Ke Fia‵fia Ki ‵Tou Fakamoemoega

“[E isi se] fakamoemoega o te ola se-gata-mai, ko leva eiloa ne folafola mai ne te Atua, telā e se mafai o loi.”—TITO 1:2.

E AUALA I TE ‵TOE ONOONO KI EI

Kaia e iloa ei ne tatou me e maua te fiafia i te lagi māfai se tokotasi o te kau fakaekegina e tumau i te fakamaoni i tena olaga kātoa?

E tau atu pefea a te iloaga o te fakamoemoega o nisi mamoe ki te fakamoemoega o te kau fakaekegina?

Ke ‵kilo atu ki te fakataunuga o ‵tou fakamoemoega, ne a “amioga ‵ma” mo “faifaiga fakamaoni” e ‵tau o fakaasi atu ne tatou?

1. E mafai pefea o fesoasoani mai ki a tatou a te fakamoemoega telā ne tuku mai ne Ieova ko te mea ke mafai ne tatou o fa‵ki?

A IEOVA ko “te Atua telā e tuku mai ne ia te fakamoemoega.” Tenā ne fai mai ei a te apositolo ko Paulo, me e mafai ne Ieova o ‘faka‵fonu tatou ki te fiafia mo te filemu ona ko te ‵tou tali‵tonu ki a ia, ko te mea ke ‵fonu tatou i te fakamoemoega i te ‵mana o te agaga tapu.’ (Loma 15:13) Kafai e ‵fonu tatou i te fakamoemoega, ka mafai eiloa ne tatou o fa‵ki i so se tulaga e sae aka, ka ‵fonu eiloa ‵tou loto i te fia‵fia mo te filemu. E pelā mo Kelisiano fakaekegina, e fai te fakamoemoega tenei e pelā me “se taula mō ‵tou ola, e mautinoa kae ‵mautakitaki” mō nisi Kelisiano. (Epelu 6:18, 19) A ‵tou fakamoemoega ko te mea telā e mafai ne tatou o ‵piki ‵mau ki ei i taimi o kaumatagi o te olaga, se mea telā ka fesoasoani mai ki a tatou ke sē tapea‵pea atu ki loto i tulaga fakalotolotolua io me ko te sē lava o te fakatuanaki.—Faitau te Epelu 2:1; 6:11.

2. Ne a fakamoemoega e lua e maua atu i Kelisiano i aso nei, kae kaia e fia‵fia ei a “nisi mamoe” ki te fakamoemoega telā e maua ne te kau fakaekegina?

² E ‵saga tonu atu eiloa a Kelisiano kolā e ola i te taimi tenei o te gataga ki se mea e tasi mai fakamoemoega e lua. E maua ne te ‵toega o te “lafu foliki” o Kelisiano fakaekegina a te fakamoemoega ke tumau i te ola i te lagi e pelā me ne tupu mo faitaulaga fakatasi mo Keliso i tena Malo. (Luka 12:32; Fakaasiga 5:9, 10) Kae e fakamoe‵moe eiloa a te “vaitino tokouke” o “nisi mamoe” ke ola ki te se-gata-mai i se lalolagi palataiso mai lalo i te Malo faka-Mesia. (Fakaasiga 7:9, 10; Ioane 10:16) E se ‵tau o puli i nisi mamoe me i te lotou fakaolataga e faka‵na eiloa ki te ‵lago malō atu o latou ki “taina” fakaekegina o Keliso kolā koi ‵nofo i te lalolagi. (Mataio 25:34-40) Ka ulu atu a te kau fakaekegina ki te lotou taui, kae mautinoa eiloa me ka fakataunu a te fakamoemoega o nisi mamoe. (Faitau te Epelu 11:39, 40.) Muamua la, ke suke‵suke aka tatou ki te fakamoemoega telā ne tuku atu ki te kau fakaekegina.

TE “FAKAMOEMOEGA OLA” O KELISIANO FAKAEKEGINA

3, 4. E mafai pefea o toe fa‵nau mai a Kelisiano fakaekegina ki “se fakamoemoega ola,” kae se a te fakamoemoega tenā?

³ Ne tusi ne te apositolo ko Petelu a tusi e lua ki Kelisiano fakaekegina, kolā ne taku ne ia “ko latou kolā ne filifiligina.” (1 Petelu 1:1) Ne tuku mai ne tou tagata a fakamatalaga likiliki o te fakamoemoega fakaofoofogia telā ne tuku atu ki te lafu foliki. I tena tusi muamua, ne tusi atu a Petelu: “Ke vikia te Atua te Tamana o te ‵tou Aliki ko Iesu Keliso, ona ko te lasi o tena alofa fakamagalo ne fai ei ne ia ke toe fa‵nau mai tatou ki loto i se fakamoemoega ola e auala i te ‵toe fakatumaiga o Iesu Keliso mai te mate, ki se tofi telā e se mafai o pala io me lailai kae e se mafai foki o galo. E tausi te mea tenā i te lagi mō koutou, kolā e puipuigina ne te ‵mana o te Atua e auala i te fakatuanaki mō te fakaolataga telā ka fakaasi mai i te taimi o te gataga. Ona ko te mea tenei ko fia‵fia malosi eiloa koutou.”—1 Petelu 1:3-6.

⁴ Ka “toe fa‵nau mai” a te aofaki foliki o Kelisiano kolā ne filifili ne Ieova ke ‵kaufakatasi mo Keliso i te pulega faka-te-lagi a te Malo e pelā me ne tama faka-te-agaga a te Atua. E fakaeke latou ki te agaga tapu ke fai mo tupu mo faitaulaga fakatasi mo Keliso. (Fakaasiga 20:6) E fai mai a Petelu me i te “toe fanau” tenei e ‵tala atu i ei ki a latou “se fakamoemoega ola” telā e taku ne ia “se tofi telā e se mafai o pala io me lailai kae e se mafai foki o galo” telā ne tausi mō latou “i te lagi.” E se tioa eiloa o ‘fia‵fia malosi’ a te kau fakaekegina ki te lotou fakamoemoega ola! A te iloaga o te fakamoemoega tenā e faka‵na eiloa ki te lotou fakamaoni.

5, 6. Kaia e ‵tau ei mo Kelisiano fakaekegina o fai te ‵toe mea e mafai ne latou ke fakamautinoa aka te lotou kalagaga faka-te-lagi?

⁵ I te lua o ana tusi, ne fakamalosi atu a Petelu ki Kelisiano fakaekegina ke ‘fai te ‵toe mea e mafai ne latou ke fakamautinoa aka te lotou kalagaga mo te lotou filifiliga.’ (2 Petelu 1:10) E ‵tau o ga‵lue malosi latou ke ati aka a vaegā uiga faka-Kelisiano e pelā mo te fakatuanaki, te tuku katoatoa atu ki te Atua, te alofa fakataina, mo te alofa. Muna a Petelu: “Kafai e maua a mea konei i loto i a koutou kae e ‵fonu maligiligi koutou i ei, ka fai ei ne mea konei ke se paie koutou kae ke ‵fua mai.”—Faitau te 2 Petelu 1:5-8.

⁶ I tena fekau ki toeaina faka-te-agaga i te fakapotopotoga i Filatelafia i te senitenali muamua i Asia Foliki, muna a te Keliso telā ne toetu aka: “Ona ko te mea ne fakalogo koe ki te muna e uiga ki toku kufaki, ka tausi foki ne au a koe i te itula o tofotofoga, telā ka oko atu ki te lalolagi nofoaki kātoa, ke tofotofo aka ei a latou kolā e ‵nofo atu i te lalolagi. Au ka fanatu fakavave. Ke puke ‵mau faeloa ki mea kolā ko oti ne maua ne koe, ko te mea ke se mafai o ave keatea ne se tino tou foualiki.” (Fakaasiga 3:10, 11) Kafai ko sē fakamaoni se Kelisiano fakaekegina, ka sē maua ne ia “te foualiki ‵malu telā e se mafai o mago” telā ne tauto atu a ia ki tino filifilia kolā e tumau i te fakamaoni ke oko eiloa ki te mate.—1 Petelu 5:4; Fakaasiga 2:10.

SE MATALOA KI LOTO I TE MALO

7. Se a te fakamoemoega fakaofoofogia telā ne fakasino atu a Iuta ki ei i tena tusi?

⁷ E nofo pelā ki te tausaga e 65 T.A, ne tusi atu ei ne te āfa taina o Iesu ko Iuta se tusi ki ana taina ko Kelisiano fakaekegina, kolā ne faipati a ia ki ei e pelā me ne “tino kolā ne kalagagina.” (Iuta 1; fakatusa ki te Epelu 3:1.) Ne manako eiloa tou tagata ke tusi atu se tusi ki a latou e fakavae ki luga i te fakamoemoega ‵malu o te fakaolataga telā “e maua fakatasi” ne Kelisiano kolā e kalagagina ki te Malo faka-te-lagi o te Atua. (Iuta 3) E tiga eiloa e isi aka ne nisi mataupu tāua e manakogina ke faipati a ia ki ei, i te fakaotiga o tena tusi toetoe, ne fakasino atu eiloa a ia ki te fakamoemoega fakaofoofogia telā e maua ne Kelisiano fakaekegina, penei: “Kae nei la, ki te tino telā e mafai o puipui ne ia ke mo a koutou e ‵siga kae fai ne ia koutou ke tumau i te sē lai‵lai i mua o tena ‵malu mo te fiafia lasi, ke i luga i te Atua fua e tokotasi te ‵tou Fakaola e auala i a Iesu Keliso te ‵tou Aliki, te ‵malu, te malosi mo te pule mai te se-gata-mai ke oko atu eiloa ki te se-gata-mai.”—Iuta 24, 25.

8. E ‵tusa mo te Iuta e 24, se a te mea e fakaasi mai i ei me e maua te fiafia i te lagi māfai e fakatalitonu atu ne se tokotasi o te kau fakaekegina a tena fakamaoni?

⁸ E ma‵nako eiloa a Kelisiano fakaekegina ke puipui latou taki tokotasi mai te ‵to atu ki loto i fakamaseiga. A te lotou fakamoemoega faka-te-Tusi Tapu me ka faka‵tu aka latou ne Iesu Keliso mai te mate, ko talia ei ke ‵tu atu latou i mua o te Atua mo te fiafia lasi i te ‵lei katoatoa faka-te-agaga. Kafai e mate se tokotasi o te kau fakaekegina i te fakamaoni, e mautinoa eiloa me ka “fakatu aka i se foitino faka-te-agaga,” toe fakatu aka “i te sē pala . . . , mo te ‵malu.” (1 Kolinito 15:42-44) Kafai e lasi te “fiafia e maua i te lagi māfai e salamō se tino agasala e tokotasi,” mafaufau ki te fiafia e maua i koga faka-te-lagi māfai se tokotasi o taina faka-te-agaga o Keliso e mate i te fakamaoni. (Luka 15:7) Ka fia‵fia fakatasi eiloa a Ieova mo tino faka-te-agaga fakamaoni mo te tino fakaekegina telā e maua a tena taui “mo te fiafia lasi.”—Faitau te 1 Ioane 3:2.

9. E fai pefea a te ulu atu ki te Malo mo fai se “tauliaga lasi” ki te kau fakaekegina fakamaoni, kae pokotia pefea a te kau fakaekegina kolā koi nofo i te lalolagi i te fakamoemoega tenei?

⁹ Ko te lagonaga foki tenā, ne tusi atu ei a Petelu ki Kelisiano fakaekegina me kafai e fakamautinoa aka ne latou te lotou kalagaga e auala i te lotou fakamaoni “ka tuku atu eiloa te tauliaga lasi ke ulu atu koutou ki loto i te Malo se-gata-mai o te ‵tou Aliki mo te ‵tou Fakaola ko Iesu Keliso.” (2 Petelu 1:10, 11) A te ulu atu o latou ki loto i te lotou taui faka-te-lagi se “tauliaga lasi,” e fakaata mai foki i te lasi o te mata fia‵fia o latou a olotou uiga faka-Kelisiano. Me se “tauliaga lasi” e fakaasi mai i ei a te lasi o te fakamanuiaga e maua ne tino kolā ne fakamalosi atu ki a latou ke ‵tele i te fakatau‵telega ki te ola. E mafai o toe ‵kilo atu latou ki tua i olotou olaga ne ola latou i ei mo te fakamaoni mo loto e ‵fonu i te fiafia mo te loto fakafetai. E tuku atu ne te fakamoemoega tenei ki Kelisiano fakaekegina kolā koi nofo i te lalolagi se malosi ke ‘fakatoka olotou mafaufau mō te faiga o galuega tumau.’—1 Petelu 1:13.

‘TE FAKAVAE O TE FAKAMOEMOEGA’ O NISI MAMOE

10, 11. (a) Se a te fakamoemoega ne tuku atu ki nisi mamoe? (e) E tau atu pefea a te fakamoemoega faka-te-lalolagi ki a Keliso mo te ‘fakaasimaiga o tama a te Atua’?

¹⁰ Ne tusi mai te apositolo ko Paulo e uiga ki te fakamoemoega ‵malu o “tama [faka-te-agaga] a te Atua” e pelā me ne ‘sui ‵kaufakatasi’ o Keliso. I konā, ne fakasino atu tou tagata ki te fakamoemoega fakaofoofogia telā ne tuku atu ne Ieova ki nisi mamoe kolā e seai se aofaki o latou: “Me e fakatali‵tali a mea katoa ne faite mo te olioli ki te taimi e fakaasi mai ei a tama a te Atua. Me ne tuku atu a mea ne faite ki loto i se olaga sē aoga, e se i olotou loto eiloa, kae e auala i a ia telā ne tuku atu ne ia latou ke fai penā, kae e fakavae ki luga i te fakamoemoega, me ka toe fakasaoloto a mea ne faite mai te pologa ki te masei ke maua ne latou a te saolotoga ‵malu, ko te fai mo fai a fanau a te Atua.”—Loma 8:14-21.

¹¹ Ne tuku mai ne Ieova ki tino a ‘te fakavae o te fakamoemoega’ i te taimi ne tauto mai ei tou tagata me ka fakasaoloto tatou mai te “gata muamua,” ko Satani te Tiapolo, e auala i te “fanau” telā ne folafola mai. (Fakaasiga 12:9; Kenese 3:15) A te vaega muamua o te “fanau” tenā ko Iesu Keliso. (Kalatia 3:16) E auala i tena mate mo te ‵toetu, ne maua i ei ne tino a te fakamoemoega ke fakasaoloto latou mai te ‵nofo pologa ki te agasala mo te mate. E tau atu a te fakamoemoega tenei ki te ‘fakaasi mai o tama a te Atua,’ ko te kau fakaekegina. A te kau fakaekegina ‵malu ko te lua o vaega o te “fanau.” Ka “fakaasi” mai latou i te taimi telā e ‵kau fakatasi ei latou mo Keliso i te fakaseaiga o te fakanofonofoga masei a Satani. (Fakaasiga 2:26, 27) Ka aumai ne te mea tenei a te fakaolataga ki nisi mamoe kolā ka ‵sao mai te fakalavelave lasi.—Fakaasiga 7:9, 10, 14.

12. Ne a mea aoga kae ‵malu e maua ne tino i te fakaasimaiga o te kau fakaekegina?

¹² Ma‵faga o fakatapūga lasi ‵ki e maua ne tino i te Pulega a Keliso i te Afe Tausaga! I te taimi tenā, ka ‘fakaasi’ faka‵sau mai ei a “tama [‵malu] a te Atua” māfai e ga‵lue latou e pelā me ne faitaulaga fakatasi mo Keliso, i te ‵tukuatuga o mea aoga o te taulaga togiola a Iesu ki tino. Ka kamata eiloa o maua ne tino a te fakasaolotoga mai ikuga o te agasala mo te mate mai lalo i te Malo faka-te-lagi. A tino faka‵logo ka “fakasaoloto [malielie] mai te pologa ki te masei.” Kafai e tumau latou i te fakamaoni ki a Ieova i loto i te afe tausaga mo te ‵toe tofotofoga telā ka fai i te fakaotiga o te afe tusaga, ka tusi faka‵mau olotou igoa i loto i “te pelugā tusi o te ola.” Ka ulu atu latou ki loto i ‘te saolotoga ‵malu o fanau a te Atua.’ (Fakaasiga 20:7, 8, 11, 12) Se ma‵tugā fakamoemoega ‵malu eiloa!

TE TAUSIGA O ‵TOU FAKAMOEMOEGA KE OLA

13. E fakavae ki te ā ‵tou fakamoemoega, kae ka fakaasi mai māfea a Keliso?

¹³ E tusi i loto i tusi fakaosofia e lua a Petelu a mea e uke ke fesoasoani atu ki te kau fakaekegina mo nisi mamoe ke tausi olotou fakamoemoega ke ola. Ne fai atu tou tagata me i olotou fakamoemoega e se fakavae ki luga i olotou galuega, kae fakavae ki te alofa tauanoa o Ieova. Ne tusi mai a ia: “Tuku atu otou fakamoemoega ki luga i te alofa tauanoa telā ka fakaasi atu ki a koutou i te taimi e fakaasi mai ei a Iesu Keliso.” (1 Petelu 1:13) Ka fakaasi mai a Keliso māfai e vau a ia o tuku atu te taui ki ana soko fakamaoni kae fakaoko atu te fakamasinoga a Ieova ki luga i tino sē amioatua.—Faitau te 2 Tesalonia 1:6-10.

14, 15. (a) Ke tausi ‵tou fakamoemoega ke ola, se a te mea e ‵tau o tuku tonu ‵tou mafaufau ki ei? (e) Se a te polopolokiga ne tuku mai ne Petelu?

¹⁴ Ke tausi ‵tou fakamoemoega ke ola, e ‵tau o tuku tonu atu ‵tou mafaufau kae fakavae ‵tou olaga ki te oko mai o te “aso o Ieova.” Ka aumai i ei a te fakaseaiga o “lagi,” ko pulega a tāgata i aso nei, mo te “lalolagi,” ko te fakapotopotoga o tino amio ma‵sei mo ana “mea.” Ne tusi mai a Petelu: “E ‵tau o fai otou amioga ke ‵ma kae fakamaoni ki te Atua, a koi fakatali‵tali kae olioli faeloa koutou ki te oko mai o te aso o Ieova. I te aso tenā ka fakaseai atu ei a te lagi telā ka ‵ka i te afi kae ka liu suavai a mea katoa i ei ona ko te lasi o te ‵vela!”—2 Petelu 3:10-12.

¹⁵ Ka sui a “lagi” mo te “lalolagi” i aso nei ne te “lagi fou [te pulega faka-te-Malo a Keliso] mo se lalolagi fou [se fakapotopotoga fou i te lalolagi].” (2 Petelu 3:13) I konā, ne polopoloki ‵tonu mai a Petelu, e fakavae ki luga i te “fakatali‵tali,” o tatou io me ko te tausiga o ‵tou fakamoemoega ke ola, mō te lalolagi fou telā ne tauto mai ki ei: “Tela la, e aku fagasele, a koi fakatali‵tali koutou ki mea konei, fai te toe mea e mafai o fai ke maua atu koutou ne ia e seai ne otou pona io me ne lailaiga kae ko te filemu fua.”—2 Petelu 3:14.

KE OLA E ‵TUSA MO ‵TOU FAKAMOEMOEGA

16, 17. (a) Ne a “amioga ‵ma” mo “faifaiga fakamaoni” e ‵tau o fakaasi atu ne tatou? (e) Ka fakataunu pefea ‵tou fakamoemoega?

¹⁶ E se ‵tau fua o tausi ‵tou fakamoemoega ke ola kae e ‵tau foki mo tatou o ola ke fetaui mo ‵tou fakamoemoega. E ‵tau mo tatou o ‵saga tonu me e a tatou i te feitu faka-te-agaga. “Fai amioga ke ‵ma” e aofia i ei ‘ke tausi ‵tou amioga ke ‵lei i mua o tino i fenua katoa,’ mai te fakamaoni ki ‵tou amioga e fai. (2 Petelu 3:11; 1 Petelu 2:12) E ‵tau o maua te ‘alofa i va o tatou.’ E aofia i te mea tenā a te faiga o mea katoa e mafai ne tatou ke fakatumau a te ‵kaufakatasi o te kautaina i te lalolagi ke oko foki loa ki tino i loto i ‵tou fakapotopotoga. (Ioane 13:35) ‘Faifaiga fakamaoni ki te Atua’ ko faifaiga kolā e fakamau‵tu i ei te ‵tou fesokotakiga mo Ieova. E aofia i te mea tenei a te ‵lei o ‵tou ‵talo, e pelā foki loa mo ‵tou fai‵tauga ki te Tusi Tapu i aso katoa, te ‵poko o ‵tou sukesukega totino, tapuakiga a kāiga, mo te ‵kau malosi atu ki te talaiga o te “tala ‵lei o te Malo.”—Mataio 24:14.

¹⁷ A tatou taki tokotasi e ma‵nako ke fai mo fai se vaegā tino telā e talia ne Ieova kae ka sao māfai ko “fakaseai” atu a te fakanofonofoga masei tenei. Ka iloa eiloa ne tatou a ‵tou fakamoemoega, te “fakamoemoega o te ola se-gata-mai, ko leva eiloa ne folafola mai ne te Atua, telā e se mafai o loi.”—Tito 1:2.

[Ata i te itulau e 22]

A Kelisiano fakaekegina ka “toe fa‵nau mai . . . ki loto i se fakamoemoega ola”

[Ata i te itulau e 24]

Tausi te fakamoemoega ke ola i loto i tou kāiga