Ke ‵Sala Atu ki te Filemu

“Ke salasala ne tatou a mea e tupu ei te filemu.”​​—LOMA 14:19.

1, 2. Kaia e fia‵fia ei a Molimau a Ieova ki te filemu i te vā o latou?

E FAIGATA ke maua ne tatou a te filemu tonu i te lalolagi i aso nei. Ke oko foki loa ki tino kolā e fenua tasi kae fai‵pati ki te ‵gana e tasi, e mavae‵vae eiloa i mea tau lotu, mea fakapolitiki, mo mea faka-fenua. E ‵kese mai i ei, e ‵kau fakatasi eiloa a tino o Ieova faitalia me ne ‵mai latou mai “fenua katoa, matakāiga, tino valevale, ‵gana.”​—Fakaasiga 7:9.

² E seai eiloa se fakalavelave ki te filemu telā e masani o maua ne tatou. E fai pelā me se mea e tāua me e maua ne tatou a “te nofo ‵lei [filemu] o te Atua” e auala i te ‵tou fakatuanaki ki tena Tama, telā ne maligi tena toto ke fakamagalo ei ‵tou agasala. (Loma 5:1; Efeso 1:7) E se gata i ei, e tuku atu ne te Atua tonu a te agaga tapu ki ana tavini fakamaoni, mo fuataga o te agaga tapu telā e aofia i ei te filemu. (Kalatia 5:​22) A te suā pogai o te ‵tou ‵kau fakatasi mo te filemu me e se fai tatou e pelā me ne “tino o te lalolagi.” (Ioane 15:19) I lō te aofia i kinauga fakapolitiki, e tumau eiloa tatou i te sē ‵kau atu ki ei. Ona ko te mea ko oti ne ‘tuki ‵tou pelu ke fai mo mea fakamalū laukele,’ e se aofia eiloa tatou i taua.​​—Isaia 2:4.

3. E mafai pefea o maua ne tatou a te filemu, kae se a te mea ka sau‵tala tatou ki ei i te mataupu tenei?

³ E ‵loto atu a te filemu telā e maua ne tatou mai te suā tino ki te suā tino i lō te ‵kalo keatea mai te fakalogo‵mae atu ki ‵tou taina. E tiga eiloa e aofia i te fakapotopotoga o Molimau a Ieova a tino taki tokotasi mai fenua mo tuu kese‵kese e uke, e “fakatau a‵lofa” eiloa latou. (Ioane 15:17) Ko te ‵tou uiga filemu e fai ei tatou ke “fai te mea ‵lei ki tino katoa, kae fakasilisili ki a latou kolā e i loto i te kāiga Kelisiano.” (Kalatia 6:10) A te filemu o te ‵tou palataiso faka-te-agaga se mea telā e ‵tau o fakatāua kae puipui faka‵lei ne tatou. Tela la, ke na suke‵suke nei tatou ki te auala e mafai ei o ‵sala atu tatou ki te filemu i loto i te fakapotopotoga.

Te Taimi ko Vāi‵vai ei Tatou

4. Ne a ‵tou mea e ‵tau o fai ke maua ei te filemu māfai ne fakalogo‵mae ne tatou se tino?

⁴ Ne tusi mai te soko ko Iakopo, penei: “A tatou katoa e masani o fai mea ‵se. Kafai se tino e seki fai eiloa ne ia se mea ‵se i ana pati, a ia se tino e katoatoa i te ‵lei, ko mafai foki ne ia o pule tona foitino kātoa.” (Iakopo 3:2) Kae e ‵sae aka eiloa a kinauga mo te sē malamalama i vā o taina tali‵tonu. (Filipi 4:​2, 3) Kae ne mafai o faka‵lei aka a fakalavelave i vā o tino taki tokotasi e aunoa mo te fakalavelave atu ki te filemu o te fakapotopotoga. E pelā me se fakaakoakoga, mafaufau la ki te polopolokiga telā e ‵tau o fakagalue ne tatou māfai e iloa ne tatou me ne fakalogo‵mae ne tatou se tino.​​—Faitau te Mataio 5:​23, 24.

5. E mafai pefea o maua ne tatou te filemu māfai e fai ne tatou a mea ‵se?

⁵ Kae e a māfai ne fai ne tatou se mea ‵se i se auala foliki? E mata, e fakamoe‵moe tatou ke vau te tino telā e ‵se o fakatoese mai? E fai mai te 1 Kolinito 13:​5, penei: “A te alofa e se . . . fakamasausau ne ia a mea ‵se a se tino.” Kafai ne logo‵mae tatou, e ‵sala atu tatou ki te filemu mai te fakamagalo kae fakapuli, mai te ‘sē fakamasausau a mea ‵se.’ (Faitau te Kolose 3:​13.) E ‵tau o faka‵lei aka i te auala tenei a tamā mea ‵se kolā e fai ne tatou i aso takitasi o ‵tou olaga, me e mafai o fakaopoopo atu a te mea tenei ki se fesokotakiga filemu mo tino tapuaki e penā foki mo te mauaga o te filemu o te mafaufau. E fai mai se faigamuna poto penei: “Kafai e isi se tino ne fai ne ia se mea ‵se ki a koe . . . ke se saga koe ki ei.”​​—Faataoto 19:11.

6. Ne a mea e ‵tau o fai ne tatou māfai e faigata ‵ki ke fakapuli ne tatou se mea ‵se a se tino ki a tatou?

⁶ Kae e a māfai e faigata ‵ki ke fakapuli ne tatou a te mea ‵se tenā? A te fakasalalau atu ki tino kolā e fia ‵logo i ei e mautinoa eiloa me e sē se auala poto tenā. A te vaegā mea tenā e fakamasei fua ne ia a te filemu o te fakapotopotoga. Ne a mea e ‵tau o fai ke faka‵lei aka ei te fakalavelave tenā i se auala filemu? E fai mai te Mataio 18:​15, penei: “Kafai e agasala mai tou taina ki a koe, fano ki a ia o fakaasi atu a tona ‵se i a koulua ake eiloa tokolua. Kafai e fakalogo mai ki a koe, ko tena uiga ko maua ne koe tou taina.” E tiga eiloa e fakasino atu a te Mataio 18:​15-17 ki te agasala matagā, e fakaasi mai i te agaga tonu o te fakatakitakiga telā ne siki mai i te fuaiupu e 15, me e ‵tau o olo atu tatou ki te tino fai mea ‵se kae taumafai ke toe maua se fesokotakiga filemu mo ia.a

7. Kaia e ‵tau ei o faka‵lei fakavave ne tatou a fakalavelave?

⁷ Ne tusi mai te apositolo ko Paulo, penei: “Kafai koe e kaitaua, ke se takitaki koe ne tou kaitaua ki te agasala, kae sa nofo mo tou kaitaua i te aso kātoa. Sa tukugina se avanoa mō te Tiapolo.” (Efeso 4:​26, 27) “Ke vave o faka‵lei koulua mo te tino telā e tagi me nofo mo koe ana mea, ka koi sa‵sale koulua i te auala o olo ki te fakamasinoga,” ko muna a Iesu. (Mataio 5:​25) Ke ‵sala atu ki te filemu, kae faka‵lei fakavave a fakalavelave. Kaia? Me i te faiga tenā e puipui i ei te vā o se tokolua mai te gasolo o masei atu e pelā mo te pakiaga telā e se mafai o faka‵lei. Ke mo a ma talia ne tatou a te fakamatamata, te loto masei, io me ko te fakatāua malosi o kope faka-te-foitino ke taofi ei tatou mai te faka‵lei fakavave o kinauga kolā e ‵sae aka.​​—Iakopo 4:​1-6.

Te Taimi e Aofia ei a Tino e Tokouke i se Kinauga

8, 9. (a) Ne a kilokiloga kese‵kese kolā ne ‵sae aka i te fakapotopotoga i Loma i te senitenali muamua? (e) Se a te polopolokiga ne tuku atu ne Paulo ki Kelisiano i Loma e uiga ki te lotou fakalavelave?

⁸ I nisi taimi a kinauga i loto i te fakapotopotoga e se aofia fua i ei se tokolua kae e tokouke atu. Tenā eiloa te mea ne tupu ki Kelisiano i Loma telā ne tusi atu ki ei te apositolo ko Paulo. Ne isi se kinauga i te vā o tino Iutaia mo Kelisiano mai Fenua Fakaa‵tea. E mautinoa eiloa me ne fakaseaoga ne nisi tino i te fakapotopotoga a latou kolā e vāi‵vai olotou loto lagona. E fakamasino ne vaegā tino penā i se auala sē ‵tau a nisi tino ki olotou fakalavelave totino. Ne a pati fakatonutonu ne tuku atu ne Paulo ki te fakapotopotoga?​​—Loma 14:​1-6.

⁹ Ne polopoloki ne Paulo a tino taki tokotasi i feitu e lua o te kinauga. Ne fai atu a ia ki a latou kolā ne malamalama me i a latou e se ‵nofo mai lalo i te tulafono faka-Mose ke se fakaseaoga ne latou a olotou taina. (Loma 14:​2, 10) E mafai o fakavāivāi ne vaegā kilokiloga penā a tino tali‵tonu kolā e takalia‵lia ma ‵kai ki mea kolā e se talia i lalo i te Tulafono. “Sa fakamaseigina a te galuega a te Atua ona ko mea‵kai,” ko te fakamalosiga a Paulo. “E sē se mea ‵lei te kai ki ‵kano manu, io me inu ki uaina io me e fai a so se mea e pakū ei tou taina.” (Loma 14:​14, 15, 20, 21) I te suā feitu, ne polopoloki ne Paulo a Kelisiano kolā ne akoakogina olotou loto lagona ke mo a ma fakamasino ne latou a nisi tino kolā e maua ne latou se kilokiloga ‵loto e pelā me i a latou e se fakamaoni. (Loma 14:13) Ne fai atu a ia ‘ki tino katoa ke se manatu fia ma‵luga latou, ka ke mafau‵fau ifo ki a latou eiloa.’ (Loma 12:3) Mai te polopoloki atu ki feitu e lua o te fakalavelave tenei, ne tusi mai a Paulo, penei: “Ke salasala ne tatou a mea e tupu ei te filemu, mo mea e fakatau putiputi ake ei tatou.”​​—Loma 14:19.

10. E pelā mo te mea ne tupu i te fakapotopotoga i Loma i te senitenali muamua, ne a mea e manakogina ke faka‵lei aka ei a kinauga i aso nei?

¹⁰ E mafai o mautinoa i a tatou me ne ‵saga faka‵lei atu a te fakapotopotoga i Loma ki te polopolokiga a Paulo kae fai ne latou a ‵fuliga aoga. Kafai e ‵sae aka a kinauga i vā o taina Kelisiano i aso nei, e mata, e se ‵tau o faka‵lei aka ne tatou a kinauga konā mai te ‵sala atu mo te loto maulalo ki fakatakitakiga mai te Tusi Tapu? E pelā mo te mea ne tupu ki tino i Loma, e ‵tau o fai ne tino kolā e fakatau kinau a fakamafulifuliga ko te mea ke “fakatau ola filemu foki” latou.​​—Maleko 9:​50.

Te Taimi ko Manakogina ei se Fesoasoani

11. Se a te mea e ‵tau o fakagalue aka ne se toeaina māfai e manako se Kelisiano ke faipati atu ki a ia e uiga ki sena fakalavelave mo se taina talitonu?

¹¹ Kae e a māfai e manako se Kelisiano o faipati atu ki se toeaina e uiga ki se fakalavelave o sena kāiga io me se tino talitonu? E fai mai te Faataoto 21:​13, penei: “Kafai koe e se fiafia o fakalogo ki fakatagi a tino ma‵tiva, ko tena uiga a tau tagi mō se fesoasoani, e se mafai o lagona.” E mautinoa eiloa me e mafai ne toeaina o ‘faka‵logo ki te fakatagi.’ Kae fakamasaua mai se suā faigamuna, penei: “A te tino telā e muamua o faipati i te fono tulafono e mata tonu tena fakamatalaga, kae kafai ko fakafesili atu ne te tagata telā e fakafesagai ki a ia, ko lavea atu ei me e isi ne mea sē ‵tonu i tena fakamatalaga.” (Faataoto 18:17) E ‵tau mo te toeaina o fakalogologo mo te atafai, kae e ‵tau o fakaeteete a ia ke mo a ma oso i te tino telā e lipoti atu ne ia a te tino fai mea ‵se. Kafai ko oti ne fakalogologo a ia ki te mea tenā, e mafai o fakafesili ne ia me e mata, ne faipati atu te tino fai mea ‵se ki te tino telā ne fakamāfua ne ia te fakalavelave io me ikai. E mafai o toe onoono te toeaina ki auala faka-te-Tusi Tapu kolā e mafai o fakaaoga ne te tino fai mea ‵se ke maua ei te filemu.

12. Taku mai ne fakaakoakoga kolā e fakaasi mai i ei a te fakamataku o te gasue fakavave māfai ko oti ne fakalogologo ki se fameo.

¹² E tolu a fakaakoakoga i te Tusi Tapu kolā e faka‵mafa mai i ei a te fakamataku o te pati ‵pole māfai ko oti ne fakalogologo ki se kinauga a se tino e tokotasi. Ne talitonu a Potifala ki te tala a tena avaga me ne taumafai a Iosefa o pukemālō tou fafine. Ona ko te kaitaua telā e seai se fakavae, ne ‵pei atu ei ne Potifala a Iosefa ki te falepuipui. (Kenese 39:​19, 20) Ne talitonu a te tupu ko Tavita ki a Sipa, telā ne fai atu me i tena pule, ko Mefiposeta e oso i fili o Tavita. Ne tali fakavave atu a Tavita, penei: “A mea katoa a Mefiposeta ke puke mā koe.” (2 Samuelu 16:4; 19:​25-​27) Ne fakailoa atu ki te tupu ko Aletaseta me i tino Iutaia ko toe faite ne latou a ‵pui o Ielusalema kae ka taua atu latou ki te emupaea o Pelesia. Ne talitonu a te tupu ki te lipoti ‵se tenā kae fai tena fakatonuga ke taofi aka te toe faitega o Ielusalema. E pelā me ko te ikuga, ne taofi ne tino Iutaia a te galuega i te Faletapu o te Atua. (Esela 4:​11-​13, 23, 24) E tau‵tali atu eiloa a toeaina Kelisiano mo te ‵poto ki pati fakatonutonu a Paulo ki a Timoteo ke ‵kalo keatea mai te fai fakavave o fakamasinoga.​​—Faitau te 1 Timoteo 5:​21.

13, 14. (a) Ne a tapula e maua ne tatou katoa e uiga ki kinauga a nisi tino? (e) Ne a fesoasoani e maua ne toeaina ke fai ei a fakamasinoga ‵tonu e uiga ki taina tali‵tonu?

¹³ Kafai foki loa ko sae mai te ‵tonuga o te kinauga, se mea tāua ke iloa atu me kafai “te tino e muna mai i a ia e poto i mea faka-te-lalolagi; e tonu ka ko te mea e se maua ne ia te poto tonu telā ko te iloa o te Atua.” (1 Kolinito 8:2) E mata, e iloa ‵lei ne tatou a fakamatalaga katoa kolā e iku atu ki kinauga? E mata, e mafai o malamalama katoatoa tatou i uiga o tino kolā e aofia i ei? Kafai ko fai te fakamasinoga, e tāua ‵ki eiloa ke mo a ma fakaloiloigina a toeaina ne mea sē ‵tonu, auala faitogafiti, io me ko tala! A te Famasino a te Atua telā ne filifili, ko Iesu Keliso e fakamasino mai mo te amiotonu. E se “fakamasino ne ia a tino i olotou foliga io me ko muna fai‵pati a latou.” (Isaia 11:​3, 4) I lō te fai penā, ne takitaki eiloa a Iesu ne te agaga o Ieova. E maua foki ne toeaina Kelisiano a mea aoga mai te takitakiga a te agaga tapu o te Atua.

¹⁴ A koi tuai o fai olotou fakamasinoga e uiga ki olotou taina tali‵tonu, e ‵tau o ‵talo atu a toeaina mō te fesoasoani o te agaga o Ieova kae fakalago‵lago ki tena takitakiga mai te sau‵tala ki te Muna a te Atua mo tusi a te tavini fakamaoni kae poto.​​—Mataio 24:45.

E Mata, e Tāua te Filemu i Mea Katoa?

15. Ko te taimi fea e ‵tau ei o lipoti ne tatou se agasala matagā telā e iloa ne tatou?

¹⁵ E pelā me se Kelisiano, ne fakamalosigina tatou ke ‵sala atu ki te filemu. Kae e fai mai foki te Tusi Tapu, penei: “Ka ko te poto mai te lagi, se poto e tulaga muamua i te ‵ma, e filemu.” (Iakopo 3:​17) A te filemu e tulaga lua ki te ‵ma, telā ko te taofi ‵mau ki tulaga ‵ma i mea tau amioga a te Atua kae fakafetaui aka ana fakatakitakiga amio‵tonu. Kafai e iloa ne se Kelisiano se agasala matagā a se taina talitonu, e ‵tau o fakamalosi atu a ia ki te tino tenā ke fakaasi tena agasala ki toeaina. (1 Kolinito 6:​9, 10; Iakopo 5:​14-​16) Kafai e se fai ne tino fai mea ‵se a te mea tenā, e ‵tau o lipoti atu ne te Kelisiano telā e iloa ne ia a te agasala tenā. A te sē fai ne ia o te mea tenā ona ko taumafaiga ke fakatumau te vā filemu mo tino agasala e fai ei ke aofia a ia i te mea ‵se tenā.​​—Levitiko 5:1; faitau te Faataoto 29:24.

16. Ne a mea e mafai o tauloto ne tatou mai te mea ne tupu ki a Ieu mo te tupu ko Iolamo?

¹⁶ A te tala e tasi telā ne aofia i ei a Ieu e fakaasi mai i ei me e ‵tau o fakamuamua a te amiotonu o te Atua i te filemu. Ne uga atu ne te Atua a Ieu ke fakaoko atu Tena fakasalaga ki te kāiga o Aapo. Ne tele atu a te tupu masei ko Iolamo, te tama tagata a Aapo mo Iesepela, i tena kaliota ke fetaui mo Ieu kae fai atu, penei: “A koe na e vau mo te filemu?” Ne saga atu pefea a Ieu ki ei? Ne tali atu a ia: “E maua pefea te filemu manafai koi ‵mautakitaki mai eiloa a uiga fakataulaitu mo te ifo ki tupua telā ne kamata ne tou mātua ko Iesepela?” (2 Tupu 9:​22) Ona ko te mea tenā, ne tapale aka te kausana a Ieu kae sana atu ki a Iolamo ke oko eiloa ki tena fatu. E pelā loa mo Ieu, e ‵tau mo toeaina o se gutugutulua ki fakaikuga, io me ki tino agasala kae se sala‵mo ko te mea ke tausi ei te filemu. E faka‵tea ne latou a tino agasala kolā e se sala‵mo ko te mea ke mafai ne te fakapotopotoga o maua se vā filemu mo te Atua.​​—1 Kolinito 5:​1, 2, 11-​13.

17. Se a te tusaga e fai ne Kelisiano katoa ke tausi te filemu?

¹⁷ A te ukega o kinauga i vā o taina e se aofia i ei a mea ‵se kae matagā kolā e manakogina ke fai ei a fakamasinoga. Tela la, se mea ‵lei ke se fakaasi atu a mea ‵se a nisi tino ona ko te alofa. “Kafai koe e manako ki tino ke fia‵fia atu ki a koe, e ‵tau o fakamagalo ne koe a mea ‵se a latou e fai atu ki a koe,” ko pati i te Muna a te Atua, “kafai e tausisi faeloa koe ki mea ‵se ne fai atu ki a koe, e ofa fua ne koe a te vā ‵lei o koe mo ou taugasoa.” (Faataoto 17:9) A te fakalogo ki pati konā ka fesoasoani mai ki a tatou katoa ke tausi te filemu i te fakapotopotoga kae fakatumau se fesokotakiga ‵lei mo Ieova.​​—Mataio 6:​14, 15.

A te ‵Sala Atu ki te Filemu e Maua i ei a Fakamanuiaga

18, 19. Ne a mea aoga e maua ne tatou mai te ‵sala atu ki te filemu?

¹⁸ A te ‵tou ‵sala atu ki “mea e tupu ei te filemu” e aumai ne ia a fakamanuiaga e uke. E fia‵fia tatou me e maua ne tatou se fesokotakiga pili mo Ieova māfai e tau‵tali tatou i ana auala, kae fesoasoani atu foki tatou ki te filemu o te ‵tou palataiso faka-te-agaga. A te ‵sala atu ki te filemu i loto i te fakapotopotoga e fesoasoani mai foki ke lavea ne tatou a auala kolā e mafai o tausi ne tatou a te vā filemu mo latou kolā e talai atu ne tatou ki ei a te “tala ‵lei o te filemu.” (Efeso 6:​15) Ko toka ‵lei eiloa tatou ke ‘a‵lofa ki tino katoa, kae ke kufaki i amioga ma‵sei.’​​—2 Timoteo 2:​24.

¹⁹ Ke masaua foki “me i tino ‵lei mo tino sē ‵lei ka faka‵tu mai katoa mai te mate.” (Galuega 24:15) Kafai ko fakataunu a te fakamoemoega tenā i te lalolagi, ka toe faka‵tu mai ei ki te ola a te fia miliona o tino kolā e kese‵kese olotou tulaga, uiga mo kilokiloga​​—kae ka toe ‵foki eiloa a taimi konā ki “te kamataga o te lalolagi”! (Luka 11:​50, 51) Ka fai eiloa a te akoako atu o tino kolā e toe‵tu mai, ki auala o te filemu e pelā me se tauliaga sili. Ko tafaga la te lasi o te fesoasoani e maua ne tatou mai i mea kolā e fai nei ne tatou, ke fai e pelā me ne tino faka‵tupu filemu i te taimi tenā!

[Fakamatalaga fakaopoopo]

Ne a Mea ne Tauloto ne Koe?

• E mafai pefea ne tatou o tausi a te filemu māfai ne kinau tatou mo se tino?

• Ne a mea e ‵tau o fai ke tausi te filemu māfai ne fai ne tatou se mea ‵se?

• Kaia e sē se faiga poto ke oso atu ki kinauga a nisi tino?

• Fakamatala mai a te pogai e se ‵tau ei o tausi ne tatou a te filemu i mea katoa.

[Ata i te itulau e 25]

E alofa eiloa a Ieova ki a latou kolā e fakamagalo ne latou a nisi tino