Au se Vaegā Tino Pefea?

NE A AU MEA KA FAI?

Mafaufau ki te tulaga tenei: E seki kātoa se sefulu minute i te okoatuga a Kelena ki se pā‵ti kae lagona ne ia se leo telā e masani ‵lei a ia ki ei mai i ana tua.

Ne ‵fuli atu a Kelena kae lavea ne ia tena taugasoa ko Tiesika mo fagu e lua fatoa ‵tala. Ne lavea ne ia me ne meainu ma‵losi. Ne fakatu atu ne Tiesika a te fagu e tasi i mata eiloa o Kelena kae fai atu, “Koe la ko saoloto loa i te inu, ne?”

E fia ‵teke atu a Kelena ki ei, kae ko Tiesika ko tena taugasoa. Kae ne seki manako a Kelena ke mafaufau tena taugasoa me i a ia e se gali. I tafa i ei, a Tiesika se tokotasi o tama‵liki fā‵fine ‵lei. Kae kafai e inu tou fafine, ko tena uiga, kāti e se masei. ‘Se meainu fua,’ ne fai ifo a Kelena, ‘e se pelā mo te fakaaogaga o vailakau tapu.’

Moi fai koe ko Kelena, ne a au mea ka fai?

TU KAE MAFAUFAU!

Ke fai se fakaikuga poto i se vaegā tulaga penei, e ‵tau o isi sou iloga. A te iloga e fakauiga ki ou tulaga mo te mea e talitonu koe ki ei. Ona ko tou malamalama ‵lei i tou iloga, e maua ei ne koe te malosi ke pule atu ki tou olaga i lō te taliaga o nisi tino ke pule atu ki a koe.—1 Kolinito 9:26, 27.

E mafai pefea o ati aka ne koe a te vaegā malosi tenā? Se mea gali ke kamata o tali aka ne koe a fesili kolā e ‵soko mai.

1 NE A FEITU E MALOSI EI AU?

A te iloa atu o ou atamai mo uiga ‵lei ka fakamalosi aka ei tou loto talitonu.

FAKAAKOAKOGA I TE TUSI TAPU: Ne tusi mai te apositolo ko Paulo: “Me kafai au e se apo i te faipati, kae e se penā eiloa toku iloa.” (2 Kolinito 11:6) Ona ko tena malamalama ‵lei i te Tusi Tapu, ne mafai ei o tu ‵mautakitaki a Paulo i taimi ne ‵teke atu ei a nisi tino ki a ia. Ne seki talia ne ia olotou pati sē ‵lei ke fakavāivāi aka ei tena loto talitonu.—2 Kolinito 10:10; 11:5.

ILOILO IFO KI A KOE EILOA. Tusi mai lalo nei se taleni io me se atamai o koe.

Nei la, ke fakamatala mai se uiga gali o koe. (E pelā mo mea konei, e a, e atafai koe? e kaimalie? e fakatuagagina? e fakamaoni ki te taimi?)

2 NE A OKU VĀIVĀIGA?

Kafai e se ‵lei te sokoga o te seni, e mafai eiloa o se malosi te seni kātoa, e penā foki loa, kafai e fakavāivāi koe, e mafai o se malosi ‵lei tou iloga, kae e mafai eiloa o ‵fuli ki te masei atu.

FAKAAKOAKOGA I TE TUSI TAPU: Ne iloa ‵lei ne Paulo ana vāivāiga. Ne tusi mai a ia: “Kae ko toku ‵kanoloto tonu eiloa e fiafia ki te tulafono a te Atua, kae e lagona foki ne au i toku foitino se isi tulafono telā e taua atu ki te tulafono i toku mafaufau kae e takitaki ne ia au ke pologa ki te tulafono o te agasala.”—Loma 7:22, 23.

ILOILO IFO KI A KOE EILOA.

Ne a ou vāivāiga e ‵tau o fakamasani koe ke pule faka‵lei atu ki ei?

3 NE A OKU FAKAMOEMOEGA?

E mata, ka sopo atu koe ki se taxi kae fai atu ki te tino fakatele ke tele fakatamilomilo ke oko ki te taimi e masa ei tena penitini? Se mea valea ke fai penā—kae ‵togi ‵mafa foki!

Se a te akoakoga? A te faiga o fakamoemoega e fakatonutonu aka ei tou olaga kae fai foki i ei ke mo a ma māumāu ou taimi. Ona ko te mea e isi se koga e fano koe ki ei kae palani faka‵lei ke oko atu koe ki ei.

FAKAAKOAKOGA I TE TUSI TAPU:

Ne tusi mai a Paulo: “A te auala telā e tele ei au e se tele valevale fua au i ei.” (1 Kolinito 9:26) I lō te tapeapea atu i te olaga mai te taliaga o mea ke ‵tupu ki a ia, ne fakatoka ne Paulo a fakamoemoega kae ne ola e ‵tusa mo mea konā.—Filipi 3:12-14.

ILOILO IFO KI A KOE EILOA.

Tusi mai lalo nei a fakamoemoega e tolu kolā e manako koe ke taumafai ki ei i loto i te suā tausaga.

4 NE A OKU TALITONUGA?

E aunoa mo te talitonu malosi ki se mea, ka fakalotolotolua eiloa koe i au fakaikuga. E pelā mo te anufe e ‵fuli ki te pepe, ka fai foki koe penā ko te mea ke kau atu koe ki ou taugasoa—se fakailoga mautinoa me e seai sou iloga.

E ‵kese mai i ei, kafai e fakavae au faifaiga ki mea kolā e talitonu koe ki ei, e fakatumau ei ne koe tou iloga—faitalia a mea e fai ne nisi tino.

FAKAAKOAKOGA I TE TUSI TAPU: Kāti koi talavou a te pelofeta ko Tanielu kae ne “mafaufau ifo” ke fakalogo a ia ki tulafono a te Atua, faitalia me ne ‵vae keatea a ia mai i tena kāiga. (Tanielu 1:8) Mai te faiga penā, ne fakamaoni eiloa a ia i ana faiga. Ne ola a Tanielu e ‵tusa mo mea ne talitonu a ia ki ei.

ILOILO IFO KI A KOE EILOA.

Ne a mea e talitonu koe ki ei? E pelā mo mea konei: E talitonu koe ki te Atua? Kafai e pena loa, kaia? Se a te fakamaoniga me e ola tonu a ia ki a koe?

E talitonu koe me i tulaga o te Atua i mea tau amioga ne fai eiloa mō tou ‵lei? Kafai e pena loa, kaia?

I te fakaotiga, se a te mea e manako koe ki ei—ke fai pelā mo se laulakau telā e agiagi valevale ne se tamā matagi io me se lakau telā e ‵mautakitaki i taimi o matagi ma‵losi? Fakamalosi aka tou iloga, kae ka fai koe pelā mo te lakau tenā. Kae ka fesoasoani atu te mea tenā ke tali aka ne koe te fesili, Au se Vaegā Tino Pefea?