Te Auala E Faka‵sao Ei Tatou Ne Te Togiola

“A te tino telā e talitonu ki te Tama, ko i a ia te ola se gata mai; ka ko te tino telā e se fakalogo ki te Tama, ka se lavea ne ia te ola, kae ka tumau eiloa i a ia te fakasalaga a te Atua.”​—IOANE 3:36.

1, 2. Se a te pogai e tasi ne ‵lomi ei a te Zion’s Watch Tower?

“KAFAI e sukesuke faka‵lei se tino ki te Tusi Tapu, ka lavea ne ia a te tāua o te mate o Keliso,” ko pati i te mataupu e fa o te mekesini i a Oketopa 1879. Konei a pati fakaoti i te mataupu tāua tenā: “Ke na fakaeteete tatou i so se mea telā e fai ei ke manatu māmā, io me ave kea‵tea i ei a te tāua o te mate o Keliso, e pelā me se taulaga ke fakamagalo ei a agasala.”​—Faitau te 1 Ioane 2:1, 2.

² A te pogai e tasi ne ‵lomi muamua ei a te Zion’s Watch Tower i a Iulai 1879, ko te mea ke ‵pulu ei a te akoakoga i te Tusi Tapu e uiga ki te togiola. Ne tuku mai ne te mekesini tenā a “meakai i te taimi tonu,” me i tausaga ki tua ifo o te 1800, ne kamata o tokouke a te aofaki o tino kolā e fai mai i a latou ne Kelisiano ne fakalotolotolua me i te mate o Iesu e mafai o fai e pelā me se togiola mō ‵tou agasala. (Mataio 24:45) I te taimi tenā, e tokouke a tino ne kamata o tali‵tonu ki te akoakoga o te evolusione, se manatu telā e se fetaui mo te fakamatalaga tonu me ne pa‵ku a tino mai se tulaga ‵lei katoatoa. E akoako atu ne tino kolā e tali‵tonu ki te evolusione me e mafai o fakasao ne te tagata a ia eiloa, kae e se manakogina i ei a te togiola. Kae ko oko loa i te ‵tonu o te polopolokiga a te apositolo ko Paulo ki a Timoteo: “Tausi faka‵lei ki akoakoga ne tuku atu ne au ki a koe. ‵Kalo keatea mai i finauga va‵lea mo tino kolā e fai mai me ne maua ne latou mai te Atua se fakaasiga fakapitoa. A te mea nei se fakaasiga loi fua, e takitaki ei latou keatea mai te fakatuanaki.”​—1 Timoteo 6:20, 21.

3. Ne a fesili kolā ka mafau‵fau tatou ki ei?

³ E mautinoa eiloa me ne fakaiku aka ne koe ke se ‘takitaki koe keatea mai te fakatuanaki.’ Ke tumau te malosi o tou fakatuanaki, se mea ‵lei ke mafaufau koe ki fesili konei: Kaia e manakogina ei ne au a te togiola? Se a te mea e ‵togi ki ei? E mafai pefea o aoga ki a au a te fakatokaga tāua tenei ko te mea ke mafai ei o fakasao au mai te kaitaua o te Atua?

Ne Fakasao Mai te Kaitaua o te Atua

4, 5. Se a te fakamaoniga me ne oko atu a te fakasalaga a te Atua ki luga i te fakanofonofoga masei tenei?

⁴ E fakaasi mai ne te Tusi Tapu mo tala fakasolopito me i te taimi ne agasala ei a Atamu, ne “tumau eiloa” te fakasalaga a Atua ki luga i tino. (Ioane 3:36) E fakamaoni aka ne tatou a te mea tenei me e seai eiloa se tino ne mafai o sao mai te mate. E seki mafai eiloa ne te pulega matagā a Satani o puipui a tino mai fakalavelave, kae e seai foki se malo o tagata e mafai o fakataunu ne ia a manakoga tāua o tino katoa. (1 Ioane 5:19) Tela la, koi logo‵mae eiloa a tino i taua, amioga ma‵sei, mo te mativa.

⁵ E manino ‵lei me e se ‵ligi mai ne Ieova ana fakamanuiaga ki te fakanofonofoga masei tenei. Ne fai atu a Paulo me “ne fakaasi mai ei foki te fakasalaga a te Atua mai te lagi ki te sē amio Atua mo te amio ma‵sei o tino.” (Loma 1:18-20) Tela la, a latou kolā e se sala‵mo kae ola i se auala sē amioatua ka se ‵sao i ikuga o olotou amioga. I aso nei, ko oti ne fakaoko atu a te kaitaua o te Atua i fekau o te fakamasinoga kolā ne fai e pelā me ne mala ki te lalolagi a Satani. Kae e ‵sae mai a vaegā fakamatalaga penā i ‵tou tusi faka-te-Tusi Tapu e uke.​—Fakaasiga 16:1.

6, 7. Se a te galuega telā e fakasalalau atu ne Kelisiano fakaekegina, kae se a te avanoaga koi ‵tala atu ki tino kolā e aofia i te lalolagi a Satani?

⁶ E mata, e fakauiga i ei me ko to talimuli ke ‵vae keatea a tino mai te pulega a Satani kae maua te taliaga a te Atua? Ikai, koi maua eiloa te avanoaga ke toe fesokotaki mo Ieova. A Kelisiano fakaekegina, kolā ko “sui o Keliso,” e takitaki ne latou a te galuega talai e auala i se ‵kamiga e fai ki tino mai atufenua katoa, penei: “Ke faka‵lei koutou mo te Atua.”​—2 Kolinito 5:20, 21.

⁷ Ne fai mai a te apositolo ko Paulo me “e fakasao ne ia [Iesu] tatou mai te fakasalaga a te Atua telā ka oko mai.” (1 Tesalonia 1:10) E iku atu a te kaitaua o Ieova ki te fakaseaiga se-gata-mai o tino agasala kolā e se sala‵mo. (2 Tesalonia 1:6-9) Ko oi la ka ‵sao? E fai mai te Tusi Tapu, penei: “A te tino telā e talitonu ki te Tama, ko i a ia te ola se gata mai; ka ko te tino telā e se fakalogo ki te Tama, ka sē lavea ne ia te ola, kae ka tumau eiloa i a ia te fakasalaga a te Atua.” (Ioane 3:36) Ao, ka ‵sao atu katoa a tino kolā e fakatuanaki ki a Iesu mo te togiola i te gataga o te fakanofonofoga tenei mai i ikuga o te aso o te kaitaua o te Atua.

Te Auala e Fakagalue Aka ei a te Togiola

8. (a) Se a te fakamoemoega gali ne tuku atu ki a Atamu mo Eva? (e) E fakamaoni atu pefea i a Ieova se Atua e fai mea tonu?

⁸ Ne faite a Atamu mo Eva ke ‵lei katoatoa. Moi ne tumau lāua i te faka‵logo ki te Atua, penei ko ‵fonu a te lalolagi i la tama‵liki fia‵fia kolā e ‵nofo fakatasi mo lāua i te Palataiso. Kae se mea fakafanoanoa me ne seki faka‵logo lāua ki te fakatonuga a te Atua. Ne iku atu ei ki te fakasala o lāua ki te mate kae ‵tuli keatea lāua mai te Palataiso tenā. I te taimi ko isi ei ne tama‵liki a Atamu mo Eva, ne pokotia a tino katoa i te agasala, kae ne ga‵solo aka a te tauavaga muamua o ma‵tua kae ‵mate. E fakamaoni mai ei a te ‵tonu o pati a Ieova. E se gata i ei, a ia se Atua e fai mea tonu. Ne fakailoa atu ne Ieova ki a Atamu me i te kai ki te fuagalakau telā ko oti ne fakatapu e iku atu ki te mate, kae ne fai eiloa penā.

9, 10. (a) Kaia e ‵mate ei a tama‵liki a Atamu? (e) E mafai pefea o ‵sao tatou mai te mate se-gata-mai?

⁹ E pelā me ne tama‵liki a Atamu, e maua ne tatou se foitino sē ‵lei katoatoa telā e iku atu ki te agasala mo te mate. I te taimi ne agasala ei Atamu, ne agasala foki tatou. Tela la, e aofia tatou i te fakasalaga ko te mate. Kafai e toe tuku atu ne Ieova a te ola ki tino e aunoa mo se togiola, ka se ‵tonu eiloa ana pati ne fai. E tonu, ne faipati a Paulo mō tatou katoa i ana pati konei: “E iloa ne tatou a te Tulafono se mea faka te Agaga; ka ko au se tagata faka te lalolagi, ne ‵togi atu e pelā mo se pologa ki te agasala. Ko seai la se tino malaia penei mo au! Ko oi la ka fakaola ne ia a au mai i te foitino mate tenei?”​—Loma 7:14, 24.

¹⁰ Ko Ieova fua e mafai o tuku mai ne ia a te tulafono fakavae me e mafai o fakamagalo ne ia ‵tou agasala kae fakasaoloto tatou mai te fakasalaga o te mate se-gata-mai. Ne uga mai ne ia tena Tama mai te lagi ke fanau mai e pelā me se tino faka-te-foitino ‵lei katoatoa, telā e mafai o tuku mai tena ola e pelā me se togiola mō tatou. E se pelā mo Atamu, ne tumau eiloa te ‵lei katoatoa o Iesu. E tonu, “e seai se agasala kai fai ne ia.” (1 Pe. 2:22) Tela la ne mafai o fai a Iesu e pelā me se tamana ‵lei katoatoa o tino. Kae, ne talia ke tuku atu a ia ki ana fili ke oko ki te mate ko te mea ke mafai o ‵togi ne ia a agasala a tama‵liki a Atamu kae ke maua ne tino kolā e fakatuanaki ki a ia a te ola se-gata-mai. E fakamatala mai te Tusi Tapu: “E tokotasi te Atua, kae tokotasi foki te sokoga i te va o te Atua mo tino, ko te tagata e igoa ki a Keliso Iesu, telā ne tuku atu tona foitino o fakasaoloto a tino katoa.”​—1 Timoteo 2:5, 6.

11. (a) Se a te mea ne fakatusa ki ei a te aoga o te togiola? (e) E pefea te uke o mea aoga e maua mai i te togiola?

¹¹ A te auala e fakagalue ei a te togiola e mafai o fakatusa ki te tulaga o tino kolā ne kaisoa olotou tupe ne tino ga‵lue i se pagike kae ‵nofo mai mo kaitalafu e uke. Ne ‵pei atu a te pule ki te falepuipui mō tausaga e uke. Kae e a la a tino kolā ne fakamaoni o faulu olotou tupe? Ke fakafoliki te mativa, e mafai o ‵lei olotou fakanofonofoga māfai ko pule atu se tagata alofa kae maumea ki te pagike tenā kae sui atu a tupe ‵teu katoa a tino, ko te mea ke magalo ei a kaitalafu. I se auala tai ‵pau, ne ‵togi ne Ieova te Atua mo tena Tama fagasele a tama‵liki a Atamu mai te agasala ki te toto maligi o Iesu. Tenā ne fai ei a pati a Ioane te Papatiso e uiga ki a Iesu: “Kiloke, telā te Tama Mamoe a te Atua ka ave ne ia keatea agasala a te lalolagi.” (Ioane 1:29) E aofia i tino kolā ka fakamagalo olotou agasala, ko tino ola mo tino ‵mate.

Te ‵Togi o te Togiola

12, 13. Se a te mea e tauloto ne tatou mai te lotomalie o Apelaamo ke ofo atu a Isaako?

¹² E se mafai o malamalama faka‵lei tatou i te ‵togi ‵mafa o te togiola ki te ‵tou Tamana faka-te-lagi mo tena Tama fagasele. Kae e maua i te Tusi Tapu a tala kolā e mafai o fesoasoani mai ke mafaufau ‵loto tatou ki te mea tenei. E pelā me se fakaakoakoga, mafaufau la ki lagonaga o Apelaamo i te taimi ne malaga ei a ia i aso e tolu ki Molia ona ko tena fakalogo ki te fakatonuga te Atua: “Puke tau tamaliki tagata tenā ko Isaako, telā e pele i tou loto, kae olo ki te fenua o Molia. E fakaasi atu ne au a te mauga i te fenua tenā, telā ka fano koe ki luga i ei o ofo mai ne koe a Isaako mo fai tau taulaga ki a au.”​—Kenese 22:2-4.

¹³ Ne oko atu eiloa a Apelaamo ki te fa‵kai tenā. Mafaufau la ki te logo‵mae ne ‵tau o maua ne ia i te taimi ne saisai ei ne ia a lima mo vae o Isaako kae fakamoe ne ia i luga i te fatafaitaulaga telā ne faite ne ia. Ko oko eiloa i te fakafanoanoa ki a Apelaamo ke sisi aka ne ia te naifi telā e ‵kati ki ei tena tama! Ke fakaataata ne koe a lagonaga o Isaako i te taimi ne moe ei i luga i te fatafaitaulaga, kae fakatalitali ki te logo‵mae telā ka iku atu ki te mate. Kae ne taofi eiloa ne te agelu a Ieova a Apelaamo. E fesoasoani mai a te mea ne fai ne Apelaamo mo Isaako ke malamalama tatou i te ‵mafa ki a Ieova ke talia ne ia a sui o Satani ke tamate ne latou a Tena Tama. E fakaasi mai i te fakalogo o Isaako ki a Apelaamo a te lotomalie o Iesu ke puapuaga kae mate mō tatou.​—Epelu 11:17-19.

14. E fesoasoani mai pefea a te mea ne tupu ki a Iakopo ke loto fakafetai tatou ki te ‵togi o te togiola?

¹⁴ A te ‵togi o te togiola e mafai foki o fakaata mai i te mea ne tupu i te olaga o Iakopo. Mai ana tama tagata katoa, ne alofa malosi eiloa a Iakopo ki a Iosefa. Se mea fakafanoanoa me ne loto ma‵sei kae takalia‵lia a taina o Iosefa ki a ia. Kae ne talia ne Iosefa ke uga atu a ia ne tena tamana o onoono ki ana taina. I te taimi tenā, ne tausi ne latou a mamoe a Iakopo i se koga telā e 60 maila te ‵mao mai te lotou fale i Hepelona. Mafaufau la ki lagonaga o Iakopo i te taimi ne ‵foki mai ei ana tama mo te gatu o Iosefa telā e ‵fonu i toto! Ne fai atu a ia: “Ao, e o Iosefa! Kāti ne ta faeloa ne se manu fekai.” Ne pokotia malosi a Iakopo i te mea tenei, telā ne fanoanoa a ia mō taimi e uke. (Kenese 37:33, 34) E se saga atu a Ieova ki tulaga kolā e ‵saga atu ki ei a tino sē ‵lei katoatoa. Kae ko te mafaufau ‵loto ki te mea ne tupu i te olaga o Iakopo e mafai o fesoasoani mai ke malamalama, i lagonaga o te Atua i te taimi ne ta fakamasei ei tena Tama e pelā me se tagata i te lalolagi nei.

Mea Aoga e Maua Mai te Togiola

15, 16. (a) E fakaasi mai pefea me e talia ne Ieova a te togiola? (e) E maua pefea ne koe a mea aoga mai te togiola?

¹⁵ Ne toe fakatu aka ne Ieova te Atua a tena Tama fakamaoni ki se foitino faka-te-agaga ‵malu. (1 Petelu 3:18) Ne fakasae atu a Iesu ki ana soko i aso e 40, o fakamalosi olotou fakatuanaki kae fakatoka latou mō te galuega talai i aso mai mua. Oti aka, fanaka ei a ia ki te lagi. Ne ofo atu ne ia i konā a te tāua o tena toto maligi, ke ‵togi ki ei ana soko fakamaoni kolā e fakatuanaki ki te tāua o tena taulaga togiola. Ne fakaasi atu ne Ieova te Atua me e talia ne ia te togiola a Keliso mai te ‵tofi aka ke ‵ligi atu ne Iesu a te agaga tapu ki ana soko kolā ne maopoopo i Ielusalema i te aso o te Penitekoso i te 33 T.A.​—Galuega 2:33.

¹⁶ Ne kamata o fakamalosi fakavave atu a soko fakaekegina o Keliso ki olotou taina ke papatiso latou i te igoa o Iesu Keliso ke magalo ei olotou agasala kae ke ‵sao i te kaitaua o te Atua. (Faitau te Galuega 2:38-40.) Mai te vaitaimi tenā ke oko mai nei, ko oti ne maua ne te fia miliona o tino mai atufenua katoa se fesokotakiga mo te Atua telā e fakavae ki te fakatuanaki ki te taulaga togiola a Iesu. (Ioane 6:44) Kafai e mafau‵fau ki te mea tenei, e ‵tau o ‵sili ifo ne tatou a fesili e lua konei: E mata, e maua ne tatou a te fakamoemoega ko te ola se-gata-mai e auala i ‵tou galuega ‵lei? Kafai ko oti ne maua ne tatou a te fakamoemoega gali tenei, e mata, e mafai o toe galo atu i a tatou?

17. E ‵tau o pefea tau kilokiloga ki te fakamanuiaga gali ke fai mo taugasoa o te Atua?

¹⁷ A te togiola se mea telā e se mafai o ‵togi ne tatou. Kae mai te fakatuanaki ki ei, ko fai nei a te fia miliona o tino mo taugasoa o te Atua, fakatasi mo te fakamoemoega ke ola ki te se-gata-mai i te lalolagi palataiso. A ko te fai mo taugasoa o Ieova, e sē se fakamaoniga me ka tumau eiloa tatou i se vaegā fesokotakiga penā mo ia. Ke ‵sao atu i te aso o te kaitaua o te Atua, e ‵tau o tumau tatou i te fakaasi atu o te loto fakafetai mō “te togiola telā ne ‵togi ne Keliso Iesu.”​—Loma 3:24, NW; faitau te Filipi 2:12.

Ke Tumau i te Fakatuanaki ki te Togiola

18. Ne a mea e aofia i te fakatuanaki ki te togiola?

¹⁸ E fakaasi mai i te Ioane 3:36, telā ko te tusi siki fakavae o te mataupu tenei, me i te fakatuanaki ki te Aliki ko Iesu Keliso e aofia i ei a te fakalogo ki a ia. A te loto fakafetai ki te togiola e fai ei ke ola tatou e ‵tusa mo akoakoga a Iesu, e aofia i ei a mea ne akoako ne ia e uiga ki amioga. (Maleko 7:21-23) “E oko atu . . . . te fakasalaga a te Atua” ki tino katoa kolā e fai ne latou a faifaiga e pelā mo te finalalolagi, pati masei, io me e “amio sē ‵tonu,” kolā e mafai o aofia i ei a te onoono faeloa ki ata ma‵sei.​—Efeso 5:3-6.

19. Ne a auala ‵lei e mafai ei ne tatou o fakaasi atu a te ‵tou fakatuanaki ki te togiola?

¹⁹ Ona ko te ‵tou loto fakafetai mō te togiola, e ‵tau o tumau tatou i te “fakatapu o‵tou olaga mō te Atua.” (2 Petelu 3:11) Ke fakaavanoa ne tatou a taimi e uke ke fai a ‵tou ‵talo, sukesukega totino ki te Tusi Tapu, ‵kau atu ki fakatasiga, tapuakiga a kāiga, mo te talai atu o te tala ‵lei o te Malo mo te loto finafinau. Kae ke mo a ma “puli i a koutou o fai te mea ‵lei, kae ke fesoasoani foki te suā tino ki te suā tino, me ko taulaga konei e fiafia ki ei te Atua.”​—Epelu 13:15, 16.

20. Se a te fakamanuiaga i aso mai mua e fakamoe‵moe ke maua ne tino kolā fakatuanaki ki te togiola?

²⁰ Kafai ko oko mai te fakasalaga a Ieova ki te lalolagi masei tenei, ka fia‵fia eiloa tatou me e fakatuanaki tatou ki te togiola kae fakaasi atu foki te ‵tou loto fakafetai ki ei! Kae i te lalolagi fou a te Atua telā ne folafola mai, ka loto fakafetai faeloa tatou mō te fakatokaga gali telā ne fakasao ne ia tatou mai te fakasalaga a te Atua.​—Faitau te Ioane 3:16; Fakaasiga 7:9, 10, 13, 14.

E Tali Mai Koe Pefea?

• Kaia e manakogina ei ne tatou te togiola?

• Se a te ‵togi o te togiola?

• Ne a mea aoga ne maua mai te togiola?

• E fakatuanaki pefea tatou ki te taulaga togiola a Iesu?

[Ata i te itulau e 14]

A te mataloa ki te mauaga o te taliaga mai a Ieova e matala eiloa

[Ata i te itulau e 16]

A te mafaufau ‵loto ki mea ‵tupu kolā ne aofia i ei a Apelaamo, Isaako, mo Iakopo e mafai o fesoasoani mai ke loto fakafetai tatou ki te ‵togi ‵mafa o te togiola