Apelaamo Se Tagata Loto Malosi

Ne kilo atu Apelaamo ki tena kāiga mo ana tavini i te taimi koi fakatoka ei latou o olo atu ki Kanana. (Kenese 12:1-5) I te kilokilo atu ki tino e tokouke konei e fakalagolago atu ki ia mō te tausiga o te olaga, ne lavea ‵lei ei ne Apelaamo a te tiute e ‵tau o fai ne ia ki a latou. E tuku atu pefea ne Apelaamo a mea e ma‵nako latou ki ei kae ‵nofo atu i se fenua fakaatea? E mata, ne faigofie te tausi atu ki a latou i Ulo, se koga maumea kae lauusiusi, e ola ‵lei, kae lava a vai e maua i ei? Kae e a māfai e masaki io me e mate a ia i te fenua fou tenā? Ko oi ka tausi atu ki tena kāiga? Ka sē talia ne Apelaamo ke fakavāivāi a ia ne tena mataku māfai e isi ne mea e manavase a ia ki ei. Ko oti ne fakaiku aka ke gasuesue a ia kae fakalogo ki fakatonuga a te Atua faitalia me se a te ikuga—se fakailoga o te loto malosi.

SE A TE LOTO MALOSI? Se uiga telā e lavea i ei a te malosi mo te loto toa—e ‵kese mo te mata mā io me ko te mata mataku. Ke loto malosi, e se fakauiga i ei me e se mafai lele eiloa o ma‵taku tatou. I lō te fai penā, e gasuesue eiloa te tino telā e maua ne ia te loto malosi mai te Atua faitalia tena mataku.

NE FAKAASI ATU PEFEA NE APELAAMO A TE LOTO MALOSI? Ne loto fiafia eiloa Apelaamo ke ‵kese a ia mai tino e tokouke. Ne ola aka Apelaamo i se koga telā e tapuaki atu ei a tino ki tupua mo atua e tokouke. E ui ei, ne seki taofi aka ne ia te faiga o te mea tonu ona fua ko te mataku i manatu o nisi tino. Tela la, ne loto malosi eiloa Apelaamo ke ola a ia i se olaga telā e ‵kese mo nisi tino mai te filifili aka ke tapuaki atu fua a ia ki te Atua e tokotasi—“te Atua Tafasili i te Malosi,” ko Ieova.—Kenese 14:21, 22.

Ne fakamaluga aka ne Apelaamo a te tapuaki atu ki te Atua tonu i lō kope faka-te-foitino. Ne loto fiafia a ia o tiakina tena olaga gali i Ulo kae fanatu ki te koga lavaki. E talitonu katoatoa a ia me ka tausi atu a Ieova ki ana manakoga faka-te-foitino. Ao, i te gasologa o tausaga, kāti ko oti ne mafaufau Apelaamo ki nisi mea ‵gali ne maua ne ia i Ulo. Kae e mautinoa eiloa i a Apelaamo me ka tausi atu faeloa a Ieova ki a ia mo tena kāiga. Ne maua ne Apelaamo a te loto malosi ke fakalogo ki fakatonuga a te Atua mai te ‵piki faeloa ki a Ieova e pelā me ko te ‵toe Tino tāua eiloa i tena olaga.

NE A AKOAKOGA E MAUA NE TATOU? E ‵tau o ati aka ne tatou a te loto malosi ke faka‵logo ki a Ieova mai te fakaakoako atu ki a Apelaamo faitalia me e se fai penā a tino i ‵tou tafa. E pelā me se fakaakoakoga, e akoako mai te Tusi Tapu me kāti ka ‵teke atu a taugasoa ‵pili io me ko kāiga ki a latou kolā e tumau i te tali‵tonu ki a Ieova. (Ioane 15:20) Ka ‵lago malosi atu tatou ki ‵tou talitonuga i se auala āva māfai e lotoma‵lie tatou ki mea ko oti ne tauloto ne tatou e uiga ki a Ieova. —1 Petelu 3:15.

E mafai foki o tali‵tonu fakamaoni tatou ki tautoga a te Atua me ka tausi ne ia a latou kolā e fakatuanaki atu ki a ia. E tuku mai ne te vaegā talitonu tenā a te loto malosi ke fakavae ‵tou olaga ki mea faka-te-agaga i lō te ‵saga atu ki kope faka-te-foitino. (Mataio 6:33) Ke mafaufau ki te auala ne fai ei ne se kāiga e tasi a te mea eiloa tenā.

E tiga eiloa ko tokolua a lā tamaliki tāgata fo‵liki, ne ma‵nako eiloa a Doug mo Becky o olo atu ki se atufenua telā e manakogina malosi i ei a tino talai o te tala ‵lei i te Tusi Tapu. I te otiga ne iloilo faka‵lei kae ‵talo faeloa, ne fakaiku aka ne lāua ke fakataunu eiloa te lā palani. “E manakogina te loto malosi ke fakatoka a tamaliki kae ga‵sue matou o olo e aunoa mo te iloa me ne a mea ka ‵tupu ki a matou,” ko pati a Doug. “Kae i te kamataga o mafau‵fau māua ke olo atu ki se isi koga, ne sau‵tala eiloa māua ki te fakaakoakoga a Apelaamo mo Sala. A te mafaufau atu ki te auala ne tali‵tonu fakamaoni ei laua ki a Ieova—mo te auala ne fesoasoani atu ei a ia ki a lāua—ne fesoasoani malosi mai eiloa ki a māua.”

E uiga mo te lā olaga i se fenua fakaatea, e fai mai a Doug: “Ko oti ne fakamanuiagina māua i se auala lasi ‵ki.” E fakamatala mai a ia: “Ona ko te faigofie o te olaga i konei, ko mafai ei o fai fakatasi ne matou a mea e manakogina i te aso e pelā me se kāiga—te galuega talai, sau‵tala fakatasi, mo te ta‵fao fakatasi mo tamaliki tāgata. Tela la, ko lasi atu te saolotoga e maua ne latou ke fai a mea kolā e ‵lei ki te kāiga mo te tapuakiga.

Ao, e se ko tino katoa e mafai o fai se vaegā fakamafuliga lasi penā. E ui ei, e mafai ne tatou katoa o fakamuamua te ‵tou tapuakiga ki te Atua mai te tautali atu i te fakaakoakoga a Apelaamo kae tali‵tonu tatou me ka ‵lago mai a ia ki a tatou. Kafai e fai tatou penā, ko tau‵tali atu eiloa tatou i te fakatakitakiga a te Tusi Tapu “ke loto ‵toa tatou o fai aka penei: ‘A Ieova ko toku fesoasoani, ka se mataku lele au.’”—Epelu 13:5, 6.

[Ata i te itulau e 7]

Se Fafine Amoiatua kae se Avaga Tāua

Ne avaga a Sala ki se tagata e lasi tena fakatuanaki. Ne fai ne te fafine amioatua tenei se fakaakoakoga tafasili i te gali. A te tonuga loa, e tolu taimi e faipati te Tusi Tapu e uiga ki a ia mai te fakaaogaga o tena igoa ke fai pelā me se fakaakoakoga ke tau‵tali ki ei a fāfine amioatua. (Isaia 51:1, 2; Epelu 11:11; 1 Petelu 3:3-6) E tiga eiloa e se uke a mea e fakaasi mai ne te Tusi Tapu e uiga ki te fafine fakaofoofogia tenei, e mafai eiloa o lavea ne tatou me isi ne ana uiga ‵lei.

Pelā me se fakaakoakoga, ke mafaufau ki faifaiga a Sala i te taimi ne fakailoa atu ei ne Apelaamo ki ia a te fakatonuga a te Atua ke tiakina a Ulo. E mata, kai mafaufau aka a ia me ka olo latou ki fea kae kaia foki e olo ei latou? E mata, ne manavase a ia ki kope faka-te-foitino kolā e manakogina ne latou? E mata, ne fanoanoa tou fafine me ka tiaki ne ia ana taugasoa mo kāiga me e se iloa ne ia me tefea te taimi ka toe fetaui ei latou? E seai se fakalotolotolua me ne oko eiloa a vaegā mafaufauga penā ki tena mafaufau. Kae faitalia me se a, ne loto fiafia eiloa a Sala o fano mo te talitonu me ka fakamanuia a ia ne Ieova ona ko tena fakalogo.—Galuega 7:2, 3.

Ne fai a Sala mo fai se avaga tafasili i te ‵lei i tafa o te fai pelā me se tavini fakalogo a te Atua. I lō te fakatau‵fai mo tena avaga me ko oi e pule atu ki mea i te kāiga, ne ati aka eiloa ne Sala a te āva tonu ki tena avaga kae ‵lago atu ki a ia i te taimi ne ‵taki atu ei ne ia te lā kāiga. I te auala tenei, ne teu ne tou fafine a ia eiloa— fai ke taulekaleka a ia—e auala i ana uiga.—1 Petelu 3:1-6.

E mata, e mafai o aoga a vaegā uiga penā ki fāfine a‵vaga i aso nei? “Ne akoako mai ki au a te fakaakoakoga a Sala me e ‵tau o faipati atu au kae fakaasi atu oku manatu ki taku avaga e aunoa mo te mataku,” ko pati a te fafine e igoa ki a Jill, telā ne fiafia eiloa i tena olaga avaga i tausaga e silia atu i te 30. “I te taimi foki tenā,” toe fai mai tou fafine, “e pelā me se ulu o te kāiga, e maua ne taku avaga a te tiute ke fai ne ia a te ‵toe fakaikuga. Te taimi eiloa e oti ei ne fai te mea tenā, i o oku te tiute ke fai so se mea e mafai o fai ke fakagalue aka a te ikuga tenā.”

E se taumate e tenei eiloa te ‵toe akoakoga tāua e tauloto ne tatou mai i a Sala: E tiga eiloa ne taulekaleka ‵ki a ia, ne seki talia ne Sala a tena taulekaleka faka-te-foitino ke fai ei a ia ke fakamatamata. (Kenese 12:10-13) I lō te fai penā, ne loto maulalo eiloa tou fafine o ‵lago atu ki a Apelaamo i taimi ‵lei mo taimi ma‵sei o te lā olaga. E seai se fakalotolotolua me i a Apelaamo mo Sala se tauavaga a‵lofa, fakamaoni, kae loto maulalo—se tauavaga telā ne maua tonu mai i ei a fakamanuiaga ki a lāua tokolua.