Te Togiola E Faka‵mafa Mai i ei te Fai Mea Tonu o te Atua
MAI tua o te ‵tekeatuga o Atamu mo Eva, ne taku mai ei ne Ieova tena fuafuaga e uiga ki se Fanau telā e ‵tau o fakapakia tena mulivae. (Kenese 3:15) Ne fakataunu te mea tenei i te taimi ne fai ei ne fili o te Atua ke mate a Iesu Keliso i luga i te sataulo. (Kalatia 3:13, 16) Ne seai se agasala a Iesu, me ne fakafua fakavavega mai a ia ne te malosi o te agaga tapu i loto i te moegātama o se tamāfine e seki iloa ne ia tāgata. Telā la, ne mafai o fakaaogā tena toto maligi e pelā me se togiola ke fakasaoloto ei a tino, kolā ne maua ne latou te agasala mo te mate mai i a Atamu.—Loma 5:12, 19.
E seai eiloa se mea e mafai o fakagata ne ia te Atua malosi katoatoa, ko Ieova, mai te fakataunuga o ana fuafuaga. Telā la, mai tua o te taimi ne pakū atu ei te tagata ki te agasala, ne fai eiloa pelā me ko oti ne ‵togi atu te togiola i te kilokiloga a Ieova kae ka isi ne ana faifaiga e fai ki tino kolā e fakatuanaki ki te fakataunuga o ana folafolaga. Ona ko te mea tenei, ne mafai ei ne tama‵liki agasala a Atamu, e pelā mo Enoka, Noa, mo Apelaamo, o sa‵sale fakatasi kae fai taugasoa mo te Atua e aunoa mo te fakalailaiga o Tena tulaga tapu.—Kenese 5:24; 6:9; Iakopo 2:23.
E isi ne tino kolā ne tali‵tonu ki a Ieova ne fai ne latou a agasala matagā. A te Tupu ko Tavita se tino e tokotasi i a latou. E mafai o fesili ifo koe, ‘Ne mafai pefea o tumau a Ieova i te fakamanuia atu ki te Tupu ko Tavita mai tua o tena agasala, ko te mulilua mo Patisepa kae ne fai foki ne ia ke mate te avaga a tou fafine, ko Ulia?’ A te pogai tāua, ko te salamo tonu o Tavita mo tena fakatuanaki. (2 Samuelu 11:1-17; 12:1-14) Ona ko te taulaga a Iesu Keliso i aso mai mua, ne mafai ei o fakamagalo ne te Atua a Tavita kae fakatumau eiloa Tena fai mea tonu mo ana fakamasinoga ‵tonu. (Salamo 32:1, 2) Ke fakamaoni aka te manatu tenei, e fakamatala mai i te Tusi Tapu a te ‵toe mea gali telā ne fakataunu mai i te togiola a Iesu, “ko te mea ke fakaasi mai ei te amiotonu a te Atua, i te mea ne fakapuli ne ia a agasala kolā ko leva” “ke oko [mai eiloa] ki aso nei.”—Loma 3:25, 26.
E tonu, ne ‵tafe mai ei ki tino a mea aogā e uke ona ko te tāua o te toto o Iesu. Ona ko te togiola, ko mafai ei o toe maua ne tino agasala kolā ko sala‵mō tonu se vā fakataugasoa mo te Atua. E se gata i ei, e ‵tala mai ne te togiola te auala ke toe faka‵tu mai a tino ‵mate ki te lalolagi fou a te Atua. E aofia i ei a tavini fakamaoni a te Atua kolā ne ‵mate mai mua o ‵togi atu ne Iesu te togiola mo tino e tokouke kolā ne ‵mate e aunoa mo se iloaga tonu kae seki tapuaki atu ki a Ia. E fai mai te Tusi Tapu: “Me i tino ‵lei mo tino se ‵lei, ka faka‵tu mai katoa mai te mate.” (Galuega 24:15) I te taimi tenā, ona ko te togiola, ka tuku atu ne Ieova ki tino faka‵logo katoa a te ola se-gata-mai. (Ioane 3:36) Ne fakamatala mai a Iesu: “Me ne penā eiloa o alofa mai te Atua ki te lalolagi, ne tuku mai ei ne ia tena Tama e tokotasi, ko te mea ke se malaia so se tino e fakatuanaki ki a ia, kae ke maua ne ia te ola se gata mai.” (Ioane 3:16) Ka ‵tafe atu a mea aogā katoa konei ki tino ona ko te fakatokaga ne te Atua o te taulaga togiola.
Kae ko te ‵toe mea fakaofoofogia e uiga ki te togiola, e se ko mea aogā kolā e maua ne tatou mai i ei. E sili atu te tāua o mea kolā e fai ne te togiola a Keliso mō te igoa o Ieova. E fakamaoni mai i ei me i a Ieova se Atua telā e ‵tonu katoatoa ana fakamasinoga kae telā e mafai o fesokotaki kae fai taugasoa mo tino sē ‵lei katoatoa kae tumau eiloa tena ‵mā mo tena tulaga tapu. Moi ne seki fakatoka ne te Atua ke tuku mai te togiola, penei, e seai eiloa se tamaliki a Atamu, ke oko eiloa ki a Enoka, Noa, mo Apelaamo, ne mafai o sa‵sale fakatasi mo Ieova io me fai mo fai ana taugasoa. Ne iloa ne te faisalamo te mea tenei kae tusi mai: “Kafai ne tusitusi ne koe omotou agasala, ko oi la te tino ka mafai o sao mai te fakasalaga?” (Salamo 130:3) Ko se faka‵tau eiloa te lasi o te ‵tou loto fakafetai ki a Ieova mō te ugamaiga o tena Tama fagasele e tokotasi ki te lalolagi, kae penā foki loa ki a Iesu ona ko tena loto fiafia o tuku atu tena ola e pelā me se togiola mō tatou!—Maleko 10:45.