4 A te Atua e Fapito e Mata, e Tonu te Manatu tenā?

Mea kolā kāti ne logo koe i ei: “A te Atua e pule i te lalolagi tenei, a ko mea kolā e ‵tupu nei, ko te loto eiloa o te Atua. Ona ko te mea ko ‵fonu a te lalolagi i te uiga fapito, faifaiga sē fakamaoni, mo ‵tekemaiga, e ‵tau eiloa o ‵losi atu ki te Atua e uiga mō mea konā.”

Mea kolā e akoako mai i te Tusi Tapu: E se māfua mai i te Atua a faifaiga sē fakamaoni i te lalolagi nei. E uiga ki a Ieova, e fai mai te Tusi Tapu, penei: “E tonu kae amiotonu i ana auala katoa.”—Teutelonome 32:4.

A te Atua e kaimalie ki tino katoa, e aofia i ei a tino amio ma‵sei. E pelā me se fakaakoakoga, “e fakamaina mai ne ia tena la ki tino amio ma‵sei mo tino amio ‵lei, e faka‵to foki ne ia a te vaiua ki tino amio‵tonu mo tino amio ma‵sei.” (Mataio 5:45) E ‵pau katoa ki a ia a tino mai fenua mo tuu kese‵kese, e pelā eiloa mo te mea e fakaasi mai i te Galuega 10:34, 35: “Te Atua e se fakailoga tino. So se tino o so se fenua e mataku ki te Atua, kae amiotonu foki, e talia faeloa a ia ne te Atua.”

Kae se a te māfuaga o faifaiga sē fakamaoni? E fakaiku aka ne tino e tokouke ke fai ne latou a faifaiga fapito, kae e se tau‵tali ki te fakaakoakoga a te Atua e uiga ki te fai mea tonu. (Teutelonome 32:5) E fakaasi mai foki i te Tusi Tapu me e talia ne te Atua tena fili ko te Tiapolo, ke pule atu ki luga i te lalolagi.a (1 Ioane 5:19) Kae ko pili fua o palele atu te taliaga a te Atua ki te pulega sē tonu tenei. Ko oti ne fakatoka ne ia a auala ke “fakamalepe a te galuega a te Tiapolo.”—1 Ioane 3:8.

Te auala e fesoasoani mai ei a te iloaga e uiga ki te munatonu ki a koe: E mafai eiloa o manavase koe mai te kilo atu ki lipoti e uke e uiga ki te fai valevale, ‵tekemaiga, mo faifaiga sē fakamaoni. Kafai e iloa ne koe te pogai e ‵tupu ei a fakalavelave ka fesoasoani atu ki a koe ke malamalama i te pogai e ma‵sei ei a tulaga o mea i aso nei mo te pogai e se mafai ei o manuia faeloa a taumafaiga a tāgata ke fai a te lalolagi kātoa mo koga gali. (Salamo 146:3) I lō te fakamāumāu o taimi mo malosi ke fai a fakama‵fuliga kolā e mafai fua o aoga mō se taimi toetoe, e mafai o maua ne koe se fakamoemoega gali mō aso mai mua telā e fakavae ki te talitonu ki folafolaga a te Atua.—Fakaasiga 21:3, 4.

A te malamalama i te māfuaga tonu o faifaiga sē fakamaoni e mafai o fesoasoani mai ki a tatou māfai e fakafesagai tatou mo se fakalavelave i te kāiga. Kafai e se ‵lei a faifaiga e fai ki a tatou, e mafai o fai tatou pelā mo te tavini a te Atua ko Sapakuka, telā ne tagi, penei: “A te tulafono ko vāivāi ka ko se aoga foki, ka ko te fai mea tonu ko se fai.” (Sapakuka 1:4) Ne seki polopoloki ne te Atua a Sapakuka ona ko ana pati konei. Kae ne fakatalitonu atu te Atua ki Tena tavini me ko oti ne fakatoka ne Ia se taimi ke faka‵tonu aka ei a mea kae ne fesoasoani atu ki a Sapakuka ke maua ne ia te fiafia i taimi o fakalavelave. (Sapakuka 2:2-4; 3:17, 18) I se auala tai ‵pau, a te talitonu ki te folafolaga a te Atua ke faka‵tonu aka a faifaiga sē fakamaoni e mafai o fesoasoani atu ke maua ne koe a te filemu o te mafaufau i se lalolagi sē fai mea tonu.

[Fakamatalaga fakaopoopo]

[Ata i te itulau e 7]

E mata, e ‵tau o ‵losi atu ki te Atua mō logo‵maega mo faifaiga sē fakamaoni?

[Manatu tāua i te itulau e 7]

© Sven Torfinn/Panos Pictures