Ke ‵Sala Atu Mo Te Loto Finafinau Ki Fakamanuiaga A Ieova

“Kae tuku atu foki ne [te Atua] te taui ‵lei ki tino kolā e salasala ki a ia.”​—EPELU 11:6.

1, 2. (a) E maua pefea ne tino e tokouke a fakamanuiaga mai te Atua? (e) Kaia e ‵tau mo tatou o fia‵fia ke maua a fakamanuiaga a Ieova?

“KE FAKAMANUIA koe ne te Atua!” I nisi fenua, e sē se mea masani ke lagona ne koe se tino fakaa‵tea e fai ne ia te pati tenei māfai ko mafatua se tino. E fakamanuia sāle ne faifeau o lotu e uke a tino, manu, mo mea ‵mate. E mafai o faima‵laga atu a tino ki koga kolā e lauiloa i ei a mea tau lotu ona ko te fakamoemoega ke maua ne latou se fakamanuiaga. E akai atu faeloa a tino e aofia i mea fakapolitiki ki te Atua ke fakamanuia mai a te lotou fenua. E mata, e ‵lei a te vaegā akai tenā mō se fakamanuiaga? E mata, e magoi? Ko oi eiloa a tino e maua ne latou a fakamanuiaga a te Atua, kae kaia?

² Ne ‵valo mai a Ieova me i aso fakaoti, ka aumai ne ia a tino ‵ma kae filemu mai fenua katoa, kolā ka talai atu ne latou a te tala ‵lei o te Malo ke oko eiloa ki te gataga o te lalolagi faitalia a takalialiaga mo ‵tekemaiga. (Isaia 2:2-4; Mataio 24:14; Fakaasiga 7:9, 14) A tino kolā ne talia ne latou a te tiute ke fai mo vaega o tino konei e ma‵nako ki te fakamanuiaga a te Atua, me e se mafai o manumalo latou e aunoa mo se fakamanuiaga mai te Atua. (Salamo 127:1) Kae e maua pefea ne tatou a te fakamanuiaga a te Atua?

Fakamanuiaga e Maua ne Tino Faka‵logo

3. Moi ne faka‵logo a te kau Isalaelu, se a te mea e mafai o iku mai i ei?

³ Faitau te Faataoto 10:6, 7. A koi tuai o ulu atu a tino Isalaelu ki te Fenua o te Folafolaga, ne fakaasi atu ne Ieova a te fakamanuiaga gali tenā kae e mafai o maua ne latou a te puipuiga māfai e faka‵logo latou ki tena leo. (Teutelonome 28:1, 2) Ka fakamanuia malosi eiloa ne Ieova ana tino. Mō tino faka‵logo, ka maua eiloa ne latou a te fakamanuiaga.

4. Ne a mea e aofia i te fakalogo tonu?

⁴ Se a te kilokiloga e ‵tau o maua ne tino Isalaelu ke faka‵logo latou ki ei? Ne fai mai a te Tulafono a te Atua me e mafai o fanoanoa a ia māfai e se tavini atu ana tino ki a ia “mo te loto fia‵fia.” (Faitau te Teutelonome 28:45-47.) E se manako a Ieova ki te fakalogo telā e faimalō atu ki a ia, telā e fai sāle ki manu mo temoni. (Maleko 1:27; Iakopo 3:3) A te fakalogo mo te fakamaoni ki te Atua se fakaasiga o te alofa. Ne fakailoga o te fiafia telā e māfua mai i te fakatuanaki me i fakatonuga a Ieova e se ‵mafa kae e “tuku atu foki ne ia te taui ‵lei ki tino kolā e salasala ki a ia.”​—Epelu 11:6; 1 Ioane 5:3.

5. Ne fesoasoani atu pefea a te talitonu ki folafolaga a Ieova ke fakalogo ei se tino ki te tulafono i te Teutelonome 15:7, 8?

⁵ Mafaufau ki te auala ka fakaasi mai ei a te vaegā fakalogo tenā māfai ko tautali ki te tulafono i te Teutelonome 15:7, 8. (Faitau.) A te tautali atu fua i te tulafono tenā e mafai o fai e pelā me se fakatapūga ki tino ma‵tiva, kae e mata, e fakamalosi aka ei a fesokotakiga ‵lei mo te alofa i va o tino o te Atua? A ko te ‵toe mea tāua, e mata, e fai a te mea tenei e pelā me se fakaasiga o te fakatuanaki me e mafai ne Ieova o tuku mai a mea mō ana tavini kae loto fakafetai mō te avanoaga ke fakaakoako atu ki tena kaimalie? E tai faigata eiloa! E lavea ne te Atua a te tulaga o te loto o te tino kaimalie tonu kae ne tauto mai a ia me ka fakamanuia ne ia ana galuega katoa. (Teutelonome 15:10) A te fakatuanaki ki te folafolaga tenā e fai ei ke gasue‵sue tatou kae ka iku atu ki fakamanuiaga e uke.​—Faataoto 28:20.

6. Se a te mea e ‵tau o fakatalitonu mai ki a tatou i te Epelu 11:6?

⁶ I tafa o te fakatuanaki ki a Ieova e pelā me ko te Tino telā e tuku mai ne ia te taui, e faka‵mafa mai i te Epelu 11:6 a te suā uiga telā e manakogina ke maua ei a te fakamanuiaga a te Atua. Ke masaua me e taui atu ne Ieova a latou kolā e “salasala ki a ia.” A te pati tonu telā ne fakaaoga i konei e aofia i ei a te taumafai malosi mo te saga tonu atu. E ‵tau eiloa o fakatalitonu mai ki a tatou a te fakataunuga o te fakamanuiaga tenei! E māfua mai eiloa i te Atua tonu e tokotasi, “telā e se mafai o loi.” (Tito 1:2) Ko oti ne fakaasi mai ne ia i te fia afe o tausaga ko ‵teka me e ‵tonu eiloa ana folafolaga. E se mafai eiloa o sē taunu ana pati; e fakataunu faeloa. (Isaia 55:11) Tela la, e tali‵tonu eiloa tatou me kafai e fakaasi atu ne tatou a te fakatuanaki tonu, ka fakamaoni mai ei me i a ia ko te Tino telā e tuku mai ne ia a te taui.

7. E mafai pefea o maua ne tatou a fakamanuiaga e auala i te “fanau” a Apelaamo?

⁷ Ne fakamaoni aka me i a Iesu Keliso ko te vaega tāua o “te fanau” a Apelaamo. Ne fai a Kelisiano fakaekegina mo fai te lua o vaega o te “fanau” telā ne folafola mai. Ne fakatonu atu ki a latou ke “folafola atu a galuega fakaofoofogina a te Atua, telā ne kalagagina ne ia a [latou] mai i te pouliga ki tona mainaga fakaofoofogina.” (Kalatia 3:7-9, 14, 16, 26-29; 1 Petelu 2:9) E se mafai o fakamoe‵moe ke maua ne tatou se fesokotakiga ‵lei mo Ieova māfai e se ‵saga atu tatou ki a latou kolā ne filifili ne Iesu ke tausi atu ki ana mea. E aunoa mo te fesoasoani o te “tavini fakamaoni kae poto,” e se mafai eiloa o maina katoatoa tatou i mea e fai‵tau ne tatou i te Muna a te Atua io me ko te auala e fakagalue aka ei a mea konā. (Mataio 24:45-47) Kafai e fakagalue aka ne tatou a mea e tauloto ne tatou mai te Tusi Tapu, e maua eiloa ne tatou a fakamanuiaga a te Atua.

Ke ‵Saga Tonu Atu ki te Loto o te Atua

8, 9. Ne a taumafaiga ne fai ne te toeaina mua ko Iakopo kolā e fetaui ‵tonu mo tena fakamolemole?

⁸ A te manatu e uiga ki te taumafai malosi ke maua a fakamanuiaga a te Atua e fakamasaua mai ki a tatou e uiga ki te toeaina mua ko Iakopo. E se iloa ne ia me e fakataunu pefea a te folafolaga a te Atua ki a Apelaamo, kae ne talitonu a ia me ka fakatokouke ne Ieova a tama‵liki a tena tupuna, telā ka fai pelā me se fenua lasi. Tela la, i te 1781 T.L.M., ne faimalaga a Iakopo o ‵sala sena avaga i Halana. Ne seki manako fua ke ‵sala ne ia se fafine telā e ‵lei; kae ne ‵sala atu a ia ki se tino tapuaki a Ieova kae matua faka-te-agaga telā e mafai o fai e pelā me se mātua ‵lei ki ana tama‵liki.

⁹ E iloa ne tatou me ne fetaui a Iakopo mo tena kāiga ko Lasela. Ne fiafai a ia ki a Lasela kae ne talia ne ia ke galue a ia mō te tamana o Lasela, ko Lapana, mō se fitu tausaga ko te mea ke mafai o avaga a ia ki a Lasela. A te mea tenei e sē se tala fakafamau. Ne iloa ‵lei ne Iakopo a te folafolaga a te Atua Malosi telā ne fai ki tena tupuna ko Apelaamo kae ne toe fai atu foki ki tena tamana, ko Isaako. (Kenese 18:18; 22:17, 18; 26:3-5, 24, 25) Kae ne fai atu a Isaako ki tena tama ko Iakopo: “Ke fakamanuia ne te Atua Malosi tou kāiga, kae tuku atu ne fanau e tokouke. Ke fai koe mo tamana o malo e uke! Ke fakamanuia ne te Atua a koe mo tou gafa e pelā mo te fakamanuiaga ne ia a Apelaamo, kae ke fai foki mō koe a te fenua tenei ne nofo koe i ei, te fenua telā ne tuku ne te Atua ki a Apelaamo.” (Kenese 28:3, 4) Tela la a taumafaiga ne fai ne Iakopo ke maua se avaga telā e fetaui ‵lei kae tausi atu ki tena kāiga ne fakaasi atu i ei a tena talitonu ki pati a Ieova.

10. Kaia ne fiafia ei a Ieova o fakamanuia a Iakopo?

¹⁰ Ne seki ‵sala atu a Iakopo ki koloa ke tausi ei tenā kāiga. Ne tuku tena mafaufau ki te folafolaga a Ieova e uiga ki ana tama‵liki. Ne saga atu a ia ki te fakataunuga o te loto o Ieova. Ne fakaiku aka ne Iakopo ke fai so se mea i tena malosi eiloa ke maua ei te fakamanuiaga a te Atua faitalia a mea faiga‵ta. Ne fakatumau ne ia a te kilokiloga tenā ke oko eiloa ki te taimi ko matua ei a ia, kae ne fakamanuia a ia ne Ieova ona ko te mea tenā.​—Faitau te Kenese 32:24-29.

11. Ne a taumafaiga e ‵tau o fai ne tatou e ‵tusa mo te loto o te Atua?

¹¹ E pelā mo Iakopo, e se iloa ne tatou a fakamatalaga katoa e uiga ki te fakataunuga o te fuafuaga a Ieova. Kae mai te sukesuke ki te Muna a te Atua, ko malamalama ei tatou i mea kolā ka ‵tupu i te “aso o Ieova.” (2 Petelu 3:10, 17, NW) E pelā me se fakaakoakoga, e se iloa tonu ne tatou a te aso ka oko mai ei, kae ko iloa ne tatou me ko pili mai. E tali‵tonu tatou ki te Muna a te Atua telā e fai mai me kafai e tuku atu ne tatou se molimau i te taimi toetoe tenei, ka faka‵sao eiloa ne tatou a ‵tou ola fakatasi mo latou kolā e faka‵logo mai ki a tatou.​—1 Timoteo 4:16.

12. Se a te mea e ‵tau o mautinoa i a tatou?

¹² E iloa ne tatou me e mafai o oko mai a te gataga i so se taimi; E se faka‵tali a Ieova ki te taimi e oko atu ei a te talaiga ki tino taki tokotasi i te lalolagi. (Mataio 10:23) E se gata i ei, e maua ne tatou a fakatakitakiga ‵lei ki te auala e fai ei ke magoi a te galuega talai. Ona ko te fakatuanaki, e fai ne tatou a te galuega tenei ki te ‵toe mea ‵lei e mafai o fai ne tatou, mai te fakaaogaga o so se kope. E mata, ka talai atu faeloa tatou i toe koga talai ma‵goi? Kafai e penā loa, e mafai pefea o iloa muamua ne tatou? (Faitau te Failauga 11:5, 6.) A te ‵tou galuega ko te talai atu, kae ke tali‵tonu me ka tuku mai ne Ieova a te fakamanuiaga ki a tatou. (1 Kolinito 3:6, 7) E mautinoa eiloa me e lavea ne ia a te ‵tou taumafai malosi, kae e auala i tena agaga tapu, ka tuku mai ne ia so se fakatakitakiga aoga e ma‵nako tatou ki ei.​—Salamo 32:8.

‵Sala Atu ki te Agaga Tapu

13, 14. Ne fakaasi mai pefea a te lasi o te fesoasoani o te agaga tapu o te Atua ki ana tavini?

¹³ Kae e a māfai e se mafai ne tatou o fakataunu se galuega io me aofia i te galuega talai? E ‵tau o fakamolemole atu tatou ki a Ieova ke tuku mai tena agaga tapu ke momea aka te ‵lei o mea e fai ne tatou i te galuega talai. (Faitau te Luka 11:13.) E mafai o filifili ne te agaga o te Atua a tino mō se galuega io me se tauliaga faitalia olotou fakanofonofoga io me ko olotou tulaga mua. E pelā me se fakaakoakoga, mai tua eiloa o te Faka‵saoga mai Aikupito, ne fesoasoani atu a te agaga o te Atua ke fakatakavale ne tausi mamoe mo pologa a olotou fili i te taua faitalia me e se iloa ne latou o taua atu. (Esoto 17:8-13) Mai tua malie ifo, ne fesoasoani atu a te agaga tenā ke fai ne Pesaleli mo Oliapo a te fakatokaga gali mai te Atua e uiga ki te ‵lomiga o te ata o te faleie.​—Esoto 31:2-6; 35:30-35.

¹⁴ E fesoasoani mai a te agaga ‵mana tenā ki tavini a te Atua i aso nei ke tausi atu ki manakoga o te fakapotopotoga i te taimi ne kamata ei o faka‵tu aka a olotou masini ‵lomi tusi. I se tusi, ne fakamatala mai ne te ovasia o te fale ‵lomi tusi, ko te taina ko R. J. Martin, a te mea telā ne fakataunu i te 1927. “Ne ‵tala ne te Aliki a te mataloa i te taimi tonu; kae ne maua ne matou se masini ‵lomi tusi, telā e se iloa ne matou o fakaaoga io me fakagalue aka. Kae e iloa ne te Aliki a te auala e fakavave ei a mafaufau o tino kolā e tuku atu olotou mea katoa ki a ia. . . . I ne nāi vaiaso mai tua ifo, ne mafai o fakagalue faka‵lei ne matou a te masini tenā; kae koi galue eiloa, e fai ne ia a galuega kolā e se fakamoemoegina.” Koi fakamanuia eiloa ne Ieova a taumafaiga e uke penā ke oko mai eiloa ki aso nei.

15. E fakamalosi atu pefea a te Loma 8:11 ki tino kolā e fepaki mo tofotofoga?

¹⁵ E uke a auala e galue i ei a te agaga o Ieova. E avanoa eiloa a te agaga tenā ki tavini a te Atua, kae fesoasoani atu ke manumalo latou i mea faiga‵ta. Ka e a māfai e fakavāi‵vai tatou ne tofotofoga? E mafai o maua ne tatou a te malosi mai pati a Paulo i te Loma 7:21, 25 mo te 8:11. E tonu, a “te agaga o te Atua, telā ne fakatu ne ia a Iesu mai te mate” e mafai o galue mō tatou, kae fakamalosi mai ke manumalo tatou i te taua atu ki manakoga faka-te-foitino. A te fuaiupu tenā ne tusi atu ki Kelisiano fakaekegina, kae e aofia katoa ei a tavini a te Atua i te fakatakitakiga tenā. E maua katoa ne tatou a te ola mai te fakaasi atu te ‵tou fakatuanaki ki a Keliso, kae taumafai o fakagata a manakoga sē ‵lei, kae ke ola e ‵tusa mo te takitakiga a te agaga tenā.

16. Ne a mea e ‵tau o fai ne tatou ke maua ei te agaga tapu o te Atua?

¹⁶ E mata, e fakamoe‵moe tatou ke tuku mai ne te Atua tena malosi galue e aunoa mo ne taumafaiga e fai ne tatou? Ikai. I tafa o te ‵talo atu, e ‵tau o sukesuke faka‵lei tatou ki te Muna fakaosofia a te Atua. (Faataoto 2:1-6) E se gata i ei, a te agaga o te Atua e i luga i te fakapotopotoga Kelisiano. A te ‵kau atu faeloa o tatou ki fakatasiga e fakaasi atu ei a te ‵tou manakoga ke “faka‵logo la ki muna e fai atu ne te agaga ki te ekalesia!” (Fakaasiga 3:6) E se gata i ei, e ‵tau o ‵saga atu tatou mo te loto maulalo ki mea e tauloto ne tatou. E polopoloki mai a te Faataoto 1:23 ki a tatou, penei: “‵Fuli mai ki aku polopolokiga. Kiloke, ka ‵ligi atu ne ia a toku agaga ki a koutou.” E tonu, e tuku mai ne te Atua a tena agaga “ki a latou kolā e faka‵logo ki a ia.”​—Galuega 5:32.

17. E fakatusa ne tatou ki te a, a fakamanuiaga a te Atua ona ko ‵tou taumafaiga?

¹⁷ E tiga eiloa e manakogina a taumafaiga e uke ke maua i ei a te fakamanuiaga a te Atua, ke masaua me i te galue malosi e se taitai eiloa o faka‵pau ki te uke o mea ‵lei kolā ne ‵ligi mai ne Ieova ki luga i ana tino. A fakamanuiaga kolā e maua mai i ‵tou taumafaiga e mafai o fakatusa ki te auala e aoga ei a mea‵kai ki ‵tou foitino. Ne faite ne te Atua a ‵tou foitino i se auala telā e fai ei ke fia‵fia tatou ki meakai kae ke maua ne tatou a mea aoga mai i ei. E tuku mai foki ne ia a meakai. E se iloa katoatoa ne tatou a te auala e maua ei a niutilisini i ‵tou meakai, io me fakamatala ne tatou a te auala e maua ei ne tatou a te malosi mai meakai e kai ne tatou. E iloa ne tatou me e galue eiloa a te mea tenā kae e ‵saga atu fua tatou ki ei mai te ‵kai. Kafai e filifili tatou ke ‵kai ki meakai ‵gali, e mafai eiloa o iku atu ki te ‵lei. I se auala tai ‵pau, ko oti ne fakatoka ne Ieova a fakatakitakiga mō te ola se-gata-mai, kae e tuku mai ne ia a te fesoasoani e manakogina ke fakafetaui aka mo fakatakitakiga konā. E manino lei, me e fesoasoani malosi mai a ia kae e ‵tau o maua ne ia a te vikiga. Kae e ‵tau o ‵kau fakatasi tatou mo ia, gasue‵sue e ‵tusa mo te loto o te Atua, ke maua ei ne tatou a te fakamanuiaga.​—Hakai 2:18, 19.

18. Se a te mea e fakaiku aka ne koe, kae kaia?

¹⁸ Tela la, ke tuku katoatoa atu tou loto o fakataunu tau galuega. Ke kilo atu faeloa ki a Ieova telā e maua mai i ei a te manuia. (Maleko 11:23, 24) Kafai e fai koe penā, ke na fakatalitonu atu me i a “ia telā e salasala atu, e maua ne ia.” (Mataio 7:8) Ke maua eiloa ne tino fakaekegina ki te agaga a “te foualiki o te ola” e pelā me se fakamanuiaga i te lagi. (Iakopo 1:12) A ‘nisi mamoe’ a Keliso kolā e taumafai ke maua ne latou a te fakamanuiaga e auala i te fanau a Apelaamo, ka fia‵fia ke lagona ne latou a Ia e fai atu, penei: “O‵mai, i a koutou ko oti ne fakamanuiagina ne toku Tamana, ke fai mō koutou a te malo ne fakatoka mō koutou mai te kamataga o te lalolagi.” (Ioane 10:16; Mataio 25:34) Ao, “a tino kolā e fakamanuia ne te [Atua] e ‵nofo filemu a latou i te fenua, . . . kae ka ‵nofo faeloa i ei ki te se gata mai.”​—Salamo 37:22, 29.

E Mafai o Fakamatala Mai ne Koe?

• Ne a mea e aofia i te fakalogo tonu?

• Se a te mea e manakogina ke maua ei a fakamanuiaga a te Atua?

• E mafai pefea o maua ne tatou a te agaga tapu o te Atua, kae e mafai pefea o galue mō tatou?

[Ata i te itulau e 12]

Ne taua a Iakopo mo se agelu ke maua ei a te fakamanuiaga a Ieova.

[Ata i te itulau e 12]

E mata, e fai foki ne koe a taumafaiga e uke?

[Ata i te itulau e 13]

Ne fesoasoani atu a te agaga tapu o te Atua ki a Pesaleli mo Oliapo ke fai e pelā me ne tino apo