Kāiga Kelisiano—Ke “Mataala” Koutou

“E ‵tau mo tatou o mataala kae toka.”​—1 TESALONIA 5:6.

1, 2. Se a te mea e manakogina ke tumau te kāiga i te mataala i te feitu faka-te-agaga?

MAI te fakasino atu ki te “aso fakamataku o te Aliki [ko Ieova,]” ne tusi atu a te apositolo ko Paulo ki Kelisiano i Tesalonia: “Taina, a koutou nei e se ‵nofo i te pouliga, ka ko te mainaga. Tela la, ke se puketu atu koutou ne te Aso e pelā mo se tino kaisoa. A koutou katoa ko tino o te mainaga, ko tino foki o te ao. A tatou e se ne tino o te po io me ko te pouliga.” Ne toe fai atu a Paulo: “Tela la, e se ‵tau mo tatou o ‵moe e pelā mo nisi tino; e ‵tau mo tatou o mataala kae toka.”​—Ioelu 2:31; 1 Tesalonia 5:​4-6.

² E fetaui tonu eiloa a te fakatakitakiga a Paulo ki te kau Tesalonia mō Kelisiano kolā e ola i te taimi o “te gataga.” (Tanielu 12:4) Ona ko te pili mai o te gataga o te olaga masei tenei, ko oti ne fakaiku aka ne Satani me e mafai ne ia o ‵fuli keatea a tino tapuaki ‵tonu e tokouke mai te taviniga ki te Atua. Tela la ke ‵poto tatou o faka‵logo ki te fakamalosiga a Paulo ke tumau i te matapula‵pula i te feitu faka-te-agaga. Kafai e taumafai se kāiga Kelisiano o tumau i te mataala, se mea tāua ke fai ne tino taki tokotasi i te kāiga a olotou tiute kolā e fakamatala mai i te Tusi Tapu. Kae, ne a la a tiute e ‵tau o fai ne tagata a‵vaga, fafine a‵vaga, mo talavou ke fesoasoani atu ke tumau te kāiga i te “mataala”?

Tagata A‵vaga​—Fakaakoako ki te “Tausi Mamoe ‵Lei”

3. E ‵tusa mo pati i te 1 Timoteo 5:​8, ne a mea e aofia i te tiute o te tagata e pelā me ko te ulu o te kāiga?

³ E fai mai te Tusi Tapu: “A te tagata e sili foki i tena avaga.” (1 Kolinito 11:3) Ne a mea e aofia i te tiute o te tagata avaga e pelā me ko te ulu o te kāiga? Ke faka‵mafa atu te vaega e tasi e uiga ki te pulega, e fai mai te Tusi Tapu: “Kae kafai e isi se tino e se fia tausi ki sona kāiga, kae maise eiloa tino o tona kāiga tonu, ko tona uiga ko ‵teke ne ia te fakatuanaki, kae sili atu tona masei i lō te tino sē kelisiano.” (1 Timoteo 5:8) E tonu, e ‵tau o tausi atu se tagata ki tena kāiga i te feitu faka-te-foitino. Kae kafai e fesoasoani atu a ia ki tena kāiga ke mataala i te feitu faka-te-agaga, e ‵tau o uke atu ana mea e fai i lō te ‵lago atu fua ki tena kāiga i mea tau tupe. E ‵tau o ati aka ne ia tena kāiga i te feitu faka-te-agaga, mai te fesoasoani atu ki te kāiga ke fakamalosi aka te lotou fesokotakiga mo te Atua. (Faataoto 24:​3, 4) E mafai pefea o fai ne ia te mea tenā?

4. Se a te mea e mafai o fesoasoani atu ki se tagata ke manuia i te atiakaga o tena kāiga i te feitu faka-te-agaga?

⁴ Kafai a “te tagata e isi sena pule i luga i tena avaga, e pelā mo Keliso e isi foki sena pule i te ekalesia,” e ‵tau mo ia o sukesuke kae fakaakoako ki te vaegā pulega telā e tuku atu ne Iesu ki te fakapotopotoga. (Efeso 5:​23) Mafaufau ki te auala ne fakamatala ei ne Iesu a tena fesokotakiga mo ana soko. (Faitau te Ioane 10:​14, 15.) Se a kī ki te manuia mō se tagata telā e manako ke ati aka tena kāiga i te feitu faka-te-agaga? Ko te mea tenei: Sukesuke ki pati mo mea ne fai ne Iesu e pelā me ko “te tausi mamoe ‵lei,” kae “tau‵tali . . . i ona kalafaga.”​—1 Petelu 2:​21.

5. Se a te mea e iloa ne te Tausi Mamoe ‵Lei e uiga ki te fakapotopotoga?

⁵ I se auala fakatusa, e fakavae eiloa a te fesokotakiga i te va o te tausi mamoe mo ana mamoe ki te iloa mo te loto talitonu. E iloa ne te tausi mamoe a mea katoa e uiga ki ana mamoe, kae tali‵tonu foki a mamoe ki te lotou tausi mamoe. E iloa kae faka‵logo latou ki tena leo. “E iloa tonu eiloa ne au aku mamoe,” ko muna a Iesu. E iloa tonu ne ia a mea e uiga ki te fakapotopotoga. A te pati Eleni telā ne ‵fuli ki te “iloa tonu” e fakauiga ki te “maina ‵lei.” Ao, e iloa tonu ne te Tausi Mamoe ‵Lei a ana mamoe taki tokotasi. E iloa ne ia olotou manakoga totino, vāivāiga mo te ma‵losi o latou. E seai eiloa se mea e uiga ki ana mamoe e se iloa ne te ‵tou Fakaakoakoga Sili. Kae e iloa katoatoa ne mamoe a te tausi mamoe kae tali‵tonu latou ki tena takitakiga.

6. E mafai pefea o fakaakoako atu a tagata a‵vaga ki te Tausi Mamoe ‵Lei?

⁶ Ke fakagalue aka tena pulega e pelā mo Keliso, e ‵tau o mafaufau te tagata avaga ki a ia eiloa e pelā me se tausi mamoe mo latou kolā e ‵nofo mai lalo i tena tausiga e pelā me ne mamoe. E ‵tau o taumafai ke iloa ‵lei ne ia tena kāiga. E mata, e mafai o maua ne se tagata avaga se vaegā iloaga penā? Ao, māfai e fesokotaki atu a ia ki te kāiga kātoa, fakalogologo ki mea e manava‵se latou ki ei, fai ne ia te takitakiga i te kāiga, kae galue malosi i te faiga o filifiliga ‵lei kolā e aofia i ei a vaegā mea e pelā mo tapuakiga a kāiga, te ‵kau atu ki fakatasiga, te galuega talai, mo fakafiafiaga. Kafai e tauloto faka‵lei ne se tagata avaga Kelisiano a pati a te Tusi Tapu kae taumafai ke iloa faka‵lei ne ia tena kāiga ko te mea ke tuku atu se fakaakoakoga kae fai a filifiliga ‵poto, e mautinoa eiloa me ka tali‵tonu a tena kāiga ki tena pulepulega kae ka lotomalie a ia ke lavea atu me e ‵kau fakatasi latou i te tapuakiga tonu.

7, 8. E mafai pefea o fakaakoako atu se tagata avaga ki te Tausi Mamoe ‵Lei i te fakaasiatuga o te amanaia tonu ki tena kāiga?

⁷ A te tausi mamoe ‵lei e amanaia foki ki ana mamoe. Kafai e suke‵suke tatou ki tala Evagelia e uiga ki te olaga o Iesu mo tena galuega talai, e loto fakafetai eiloa tatou mō te amanaia telā ne fakaasi atu ne Iesu mō ana soko. Ne ‘tuku atu foki tena ola e sui ei ana mamoe.’ E ‵tau o fakaakoako atu a tagata a‵vaga ki a Iesu mai te fakaasi atu o te amanaia tonu ki olotou kāiga. I lō te pule mālō atu ki tena avaga, e tumau eiloa a te tagata avaga telā e manako ki te taliaga a te Atua o fakaasi atu te alofa ki tou fafine “e pelā eiloa mo Keliso ne alofa ki te ekalesia.” (Efeso 5:​25) E ‵tau o fakaasi atu te atafai mo te malamalama i ana pati, me e ‵tau eiloa o āva a ia ki tou fafine.​—1 Petelu 3:7.

⁸ Mai te akoako atu o tama‵liki, e ‵tau o ‵lago malosi atu a te ulu o te kāiga ki fakatakitakiga fakaatua. Kae e ‵tau o fakaasi atu ne ia te amanaia tonu ki ana tama‵liki. E ‵tau o fai a polopolokiga i se auala alofa. E faigata o malamalama a nisi tama‵liki ki mea kolā e fakamoe‵moe ke fai ne latou. I te feitu tenā, e ‵tau o fakaasi atu ne se tamana a te lasi o tena kufaki. Kafai e tau‵tali faeloa a tagata i te fakaakoakoga a Iesu, ka ati aka eiloa ne latou se kāiga tokagamalie. Ka maua eiloa ne olotou kāiga a te vaegā puipuiga faka-te-agaga telā ne usu mai ne te faisalamo.​—Faitau te Salamo 23:​1-6.

9. E pelā mo Noa i aso mua, ne a tiute e maua ne tagata a‵vaga Kelisiano, kae se a te mea ka fesoasoani atu ke fai ne latou a te tiute tenei?

⁹ Ne ola eiloa a Noa i te taimi o te gataga o te lalolagi i ona aso. Kae ne tausi ne Ieova a ia “mo nisi tino ake ei e tokofitu” i te taimi “ne aumai ne ia te lolo ki te lalolagi ki tino ma‵sei.” (2 Petelu 2:5) Ne maua ne Noa te tiute ke fesoasoani atu ki tena kāiga ke ‵sao i te Lolo. E penā foki te tulaga o ulu o kāiga Kelisiano i aso fakaoti konei. (Mataio 24:37) Se mea tāua ke suke‵suke latou ki te fakaakoakoga a “te tausi mamoe ‵lei” kae taumafai ke fakaakoako atu ki a ia!

Fafine A‵vaga​—‘Ati Ake Otou Kāiga’

10. Se a te uiga o te fakalogo o te fafine avaga ki tena avaga?

¹⁰ Ne tusi mai te apositolo ko Paulo: “A koutou e fafine, ke faka‵logo koutou ki otou avaga, e pelā eiloa mo te otou faka‵logo ki te Aliki.” (Efeso 5:​22) E se fakaasi mai i te fakamatalaga tenei me e se tāua te tulaga o fafine. Mai mua o faite te fafine muamua, ko Eva, ne folafola mai te Atua tonu: “E se ‵lei māfai e nofo tokotasi te tagata. Ka faite ne au se soa mō ia ke fesoasoani ki a ia. (Kenese 2:18) A te tiute o te tino “fesoasoani” mo te “soa”​—mai te ‵lago atu ki tena avaga i te taimi e tausi ei a ia ki tena tiute i te kāiga​—se tulaga faka­alo­alo­gina.

11. E mafai pefea ne se fafine avaga telā e fai pelā me se fakaakoakoga ‵lei o ‘ati aka tena kāiga’?

¹¹ A te fafine avaga telā e fai pelā me se fakaakoakoga ‵lei e galue mō te ‵lei o tena kāiga. (Faitau te Faataoto 14:1.) E ‵kese mai se fafine valea telā e se āva ki te fakatokaga a te ulu o te kāiga, e āva eiloa te fafine poto ki te fakatokaga tenei. I lō te fakaasi atu o te kilokiloga sē fakalogo kae fia tu tokotasi telā e fakaasi mai ne te lalolagi, e fakalogo eiloa a ia ki tena avaga. (Efeso 2:2) A te fafine avaga valea e se mataku o fakamasei ne ia tena avaga, a ko te fafine poto e fakaasi atu ne ia te āva ki tena avaga e pelā eiloa mo te āva o ana tama‵liki mo nisi tino ki te tagata. E fakaeteete eiloa a ia ke mo e manatu māmā ki te pulega a tena avaga mai te fakaitaita io me kinau atu ki tou tagata. E sae aka foki i ei a te fakalavelave i mea tau tupe. A te fafine valea e fiafia eiloa o fakamāumāu ne ia a tupe a te kāiga. E se fai eiloa penā a te fafine telā e ‵lago atu ki tena kāiga. E fesoasoani atu a ia ki tena avaga i mea tau tupe. E fai ne ia a mea konā e auala i te mafaufau ‵lei mo te fakasoasoa faka‵lei o tupe. E se fakamalosi ne ia tena avaga ke galue ovataimi.

12. Se a te mea e mafai ne te fafine avaga o fai ke fesoasoani atu ki tena kāiga ke “mataala”?

¹² E fesoasoani atu a te fafine avaga telā e fai pelā me se fakaakoakoga ‵lei ki tena kāiga ke “mataala” mai te fesoasoani atu ki tena avaga i te akoakoga o lā tama‵liki e uiga ki a Ieova. (Faataoto 1:8) E ‵lago malosi atu a ia ki te polokalame e uiga ki te Tapuakiga a Kāiga. E se gata i ei, e ‵lago atu tou fafine ki tena avaga māfai ko tuku atu a polopolokiga ki lā tama‵liki. Ko oko eiloa i te ‵kese o ia mai te fafine avaga telā e se fesoasoani ki tena kāiga, kae iku atu ki te logo‵mae o ana tama‵liki i te feitu faka-te-foitino mo te feitu faka-te-agaga!

13. Kaia e tāua ei ke ‵lago atu se fafine avaga ki tena avaga telā e aofia i galuega faka-Kelisiano?

¹³ E pelā me se fafine avaga telā e ‵lago atu ki tena kāiga, e pefea ana lagonaga māfai e lavea ne ia me e fai ne tena avaga se tiute i te fakapotopotoga Kelisiano? Ka fiafia eiloa tou fafine! Faitalia me ko tena avaga se tavini fesoasoani, se toeaina, io me kāti se tino e aofia i te Hospital Liaison Committee io me ko te Komiti Fakatu‵tu Kingdom Hall, e fiafia eiloa a ia ki te tauliaga o tena avaga. A te ‵lago malosi atu ki tena avaga i pati mo faiga ka aofia i ei a mea faiga‵ta. Kae e iloa ne ia me i te aofia o tena avaga i fakatokaga faka-Kelisiano e fesoasoani atu ki te kāiga kātoa ke tumau i te mataala i te feitu faka-te-agaga.

14. (a) Se a te mea e mafai o faigata ki se fafine avaga telā e ‵lago atu ki tena kāiga, kae e mafai pefea o fakafesagai atu a ia ki ei? (e) E mafai pefea o fesoasoani atu se fafine avaga ki te ‵lei o te kāiga kātoa?

¹⁴ E mafai o faigata ki se fafine avaga telā e fai pelā me se fakaakoakoga ‵lei ke ‵lago atu ki tena avaga māfai ko fai ne tena avaga se filifiliga telā e se fiafia tou fafine ki ei. Kae e ‵tau o fakaasi atu ne ia “te loto malalo mo te agaga filemu” kae fesoasoani atu ki tena avaga i te fakagaluegaga o tena filifiliga. (1 Petelu 3:4) A te fafine avaga ‵lei e taumafai o tautali ki fakaakoakoga ‵lei a fafine amioatua i aso mua, e pelā mo Sala, Luta, Apikaila, mo te mātua ei o Iesu, ko Malia. (1 Petelu 3:​5, 6) E fakaakoako atu foki a ia ki loma‵tua i aso nei kolā e “amio fakaaloalo.” (Tito 2:​3, 4) Mai te fakaasi atu o te alofa mo te āva ki tena avaga, e fesoasoani atu te fafine telā e fai pelā me se fakaakoakoga ‵lei ki te manuia o te lā fakaipoipoga mo te ‵lei o te kāiga kātoa. E fai eiloa tena fale e pelā me se puipuiga. Ki se tagata faka-te-agaga, e fakatāua ne ia a te fafine avaga telā e ‵lago malosi ki a ia!​—Faataoto 18:22.

Talavou​—‘Ke Tumau i te ‵Kilo Atu ki Mea Kolā e se Matea ki Mata’

15. E mafai pefea ne talavou o ga‵lue fakatasi mo olotou mātua ko te mea ke “mataala” a te kāiga?

¹⁵ E mafai pefea ne koutou talavou o fai otou tusaga kae fesoasoani atu ki otou mātua ko te mea ke “mataala” te kāiga i te feitu faka-te-agaga? Mafaufau la ki te taui e tuku atu ne Ieova ki a koe. Kāti mai tau folikiga, ne fakaasi atu ne ou mātua a ata e uiga ki te ola i te Palataiso. I te taimi ko gasolo ei koe o matua, kāti ne fakaaoga ne lāua te Tusi Tapu mo tusi faka-Kelisiano ke fesoasoani atu ke fakaataata ne koe a te ola ki te se-gata-mai i te lalolagi fou. A te tumau i te saga tonu atu ki te taviniga ki a Ieova kae ola e ‵tusa mo te mea tenā ka fesoasoani atu ki a koe ke tumau i te “mataala.”

16, 17. Ne a mea e mafai ne talavou o fai ke ‵tele atu latou mo te manumalo i te fakatau‵telega mō te ola?

¹⁶ Ke faka‵logo tatou ki pati a te apositolo ko Paulo kolā e maua i te 1 Kolinito 9:​24. (Faitau.) Ke ‵tele atu i te fakatau‵telega mo te fakamoemoega ke manumalo. Ke filifili aka a te auala telā ka iku atu ki te mauaga o te taui ko te ola se-gata-mai. Ko oti ne talia ne tino e tokouke a te ‵sala atu ki manakoga faka-te-foitino ke fai ei ke sē ‵saga atu latou ki te taui tenā. Ko tafaga la te valea o te mea tenā! A te faiga o aofaga ke maua a koloa e uke e se iku atu ki te fiafia tonu. E toetoe fua te aoga o tupe. Kae e ‵tau mo koe o tumau i te kilo atu ki “mea kolā e se matea ki mata.” Kaia? Me i “mea kolā e se matea ki mata” e tumau eiloa ke oko ki te se-gata-mai.”​—2 Kolinito 4:​18.

¹⁷ A “mea kolā e se matea ki mata” e aofia i fakamanuiaga o te Malo. Fai se fakatokaga ke ola koe i se auala telā e fai ei ke maua ne koe a fakamanuiaga konā. A te fiafia tonu e vau mai te fakaaogaga o tou ola mō te taviniga ki a Ieova. E maua ne koe a avanoaga i te taviniga ki te Atua tonu ke kausaki atu ki fakamoemoega sē tumau e pelā foki mo fakamoemoega tumau.a A te fakatokaga o fakamoemoega ‵tonu faka-te-agaga e mafai o fesoasoani atu ki a koe ke saga tonu atu o tavini ki te Atua mo se kilokiloga ke maua te taui ko te ola se-gata-mai.​—1 Ioane 2:​17.

18, 19. E mafai pefea o fakaiku aka ne se talavou ke puke‵mau a ia ki te munatonu?

¹⁸ Talavou, a te auala muamua ki te ola ko te atiakaga o tou fesokotakiga mo Ieova. E mata, kai sasale atu koe i te auala tenā? Fesili ifo ki a koe eiloa: ‘E mata, au se tino faka-te-agaga, io me e fakalagolago eiloa a toku aofia i galuega faka-Kelisiano ki oku mātua? E mata, e ati aka ne au a uiga kolā e fai ei ke fakafiafia ne au te Atua? E mata, e taumafai au ke fakatumau se fakasologa o aku mea e fai kolā e fetaui ‵lei mo te tapuakiga tonu, e pelā mo te ‵talo faeloa, faiga o sukesukega, kau atu ki fakatasiga mo te galuega talai? E mata, e fakapilipili atu au ki te Atua mai te atiakaga o se fesokotakiga totino mo ia?’​—Iakopo 4:8.

¹⁹ Mafaufau la ki te fakaakoakoga a Mose. Faitalia me ne masani a ia ki se tuu o se fenua, ne filifili aka ne Mose ke fai a ia e pelā me se tino tapuaki o Ieova i lō tena fai mo tama a te tama fafine a te falao. (Faitau te Epelu 11:​24-​27.) Talavou Kelisiano, e ‵tau o fakaiku aka ne koutou ke tavini atu mo te fakamaoni ki a Ieova. Mai te faiga o te mea tenā, ka maua eiloa ne koutou te fiafia tonu, te ‵toe olaga ‵lei, mo te fakamoemoega ke “mafai o maua ne [koutou] te ola telā ko te ola tonu.”​—1 Timoteo 6:​19.

20. I te fakatau‵telega mō te ola, ko oi e maua ne ia te taui?

²⁰ I tafaoga i aso mua, e tokotasi fua te tino tele ne sili i te fakatau‵telega. E se penā eiloa i te fakatau‵telega mō te ola. Ko te loto eiloa o te Atua “ke ola tino katoa, ka ke iloa foki ne latou te munatonu.” (1 Timoteo 2:​3, 4) E tokouke a tino ne ‵tele atu mo te manuia i ou mua, kae e tokouke foki e ‵tele fakatasi mo koe. (Epelu 12:​1, 2) Ka maua a te taui ne tino katoa kolā e se ‵fiu vave. Tela la, ke na fakaiku aka ne koe ke manumalo koe!

21. Se a te mea ka sau‵tala tatou ki ei i te suā mataupu?

²¹ E mautinoa eiloa a te “oko mai te aso lasi mo te fakamataku o te Aliki [ko Ieova].” (Malaki 4:5) E se ‵tau o ‵poa ne te aso tenā a kāiga Kelisiano kolā e se toka ‵lei. Se mea tāua mō te kāiga kātoa ke fai olotou tiute faka-te-Tusi Tapu. Ne a foki a nisi mea e mafai ne koe o fai ke tumau tou matapulapula i te feitu faka-te-agaga kae fakamalosi aka tou fesokotakiga mo te Atua? Ka sau‵tala tatou i te suā mataupu ki manatu e tolu kolā e pokotia i ei a te ‵lei o te kāiga kātoa i te feitu faka-te-agaga.

[Fakamatalaga fakaopoopo]

Ne a Mea e Tauloto ne Koe?

• Kaia e tāua ei mō kāiga Kelisiano ke “mataala”?

• E mafai pefea o fakaakoako se tagata avaga ki te Tausi Mamoe ‵Lei?

• Ne a mea e mafai ne se fafine avaga telā e fai pelā me se fakaakoakoga ‵lei o fai ke ‵lago atu ki tena avaga?

• E mafai pefea o fesoasoani atu a talavou ke tumau olotou kāiga i te mataala i te feitu faka-te-agaga?

[Ata i te itulau e 12]

E fakatāua ne se tagata faka-te-agaga a se avaga fafine telā e ‵lago atu ki a ia