Ko oi te ‵Toe Tino Tāua i Tou Olaga?

“Ko koe tokotasi fua ko te Pule Tafasili i te Maluga i te lalolagi kātoa.”​—SALAMO 83:​18, NW.

1, 2. E uiga ki te ‵tou fakaolataga, kaia e se lava fua ei ke iloa ne tatou te igoa o Ieova?

KĀTI ne fatoā lavea ne koe i te taimi muamua a te igoa o Ieova i te Salamo 83:18. Ne mafai eiloa o ofo koe ke faitau atu a pati konei: “Ko te mea ke iloa ne tino a koe, telā ko Ieova tou igoa, ko Koe tokotasi fua ko te Pule Tafasili i te Maluga i te lalolagi kātoa.” Tela la, e seai se fakalotolotolua me ne fakaaoga ne koe te tusi siki tenā ke fesoasoani atu ki nisi tino ke iloa ne latou a te ‵tou Atua alofa, ko Ieova.​—Loma 10:​12, 13.

² E tiga eiloa e tāua ke iloa ne tino a te igoa o Ieova, kae se lava fua i te iloaga tenā. Mafaufau ki te auala ne faka‵mafa mai ei ne te faisalamo a te suā munatonu telā e tāua ki te ‵tou fakaolataga i ana pati konei: “Ko Koe tokotasi fua ko te Pule Tafasili i te Maluga i te lalolagi kātoa.” Ao, a Ieova ko te ‵toe Tino tāua eiloa i te lalolagi saukātoa. E pelā me ko te Mafuaga o mea katoa, e maua ne ia te aiā ke fai atu ki mea ola katoa ne faite ne ia ke faka‵logo atu ki a ia. (Fakaasiga 4:​11) Kae mō se pogai ‵lei, e ‵tau o fesili ifo tatou penei, ‘Ko oi te ‵toe tino tāua i toku olaga?’ Se mea tāua ke iloilo aka faka‵lei ne tatou a ‵tou tali ki te fesili tenā!

Te Kinauga i te Fatoaga o Etena

3, 4. Ne fakaloiloi pefea ne Satani a Eva, kae se a la te ikuga?

³ E mafai o lavea ‵lei ne tatou a te tāua o te fesili tenei i mea kolā ne ‵tupu i te fatoaga o Etena. Ne fakaloiloi ne te agelu ‵teke telā ne taku fakamuli e pelā me ko Satani te Tiapolo, a te fafine muamua, ko Eva, ke fakamuamua tena manakoga i lō te fakatonuga a Ieova ke mo a ma kai te fuaga o te lakau. (Kenese 2:​17; 2 Kolinito 11:3) Ne talia ne ia te tofotofoga tenei kae ne fakaasi atu ne ia tena sē āva ki te pulega sili a Ieova. Ne seki fai ne Eva a Ieova e pelā me ko te ‵toe Tino tāua i tena olaga. Kae ne mafai pefea o fakaloiloi ne Satani a Eva?

⁴ Ne fakaaoga ne Satani a togafiti fai lēmū i tena sau‵talaga mo Eva. (Faitau te Kenese 3:​1-5.) Muamua la, e seki fakaaoga ne Satani a te igoa totino o Ieova. Ne faipati fua a ia e uiga ki te “Atua.” E ‵kese mai i ei, ne fakaaoga ne te tino ne tusi ne ia te Kenese a te igoa o Ieova i te kamataga o te fuaiupu tenā. Te lua, i lō te faipati atu e uiga ki te “fakatonuga” a te Atua, ne fesili atu fua a Satani e uiga ki “muna” a te Atua ne fai. (Kenese 2:​16, NW.) I te togafiti fai lēmū tenei, ne taumafai eiloa a Satani o fakamāmā ne ia te tāua o te fakatonuga tenā. A ko te tolu, e tiga eiloa ne faipati atu fua a ia ki a Eva, ne fakaaoga ne ia te tugapati ko “koulua.” I te faiga penā, ne taumafai tou tagata ke fakamatamata a Eva kae ke fakatāua ne ia a ia eiloa​—e pelā me sui atu ne tou fafine a ia mo tena avaga. Se a te ikuga? E mautinoa eiloa me ne sui ne Eva a lāua mai te fai atu ki te gata: “E mafai ne māua o ‵kai ki fuaga o so se lakau i te fatoaga.”

5. (a) Se a te mea ne taumafai a Satani ke saga atu a Eva ki ei? (e) Se a te mea ne fakaasi mai ne Eva i te kaiga ki te fuagalakau telā e tapu ma kai ki ei?

⁵ Ne faka‵se foki ne Satani a te manatu tenā. Ne fai atu a ia me i te Atua e sē tonu ana faifaiga me ne fai atu ki a Atamu mo Eva ke mo a ma ‘‵kai ki fuaga o so se lakau i te fatoaga.’ E se gata i ei, ne fai ne Satani ke mafaufau a Eva ki a ia eiloa mo te auala e momea aka ei te ‵lei o tena olaga, kae fai ke ‵pau mo “te Atua.” Fakamuli ifo, ne fai ne ia tou fafine ke mafaufau e uiga ki te lakau mo ana fuaga i lō tena fesokotakiga mo te Tino telā ne tuku atu ne ia a mea katoa. (Faitau te Kenese 3:6.) Se mea fakafanoanoa, me mai te kai ki te fuaga, ne fakaasi atu ei ne Eva me i a Ieova e se ko te ‵toe Tino tāua i tena olaga.

Te Kinauga Telā ne Sae Aka i Aso o Iopu

6. Ne tofotofo pefea ne Satani a te fakamaoni o Iopu, kae se a te avanoaga ne tuku atu ki a Iopu?

⁶ I senitenali fakamuli ifo, ne maua ne te tagata fakamaoni ko Iopu se avanoaga ke fakaasi atu ne ia a te ‵toe Tino tāua i tena olaga. I te taimi ne faipati atu ei a Ieova ki a Satani e uiga ki te fakamaoni o Iopu, ne fai atu a Satani mo te kaitaua, penei: “E mata, e tapuaki atu eiloa a Iopu ki a koe manafai e seai sena ‵lei e maua i tena tapuaki atu ki a koe?” (Faitau te Iopu 1:​7-​10.) Ne seki fakafiti ne Satani me i a Iopu ne fakalogo ki te Atua. Kae ne fakafesili ne ia a lagonaga o Iopu. Ne ‵losi atu a ia me e tavini atu fua a Iopu ki a Ieova, ona ko te manakoga kaimanako kae e se ona ko te alofa. Ko Iopu fua ne mafai ne ia o tali atu te ‵losiga tenā, kae ne tuku atu ki a ia te avanoaga ke fai penā.

7, 8. Ne a mea faiga‵ta ne fakafesagai atu ki ei a Iopu, kae se a te auala ne fakaasi atu ei ne ia tena kufaki mo te fakamaoni?

⁷ Ne talia ne Ieova ke tuku atu ne Satani a fakalavelave ki luga i a Iopu. (Iopu 1:​12-​19) Ne saga atu pefea a Iopu ki te tulaga tenā? Ne fakaasi mai ki a tatou me ne “seki agasala eiloa o ‵lou me ko te Aliki e pogai ei a mea konā ne ‵tupu.” (Iopu 1:​22) Kae ne seki ‵fiu eiloa a Satani. Ne toe fai atu foki tena fameo: “A te tagata e mafai fua o tiakina ana mea katoa manafai ko manako ke ola a ia. (Iopu 2:4) Ne mafaufau a Satani me kafai ko logo‵mae a Iopu, ka fakaiku aka ei ne ia i a Ieova e se ko te ‵toe Tino tāua i tena olaga.

⁸ Ne poko a Iopu ne se masaki matagā kae ne fakamalosi atu tena avaga ke muna masei ki te Atua kae ke mate a ia. Fakamuli ifo, ne ‵losi atu a tino fakamafanafana e tokotolu me ne fai ne ia se mea ‵se. (Iopu 2:​11-​13; 8:​2-6; 22:​2, 3) Kae faitalia te logo‵mae, ne tumau eiloa a Iopu i te fakamaoni. (Faitau te Iopu 2:​9, 10.) Ne fakaasi atu ne ia e auala i tena kufaki mo te fakamaoni me i a Ieova ko te ‵toe Tino tāua i tena olaga. Ne fakaasi atu foki ne Iopu me e mafai eiloa ne se tino sē ‵lei katoatoa o tali atu a ‵losiga ‵se a te Tiapolo.​—Fakatusa ki te Faataoto 27:11.

Te Tali ‵Lei Katoatoa a Iesu

9. (a) Ne taumafai pefea a Satani o tofotofo a Iesu e uiga ki ana manakoga totino? (e) Ne saga atu pefea a Iesu ki te tofotofoga tenei?

⁹ Mai tua malie o te papatisoga a Iesu, ne taumafai a Satani o fakaloiloi a Iesu ke kausaki atu ki manakoga kaimanako i lō te fai o Ieova e pelā me ko te ‵toe Tino tāua i tena olaga. Ne tuku atu ne te Tiapolo ki a Iesu a tofotofoga e tolu. Muamua la, ne taumafai ke fakaaoga ne ia te manakoga kaimanako, mai te tofotofo ne ia ke ‵fuli ne Iesu a fatu ki falaoa. (Mataio 4:​2, 3) Ne fatoa fakalikiliki eiloa a Iesu mō aso e 40 kae ne likiliki eiloa a ia. Tela la ne fakamalosi atu te Tiapolo ke fakaaoga ‵se ne ia tena ‵mana ke fai a vavega ke fakamalie aka tena fiakai. Ne saga atu pefea a Iesu ki ei? E se pelā mo Eva, ne saga tonu atu a Iesu ki te Muna a Ieova kae ne ‵teke fakavave atu ne ia te tofotofoga tenā.​—Faitau te Mataio 4:4.

10. Kaia ne manako malosi a Satani ke tofotofo ne ia a Iesu ke lele ki lalo mai te koga tafa maluga o te faletapu?

¹⁰ Ne taumafai malosi foki a Satani ke tofotofo ne ia a Iesu ke kaimanako. Ne tofotofo ne ia a Iesu ke lele ki lalo mai te koga tafa maluga o te faletapu. (Mataio 4:​5, 6) Se a te mea ne fakamoemoe Satani ki ei ke fakataunu? Ne mafaufau a Satani me kafai e se pakia a Iesu ma lele ki lalo, ko fakamaoni atu ei i a ia ko te “Tama a te Atua.” E manino ‵lei, me ne manako te Tiapolo ke fakatāua ne Iesu a ia eiloa, mai te fai ne ia o se mea e fakaasi atu i ei a tena fakamatamata. Ne iloa ne Satani me e mafai o talia ne se tino se tofotofoga fakamataku ona ko te fakamatamata mo se manakoga ke āva atu a tino ki a ia. Ne fakaaoga ‵se ne Satani se tusi siki, kae ne fakaasi atu ne Iesu me e malamalama katoatoa a Ia i te Muna a Ieova. (Faitau te Mataio 4:7.) Mai te ‵teke atu o te tofotofoga tenā, ne fakamaoni atu foki i ei ne Iesu me i a Ieova ko te ‵toe Tino tāua i tena olaga.

11. Kaia ne seki talia ei ne Iesu a te ofoatuga ne te Tiapolo a malo o te lalolagi?

¹¹ I tena toe taumafaiga, ne ofo atu ne Satani ki a Iesu a malo katoa o te lalolagi. (Mataio 4:​8, 9) Ne ‵teke fakavave atu ne Iesu a te mea tenā. Ne iloa ne ia me i te talia ne ia o te mea tenā e fakauiga i ei me ko ‵teke atu a ia ki te pulega sili a Ieova​—telā e isi sena aiā ke fai mo Pule Tafasili i te Maluga. (Faitau te Mataio 4:​10.) I tofotofoga takitasi konei, ne tali atu a Iesu ki a Satani mai te siki atu o tusi siki kolā e isi se igoa totino o Ieova i ei.

12. Se a te filifiliga faigata ne fakafesagai atu ki ei a Iesu i te fakaotiga o tena olaga i te lalolagi nei, kae ne a mea e tauloto ne tatou mai te auala ne saga atu ei a ia ki te filifiliga tenā?

¹² I te fakaotiga o tena olaga i te lalolagi tenei, ne fepaki a Iesu mo se filifiliga faigata ‵ki. I tena taviniga kātoa, ne fakaasi atu tena loto fiafia o tuku katoatoa atu tena ola e pelā me se taulaga. (Mataio 20:​17-​19, 28; Luka 12:50; Ioane 16:28) Kae ne iloa ne Iesu me ka ‵losi ‵se atu kae fakamasino a ia mai lalo i tulafono faka-Iutaia kae ke tamate e pelā me se tino ne muna masei ki te Atua. Ne fakalavelave malosi atu ki a ia te vaega tenei o tena mate. Ne ‵talo atu a ia: “Toku Tamana, kafai e mafai ne koe, ave keatea te ipu tenei mai i a au.” Kae ne toe fai atu a ia: “Kae ke se fai la toku loto ka ko tou loto.” (Mataio 26:39) Ao, a te fakamaoni o Iesu ke oko eiloa ki tena mate e fakaasi atu ei mo te mautinoa a te ‵toe Tino telā e fakatāua ne ia i tena olaga!

Te ‵Tou Tali ki te Fesili

13. Ne a akoakoga ne tauloto ne tatou mai i fakaakoakoga a Eva, Iopu, mo Iesu Keliso?

¹³ Se a te mea ko oti ne tauloto ne tatou? I te tala o Eva, a latou kolā e tosina atu ki manakoga faka-te-foitino io me ko te fakamatamata e fakaasi atu ei me i a Ieova e se ko te ‵toe Tino e fakatāua ne latou i olotou olaga. E ‵kese mai i ei, a te tala e uiga ki te fakamaoni o Iopu, e tauloto eiloa ne tatou me e mafai foki o fakaasi atu ne tino sē ‵lei katoatoa me e fakamuamua ne latou a Ieova mai te kufaki mo te fakamaoni i mea faiga‵ta​—faitalia me e se malamalama katoatoa latou i te pogai o te fakalavelave. (Iakopo 5:​11) Kae ko te fakaakoakoga a Iesu e akoako mai ke toka tatou ki logo‵maega kae ke sē fakatāua malosi ne tatou a ‵tou kilokiloga totino. (Epelu 12:2) Kae e mafai pefea o fakagalue ne tatou a akoakoga konei?

14, 15. Kaia ne ‵kese ei te kilokiloga a Iesu mai i a Eva, kae e mafai pefea o fakaakoako atu tatou ki a Iesu? (Ke tali mai te fakatusa i te itulau e 21.)

¹⁴ Ke mo a e talia a tofotofoga ke fakapuli ei ne koe a Ieova. Ne talia ne Eva ke saga fakavave atu a ia ki te tofotofoga i ana mua. Ne lavea ne tou fafine “te gali o te lakau, mo ona fuaga ko mata ‵lei fāka i te kai.” (Kenese 3:6) Ko oko eiloa i te ‵kese mo te kilokiloga a Iesu ki tofotofoga e tolu! I taimi takitasi, ne seki talia ne ia te tofotofoga tenā ke fai ei ke puli i a ia a ikuga o ana faifaiga. Ne fakalagolago a ia ki te Muna a te Atua kae ne fakaaoga foki ne ia te igoa o Ieova.

¹⁵ Kafai e fakafesagai atu tatou ki tofotofoga ke fai a mea kolā e fakafanoanoa atu ki a Ieova, ne a mea e ‵tau o ‵saga atu tatou ki ei? Ko te lasi o te ‵saga o tatou ki te tofotofoga, ko te malosi foki o te manakoga ‵se. (Iakopo 1:​14, 15) E ‵tau o gasue‵sue fakavave tatou ke tapale keatea te manakoga tenā, faitalia me e foliga faigata a te mea tenā, kae iku eiloa ki te galo atu o se vaega o ‵tou foitino. (Mataio 5:​29, 30) E pelā mo Iesu, e ‵tau o ‵saga tonu atu tatou ki ikuga o ‵tou faifaiga​—te auala ka pokotia ei a te ‵tou fesokotakiga mo Ieova. E ‵tau o masaua ne tatou a pati i tena Muna ko te Tusi Tapu. E mafai fua o fakamaoni atu i te auala tenei me i a Ieova ko te ‵toe Tino tāua i ‵tou olaga.

16-18. (a) Se a te mea e fai ei ke loto vāi‵vai tatou? (e) Se a te mea ka fesoasoani mai ke kufaki tatou i tulaga fakafanoanoa?

¹⁶ Ke mo a e talia ne koe a fakalavelave totino ke kaitaua ei koe ki a Ieova. (Faataoto 19:3) I te taimi ko pilipili ei tatou ki te fakaotiga o te lalolagi masei tenei, e tokouke a tino o Ieova ko oti ne pokotia i fakalavelave mo mea faiga‵ta. E se fakamoe‵moe tatou ki se puipuiga fakavavega i te taimi tenei. Kae e pelā foki mo Iopu, e mafai o loto vāi‵vai tatou māfai ko ‵galo atu a ‵tou tino pele io me logo‵mae i fakalavelave totino.

¹⁷ E seki malamalama a Iopu i te pogai ne talia ei ne Ieova ke ‵tupu a mea, kae e mafai o se malamalama tatou i nisi taimi i te pogai e ‵tupu ei a mea ma‵sei konei. Kāti ne lagona ne tatou a tala e uiga ki ‵tou taina fakamaoni kolā ne ‵mate i se mafuie, e pelā mo te mea ne tupu i Haiti, io me ko nisi fakalavelave o te natula. Io me e iloa ne tatou se tala e uiga ki se tino fakamaoni telā ne fakasaua io me ne mate i se fakalavelave fakafuasei. Io me e mafai o māfatia tatou i nisi tulaga fakafanoanoa io me ko faifaiga sē fakamaoni. E mafai o fai ne te kaitaua ke mafau‵fau tatou, penei: ‘Ieova, kaia e tupu ei a te mea tenei ki a au? Se a taku mea ‵se ne fai?’ (Sapakuka 1:​2, 3) Ne a mea ka fesoasoani mai ke kufaki tatou i vaegā taimi penā?

¹⁸ E ‵tau o fakaeteete tatou ke mo a ma mafau‵fau me i vaegā fakalavelave penā se fakaasiga o te sē fiafia o Ieova. Ne faka‵mafa mai ne Iesu a te manatu tonu i te taimi ne fakasino atu ei a ia ki fakalavelave e lua kolā ne ‵sae aka i ona aso. (Faitau te Luka 13:​1-5.) E māfua mai a puapuaga e uke mai ‘fakalavelave tupu fakafuasei.’ (Failauga 9:​11) Kae faitalia me se a te ikuga o ‵tou puapuaga, e mafai o kufaki tatou māfai e ‵saga tonu atu tatou ki te “Atua o fakamafanafanaga katoa.” Ka tuku mai ne ia ki a tatou a te malosi telā e manakogina ke tumau ei i te fakamaoni.​—2 Kolinito 1:​3-6.

19, 20. Se a te mea ne fesoasoani atu ki a Iesu ke fa‵ki i tulaga fakalumalumagina, kae se a te mea e mafai o fesoasoani mai ke fai foki tatou penā?

¹⁹ Ke mo a e talia ne koe a te fakamatamata io me ko te mataku ke fai mo mea e fakamuamua ne koe. Ne fai ne te loto maulalo o Iesu ke mafai o “tiakina katoatoa ne ia tona ‵malu faka-Atua, kae fai mo tavini.” (Filipi 2:​5-8) Ne mafai ne ia o kufaki i tulaga fakalumalumagina e uke ona ko tena fakalagolago ki a Ieova. (1 Petelu 2:​23, 24) Mai te faiga penā, ne fakamuamua ne Iesu te loto o Ieova, kae ne siki ake ei a ia ki se tulaga tai maluga atu. (Filipi 2:9) Ne manako a Iesu ke filifili ne ana soko a te vaegā olaga tenā.​—Mataio 23:​11, 12; Luka 9:​26.

²⁰ I nisi taimi, e mafai o fakamasiasi tatou ne tofotofoga o tou fakatuanaki. Kae e ‵tau o tali‵tonu tatou e pelā mo te apositolo ko Paulo, telā ne fai mai: “Tenā tonu te pogai ko ala ei au o puapuagatia i mea konei. Ka ko au e se mā, me iloa ne au a ia telā e talitonu au ki ei, kae talitonu foki au me mafai eiloa ne ia o tausi ki a au ke oko ki te Aso telā ne folafola mai ne ia ki a au.”​—2 Timoteo 1:12.

21. Faitalia a te kilokiloga kaimanako a te lalolagi, se a te mea e ‵tau o fakaiku aka ne tatou?

²¹ Ne ‵valo mai te Tusi Tapu me i te vaitaimi tenei, “ka ma‵natu fakapito” a tino. (2 Timoteo 3:2) Tela la, se tioa eiloa o sikomia tatou ne tino kolā e se ‵kilo atu ki a Ieova e pelā me ko te ‵toe Tino tāua i olotou olaga. Ke mo a e maua ne tatou se vaegā kilokiloga kaimanako penā! I lō te fai penā, faitalia me e fepaki tatou mo se tofotofoga, loto vāi‵vai i se fakalavelave, io me ko taumafaiga e fai ke fakamasiasi ei tatou, ke na fakaiku aka ne tatou taki tokotasi ke fakamaoni atu ne tatou me i a Ieova ko te ‵toe Tino tāua eiloa i ‵tou olaga!

Ne a Mea e Mafai o Tauloto ne Tatou Mai . . .

• te auala ne fakaloiloi ei ne Satani a Eva?

• faifaiga a Iopu e uiga ki fakalavelave totino?

• te mea telā ne fakatāua malosi ne Iesu?

[Ata i te itulau e 20]

Ne seki fakamuamua ne Eva a tena fesokotakiga mo Ieova

[Ata i te itulau e 21]

Ne ‵teke atu ne Iesu a tofotofoga a Satani kae ne saga tonu atu a ia o fai te loto o Ieova

[Ata i te itulau e 23]

Te talai atu mai faleie-ki-faleie mai tua o te mafuie i Haiti

I taimi o puapuaga, e mafai eiloa o ‵saga atu tatou ki te “Atua o fakamafanafanaga katoa”