Te Faiga o Taulaga ki a Ieova mo te Loto Kātoa

“I so se mea e fai ne koutou, fai mo te loto kātoa e pelā eiloa me e fai ne koutou mō Ieova.”​—KOLOSE 3:23.

ONOONO AKA ME E MAFAI NE KOE O TALI MAI A FESILI KONEI:

E mafai pefea o ‵viki atu tatou ki a Ieova i ‵tou mea e fai i aso takitasi?

Ne a taulaga e ofo atu ne tatou i te ‵tou tapuakiga ki te Atua?

Ne a ‵tou kope e mafai o ofo atu ki a Ieova?

1-3. (a) E mata, ne fakauiga te mate o Iesu i luga i te lakau fakasaua me ko se manako a Ieova ke fai ne tatou so se taulaga? Fakamatala mai. (e) Ne a fesili e ‵sae aka e uiga ki te faiga o ‵tou taulaga i aso nei?

NE FAKAILOA atu ne Ieova ki ana tino i te senitenali muamua me ko oti ne fakaseai ne te taulaga togiola a Iesu a te Tulafono a Mose. (Kolose 2:13, 14) A taulaga katoa kolā ne ofo sale atu ne tino Iutaia i te fia selau o tausaga ko se toe aoga. Ko oti ne fakataunu ne te Tulafono tena galuega “o takitaki atu tatou ki a Keliso.”​—Kalatia 3:24.

² E se fakauiga i ei me ko se amanaia a Kelisiano ki te faiga taulaga. I lō te fai penā, ne faipati mai te apositolo ko Petelu e uiga ki te manakoga ke ofo atu “a taulaga faka-te-agaga kolā e talia ne te Atua e auala i a Iesu Keliso.” (1 Petelu 2:5) E se gata i ei, ne fakaasi manino mai ne te apositolo ko Paulo me i te olaga kātoa o se Kelisiano e fai pelā me se “taulaga” ko tuku atu ki te Atua.​—Loma 12:1.

³ Tela la, e ofo atu ne te Kelisiano a taulaga mō Ieova. E aofia i ei te ofoatuga o nisi mea ki a ia, io me e tiaki ne ia a nisi mea ke faka‵lei aka ei tena tapuakiga ki a ia. Mai mea ko iloa ne tatou e uiga ki taulaga kolā ne ofo atu ne tino Isalaelu, e fakamautinoa aka pefea ne tatou me e talia ne Ieova a ‵tou taulaga i aso nei?

I ASO TAKITASI O TE OLAGA

4. Se a te mea e ‵tau o masaua ne tatou e uiga ki ‵tou galuega e fai i aso takitasi?

⁴ Kāti e faigata ke lavea atu a te auala e aofia ei a ‵tou mea e fai i aso katoa o te olaga i taulaga kolā e ofo atu ki a Ieova. Kāti e foliga mai me e se mafai o pokotia a ‵tou fesokotakiga mo Ieova i ‵tou galuega e fai i te fale, i te akoga, te ‵togiga o mea i sitoa mo nisi mea penā. Kae kafai ko oti ne tuku atu tou ola ki a Ieova io me e fakamoemoe koe ke fai penā i se taimi pili mai mua nei, e tāua ‵ki eiloa ke masaua ne tatou me e mafai eiloa o pokotia ‵tou fesokotakiga mo Ieova i galuega masani e fai ne tatou i aso takitasi. A tatou e fai mo fai ne Kelisiano i te 24 itula i aso katoa. E manakogina ke fakaaoga ne tatou a fakatakitakiga mai te Tusi Tapu i feitu katoa o ‵tou olaga. Tenā eiloa te pogai o te fakamalosiga a Paulo ki a tatou: “I so se mea e fai ne koutou, fai mo te loto kātoa e pelā eiloa me fai ne koutou mō Ieova, kae e se mō tāgata.”​—Faitau te Kolose 3:18-24.

5, 6. Ne a mea e ‵tau o mafau‵fau tatou ki ei e uiga ki tou teuga mo ‵tou amioga i aso katoa?

⁵ A ‵tou galuega e fai i aso takitasi e se ne vaega o ‵tou tapuakiga tapu ki a Ieova. Kae ona ko te fakamalosiga a Paulo ke ga‵lue tatou ‘mo te loto kātoa mō Ieova’ e fai ei ke onoono faka‵lei tatou ki ‵tou mea e fai i ‵tou olaga i aso takitasi. Ne a mea aoga e tauloto ne tatou mai te mea tenei? E mata, e ‵lei ‵tou teuga mo ‵tou amioga i taimi katoa? Kafai e fai ‵tou galuega masani i aso takitasi, e mata, e ‵ma tatou ke fakaasi atu i a tatou ne Molimau a Ieova, ona ko ‵tou teuga io me ko ‵tou amioga? Ke mo a eiloa e fai penā! E se fai ne tino o Ieova so se mea telā e fakamasei atu ei ki te igoa o te Atua.​—Isaia 43:10; 2 Kolinito 6:3, 4, 9.

⁶ Ke iloilo aka ne tatou te auala e pokotia ei ‵tou mafaufauga mo ‵tou galuega ona ko te ‵tou ma‵nako o tavini atu ‘mo te loto kātoa ki a Ieova.’ I te iloiloga tenā, e ‵tau o masaua ne tatou me i taulaga katoa kolā ne ofo atu ne tino Isalaelu ki a Ieova, ko toe mea ‵lei eiloa.​—Esoto 23:19.

TE AUALA E POKOTIA EI TOU OLAGA

7. Ne a mea e aofia i te tuku atu o ‵tou ola ki te Atua?

⁷ I te taimi ne tuku atu ei tou ola ki a Ieova, ne fai eiloa ne koe se fakaikuga ‵lei. I te faiga tenā, ne tauto atu koe me ka fakamuamua ne koe a Ieova i au mea katoa e fai i tou olaga. (Faitau te Epelu 10:7.) A te mea tenā se fakaikuga ‵lei. E seai se fakalotolotolua me ko oti ne maua ne koe a ikuga tafasili i te ‵lei i au taumafaiga ke iloa ne koe te loto o te Atua e uiga ki se mea, kae fai eiloa ne koe. (Isaia 48:17, 18) A tino o te Atua ne tino e tapu kae fia‵fia me e fakaakoako tatou ki a Ieova, telā e akoako ne ia tatou.​—Levitiko 11:44; 1 Timoteo 1:11.

8. Kaia e tāua ei ki a tatou ke masaua me i taulaga kolā ne ofo atu ne tino Isalaelu ne mea tapu i te kilokiloga a Ieova?

⁸ Ne kilo atu a Ieova ki taulaga a tino Isalaelu e pelā me ne mea tapu. (Levitiko 6:25; 7:1) A te pati Epelu telā e ‵fuli ki te “tapu” e fakauiga ki te ‵vae keatea io me se mea totino eiloa a te Atua. Kafai e ma‵nako tatou ke talia ne Ieova a ‵tou taulaga, e ‵tau o ‵kalo keatea tatou mai so se mea i te lalolagi telā e lailai. E se ‵tau o fia‵fai tatou ki mea kolā e takalialia a Ieova ki ei. (Faitau te 1 Ioane 2:15-17.) E fakauiga i konei me e ‵tau o ‵kalo keatea tatou mai so se tino io me so se mea telā ka fai ei tatou ke lai‵lai i te kilokiloga a te Atua. (Isaia 2:4; Fakaasiga 18:4) E fakauiga foki i ei me e se ‵tau o ‵kilo atu ‵tou mata io me mafau‵fau faeloa ki mea se ‵ma io me ko amioga lai‵lai.​—Kolose 3:5, 6.

9. E pefea te tāua o ‵tou faifaiga e fai ki nisi tino, kae kaia?

⁹ Ne fakamalosi atu a Paulo ki ana taina tali‵tonu penei: “Sa puli o fai a mea ‵lei kae tuku atu a mea ‵lei kolā ko maua ne koutou ki nisi tino, me e fiafia malosi eiloa a te Atua ki vaegā taulaga penā.” (Epelu 13:16) Tela la, kafai e fai faeloa ne tatou te mea ‵lei kae fesoasoani atu ki nisi tino, ka talia eiloa ne Ieova a ‵tou galuega konā e pelā me ne taulaga ki a ia. A te fakaasiatuga o te alofa ki nisi tino, se fakailoga tu ‵kese o Kelisiano ‵tonu.​—Ioane 13:34, 35; Kolose 1:10.

TAULAGA I TAPUAKIGA

10, 11. E pefea te kilokiloga a Ieova ki ‵tou galuega mo ‵tou tapuakiga faka-Kelisiano, kae e pokotia pefea tatou i ei?

¹⁰ A te auala manino e tasi e mafai ei o fai ne Kelisiano a mea ‵lei ki nisi tino ko “te folafolaatuga o te ‵tou fakamoemoega ki tino katoa.” E mata, e fakaaoga ne koe a avanoaga katoa ke tuku atu ei se molimau? Ne fai mai a Paulo me e ‵tau o “ofo atu faeloa ne tatou se taulaga o vikiga ki te Atua . . . telā ko fuataga o ‵tou gutu kolā e tavae atu ki tena igoa i mua o tino katoa.” (Epelu 10:23; 13:15; Hosea 14:2) E aoga eiloa ke mafau‵fau tatou ki te uke o taimi e fakaaoga ne tatou ke talai atu ei te tala ‵lei, mo auala ke faka‵lei aka ei te mea tenā. E aoga foki ki a tatou a tofiga e uke kolā e fai sale i Fakatasiga mō te Galuega Talai. Kae e ‵tau o masaua ne tatou me i ‵tou galuega talai mai fale ki fale mo te talai atu i so se taimi ne “taulaga o vikiga,” se vaega o te ‵tou tapuakiga, tela la, e ‵tau eiloa o ofo atu ne tatou a te ‵toe mea ‵lei. E tiga eiloa e kese‵kese a ‵tou fakanofonofoga, a te aofaki o taimi e fakaaoga ne tatou o folafola atu te tala ‵lei, e fakaasi mai i ei a te lasi o te ‵tou loto fakafetai mō mea faka-te-agaga.

¹¹ E tapuaki atu eiloa a Kelisiano ki a Ieova i taimi katoa, i olotou fale io me i te fakapotopotoga. Tenā eiloa te mea e manako a Ieova ke fai ne tatou. E tiga eiloa ko se ‵tau o tausi ne tatou te Sapati, io me faima‵laga atu faeloa ki Ielusalema o ‵kau atu ki fakamanatuga i ei, e uke a mea e tauloto ne tatou mai tulafono konā. E uke a galuega e ‵tau o fai ne tatou i aso takitasi, kae fakamoemoe eiloa te Atua ke fakaaoga a nisi taimi o tatou ki te faiga o sukesukega ki te Tusi Tapu, ‵talo, kae ‵kau atu foki ki fakatasiga faka-Kelisiano. Kae i o ulu o kāiga te tiute ke fai ne latou te takitakiga i te faiga o tapuakiga faka-te-kāiga fakatasi mo olotou kāiga. (1 Tesalonia 5:17; Epelu 10:24, 25) Tela la, se mea ‵lei ke fesili ifo tatou penei ki a tatou eiloa, ‘E mata, e mafai o tai faka‵lei aka te tulaga o taku tapuakiga?’

12. (a)Se a te mea i aso nei e mafai o faka‵tusa ki ei a te ofoatuga o mea ma‵nogi i tapuakiga e fai sale i aso mua? (e) E mafai pefea o fai a ‵tou ‵talo e pelā mo taulaga o mea ma‵nogi?

¹² Ne usu atu te tupu ko Tavita ki a Ieova penei: “Talia mai taku ‵talo, e pelā me se taulaga manogi ‵lei.” (Salamo 141:2) Se mea ‵lei ke mafaufau malie aka ki te uke mo te aoga o au ‵talo. E faka‵tusa ne te tusi ko Fakaasiga a “talosaga a te kau tapu” ki taulaga o mea ma‵nogi. (Fakaasiga 5:8) I Isalaelu i aso mua, a mea ma‵nogi kolā e ofo sale atu i luga o te fatafaitaulaga a Ieova, ne ‵tau eiloa o fakatoka faka‵lei e ‵tusa mo mea e manakogina ke fai. Ne talia fua ne Ieova māfai ne ofo atu e ‵tusa mo fakatokaga kolā ko oti ne fakaasi mai ne ia. (Esoto 30:34-37; Levitiko 10:1, 2) Kafai e ‵talo atu foki tatou mo te āva mo te atafai, e mautinoa eiloa me ka talia ne Ieova a ‵tou ‵talo.

TE TUKU ATU MO TE MAUA MAI

13, 14. (a) Se a te galuega telā ne fai ne Epafeloti mo te fakapotopotoga i Filipi mō Paulo, kae ne pefea a lagonaga o te apositolo e uiga ki ei? (e) E mafai pefea o tau‵tali atu tatou i te fakaakoakoga a Epafeloti mo taina i Filipi?

¹³ A meaalofa tupe kolā e tuku atu mō te galuega talai i te lalolagi kātoa e fai pelā me se taulaga, faitalia me e uke io me e mu‵tana fua. (Maleko 12:41-44) I te senitenali muamua T.A., ne uga atu ne te fakapotopotoga i Filipi a Epafeloti ke tausi atu ki manakoga o Paulo i Loma. Ne fanatu mo Epafeloti se meaalofa tupe mai te lotou fakapotopotoga i Filipi. E se tenei te taimi muamua ne fakaasi atu ei ne taina i Filipi a te uiga talimalo ki a Paulo. Ne avatu ne latou te lotou meaalofa tenā me e se ma‵nako latou ke manavase a Paulo ki mea tau tupe, kae ke fakaaoga ana taimi e uke ki te faiga o te galuega. Se a te kilokiloga a Paulo ki te meaalofa tenā? Ne fakaigoa ne ia ki “se mea manogi gali, se taulaga telā e talia kae fakafiafia malosi atu ki te Atua.” (Faitau te Filipi 4:15-19.) Ne talia eiloa ne Paulo mo te loto fakafetai a te kaimalie o taina i Filipi, kae e penā foki a Ieova.

¹⁴ E penā foki i aso nei, e fiafia malosi eiloa a Ieova ki ‵tou meaalofa kolā e tuku atu mō te galuega talai i te lalolagi kātoa. Kae e tauto mai a ia me kafai e fakamuamua ne tatou a manakoga o te Malo i ‵tou olaga, ka tausi mai eiloa a ia ki ‵tou manakoga katoa, i te feitu faka-te-agaga mo te feitu faka-te-foitino.​—Mataio 6:33; Luka 6:38.

FAKAASI ATU TOU LOTO FAKAFETAI

15. Ne a nisi pogai e ‵tau ei o fakafetai tatou ki a Ieova?

¹⁵ E uke ‵ki a pogai e ‵tau ei o loto fakafetai tatou ki a Ieova. E ‵tau o fakafetai atu tatou ki a ia i aso takitasi mō tena meaalofa ko te ola. E tuku mai ne ia a mea katoa kolā e ola tatou i ei​—meakai, gatu mo ‵tou fale e pelā foki mo te ea e ma‵nava ei tatou. E se gata i ei, e maua ne tatou se fakamoemoega ona ko te ‵tou fakatuanaki telā e fakavae ki te iloa tonu. E ‵tau eiloa o tapuaki atu tatou ki a Ieova kae ofo atu a vikiga o tavaega ki a ia, ona ko te vaegā tino penā mo ia, mo mea ko oti ne fai ne ia mō tatou.​—Faitau te Fakaasiga 4:11.

16. E ‵tau o ‵saga atu pefea tatou ki te taulaga togiola a Keliso?

¹⁶ E pelā mo te mea ne matea ne tatou i te mataupu muamua, a te meaalofa fakapito kae tāua a te Atua mō tino katoa, ko te taulaga togiola a Keliso. Tenei eiloa te fakaasiga o te lasi o te alofa o te Atua mō tatou. (1 Ioane 4:10) E fakaasi atu pefea ne tatou te ‵tou loto fakafetai mō te mea tenei? Ne fai mai a Paulo penei: “Me ne fakamalosi mai te alofa o Keliso ki a matou, ona ko te fakaikuga tenei ko oti ne fai ne matou, me ne mate te tagata e tokotasi mō tino katoa; ona ko te mea ko ‵mate a tino katoa; kae ne mate a ia mō tino katoa ko te mea ko tino kolā e ola ke se toe ola mō latou eiloa, kae mō ia telā ne mate mō latou kae toe fakatu aka.” (2 Kolinito 5:14, 15) E tonu, ne fai mai a Paulo me kafai e maua ne tatou te loto fakafetai mō te alofa tauanoa o te Atua, se mea ‵tau ke fakaaoga ne tatou ‵tou ola ke ‵viki atu ei ki a Ia mo Tena Tama. E fakaasi atu te ‵tou a‵lofa mo ‵tou loto fakafetai ki te Atua mo Keliso e auala i te ‵tou faka‵logo mo te ‵tou ma‵nako o talai kae fai foki a soko.​—1 Timoteo 2:3, 4; 1 Ioane 5:3.

17, 18. I auala fea ne faka‵lasi aka ei ne nisi tino olotou taulaga o vikiga ki a Ieova? Taku mai se fakaakoakoga.

¹⁷ E mata, e mafai o faka‵lei aka tau taulaga o vikiga telā e ofo atu ki te Atua? I te otiga ne mafau‵fau ki mea ‵lei katoa kolā ko oti ne fai ne Ieova mō latou, ne otia a loto o tino e tokouke kae fai ei ke uke olotou taimi e fakaaoga ki te talaiatuga o te Malo mo nisi galuega i te fakapotopotoga a Ieova. Ko oti ne mafai o paenia lagolago a nisi tino i se masina e tasi io me uke atu i tausaga katoa, a ko mafai ne nisi tino o fai pelā me ne paenia tumau. Ko oti ne fesoasoani atu a nisi tino i galuega fakatu‵tu kolā e fakaaoga i te taviniga a Ieova. E a, e se konei eiloa a auala ‵lei ke fakaasi atu ei tou loto fakafetai? Kafai e tavini atu tatou ki te Atua mo te loto lagona tonu​—ke fakaasi atu ei te ‵tou loto fakafetai ki a ia​—ka talia eiloa ne Ieova a galuega e fai ne tatou mō ia.

¹⁸ Ko oti ne otia a loto o Kelisiano e tokouke ke fakaasi atu te lotou loto fakafetai ki a Ieova. E tokotasi mai i a latou ko Morena. Ne puti aka a ia e pelā me se Katolika, kae e uke ana fesili e uiga ki te Atua mo te uiga o te olaga. Ne ‵sala atu a ia ki tali o ana fesili i te lotu Katolika e pelā foki mo poto o fenua i Asia. Kae ne seki fiafia a ia ki tali kolā ne maua ne ia mai i ei. Kae ko te taimi fua ne suke‵suke ei a ia mo Molimau a Ieova ki te Tusi Tapu ne fatoa maua ei ne ia a tali ma‵nino ki ana fesili. Ne fakafetai eiloa a Morena ki a Ieova mō tali ma‵nino mai te Tusi Tapu ki ana fesili katoa. Ne maua ne ia mai ei a te fiafia tonu, kae ne manako tou fafine o fakafetai atu ki a Ieova mai te fakaaogaga o tena malosi kātoa i tena taviniga. I tena otiga ne papatiso ne paenia lagolago faeloa tou fafine, kae ne paenia tumau a ia i te taimi eiloa ne toka ei a ia. Ko 30 nei tausaga talu mai te taimi tenā, kae koi galue eiloa a Morena i te taviniga tumau.

19. E mafai pefea o fakalasi aka tau taulaga o vikiga ki a Ieova?

¹⁹ E tonu, e tokouke a tavini fakamaoni a Ieova e se mafai o tavini atu e pelā me ne paenia ona ko olotou fakanofonofoga. Kae ko so se mea telā e mafai o fai ne tatou i te taviniga ki a Ieova, e tuku atu eiloa i ei ne tatou a taulaga faka-te-agaga kolā e talia ne ia. E uiga ki ‵tou amioga, e ‵tau eiloa o tau‵tali atu tatou mo te fakamaoni i fakatakitakiga amio‵tonu fakavae, ona ko ‵tou iloa me e sui ne tatou a Ieova i taimi katoa. E uiga ki te ‵tou fakatuanaki, e tali‵tonu katoatoa tatou me ka fakataunu ne te Atua ana fuafuaga. E uiga ki ‵tou galuega ‵lei, e fesoasoani atu tatou i te fakasalalauatuga o te tala ‵lei. E fakaasi atu ne tatou me e lasi te ‵tou loto fakafetai mō mea katoa kolā ko oti ne fai ne Ieova mō tatou. Tela la, ke na avatu faeloa ne tatou a taulaga mo te loto kātoa ki a Ieova.

[Ata i te itulau e 25]

E mata, e fakaaoga ne koe so se avanoaga ke tuku atu ei se molimau?

[Fakamatalaga Tāua i te itulau e 27]

E mata, e otia tou loto i te aga‵lei o Ieova, ke faka‵lei aka ei tau taulaga o vikiga ki a ia?