E Mata, e Isi se Tino e Māfua Mai i ei a Mea Ma‵sei Katoa Konei?

“NE FAKATALOFA māua mo te tiapolo.” Ko pati a te pule o te United Nation i Rwanda, telā ne seki mafai o fakagata ne latou a te fakatau tamatega i te vā o itukāiga i te fenua tenā talu mai te 1994. I fakamatalaga e uiga ki te matagā o te mea ne tupu i te taimi tenā, ne fai mai a te suā tagata, penei: “Kafai koi mafaufau se tino me i a Satani e sē se tino tonu, ke vau la o onoono ki te mea ne fai ne au i te matugā tanuga lasi o tino ‵mate i Rwanda.” E mata, ne fai eiloa ne te Tiapolo a vaegā taumafaiga penei?

E fai mai a te tokoukega o tino me i amioga fakasaua kae solitulafono konei e se ko galuega e fai ne se agaga matagā kae sē matea. E tali‵tonu a tino e tokouke me i mea konei ko ikuga o uiga ma‵sei i loto i tino, a ko te pogai tonu o mea ma‵sei konei ko ‵tou lagonaga ma‵sei telā ne fa‵nau mai mo tatou. E mafau‵fau a nisi tino me e isi se potukau o tino mau‵mea kae ma‵losi, e pelā me se fakapotopotoga ‵funa i te lalolagi kātoa, ko oti ne fakamalosi ne ia a tino ko te mea ke pule atu latou ki te lalolagi. Kae e isi foki ne tino kolā e ‵losi atu ki malo o tagata mō faifaiga sē fakamaoni mo logo‵maega katoa kolā e matea ne latou.

Se a te mea e talitonu koe ki ei? Kaia ko ‵fonu ei te lalolagi i aso nei i amioga ma‵sei, amioga fakasaua, amioga fakama‵taku, mo logo‵maega faitalia a taumafaiga ke fakafeoloolo aka a mea konā? Kaia e foliga mai ei me e gasue‵sue fakavave a tino katoa o olo atu i se auala telā ka fakaseai i ei ne latou a latou eiloa, e aunoa mo te faka‵logo ki faka‵pulaga e uke? E mata, e isi se tino e māfua mai i ei a mea katoa konei? Ko oi e pule tonu ki te lalolagi? E mafai o poi koe i te tali e uiga ki ei.