E Oko Mai Māfea Te Taua O Amaketo?

“Ne kilo atu au, kae kiloke! se vaitino e tokouke, telā e se mafai o lau aka ne se tino, mai i atufenua katoa, matakāiga katoa, tino katoa, penā foki loa mo ‵gana katoa . . . ne ‵sao i te fakalavelave lasi.”—FAKAASIGA 7:9, 14.

KO TOKA nei te koga mō te taua o Amaketo. E pefea la?

Ko leva ne isi se fakapotopotoga o tino i te lalolagi kātoa kolā e tavini atu ki a Ieova kae ola e ‵tusa mo tulaga ma‵luga o te Tusi Tapu. Mai te ‵lago atu o te Atua, ko maopoopo fakatasi nei a te fia miliona o tino mai fenua katoa, matakāiga, mo ‵gana e pelā me se kautaina filemu kae a‵lofa. E maua eiloa te kautaina tenā i loto i Molimau a Ieova.—Ioane 13:35.

Ko pili fua o fakamaopoopo ne Satani ana kautau kae laga taua atu i tena toe taua lasi eiloa ki luga i tino kolā e foliga mai pelā me filemu kae seai se puipuiga. (Esekielu 38:8-12; Fakaasiga 16:13, 14, 16) E mafai pefea o iloa tonu ne koe a te mea tenā? E fakamatala mai i te Tusi Tapu a mea ‵tupu fakapitoa kolā ka fesoasoani mai ke iloa ne tatou a te taimi ka oko mai ei Amaketo. A te ukega o mea ‵tupu kolā e fakaasi mai i ei ko oti eiloa ne fakataunu.

Mea ‵Tupu Kolā e Lavea ne Koe me ko Fakataunu

Ne fesili atu a soko o Iesu ki tou tagata me ka iloa pefea ne tino a te taimi e oko mai ei a “te gataga o te olaga tenei.” (Mataio 24:3) Ne tali atu Iesu mai te fakasino atu ki se taimi mai mua, e pelā mo ana muna, “Me ka fai taua te suā atufenua ki te suā atufenua, mo te suā malo ki te suā malo. Ka oko mai a oge meakai mo mafuie ki koga katoa.” Kae ne toe fai mai a ia: “A mea katoa konei ko te kamataga o puapuaga.” (Mataio 24:7, 8) Ne fakamatala mai ne te apositolo ko Paulo a te vaitaimi foki eiloa tenei e pelā me ko “aso fakaoti,” kae ko aso konā ko “toe taimi faiga‵ta.” (2 Timoteo 3:1) E mata, e foliga atu ki a koe me e fakamatala mai i valoaga konā a mea kolā ko ‵tupu i aso nei?

Kaia e faigata ‵ki ei te vaitaimi tenei? E tuku mai ne te apositolo ko Ioane a te pogai. Ne ‵valo mai ne tou tagata me i te “taimi ko toetoe” ke fai ei a galuega a Satani mo ana temoni i te lalolagi nei. Ne fakamatala mai me i a Satani “ko oko eiloa i te kaitaua” i te vaitaimi tenei. (Fakaasiga 12:7-12) E mata, e matea ne koe me isi se uiga kaitaua kae saua i va o tino i aso nei, i te lalolagi kātoa?

Ne fai mai foki Iesu me i loto i te vaitaimi faigata ‵ki tenei, ka fakataunugina i ei se galuega fakaofoofogia. “A ko te tala ‵lei tenei o te Malo ka talai atu ki te lalolagi nofoaki kātoa mo fai se molimau ki atufenua katoa; ko oko mai ei te gataga.” (Mataio 24:14) I aso nei, i atufenua e silia atu i 235, e talai atu eiloa ne Molimau a Ieova a te tala ‵lei e uiga ki te Malo o te Atua i ‵gana e silia atu i te 500. A lomiga faka-te-Tusi Tapu e lua kolā e faite ne latou, Te Faleleoleo Maluga mo te Awake!, ko toe mekesini uke eiloa ne tufatufa atu i te lalolagi. Ko oti foki ne ‵fuli ne Molimau a te Tusi Tapu ki ‵gana e nofo ki te 100. E fai a te lotou galuega ne volenitia kae ‵togi katoa ki meaalofa kolā e fai mo te lotomalie. E mata, e mafai o fai a te galuega talai fakaofoofogina tenei e pelā me se fakataunuga o te valoaga a Iesu?

E fakasolo mai foki i te Tusi Tapu a mea ‵tupu kolā e tau tonu atu ki te taua i te va o Ieova te Atua mo tino kolā e ‵teke atu ki a ia. Ke mafaufau ki valoaga e tolu kolā ka lavea ne koe me ko fakataunu.

Fakalavelave Kolā ko Pili o Lavea ne Koe ko ‵Tupu

Te Valoaga 1. E fai mai te Tusi Tapu me ka fai ne atufenua se faka‵pulaga tāua e uiga ki te “filemu kae tokagamalie.” Kāti e mafau‵fau latou me ko ‵tu latou i te tulaga telā ko mafai o faka‵lei aka i ei a fakalavelave ‵lasi ‵ki. Kae e ui i ei, a mea ‵tupu kolā e ‵tao mai tua o te faipatiga tenei e seai eiloa se filemu e maua i ei.—1 Tesalonia 5:1-3.

Te Valoaga i te 2. Ka fakaiku aka ne malo kese‵kese ke ‵teke atu latou ki fakapotopotoga fakalotu o te lalolagi. I loto i te Tusi Tapu, e fakatusa a malo konei ki se manu fekai; kae ko lotu ‵se o te lalolagi ki se fafine e sopo i te tua o te manu fekai. (Fakaasiga 17:3, 15-18) Ka fai eiloa ne te manu fekai fakatusa a te mea e manako ki ei te Atua e aunoa mo te iloa ne ia e auala i te fakamaseiga o lotu kolā e fai olotou mau sē tonu me sui ne latou te Atua.

I te fakaaogaga o fakailoga, ne fakamatala mai penei ne te apositolo ko Ioane a te tala: “Kae ko suki e sefulu kolā ne matea ne koe, e penā foki mo te manu fekai, ka takalia‵lia ki te fafine talitagata kae ka ta fakamasei ne latou tou fafine kae tuku atu ke nofo fuafua. Ka kai ne latou ana ‵kano kae ka ‵sunu katoatoa ne latou a ia ki te afi. Me ne faulu ne te Atua ki olotou loto a tena manatu ke fakataunu ei tena loto.”—Fakaasiga 17:16, 17.

Te Valoaga i te 3. Mai tua o te osoatuga manuia tenei ki lotu ‵se, ka fakamaopoopo eiloa ne Satani a atufenua ke taua atu ki tino kolā e tapuaki atu ki a Ieova te Atua.—Fakaasiga 7:14; Mataio 24:21.

Ka Pokotia Pefea Koe i ei?

Kafai ne seki maua ne koe se avanoaga ke tauloto malosi ki te Tusi Tapu, kāti e faigata ke talitonu koe ki fakalavelave kolā ne fakamatala mai luga me ka ‵tupu eiloa. Kae isi se pogai ‵lei ke talitonu me i fakamatalaga likiliki katoa ka fakataunu eiloa kae ko fakalavelave konei ka taunu eiloa i se taimi mai mua nei. A valoaga e uke i loto i te Tusi Tapu kolā ko oti ne fakataunu e tuku mai i ei se fakatalitonuga.a

Kaia e se fakaavanoa ei ne koe ne taimi e uke o ‵sala aka te pogai e loto ma‵lie ei Molimau a Ieova me i “te taua i te aso lasi o te Atua Malosi Katoatoa” ko pili ‵ki mai eiloa kae kaia e se ‵tau ei koe o mataku e uiga ki ei? Ke sau‵tala fakatasi mo latou ki mea kolā e fai mai te Tusi Tapu e ‵tau o fai ne koe ke nofo atu koe i loto i tino kolā e puipui ne Ieova te Atua. (Fakaasiga 16:14) E se taumate ka ‵fuli tau kilokiloga e uiga ki te taimi mai mua ne mea kolā e tauloto ne koe.

[Fakamatalaga fakaopoopo]

[Ata i te itulau e 8]

E mata, e mafai o fai te galuega a Molimau a Ieova e pelā me se fakataunuga o valoaga i te Tusi Tapu?