Apelaamo—Se Taugasoa o te Atua

E TASI te koga ne olo atu a tino o ‵nofo i ei mai tua ifo o te Lolo ko Ulo. Ne fai te fakai tenā mo fai se fa‵kai tāua mo nisi fale ‵gali i ei. Kae ne tapuaki atu a tino i ei ki atua ‵se. Tenā foki eiloa a te mea ne fai ne latou i Papelu. Ne seki fai a tino i Ulo mo Papelu pelā mo Noa mo tena tama tagata ko Semu, kolā ne tumau i te tavini atu ki a Ieova.

Fakamuli loa, i te 350 tausaga mai tua ifo o te lolo, ne mate atu a te tino fakamaoni ko Noa. Kae ko te lua tausaga fua mai tua ifo i ei, ne fanau mai ei a te tagata telā e lavea ne koe i te ata tenei. Ne fai a ia mo fai se tino tāua ‵ki ki te Atua. A tena igoa ko Apelaamo. Ne ‵nofo a ia mo tena kāiga i te fa‵kai tenā ko Ulo.

I te aso e tasi ne fai atu penei a Ieova ki a Apelaamo: ‘Tiaki a Ulo mo ou kāiga, kae fano ki se fenua telā ka fakaasi atu ne au ki a koe.’ E mata, ne fakalogo a Apelaamo ki te Atua kae tiaki ne ia tena olaga gali i Ulo? Ao, ne fakalogo eiloa a ia. Kae ona ko te mea ne fakalogo faeloa a Apelaamo ki te Atua, ne iloga a ia pelā me se taugasoa o te Atua.

E isi ne tino o te kāiga o Apelaamo ne olo fakatasi atu mo ia i te taimi ne tiakina ei ne ia a Ulo. Ne fano foki tena tamana ko Tala. E penā foki a te tama a tena taina ko Lota. Kae ne fano foki eiloa a te avaga o Apelaamo ko Sala. Fakamuli ifo ne oko tasi atu latou ki te koga e igoa ki a Halana, telā ne mate ei a Tala i konā. Ko ‵mao ‵ki latou mai Ulo.

Mai tua malie ifo ne tiaki ne Apelaamo mo tena kaukāiga a Halana kae ne olo atu ki te fenua ko Kanana. I konā ne fai atu penei a Ieova: ‘Tenei te fenua ka tuku atu ne au ki otou tama‵liki.’ Ne nofo Apelaamo i Kanana i faleie.

Ne kamata o fesoasoani atu te Atua ki a Apelaamo ko te mea ke maua ne ia a lafu mamoe mo nisi manu e uke mo te fia selau foki o tavini. Kae ne seki maua ne laua mo Sala ne tama‵liki.

I te taimi ko 99 ei a tausaga o Apelaamo, ne fai atu penei a Ieova: ‘Au e tauto atu me ka fai koe mo tamana ki atufenua e uke o tino.’ Kae ne mafai pefea o tupu te mea tenei, me i a Apelaamo mo Sala ko tō ma‵tua ke fai se tamaliki?