au o fesoasoani atu ki tino ke fai foki penā. E fakatau fesoasoani eiloa māua mo Gary ko te mea ke tumau te malosi o te mā kāiga kae ke ‵kau fakatasi foki i te tapuakiga ki te Atua. E fakatoka eiloa māua, kae taumafai o fakafaigofie te olaga ko te mea ke mafai o ‵saga atu māua ki nisi tino mo olotou manakoga.”

E fakaopoopo mai a Gary: “E ‵talo faeloa au ke aumai ne te Malo o te Atua a te fakamafanafanaga ki te fia miliona o tino. I taimi katoa e talai atu ei ne au a te tala ‵lei o te Malo o te Atua ki nisi tino, e ‵talo faeloa au ko te mea ke mafai o fakamatala atu ne au a nisi fakamoemoega mai te Tusi Tapu ki se tino e tokotasi. I tausaga e sili atu i te 25, ko oti ne tali mai ne Ieova a te tali tenā. E tali‵tonu māua mo Karen me ko pili o fakaoko mai ne Ieova a ‵fuliga ‵lasi ki te lalolagi, kae ko se toe ma‵taku tatou i te gataga.”​—Mataio 6:9, 10; 2 Petelu 3:11, 12.

[Ata i te itulau e 9]

Ko fia‵fia nei a Gary mo Karen o fesoasoani atu ki nisi tino ke maua ne latou a te fakamoemoega mai te fekau i te Tusi Tapu