Te 4 O Auala

Filifili Faka‵lei Ou Taugasoa

SE A TE MEA E AKOAKO MAI I TE TUSI TAPU? “Kauga ki tino ‵poto kae ka poto foki koe.”​—⁠Faataoto 13:⁠20.

SE A TE MEA FAIGATA? E mafai ne ‵tou taugasoa o fakamalosi io me e fakavāivāi a te ‵tou lotoma‵lie. E mafai o pokotia ‵tou kilokiloga ki te olaga i olotou uiga mo pati.​—⁠1 Kolinito 15:⁠33.

Mafaufau ki te tala i te Tusi Tapu e uiga ki tagata e toko 12 kolā ne ‵foki atu mai i se malaga ki Kanana. A te tokoukega o latou “ne fakasalalau . . . ne latou se lipoti sē tonu ki tino Isalaelu e uiga ki te fenua tenā ne olo latou o sukesuke.” Faitalia eiloa te lotou lipoti sē ‵lei, e tokolua a tagata ne fai‵pati atu ki mea aoga e uiga ki Kanana, mai i te fai atu me “se fenua tafasili i te ‵lei.” Kae ne fakavāivāi atu a te kilokiloga sē ‵lei a sipai e toko sefulu ki tino. “A tino e ‵tagi faeloa i te puapuaga,” e fai mai te tala, “ne fakatagi atu latou . . . mo te sē ma‵lie.”​—⁠Numela 13:30–14:⁠9.

E penā foki i aso nei, e tokouke a tino “e mui‵mui faeloa, kae ‵ti foki ne latou te agasala ki nisi tino.” (Iuta 16) Se mea faigata ke tumau i te lotomalie māfai e kau atu ki taugasoa kolā e se mafai o ma‵lie.

NE A MEA E MAFAI O FAI NE KOE? Ke iloilo aka a otou sau‵talaga mo taugasoa. E mata, e fakamata‵mata sāle ou taugasoa ki mea e maua ne latou, io me e mui‵mui faeloa ki mea e se maua ne latou? Kae ko koe se vaegā taugasoa pefea ki a latou? E mata, e taumafai koe o fai ou taugasoa ke loto ma‵sei ki a koe, io me e fakamalosi aka ne koe latou ke lotoma‵lie ki mea ko maua ne latou?

Mafaufau ki te fakaakoakoga a Tavita, telā ne fai mo tupu, mo Ionatana, te tama a te tupu ko Saulo. Ko oti ne ola a Tavita e pelā me se tino fakaalofa i te koga lavaki. Ne manavase a te tupu ko Saulo ki tena tulaga fakatupu ona ko Tavita kae ne fia tamate a ia ki ei. E tiga eiloa ne ‵tau eiloa o fai a Ionatana mo fai a te suā tupu i te fakasologa o tupu, ne fai a ia mo fai se taugasoa pili o Tavita. Ne iloa ne Ionatana me ne ‵tofi aka ne te Atua a Tavita ke fai mo fai te suā tupu kae ne lotomalie a ia ke ‵lago atu ki tena taugasoa.​—⁠1 Samuelu 19:​1, 2; 20:​30-33; 23:​14-18.

E manakogina ne koe ne taugasoa penā, kolā e taumafai ke lotoma‵lie kae e manako ki te ‵toe mea ‵lei mō koe. (Faataoto 17:17) E tonu, ke tosina atu a vaegā taugasoa penā, e ‵tau foki o fakaasi atu ne koe a vaegā uiga penā.​—⁠Filipi 2:​3, 4.

[Ata i te itulau e 7]

E mata, e fakamalosi aka io me e fakavāivāi ne ou taugasoa tou lotomalie?