Fesoasoani Atu Ki Tino Ke “Ala Aka . . . Mai Te Moe”

“E iloa ne koutou a te taimi, me ko leva ne oko mai a te itula e ‵tau ei o ala aka koutou mai te moe.”​—LOMA 13:11.

E MAFAI NE KOE O FAKAMATALA MAI?

Kaia e tāua ei ke ala faeloa a Kelisiano i te feitu faka-te-agaga?

Kaia e ‵tau ei mo faifeau mataala o fakalogo‵logo kae matapulapula?

Se a te tusaga e fai ne te atafai mo te aga‵lei ki te ‵tou galuega talai?

1, 2. I te feitu fea e manakogina ei ke ‵fagu aka a te tokoukega o tino?

I TAUSAGA katoa, e lau i afe o tino e ‵mate i te mea e tule‵moe io me ‵to olotou ‵moe i te taimi e fakatele ei i te motoka. E faka‵tea a nisi tino i te mea e se ala i te taimi tonu e ‵tau ei o olo ki galuega io me ‵to a ‵moe i te galuega. Kae sili atu la te ma‵sei o ikuga e maua mai te ‵tulemoe i te feitu faka-te-agaga. E maua i te tusi siki tenei a pati a te Tusi Tapu penei: “Ka fiafia te tino telā e ala faeloa.”—Fakaasiga 16:14-16.

² I te pili mai o te aso lasi o Ieova, a tino koi ‵to eiloa olotou ‵moe i te feitu faka-te-agaga. Ne fakasino atu foki a nisi takitaki o Fenua Lotu Kelisiano ki olotou lafu e pelā me ne ‘tino ‵moe.’ Se a te moe faka-te-agaga? Kaia e tāua ei ke ala faeloa a Kelisiano ‵tonu? E mafai pefea o fesoasoani atu tatou ki nisi tino ke ‵fagu aka mai i se vaegā moe penā?

TE MOE FAKA-TE-AGAGA—SE A TE MEA TENĀ?

3. E fakamatala atu pefea ne koe se tino telā e se ala i te feitu faka-te-agaga?

³ E masani o sē gasue‵sue a tino kolā e ‵moe. E ‵kese mai i ei, kāti e fakalave‵lave malosi a latou kolā e ‵moe i te feitu faka-te-agaga—kae e se fakalavelave i mea faka-te-agaga. E se taumate e manava‵se malosi latou ki mea o te olaga i aso takitasi io me ‵sala atu ki fakafiafiaga, tulaga ‵malu, io me ko te maumea. Mai mea katoa konei, e fakaasi mai ne latou a te sē ‵saga tonu atu ki olotou manakoga faka-te-agaga. E iloa ne tino kolā e ala i te feitu faka-te-agaga, me ko ola tatou “i aso fakaoti,” tela la e gasue‵sue eiloa latou ki te mea e mafai ne latou o fai i te faiga o te loto o te Atua.—2 Petelu 3:3, 4; Luka 21:34-36.

4. Se a te uiga tāua o te polopolokiga: “Ke mo a tatou e ‵moe e pelā eiloa mo nisi tino”?

⁴ Faitau te 1 Tesalonia 5:4-8. I konei e fakamalosi atu te apositolo ko Paulo ki taina tali‵tonu ke mo a e “‵moe e pelā eiloa mo nisi tino.” Se a te mea ne fakauiga a ia ki ei? E tasi te auala e mafai ei o “‵moe” tatou ko te sē talia o tulaga o Ieova i mea tau amioga. A te suā auala e mafai ei o “‵moe” tatou ko te sē talia o te manatu me ko pili mai te taimi o Ieova ke fakaseai a tino sē amioatua. E ‵tau eiloa o fakamautinoa aka ne tatou ke se fakamalosigina tatou ne tino taki tokotasi kolā e sē amioatua ke tau‵tali atu i olotou auala mo faifaiga.

5. Ne a vaegā faifaiga e iloa ei a latou kolā e ‵moe i te feitu faka-te-agaga?

⁵ E ma‵natu aka a nisi tino me e seai se Atua telā ka ‵losi atu ki mea e fai ne latou. (Salamo 53:1) Kae ma‵natu aka nisi tino me i te Atua e se fiafia mai ki a tatou, tela la, e seai se pogai e ‵tau ei o fia‵fia tatou ki a ia. Kae e mafaufau aka a nisi tino me i te kau atu ki se lotu e fai ei latou mo taugasoa o te Atua. A tino katoa konei e ‵moe i te feitu faka-te-agaga. E ‵tau o ‵fagu aka latou. E mafai pefea o fesoasoani atu tatou ki a latou?

E ‵TAU MO TATOU O ALA FAELOA

6. Kaia e ‵tau ei mo Kelisiano o taumafai malosi ke tumau i te ala faka-te-agaga?

⁶ E ‵tau mo tatou o ala ko te mea ke mafai o ‵fagu aka a nisi tino. Se a te mea e aofia i ei? E ‵soko tasi ne te Muna a te Atua a te moe, i se auala fakatusa, mo “galuega o te pouliga”—fakafiafiaga va‵lea, konā, amioga fakatauavaga se ‵tau, amio matafatu, fakatau taua, mo te loto masei. (Faitau te Loma 13:11-14.) A te ‵kalo kea‵tea mai i vaegā amioga penā e mafai eiloa o faigata. E tāua a te mataala. A te tino fakatele motoka telā e manatu māmā ki te fakamataku o te ‵to o te moe i te taimi e fakatele ei te motoka, e fai fua ne ia ke oko atu tena ola ki se tulaga fakamataku. Ko oko eiloa i te tāua ke iloa ne Kelisiano me i te moe faka-te-agaga e mafai o iku atu ki mate!

7. E mafai pefea o pokotia tatou i se kilokiloga ‵se a tino?

⁷ E pelā me se fakaakoakoga, kāti e manatu aka se Kelisiano me e se mafai o talia ne tino katoa i tena koga talai a te tala ‵lei. (Faataoto 6:10, 11) Kāti ka fai mai tena fakamasakoga, ‘Kafai e seai se tino e fia saga mai, kaia e taumafai malosi ei tatou ke oko atu io me fesoasoani atu ki tino?’ E tonu la, kāti e tokouke nei a tino e ‵moe i te feitu faka-te-agaga, kae e mafai eiloa o ‵fuli olotou fakanofonofoga mo faifaiga. E isi ne tino e ala aka kae ‵saga mai. Kae e mafai ne tatou o fesoasoani atu ki a latou māfai e ala faeloa tatou, e pelā mo te taumafai ki ne auala ‵fou ke fakaasi atu ei a te fekau o te Malo i se auala gali. E aofia i te tumau o tatou i te ala faeloa ko te fakamasaua ifo ki a tatou eiloa a te pogai e tāua ei a te ‵tou galuega talai.

SE A TE MEA E FAI EI KE TĀUA TE ‵TOU GALUEGA TALAI?

8. Kaia e tāua ‵ki ei a te ‵tou galuega faka-Kelisiano?

⁸ Ke masaua me pefea te ‵saga mai o tino, e faka‵malu atu eiloa te talaiga ki a Ieova kae fai tena tusaga i te fakagaluegaga o tena fuafuaga. Ko pili fua nei o fakamasino kae fakasala a tino kolā e se faka‵logo ki te tala ‵lei. A te auala e ‵saga mai ei a tino ki te ‵tou talaiga ka fakavae ki ei a te fakamasinoga. (2 Tesalonia 1:8, 9) E se gata i ei, se mea ‵se māfai e fakasakosako mai se Kelisiano me e se ‵tau o talai malosi “me ka toe‵tu mai a tino amio‵tonu mo tino amio sē ‵tonu.” (Galuega 24:15) E malamalama tatou mai te Muna a te Atua me i a latou kolā e fakamasino aka e pelā me ne “kouti” ka olo atu ki te “fakaseaiga se-gata-mai.” E fakaasi atu ne ‵tou talaiga a te alofa fakamagalo o te Atua, kae ‵tala atu i ei a te auala ki te tino ke ‵fuli kae ke maua te “ola se-gata-mai.” (Mataio 25:32, 41, 46; Loma 10:13-15) Kafai e se talai tatou, e mafai pefea o maua ne tino a te avanoaga ke faka‵logo ki te fekau fakaola tino tenei?

9. Ne aoga pefea ki a koe mo nisi tino a te kau atu ki te talaiga o te tala ‵lei?

⁹ E aoga foki ki a tatou a te talaiatuga o te tala ‵lei. (Faitau te 1 Timoteo 4:16.) E mata, a te faipati atu e uiga ki a Ieova mo te fakamoemoega e uiga ki te Malo e se fakamalosi atu ki tou fakatuanaki mo tou alofa ki te Atua? E mata, ne seki fesoasoani atu a te mea tenā ke ati aka ne koe a uiga faka-Kelisiano? E mata, e se ‵lago atu ki tou fiafia a te fakaasiatuga o tou tuku katoatoa atu ki te Atua e auala i te kau atu ki te galuega talai? E tokouke a tino kolā ne taulia ke akoako atu a te munatonu ki nisi tino ne fia‵fia i te kilo atu ki te fesoasoani o te agaga o te Atua ki vaegā tino penā ke ga‵solo ki mua i olotou olaga.

KE MATAALA

10, 11. (a) Ne fakaasi mai pefea ne Paulo mo Iesu a te ‵toka mo te mataala o lāua? (e) Fakamatala mai a te auala e mafai ei ne te ‵toka mo te mataala o tai faka‵lei aka te ‵tou galuega talai.

¹⁰ Kāti e mafai o ‵fagu aka a te fiafia o tino taki tokotasi ki te tala ‵lei i auala kese‵kese. Tela la, e ‵tau mo faifeau Kelisiano o fai pelā me ne tino maimoa kolā e mataala. A Iesu ko te ‵tou fakaakoakoga. Ona ko te ‵lei katoatoa, ne mafai o malamalama tou tagata i lagonaga sē fiafia o se Falesaio, te salamō tonu o se fafine agasala, mo te uiga fia tuku atu o se fafine ko mate tena avaga. (Luka 7:37-50; 21:1-4) Ne mafai eiloa o saga atu a Iesu ki manakoga faka-te-agaga o tino taki tokotasi. Kae e ui i ei, e se ‵tau o ‵lei katoatoa se tavini a te Atua ke fai mo fai se tino maimoa ‵lei. E fakamatala mai ne te apositolo ko Paulo a te mea tenā. Ne fai ne ia ana fakamatalaga ke ‵tagi ‵gali ki potukau kese‵kese mo tino kolā e kese‵kese olotou uiga.—Galuega 17:22, 23, 34; 1 Kolinito 9:19-23.

¹¹ Mai te taumafai malosi ke toka kae mataala e pelā mo Iesu mo Paulo, e mafai o iloa ne tatou me se a te ‵toe auala ‵lei ke ‵fagu aka ei a te fiafia i loto i tino kolā e fetaui mo tatou. E pelā me se fakaakoakoga, i te taimi e fanatu ei koe ki tino taki tokotasi, onoono me ne a mea e fakaasi mai i ei olotou tu, mea e fia‵fia ki ei, io me ko tulaga o te kāiga. E se taumate e iloa ne koe olotou mea e fai i te taimi tenā kae ke faipati atu koe mo te āva ki ei i te taimi e kamata ei ne koe se sautalaga.

12. Kaia e ‵tau ei o fakaeteete tatou i ‵tou sautalaga i te taimi e olo atu ei tatou i te galuega talai?

¹² E taumafai eiloa te tino maimoa telā e mataala o ‵kalo kea‵tea mai mea kolā e mafai o fakalavelave mai. I te taimi e olo atu ei i te galuega talai, e mafai eiloa o fakamalosi mai a sautalaga kolā e fai ne tatou mo ‵tou soa. Kae e ‵tau o masaua ne tatou me i te pogai e olo atu ei tatou i te galuega talai ko te mea ke talai atu tatou ki nisi tino. (Failauga 3:1, 7) Tela la, e ‵tau o fakaeteete tatou ke mo a e fakalavelave mai a ‵tou sautalaga i vasia o fale ki te ‵tou galuega talai. A manatu kolā e manakogina ke sau‵tala fakatasi tatou ki ei mo tino fia‵fia se auala ‵lei ke fai ei ‵tou mafaufau ke ‵saga tonu atu ki te mea telā e fakamoe‵moe ki ei. E se gata i ei, e tiga eiloa e fesoasoani mai a selefoni ki a tatou i nisi taimi ke maua a ikuga ‵lei i te ‵tou galuega talai, e ‵tau o fakamautinoa aka ne tatou ke mo a e fakalavelave mai a te telefoni ki te ‵tou sautalaga mo te tino i te fale.

FAKAASI ATU A TE FIAFIA TONU

13, 14. (a) E mafai pefea o iloa ne tatou me se a te mea e fiafia ki ei a te tino? (e) Se a te mea e mafai o ‵fagu aka ei a te fia‵fia o tino ki mea faka-te-agaga?

¹³ A faifeau kolā e ala kae matapulapula e fakalogo‵logo faka‵lei ki tino kolā e fetaui mo latou. Se a te fesili e mafai o fakasae aka ne koe ko te mea ke fakaasi mai ne se tino i tou koga talai ana lagonaga? E mata, e manavase a ia ki te aofaki o lotu, amioga fakasaua, io me ko te fakata‵mala o malo? E mata, e mafai ne koe o ‵fagu aka a te fiafia ki mea faka-te-agaga mai te faipati atu e uiga ki te fakaofoofogia o te faitega o mea ola io me fakaasi atu a te aoga o fakatakitakiga mai te Tusi Tapu? Toeitiiti ko tino mai tu mo aganuu katoa, ke oko foki ki nisi tino kolā e se tali‵tonu ki te Atua e fia‵fia ki ‵talo. E tokouke a tino e fesili ifo me ko oi la e lagona ne ia a ‵talo. A nisi tino e fia iloa ne latou a mea e uiga ki fesili konei: E lagona ne te Atua a ‵talo katoa? Kafai e se penā loa, ne a la mea e ‵tau o fai ne tatou ko te mea ke lagona ne te Atua?

¹⁴ E mafai foki o tauloto ne tatou a mea e uke e uiga ki te kamataga o sautalaga mai te onoono faka‵lei ki te auala e fai ei ne tino talai apo a te mea tenā. Onoono ki te auala e ‵kalo keatea ei latou mai te fakafesilisili io me ko te fia iloa o mea e uke. E fakaasi atu pefea ne olotou leo mo foliga o mata me malamalama latou i kilokiloga a te tino i te fale?—Faataoto 15:13.

KE MATAALOFA KAE APO

15. Kaia e ‵tau ei o olo tasi a te mataalofa mo ‵tou taumafaiga ke talai atu?

¹⁵ E mata, e manako koe ke ‵fagu aka māfai ko ‵nau ‵ki tau moe? E tokouke a tino e se ala ‵lei māfai e ‵fagu fakavave aka. E masani o ‵lei atu a te fagufagu malie. E penā foki loa a taumafaiga e manakogina ke ‵fagu aka a tino i te feitu faka-te-agaga. E pelā me se fakaakoakoga, kafai e ita mai se tino i te taimi e asi atu ei koe, se a te ‵toe tali ‵lei ki ei? Ke fakailoa atu mo te atafai me amanaia koe ki ana lagonaga, fakafetai atu ki a ia mo te faipati tonu mai, ko tiakina ei ne koe te koga tenā mo te filemu. (Faataoto 15:1; 17:14; 2 Timoteo 2:24) E se taumate ka fakagasuesue aka se vaegā tino penā ne tou aga‵lei ke tai saga tonu mai i te suā taimi e asi atu ei se Molimau.

16, 17. E mafai pefea o fakaaoga ne tatou a te atamai i ‵tou galuega talai?

¹⁶ I nisi feitu, kāti e mafai ne koe o fakatakavale se faifaiga sē tonu e fai atu. Kāti ka fai atu se tino, “Ikai fakafetai. E isi eiloa saku talitonuga” io me, “Au e se fiafia” me e tenā eiloa te ‵toe auala faigofie ke fakagata aka ei se sautalaga. Kae e ui i ei, a te tumau i te mataalofa mo te apo e mafai ei ne koe o fakasae aka se fesili gali telā e ‵fagu aka i ei a te fiafia o te tino i te fale ki mea faka-te-agaga.—Faitau te Kolose 4:6.

¹⁷ I nisi taimi kafai e fetaui tatou mo tino kolā e fai mai me i a latou ko tō fakalavelave, se mea ‵lei ke amanaia tatou ki ei kae tiakina te koga tenā. E isi eiloa ne taimi kāti e mafaufau koe me e mafai eiloa ne koe o fai atu ne nai pati kolā e aoga. A nisi taina e mafai eiloa o ‵suke ki olotou Tusi Tapu, faitau se tusi siki telā e fakagasuesue ei te mafaufau, kae tuku atu se fesili ki te tino i te fale—e fai a mea katoa konei i se leva e se silia atu i te minute. Ko oti ne ‵fagu aka ne olotou fakamatalaga ‵tonu kae toe‵toe a te fiafia lasi i nisi taimi telā ko iloa aka ne te tino i te fale me e se tō fakalavelave a ia ke fakalogologo ki se sautalaga toetoe. Kaia e se taumafai ei koe ke fai penā māfai e mafai?

18. Ne a mea e ‵tau o fai ne tatou ko te mea ke momea aka te magoi o te talai atu i taimi e seki fuafuagina?

¹⁸ Kafai e fetaui tatou mo tino i te taimi e fai ei ‵tou galuega i aso takitasi, e mafai eiloa o ‵fagu aka ne tatou a te lotou fia‵fia ki te tala ‵lei māfai e toka tatou o talai i taimi e seki fuafuagina. E tauave ne taina mo tuagane e tokouke ne nai tusi i olotou ato io me ko olotou taga. Kāti e ‵mau foki i olotou mafaufau se tusi siki fakapito telā e mafai o sau‵tala ki ei mo nisi tino māfai e maua se avanoaga. E mafai o fai‵pati fakatasi koe mo te ovasia o te galuega talai io me ko paenia i tau fakapotopotoga ki te auala e mafai ei o fakatoka koe ke fai a te mea tenā.

FAGUFAGU MALIE AKA A ‵TOU KĀIGA

19. Kaia e se ‵tau ei o taofi ne tatou a taumafaiga ke fesoasoani atu ki ‵tou kāiga?

¹⁹ E pelā mo te masani, e ma‵nako tatou o fesoasoani atu ki ‵tou kāiga ke talia a te tala ‵lei. (Iosua 2:13; Galuega 10:24, 48; 16:31, 32) Kafai ne ‵teke mai ki ‵tou taumafaiga muamua, e mafai o fakaoso aka ‵tou loto finafinau ne te mea tenā ke toe taumafai ki ei. Kāti ko ma‵natu aka tatou me sē uke ‵tou mea e mafai o fai io me faipati atu ke ‵fuli ei olotou faifaiga. Kae kāti, koi mafai eiloa ne mea ‵tupu o ‵fuli a kilokiloga io me ko te olaga o tou kāiga. Io me kāti ko oti ne tai faka‵lei aka ne koe a te auala e fakamatala atu ei te munatonu telā ko maua nei ne koe se ikuga telā e ‵kese.

20. Kaia e tāua ei a te apo māfai e faipati atu tatou ki kāiga?

²⁰ E ‵tau o ‵kalo tatou kea‵tea mai te lagonaga ko te se fia saga atu ki lagonaga o ‵tou kāiga. (Loma 2:4) E mata, e se ‵tau mo tatou o fai‵pati atu mo te atafai ki a latou e pelā eiloa mo te fai‵pati atu o tatou ki tino kolā e fetaui mo tatou i te galuega talai? Ke faipati atu i te āva mo te filemu. I lō te fia a, tuku atu se fakamaoniga me ne aoga pefea ki a koe a te munatonu. (Efeso 4:23, 24) Fai ke manino ‵lei a te auala ne fakamaumea ei ne Ieova tou olaga, i te akoako o “koutou ke lei koutou.” (Isaia 48:17) Fai ke lavea ne ou kāiga i a koe se fakaakoakoga o te olaga faka-Kelisiano.

21, 22. Fakamatala mai se tala telā e fakaasi mai i ei a te tāua o te taumafai faeloa o fesoasoani atu ki kāiga i te feitu faka-te-agaga.

²¹ Fakamuli nei, ne tusi mai se tuagane: “Ne taumafai faeloa au o molimau atu ki oku taina mo tuagane e toko sefulutolu e auala i aku faipati mo amioga. E seai eiloa se tausaga e seke kae seki tusi atu au ki a latou taki tokotasi. Kae ui i ei, ko au eiloa tokotasi te Molimau i loto i te kāiga mō tausaga e 30.”

²² Ne toe faka‵soko mai a te tuagane: “I te aso e tasi, ne telefoni atu au ki se tokotasi oku taina telā e nofo atu i se selau maila te ‵mao. Ne fai mai tou fafine ki au me ne fai atu a ia ki tena faifeau ke sukesuke fakatasi mo ia ki te Tusi Tapu, kae ne seki fai ne tou tagata. I te taimi ne fai atu ei au me e fiafia au o fesoasoani atu, muna a tou fafine: ‘Ko ‵lei la, a ko au e fai atu ki a koe: Ka sē fai lele au mo fai se Molimau a Ieova.’ I te otiga ne lafo atu ne au a te tusi ko te Ne a Mea e Akoako ‵Tonu Mai i te Tusi Tapu?, ne telefoni atu faeloa au ki tou fafine i ne nai aso. Kae seki ‵suke eiloa tou fafine ki te tusi. I te fakaotiga, ne fakamolemole atu au ki tou fafine ke puke mai tena tusi, kae ne fai‵tau kae sau‵tala māua ki nisi tusi siki kolā e siki mai mō se 15 minute i luga i te telefoni. Mai tua ifo o nai taimi ne telefoni ei, ne manako tou fafine ke fai te sukesukega ke silia atu i te 15 minute. Mai tua ifo ko kamata o telefoni mai a ia ki a au mō tena akoga, i nisi taimi au koi nofo loa i luga i toku moega i te taeao kae ko nisi taimi e fakalua i te aso. I te tausaga mai tua ifo, ne papatiso tou fafine, kae ko te tausaga mai tua atu i ei, ne kamata ei a ia o paenia.”

23. Kaia e se ‵tau ei o ‵fiu tatou i te taumafai o ‵fagu aka a tino mai te ‵moe i te feitu faka-te-agaga?

²³ A te fesoasoani atu ki tino ke ala aka mai te ‵moe i te feitu faka-te-agaga se auala poto kae e manakogina ke tumau a taumafaiga e fai. Kae e ui i ei, koi tumau eiloa te ‵saga mai o tino loto maulalo ki ‵tou taumafaiga ke ‵fagu aka latou. I se aofaki masani, e silia atu i te 20,000 o tino e papatiso i masina takitasi e pelā me ne Molimau a Ieova. Tela la, ke talia ne tatou i ‵tou loto a te polopolokiga a Paulo ki te ‵tou taina ko Akepasi i te senitenali muamua: “Ke onoono faka‵lei ke fakataunu ne koe te galuega telā ne talia ne koe mai te Aliki.” (Kolose 4:17) Ka fesoasoani atu te suā mataupu ki tino katoa ke amanaia ki te uiga o te talai atu mo te mafaufau ke fai fakavave.

AUALA E FAI EI KOE KE TUMAU I TE ALA

[Pokisi i te itulau e 13]

▪ Ke fakalavelave faeloa i te faiga o te loto o te Atua

▪ Tiaki a galuega o te pouliga

▪ Fakaeteete i te fakamataku o te moe i te feitu faka-te-agaga

▪ Fakatumau se kilokiloga tonu ki tino i tou koga talai

▪ Fakaaoga auala ‵fou ke talai atu ki nisi tino

▪ Ke masaua a te tāua o tau galuega talai