E Fesili Mai ‵Tou Kau Fai‵tau . . .

E mata, ka maua ne tino katoa a te avanoaga ke iloa kae a‵lofa ki te Atua?

▪ I te taimi ne fesili atu ei me se a te ‵toe tulafono tafasili i te tāua, ne fai atu a Iesu, penei: “E ‵tau mo koe o alofa ki te Aliki tou Atua mo tou loto kātoa, mo tou agaga kātoa, mo tou mafaufau kātoa.” (Mataio 22:37) Kae koi tuai o a‵lofa a tino ki te Atua, e ‵tau o iloa ‵lei ne latou a ia. (Ioane 17:3) E mata, e ‵pau a te avanoaga mō tino katoa ke mafai o maua a te poto tenei?

A te fakavae tāua o te poto e uiga ki te Atua ko te Tusi Tapu. (2 Timoteo 3:16) E ‵nofo atu a tino e tokouke i koga kolā e isi se Tusi Tapu i ei. Kāti ne maua faeloa ne tino konā se ‵kamiga ke ‵sala atu ki te poto e uiga ki te Atua e auala i se akoga faka-te-Tusi Tapu. (Mataio 28:19) Ne puti aka a nisi tama‵liki ne olotou mātua Kelisiano, kolā e tuku atu ne latou a te avanoaga i aso katoa ki a latou ke tauloto e uiga ki te Atua.​—Teutelonome 6:6, 7; Efeso 6:4.

Kae ko nisi tino e ola mai lalo i fakanofonofoga kolā e se ‵lei malosi. E o‵mai a nisi tino mai kāiga kolā e se fakaasi atu i ei ne mātua a te alofa atafai ki olotou tama‵liki. (2 Timoteo 3:1-5) E mafai o faigata ki tino penei ke ‵kilo atu ki te Atua e pelā me se Tamana faka-te-lagi alofa. E tokouke a tino e se lava olotou akoakoga, telā ko fakafaigata ei te lotou fai‵tau ki te Tusi Tapu. E se gata i ei, e tokouke a tino ne faka‵kivi olotou mafaufau ne akoakoga ‵se fakalotu, io me e ‵nofo atu latou i kāiga, fa‵kai, io me ko fenua kolā e se talia i ei a te akoakoga o te munatonu i te Tusi Tapu. (2 Kolinito 4:4) E mata, e fai ne fakanofonofoga o tino konā ke se maua ne latou a te avanoaga ke tauloto e uiga ki te Atua kae kamata o a‵lofa atu ki a ia?

Ne iloa ne Iesu me ka faigata o a‵lofa kae faka‵logo a tino ki te Atua ona ko mea faiga‵ta e fe‵paki mo latou. (Mataio 19:23, 24) Kae ne fakamasaua atu ne Iesu ki ana soko me faitalia te faiga‵ta o nisi fakalavelave ki tino, “kae e mafai ne te Atua o fai a mea katoa.”​—Mataio 19:25, 26.

Mafaufau ki manatu ‵tonu konei: Ne fakatalitonu mai ne Ieova te Atua, me i tena Muna ko te Tusi Tapu, ko te ‵toe tusi lauiloa telā ko oti ne tufa atu i te taimi nei. Ne ‵valo mai i te Tusi Tapu me ka talai atu a te tala ‵lei tenei e uiga ki te Atua mo tena fuafuaga mō te lalolagi ki “te lalolagi kātoa.” (Mataio 24:14) I aso nei, e talai atu ne Molimau a Ieova a te tala ‵lei tenā i fenua e sili atu i te 230 kae ‵lomi ne latou a tusi faka-te-Tusi Tapu i ‵gana e 500. Kae koi mafai foki eiloa o maua ne tino kolā e se mafai o fai‵tau ki te Tusi Tapu a te avanoaga ke tauloto malosi ki mea e uiga ki te Atua tonu mai te onoono atu ki ana mea ne faite.​—Loma 1:20.

E se gata i ei, e fai mai a te Muna a te Atua, penei: “E iloa ne ia a ‵tou mafaufauga mo ‵tou manakoga katoa. Kafai e tautali koe i a ia, kae ka talia ne ia a koe.” (1 Nofoaiga Tupu 28:9) Tela la, faitalia eiloa me ne seki tauto mai a Ieova me ka ‵pau a te avanoaga mō tino katoa, e fakamautinoa aka ne ia me e tuku atu se avanoaga ki tino loto fakamaoni katoa. Kae ka tuku atu foki ne ia se avanoaga ki tino kolā ne seki maua se avanoaga ke tauloto e uiga ki a ia, e auala i te toetuga ki te ola i te lalolagi fou kae amiotonu.​—Galuega 24:15.