Ke tauloto Mai te Muna a te Atua

Se a te Malo o te Atua?

E ‵sae aka i te mataupu tenei a fesili kolā e mafai o ‵sili ne koe kae fakaasi atu foki te koga e mafai o faitau i ei ne koe a tali mai tau Tusi Tapu. Ka fia‵fia eiloa a Molimau a Ieova ke sau‵tala mo koe ki tali o fesili konei.

1. Se a te Malo o te Atua?

A te Malo o te Atua se pulega faka-te-lagi. Ka sui ne ia a nisi malo katoa kae ka fai ei te loto o te Atua i te lagi mo te lalolagi. Tela la, a te Malo o te Atua ko te faka‵leiga ki ‵tou manakoga mō se pulega ‵lei.​​—Faitau te Tanielu 2:​44; Mataio 6:​9, 10.

E ‵tau o isi se tupu o se malo. Ne filifili ne Ieova tena Tama, ko Iesu, ke fai mo Tupu o Tena Malo.​​—Faitau te Luka 1:​30-​33.

2. Kaia e fai ei a Iesu e pelā me ko te ‵toe Pule ‵Lei?

A te Tama a te Atua ko te ‵toe Tupu ‵lei me i a ia e atafai, e ‵piki ‵mau ki te mea tonu, kae maua ne ia te ‵mana ke fesoasoani atu ki tino. (Mataio 11:​28-​30) Mai tua o tena toetuga, ne fanaka a Iesu ki te lagi kae ne kamata o faka‵tali i te feitu fakaatamai o Ieova. (Epelu 10:​12, 13) Fakamuli loa, ne tuku atu ne te Atua ki a ia a te ‵mana ke kamata o pule mai i te lagi.​​—Faitau te Tanielu 7:​13, 14.

3. Ko oi foki ka pule fakatasi mo Iesu?

Ko oti ne filifili aka ne te Atua se potukau e taku ko ‘tino tapu’ ke pule fakatasi mo Iesu i te lagi. (Tanielu 7:​27) A tino muamua ne filifili ke fai e pelā me ne tino tapu ko apositolo fakamaoni a Iesu. Koi tumau eiloa i te filifili ne Ieova a tagata mo fafine fakamaoni e pelā me ne tino tapu ke oko mai ki aso nei. E pelā mo Iesu, ne faka‵tu aka latou i se foitino faka-te-agaga.​​—Faitau te Ioane 14:​1-3; 1 Kolinito 15:​42-​45.

E tokofia a tino e olo atu ki te lagi? Ne taku ne Iesu latou ki se “lafu foliki.” (Luka 12:32) Ka fakakātoa ne latou te aofaki ko te 144,000, kae ka pule fakatasi mai latou mo Iesu ki te lalolagi.​​—Faitau te Fakaasiga 5:​9, 10; 14:1.

4. Ne kamata anafea o pule mai te Malo o te Atua?

Ne fai a Iesu e pelā me ko te Tupu i te 1914.a Mai tua malie ifo, ne ‵pei ifo ei ne ia a Satani mo ana temoni ki lalo i te lalolagi. (Fakaasiga 12:​7-​10, 12) Talu mai te taimi tenā, ne gasolo aka ei o uke a fakalavelave o tino. A taua, oge, mafuie, mo faifaiga soli tulafono ne vaega o te fakailoga o aso fakaoti o te olaga tenei. (2 Timoteo 3:​1-5) E ‵tau mo tino kolā e ma‵nako ke maua ne latou a mea aoga mai te Malo o te Atua o tauloto ki te auala e fai ei latou e pelā me ne soko o te Tupu, ko Iesu.​​—Faitau te Luka 21:​7, 10, 11, 31, 34, 35.

5. Se a te mea ka fakataunu ne te Malo o te Atua?

E auala i te galuega talai i te lalolagi kātoa, ko oti ne fesoasoani atu a te Malo o te Atua ki te fia miliona o tino mai fenua katoa ke tauloto ki auala o te Atua. (Mataio 24:14) Ka puipui i ei “se vaitino tokouke” o tino fakamaoni kolā ka ‵nofo mai lalo i a Iesu māfai ko fakaseai atu a te fakanofonofoga masei tenei o te lalolagi.​​—Faitau te Fakaasiga 7:​9, 10, 13-​17.

I se vaitaimi o te 1,000 tausaga, ka ‵fuli malielie ei ne te Malo a te lalolagi ke liu palataiso. Fakamuli loa, ka fakafoki atu ne Iesu a te Malo ki tena Tamana. (1 Kolinito 15:​24-​26) E mata, e iloa ne koe se tino telā e mafai o fakaasi atu ne koe ki ei a mea e uiga ki te Malo o te Atua?​​—Faitau te Salamo 37:​10, 11, 29.

[Fakamatalaga fakaopoopo]