Iesu—Te Auala ne Ola ei a Ia

“A taku mea‵kai, ko te fai ne au a te loto o ia telā ne uga mai ne ia au, kae o fakapalele foki a te galuega ne tuku mai ne ia ki a au ke fai.”—IOANE 4:​34.

E FAKAASI mai i pati a Iesu i luga nei a mea e uke atu e uiga ki te fakavae tonu o tena olaga. Ne faima‵laga atu a Iesu mo ana soko i te taeao kātoa i te fenua maugā o Samalia. (Ioane 4:6) Mai te mafau‵fau me ko ‵tau o fiakai a Iesu i te taimi tenā, ne tuku atu ei ne soko ki a ia ne mū meakai. (Ioane 4:​31-​33) I tena tali, ne fakatoetoe atu ne Iesu tena fuafuaga i tena olaga. Ki a ia loa, a te faiga o te galuega a te Atua e tāua atu i lō te kai. I ana pati mo ana faiga, ne ola a Iesu ke fai ne ia te loto o te Atua. Se a te mea e aofia i te mea tenei?

▪ Te talai mo te akoako atu e uiga ki te Malo o te Atua E fakamatala mai i te Tusi Tapu e uiga ki te galuega a Iesu: “Ne fano sāle a Iesu i Kalilaia kātoa, o akoako atu . . . o folafola atu foki a te tala ‵lei o te Malo.” (Mataio 4:​23) E seki talai io me folafola atu fua ne Iesu te Malo o te Atua ki nisi tino. Ne akoako foki ne ia a tino​—ne fakatonutonu, fakamatala kae fakatalitonu atu i se auala faigofie. A te Malo ko te matua o te fekau a Iesu.

I tena galuega talai, ne akoako ne Iesu ana tino fakalogo‵logo e uiga ki te Malo o te Atua mo te mea ka fai ne te Malo tenei. Ke onoono ki muna‵tonu e uiga ki te Malo, fakatasi mo tusi siki i te Tusi Tapu kolā e maua i ei ne tatou a pati a Iesu e uiga ki te mataupu tenei.

▪ A te Malo o te Atua se pulega faka-te-lagi, a ko Iesu ko te Tupu telā ne filifili aka ne Ieova.—MATAIO 4:​17; IOANE 18:36.

▪ Ka fakatapu ne te Malo a te igoa o te Atua kae ka fai tena loto i te lalolagi nei e pelā mo te faiga i te lagi.—MATAIO 6:​9, 10.

▪ Mai lalo i te pulega a te Malo o te Atua, ka ‵fuli a te lalolagi kātoa mō fai se palataiso.—LUKA 23:​42, 43.

▪ Ko pili o oko mai te Malo o te Atua kae ka fai ei te loto o te Atua i te lalolagi nei.a—MATAIO 24:​3, 7-​12.

▪ Te faiga o galuega ‵mana Ne fakaigoa muamua a Iesu e pelā me ko te “Faiakoga.” (Ioane 13:13) Kae i tena galuega i te tolu mo te āfa tausaga, ne fai foki ne ia a galuega ‵mana. E lua a pogai ne fai ei a galuega konei. Muamua la, ne fesoasoani atu a mea konei ke fakamaoni atu ei me ne uga tonu mai eiloa a ia ne te Atua. (Mataio 11:​2-6) A ko te lua, ne fakaasi mai i ei a mea ka fai ne ia e pelā me ko te Tupu o te Malo o te Atua i se auala tai lasi atu i aso mai mua. Mafaufau ki nisi vavega kolā ne fai ne ia.

▪ Ne fakamalū ne ia te tai sou mo te matagi malosi.—MALEKO 4:​39-​41.

▪ Ne faka‵lei ne ia a tino ma‵saki, e aofia i ei a tino ‵kivi, tino ‵tuli, mo tino ‵pili.—LUKA 7:​21, 22.

▪ Ne fai ne ia ke uke a meakai, kae fagai ki ei a te vaitino kolā ne fia‵kai.—MATAIO 14:​17-​21; 15:​34-​38.

▪ Kāti e tolu a taimi ne faka‵tu aka ei ne ia a tino ‵mate.—LUKA 7:​11-​15; 8:​41-​55; IOANE 11:​38-​44.

E mafai o fakaataata i tou mafaufau a te olaga i te lalolagi mai lalo i te pulega a se Tupu malosi!

▪ Fakaasi atu a mea e uiga ki a Ieova te Atua Kafai e mafau‵fau tatou ki te akoako atu o nisi tino e uiga ki a Ieova, e seai eiloa se tino e ‵pau mo te Tama eiloa a te Atua, telā ne lauiloa e pelā me ko Iesu Keliso. E pelā me ko “te uluaki o mea katoa ne faite,” ne nofo atu a Iesu i tafa o Ieova i te lagi mai mua atu o nisi tino faka-te-agaga. (Kolose 1:​15) Mafaufau ki avanoaga ne maua ne ia ke fakaasi mai i ei a mafaufauga o tena Tamana kae tauloto a mea e uiga ki Tena loto, tulaga, mo auala.

Ne mafai eiloa o fai ‵tonu mai a Iesu: “E seai se tino e tokotasi e iloa ne ia me ko oi te Tama, na ko te Tamana fua, kae seai foki se tino e tokotasi e iloa ne ia me ko oi te Tamana, na ko te Tama fua, mo tino ei kolā e manako te Tama o fakaasi a ia ki ei.” (Luka 10:22) I te taimi ne nofo ei a Iesu i te lalolagi e pelā me se tagata, ne loto fiafia kae loto finafinau a ia o fakaasi atu a mea e uiga ki tena Tamana. Ne faipati kae akoako atu a Iesu i se auala tu ‵kese; e fakaasi ne ia a akoakoga katoa ne maua muamua ne ia mai te lagi, te koga maluga telā e nofo i ei a te Atua Maluga ‵ki.​—Ioane 8:​28.

A mea kolā ne fakaasi mai ne Iesu e uiga ki tena Tamana e mafai o fakatusa ki se mea e ‵fuli ne ia te malosi o te iti. E mafai ne te mea ‵fuli tenei o fakafoliki te malosi o te iti, ko te mea ke mafai o fakaaoga ne tino. I tena nofoga i te lalolagi, ne fakamafulifuli ne Iesu a mea ne tauloto ne ia i te lagi e uiga ki tena Tamana i auala kolā e mafai o talia kae fakagalue ne tino i te lalolagi nei.

Ke onoono ki auala tāua e lua ne fakaasi mai ei ne Iesu a mea e uiga ki tena Tamana.

▪ Ne fakailoa atu ne Iesu i ana akoakoga a te munatonu e uiga ki a Ieova—Tena igoa, tena fuafuaga, mo ana auala.—IOANE 3:​16; 17:​6, 26.

▪ Ne fakaasi atu ne Iesu i ana faiga a vaega ‵gali e uke o uiga o Ieova. Ne fakaasi atu ne Iesu a uiga o tena Tamana i te auala ‵lei katoatoa, telā ne mafai o fai atu a ia, penei: ‘Kafai e fia iloa ne koe a toku Tamana, kilo mai fua ki a au.’—IOANE 5:​19; 14:9.

E fakaofoofogia ki a tatou a te auala ne ola ei a Iesu. E uke atu fakafia a mea aoga ka maua ne tatou māfai e suke‵suke tatou ki te pogai ne mate ei a ia kae māfai e gasue‵sue tatou e ‵tusa mo mea e tauloto ne tatou.

[Fakamatalaga fakaopoopo]