E Mata, e Manako te Atua ke Fakaasi ‵Tonu Atu a Agasala?

A te fakaasi ‵tonu atu o agasala ki te taliga o se faifeau io me se tavini koi fai nei eiloa e pelā me se vaega o faifaiga mo tapuakiga fakalotu a lotu e uke. Kae i se lalolagi telā e talia ne ia a faiga katoa konei, e mata, koi fakatāua io me koi aoga eiloa a te fakaasi ‵tonu atu o agasala?

E KESE‵KESE eiloa a lagonaga o tino ki te mataupu tenei. E pelā me se fakaakoakoga, ne lipoti mai ne te National Post o Kanata me ne fai atu se tino e tokotasi me e tiga eiloa e faigata ke fakaasi atu tau mea ‵se ne fai ki se tino, “e maua eiloa se lagonaga gali māfai ko iloa ne se tino, e ‵talo fakatasi mo koe kae fakaasi atu a mea e ‵tau o fai ne koe.” I te suā feitu, ne siki mai i te tusi ko te Bless Me, Father, for I Have Sinned a pati ne fai ne se tagata: “A te fakaasi ‵tonu atu o agasala ko te ‵toe vaega masei eiloa o te Lotu. E fai ne ia a tino ke manava‵se malosi. Kae ne a pati a te Tusi Tapu e uiga ki te mataupu tenei?

Pati a te Tusi Tapu

Mai i te Tulafono telā ne tuku atu ne te Atua ki te fenua o Isalaelu, e maua ne tatou i ei a fakatonuga ma‵nino e uiga ki mea e ‵tau o fai ne tatou māfai ne agasala se tino. E pelā me se fakaakoakoga, kafai ne agasala se tino ki sena taina io me ofa ne ia se tulafono a te Atua, ne ‵tau o fakaasi ‵tonu atu ne ia ki se faitaulaga mai te matakāiga o Levi, telā e fai ne ia te faka‵maga mō ia mai te ofoatuga o se taulaga ki te Atua ke fakamagalo ei tena agasala.​—Levitiko 5:1-6.

I senitenali mai tua ifo, i te taimi ne polopoloki ei ne te pelofeta ko Natano a te tupu ko Tavita ona ko tena agasala, ne saga atu pefea a Tavita ki ei? Ne tali fakavave atu a ia, penei: “Au ko agasala ki [a Ieova].” (2 Samuelu 12:13) Ne ‵talo fakamolemole atu foki a ia ki te Atua, ke talia mai a ia. Se a te ikuga? Ne tusi fakamuli mai a Tavita: “Telā ne fakaasi atu ei ne au ki a koe aku agasala; e seki ‵funa foki ne au i ou mua aku amioga ma‵sei. Au ne mafaufau ke fakaasi atu aku agasala ki a koe; kae ne fakamagalo eiloa ne koe.”​—Salamo 32:5; 51:1-4.

A te fakaasi ‵tonu atu o agasala se fakatonuga a te Atua ki te fakapotopotoga Kelisiano i te senitenali muamua i ‵tou Aso Nei. Ne fakamalosi atu a te āfa taina o Iesu, ko Iakopo, se tokotasi telā ne aofia i tagata kolā ne takitaki ne latou a te fakapotopotoga i Ielusalema, ki taina Kelisiano, penei: “Tela la, ke fakatau fakaasi otou agasala, kae ‵talo foki te suā tino mō te suā tino, ko te mea ke ma‵losi koutou mai otou ma‵saki.” (Iakopo 5:16) Kae se a te mea e ‵tau o fakaasi ‵tonu atu ne Kelisiano, kae ki a ai?

Se a te Mea ne ‵Tau o Fakaasi ‵Tonu Atu?

I aso katoa, e masani eiloa o gasue‵sue tatou tino sē ‵lei katoatoa, e aunoa mo te mafaufau io me e fakaaoga ‵se a ‵tou gutu kae agasala ei tatou i te suā tino ki te suā tino. (Loma 3:23) E mata, e fakauiga i ei me e ‵tau o fakaasi ‵tonu atu a vaegā mea ‵se katoa penā ki se tino pule?

E tiga eiloa e se ‵lei te kilokiloga a te Atua ki agasala katoa, e saga mai a ia mo te atafai ki ‵tou vāivāiga ona ko ‵tou tulaga sē ‵lei katoatoa. E tonu, ne fai mai te faisalamo, penei: “Kafai ne tusitusi ne koe omotou agasala, ko oi la te tino ka mafai o sao mai te fakasalaga? Ka ko matou e fakamagalo faeloa ne koe, tenā te mea e ‵tau ei mo matou o ma‵taku atu ki a koe.” (Salamo 130:3, 4) Tela la, ne a mea e ‵tau o fai ne tatou māfai ko ‵se kae agasala tatou ki nisi tino, kāti i se auala e seki fakamoemoegina? Ke masaua a te fakamolemole telā ne aofia i te ‵talo fakaakoako telā ne akoako atu ne Iesu ki ana soko: “Kae fakamagalo mai ki omotou agasala, e pelā foki mo matou e fakamagalo atu ki tino kolā e ‵se mai ki a matou.” (Luka 11:4) Ao, ka fakamagalo ne te Atua a tatou māfai e olo atu tatou ki a ia kae fakamolemole atu ki ei i te igoa o Iesu.​—Ioane 14:13, 14.

Mafaufau me ne aofia ne Iesu a te tulaga ke fakamagalo ne tatou a “tino kolā e ‵se mai ki a matou.” Ne fakamasaua atu a te apositolo ko Paulo ki ana taina tali‵tonu: “E ‵tau mo koutou o fakatau a‵lofa kae fakatau atafai; ke fakatau fakamagalo foki koutou, e pelā eiloa mo te Atua ko oti ne fakamagalo ne ia koutou i a Keliso.” (Efeso 4:32) Kafai e fakamagalo ne tatou a mea ‵se a nisi tino, ka fakamoe‵moe foki eiloa tatou ke fakamagalo tatou ne te Atua.

Kae e a, a vaegā agasala matagā e pelā mo te kaisoa, te loi, amioga fakatauavaga sē ‵tau, te konā mo nisi mea aka? So se tino telā e fai ne ia se vaegā agasala penā ko ofa ne ia a tulafono a te Atua, tela la, ko agasala a ia ki te Atua. Ne a mea e ‵tau o fai?

Ko oi e ‵Tau o Fakaasi ‵Tonu Atu ki ei a Agasala?

E se talia ne te Atua ke fakamagalo ne tagata a tino kolā e agasala atu ki a ia; ko ia fua tokotasi e fai ne ia te mea tenā. E fakaasi manino mai te Tusi Tapu ki a tatou, penei: “Kae kafai e takutonu atu o‵tou agasala ki te Atua, e fakamaoni a ia mo te amiotonu o fakamagalo ne ia o‵tou agasala, kae faka‵ma foki ne ia tatou mai i o‵tou mea ‵se katoa.” (1 Ioane 1:9) Kae, ko oi la e ‵tau o fakaasi atu ki ei a agasala konā?

Ona la ko te mea e fakamagalo fua tatou ne te Atua, e ‵tau o fakaasi ‵tonu atu ki a ia a ‵tou agasala. Tenā eiloa te mea ne fai ne Tavita, e pelā mo te mea ne iloa ne tatou. Kae se a te mea e fakavae ki ei a te fakamagaloga tenā? E fai mai te Tusi Tapu: “Tela la, ke na sala‵mo koutou ki otou agasala, kae ‵fuli atu ki te Atua, ko te mea ke fakamagalo otou agasala.” (Galuega 3:19) E tonu, e se fakalagolago fua a te taliaga o te tino fai mea ‵se ki te iloa atu o te mea ‵se mo te fakaasi ‵tonu atu o te agasala kae ko te toka foki o fakagata a te amioga masei tenā. E tai faigata eiloa a te auala tenei. Kae e isi eiloa se fesoasoani.

Mafaufau la ki pati a te soko ko Iakopo kolā ne fakaasi mai muamua: “Tela la, ke fakatau fakaasi otou agasala, kae ‵talo foki te suā tino mō te suā tino, ko te mea ke ma‵losi koutou mai otou ma‵saki.” Kae ne toe fakaopoopo atu a Iakopo: “A te ‵talo a te tino amiotonu e lasi tona ‵mana.” (Iakopo 5:16) A te “tino amiotonu” e fai pelā me se tokotasi o “toeaina o te ekalesia” telā ne fakaasi mai ne Iakopo i te fuaiupu e 14. I te fakapotopotoga Kelisiano, e isi ne “toeaina” faka-te-agaga, kolā ne ‵tofi aka ke fesoasoani atu ki tino kolā e ma‵nako ki te fakamagaloga a te Atua. E seai eiloa se “toeaina” e mafai o fakamagalo ne ia a agasala, me e se mafai eiloa ne se tagata pule o fakamagalo se tino telā e ‵se ki te Atua.a Kae e fetaui ‵lei latou i te feitu faka-te-agaga ke polopoloki kae faka‵tonu aka a te agasala a te tino, mai te fesoasoani atu ke lavea ne ia te matagā o tena agasala mo te manakoga ke salamō tonu.​—Kalatia 6:1.

Kaia e ‵Tau o Fakaasi ‵Tonu a Agasala a se Tino?

Faitalia me e matagā te agasala io me ikai, ko oti ne fakamasei ne te tino tenā a tena fesokotakiga mo tena taina e penā foki mo te Atua. Tela la, e mafai eiloa o manavase a ia ki ei. A te lagonaga tenei ko te ikuga o te ‵tou loto lagona telā ne tuku mai ne te Atua. (Loma 2:14, 15) Se a te mea e mafai o fai?

Kafai e toe onoono tatou ki te tusi a Iakopo, e maua ne tatou a pati fakamalosi konei: “Kafai e isi se tino o koutou e masaki, e ‵tau mo ia o fai atu ki toeaina o te ekalesia ke ‵talo mō ia, kae ‵mili te sinu ki luga i a ia i te igoa o te Aliki. A te ‵talo tenei, se ‵talo e fai i te fakatuanaki, kae ka fakaola ne ia te tino masaki: ka toe fakafoki atu ne te Aliki te malosi ki a ia, ka ko ana agasala ne fai ka fakamagalogina.”​—Iakopo 5:14, 15.

E se gata i ei, ne ‵tofi aka a toeaina ke tausi atu ki manakoga o te lafu. E pefea la? E se ko te fakalogologo atu fua ki se tino telā e fakaasi ‵tonu mai ne ia a tena agasala. I lō te fai penā, ona ko te mea e aofia i ei se masaki faka-te-agaga, e ‵tau o fai se mea ki ei ko te mea ke “fakaola ne ia te tino masaki.” E lua a mea kolā ne fakaasi mai ne Iakopo me e mafai o fai.

A te mea muamua, ke “‵mili te sinu ki luga i a ia.” E fakasino atu te mea tenei ki te Muna a te Atua telā e ‵mana. Ne fakamatala mai ne te apositolo ko Paulo “me i te muna a te Atua e ola kae galue mo te ‵mana. . .  E fakamasino foki ne ia a manako mo mafaufauga o loto o tino.” (Epelu 4:12) Mai te fakaaogaga o te Tusi Tapu mo te atamai, e mafai o fesoasoani atu a toeaina ki te tino masaki faka-te-agaga ke lavea ne ia te māfuaga o te fakalavelave mo mea e ‵tau o fai ke faka‵tonu aka ei a mea konā i mua o te Atua.

Kae e isi foki “se ‵talo e fai i te fakatuanaki.” E tiga eiloa ka se ‵fuli ne ‵talo a toeaina a te fakamasinoga a te Atua, e tāua ‵ki eiloa a ‵talo konei ki te Atua, telā e loto finafinau ke fakamagalo ne ia se agasala telā e fakavae ki te togiola a Keliso. (1 Ioane 2:2) E toka eiloa a Ieova o fesoasoani ki so se tino agasala telā e salamō tonu kae fai ne ia a “faiga kolā e fakaasi mai me ko oti ne sala‵mo latou.”​—Galuega 26:20.

A te ‵toe pogai tāua ke fakaasi ‵tonu atu a te agasala​—telā ne fai ne koe ki se tino io me ki te Atua—⁠ko te mauaga o te tulaga ‵lei i mua o te Atua. Ne fakaasi mai ne Iesu Keliso me e ‵tau o faka‵lei muamua tatou mo ‵tou taina kae ke maua foki se va filemu mo latou a koi tuai o tapuaki atu tatou ki te Atua mo se loto lagona ‵lei. (Mataio 5:23, 24) E fai mai te Faataoto 28:13, penei: “E se mafai koe o manuia i te olaga nei manafai e taumafai faeloa koe o ‵funa au agasala. Fakaasi au agasala, kae sa toe fai, kae ka alofa atu te Atua ki a koe.” Kafai e loto maulalo tatou i mua o Ieova te Atua kae akai atu ki a ia mō se fakamagaloga, ka maua ne tatou tena taliaga kae siki aka ne ia tatou ki luga i te taimi tonu.​—1 Petelu 5:6.

[Fakamatalaga fakaopoopo]

[Ata i te itulau e 20]

Ka fakapuli ne te Atua ‵tou vāivāiga kae fakamagalo ne ia tatou māfai e olo atu tatou ki a ia kae fakamolemole atu mō se fakamagaloga i te igoa o Iesu

[Ata i te itulau e 21]

A te ‵toe pogai tāua e ‵tau ei o fakaasi ‵tonu atu se agasala ko te mauaga o te tulaga ‵lei i mua o te Atua