Fakamoemoe ki a Ieova, Kae Loto Toa

“Talitonu io me fakamoemoe ki te Aliki. Fakatuanaki ki a ia io me loto toa kae sa loto vāivāi. Talitonu ki te Aliki.”​​—⁠SALAMO 27:⁠14.

1. E pefea te tāua o te fakamoemoega, kae e fakaaogā pefea a te pati tenā i te Tusi Tapu?

A TE fakamoemoega tonu e fai pelā me se mainaga lasi. E fesoasoani mai ke kilo ‵mao tatou ki tofotofoga ka oko mai kae ke fakafesagai atu ki mea ka ‵tupu i aso mai mua mo te loto toa mo te fiafia. Ko Ieova fua e mafai o tuku mai ne ia ki a tatou se fakamoemoega mautinoa, kae e tuku mai ne ia e auala i tena Muna fakaosofia. (2 Timoteo 3:16) A te tonuga loa, a te pati “fakamoemoe” e sae mai i taimi e uke i te Tusi Tapu, kae fakasino atu ki te fakatalitali mo te fiafia ki se mea ‵lei mo te pogai o te fakamoemoega tenā.a E sili atu te fakamoemoega tenā i lō te fakamisimisi fua e uiga ki se mea telā e manako ki ei, telā kāti e se mafai o maua.

2. Ne aogā pefea te fakamoemoega i te olaga o Iesu?

² I te taimi ne fepaki ei mo tofotofoga mo tulaga faiga‵ta, ne kilo ‵mao a Iesu kae ne fakamoemoe ki a Ieova. “Ne kufaki ne ia te sataulo ona ko te fiafia telā e fakatalitali mai ki a ia, kae ne seki fia saga foki ki tona mate fakalumalumagina i luga i te sataulo, ka ko nofo nei i te koga tāua, ko te feitu fakaatamai o te nofogaaliki o te Atua.” (Epelu 12:⁠2) Ona ko tena saga katoatoa atu ki te taku‵leiga o te pulega a Ieova mo te faka‵maluga o Tena igoa, ne fakalogo katoatoa eiloa a Iesu ki te Atua faitalia a mea kolā ne fepaki mo ia.

3. Ne aogā pefea te fakamoemoega i olaga o tavini a te Atua?

³ Ne fakasino atu a te tupu ko Tavita ki te sokoga i te vā o te fakamoemoega mo te loto toa i ana pati: “Talitonu io me fakamoemoe ki te Aliki. Fakatuanaki ki a ia io me loto toa kae sa loto vaivai. Talitonu ki te Aliki.” (Salamo 27:14) Kafai e ma‵nako tatou ke ma‵losi ‵tou loto, e se ‵tau o talia ne tatou ke matafitafi ‵tou fakamoemoega e uiga ki ei kae tausi ke manino i ‵tou mafaufau mo ‵tou loto. A te faiga penā ka fesoasoani mai ke fakaakoako tatou ki a Iesu i te fakaasiatuga o te loto toa mo te loto finafinau i te faiga o te galuega telā ne fakatonu atu ki ana soko ke fai ne latou. (Mataio 24:14; 28:​19, 20) E tonu, e taku mai i te Tusi Tapu a te fakamoemoega i tafa o te fakatuanaki mo te alofa, e pelā me se uiga tāua telā ne fakaasi mai i olaga o tavini a te Atua i se auala lasi ‵ki.​​—⁠1 Kolinito 13:⁠13.

E Mata, e ‘Lasi Tou Fakamoemoega’?

4. Ne a mea e ‵nofo fakatali‵tali ki ei a Kelisiano fakaekegina mo ‘nisi mamoe’?

⁴ E maua ne tino o te Atua se fakamoemoega tafasili i te gali i aso mai mua. E ‵nofo fakatali‵tali a Kelisiano fakaekegina ke tavini atu latou fakatasi mo Keliso i te lagi, kae e fakamoe‵moe a ‘nisi mamoe’ ki te taimi ka “fakasaoloto [ei] a mea katoa ne faite mai te pologa mo te iku vale, ki te ‵kau fakatasi i te saolotoga ‵malu o te fanau [faka-te-lalolagi] a te Atua.” (Ioane 10:16; Loma 8:​19-​21; Filipi 3:​20) A te “saolotoga ‵malu” tenā, e aofia i ei te fakasaolotoga mai te agasala mo ana ikuga matagā. E tonu, a Ieova​​—⁠te Tino telā e tuku mai ne ia a “mea ‵lei katoa . . . mo meaalofa katoatoa takitasi”​​—⁠e tuku mai ne ia te ‵toe meaalofa ‵lei mō ana tino fakamaoni.​​—⁠Iakopo 1:​17; Isaia 25:⁠8.

5. E fai pefea te ‵tou ‘fakamoemoega ke lasi’?

⁵ E pefea te lasi o te aogā o te fakamoemoega faka-Kelisiano i ‵tou olaga? I te Loma 15:​13, e fai‵tau tatou penei: “A te Atua telā ko te pogai o fakamoemoega, ke faka‵fonu ne ia koutou ki fiafiaga mo te filemu katoa, i te talitonu ki a ia, ko te mea ke ola koutou i te fakamoemoega i te ‵mana o te Agaga Tapu.” E tonu, e mafai o fakatusa a te fakamoemoega, e se ki se moligako fua e ka i te pouliga, kae ki te mainaga o te la telā e ‵kasa mai i te tafataeao, kae faka‵fonu i ei te olaga o se tino ki te filemu, te fiafia, te aogā mo te loto toa. Ke masaua me e ‘lasi te ‵tou fakamoemoega’ māfai e tali‵tonu tatou ki te Muna tusia a te Atua kae e maua ne tatou tena agaga tapu. E fai mai te Loma 15:4: “Me i mea katoa kolā ne tusi i te Tusi, ne tusi ke akoako ei tatou, ko te mea ke maua ne tatou a te fakamoemoega e alatu i te kufaki, mo te fakamalosiga e alatu i te Tusi.” Tela la, ke fesili ifo ki a koe eiloa: ‘E mata, e tausi ne au toku fakamoemoega ke ola malosi mai te fai mo fai se tino apo i te Tusi Tapu, ona ko te faitau ki ei i aso takitasi? E mata, e ‵talo faeloa au mō te agaga o te Atua?’​​—⁠Luka 11:⁠13.

6. Ko te mea ke tausi ke malosi te ‵tou fakatuanaki, se a te mea e ‵tau o puipui tatou mai i ei?

⁶ Ne maua ne Iesu, te ‵tou Fakaakoakoga Sili, a te malosi mai te Muna a te Atua. A te mafaufau ‵loto ki a ia e fai i ei ke se mafai o ‘fi‵ta tatou.’ (Epelu 12:⁠3) E manino ‵lei, me kafai ko gasolo o matafitafi te ‵tou fakamoemoega i ‵tou mafaufau mo ‵tou loto io me ko ‵saga atu tatou ki nisi mea​​—⁠kāti ki mea faka-te-foitino io me ko fakamoemoega faka-te-foitino⁠​—⁠e mafai o oko mai ki a tatou te fi‵ta i te feitu faka-te-agaga kae iku atu ei ki te galo o ‵tou malosi mo te loto toa ke ola e ‵tusa mo fakatakitakiga i mea tau amioga. Ona ko te mea tenā, e mafai foki o kasa “te [‵tou] fakatuanaki.” (1 Timoteo 1:​19) I te suā feitu, e fakamalosi aka ne te fakamoemoega tonu te ‵tou fakatuanaki.

Te Fakamoemoega​—⁠E Tāua ki te Fakatuanaki

7. I te auala fea e tāua ei te fakamoemoega ki te fakatuanaki?

⁷ “A te fakatuanaki, ko te talitonu ki mea e fakamoe‵moe tatou ki ei, ko te talitonu fakamaoni foki ki mea e se matea ki mata,” ko pati i te Tusi Tapu. (Epelu 11:⁠1) Tela la, e se fai pelā me e se tāua a te fakamoemoega ki te fakatuanaki; kae se vaega tāua o te fakatuanaki. Ke mafaufau ki a Apelaamo. Mai te kilokiloga faka-te-tagata, ko se toe mafai ne laua mo tena avaga, ko Sala, o fai se lā tamaliki i te taimi ne tauto atu ei a Ieova me ka maua ne laua se tamaliki. (Kenese 17:​15-​17) Ne saga atu pefea a Apelaamo ki te mea tenā? “I te fakamoemoe ne se talitonu io me fakatuanaki a ia ki te fakamoemoe, me ka fai a ia mo tamana o fenua e uke.” (Loma 4:​18) E tonu, ne fakamalosi aka ne te fakamoemoega o Apelaamo mai te Atua a tena fakatuanaki me ka maua sena tamaliki. Ne fakamalosi aka ei ne tena fakatuanaki ke maina faka‵lei atu tena fakamoemoega. Kae, ne maua foki ne Apelaamo mo Sala a te loto toa ke tiakina te lā fale mo kāiga kae ke ola i fale fakamalumalu i se fenua fakaatea ke oko eiloa ki te lā ‵mate!

8. E fakamalosi aka pefea ne te kufaki mo te fakamaoni a te fakamoemoega?

⁸ Ne tausi ne Apelaamo a tena fakamoemoega ke malosi mai te fakalogo katoatoa ki a Ieova, faitalia te faigatā o te fai penā. (Kenese 22:​2, 12) I se auala foki penā, mai te ‵tou fakalogo mo te kufaki i te taviniga ki a Ieova, e mafai foki o tali‵tonu tatou ki te ‵tou taui. “Ka ko te kufaki,” ko pati a Paulo, e iku atu ki “te iloa tonu,” telā e māfua mai i ei te fakamoemoega, “ka ko te fakamoemoe e se fai ne ia ke ‵mae o‵tou loto.” (Loma 5:​4, 5) Tenā foki eiloa te pogai ne tusi mai ei a Paulo: “A te motou fakamoemoega maluga ke tumau te loto naunau o koutou ke oko eiloa ki te gataga, ko te mea ke taunu a mea kolā e fakamoe‵moe koutou ki ei.” (Epelu 6:​11) A te mauaga o se vaegā kilokiloga aogā penā, telā e fakavae ki te mauaga o se fesokotakiga ‵pili mo Ieova, e mafai o fesoasoani mai ke fakafesagai atu tatou mo te loto toa ki mea faiga‵ta, ke oko ki te mauaga o te fiafia.

‘Ke Fia‵fia ki te Fakamoemoega’

9. Ne a mea e mafai o fai faeloa ne tatou ke fesoasoani mai ‘ke fia‵fia tatou ki te fakamoemoega’?

⁹ A te ‵tou fakamoemoega mai te Atua e sili fakafia atu ki so se mea e mafai o tuku mai ne te lalolagi. E fai mai te Salamo 37:34: “Ke fakamoemoe koe ki te Aliki kae fakalogo ki ana fakatonuga; ka fakamanuia ne ia a koe o tuku atu mo koe te fenua io me ko te lalolagi, kae ka lavea foki ne koe a tino amio ma‵sei ka afuli keatea.” E tonu, e maua ne tatou a pogai katoa ‘ke fia‵fia ei ki te fakamoemoega.’ (Loma 12:12) Ko te mea ke fai penā, e ‵tau o tausi ne tatou te ‵tou fakamoemoega ke fou faeloa i ‵tou mafaufau. E mata, e mafaufau faeloa koe ki tou fakamoemoega mai te Atua? E mata, e mafai o fakaataata ne koe a koe eiloa i te Palataiso, i te malosi ‵lei, te saoloto mai te manavase, te ‵nofo fakatasi mo tino kolā e pele i a koe, mo te galue i galuega fakamalie loto? E mata, e mafaufau ‵loto koe ki ata o te Palataiso kolā e ‵sae sāle mai i ‵tou tusi? A te mafaufau faeloa ki ei e mafai o fakatusa ki te ‵fuluga o se famalama ke lavea atu ei se kogā koga gali i tua. Kafai e fakatamala tatou o ‵fulu te kilasi i te famalama tenā, ka se lavea ‵lei foki ne tatou te gali o te koga tenā i tua. Ko mafai ei o ‵saga atu tatou ki nisi mea. Ke se talia lele eiloa ne tatou ke tupu te mea tenā!

10. Kaia e fakaasi manino mai i ei ne te ‵tou ‵kilo atu mo te loto naunau ki te taui a te ‵tou fesokotakiga mo Ieova?

¹⁰ E tonu, a te pogai tāua e tavini atu ei tatou ki a Ieova ko ‵tou a‵lofa mō ia. (Maleko 12:30) E tiga te feitu tenā, e ‵tau o ‵kilo atu tatou mo te loto naunau ki te taui. A te tonuga loa, e fakamoemoe eiloa a Ieova ke fai tatou penā! E fai mai te Epelu 11:6: “E seai se tino e mafai ne ia o fakafiafia te Atua e aunoa mo te fakatuanaki. So se tino e vau ki te Atua e ‵tau mo ia o fakatuanaki me iai te Atua, kae tuku atu foki ne ia te taui ‵lei ki tino kolā e salasala ki a ia.” Kaia e manako ei a Ieova ke ‵kilo atu tatou ki a ia e pelā me ko te Tino telā e tuku mai ne ia te taui? Me kafai e fai tatou penā, e fakaasi atu ei me iloa ‵lei ne tatou te ‵tou Tamana. E kaimalie kae alofa a ia ki ana tama. Ke mafaufau ki te fanoanoa mo te faigofie o loto vāi‵vāi tatou māfai e seai se ‵tou ‘fakamoemoega mō aso mai mua.’​​—⁠Ielemia 29:⁠11.

11. Ne fesoasoani atu pefea a tena fakamoemoega mai te Atua ke fai ne Mose se fakaikuga ‵lei?

¹¹ A te fakaakoakoga sili e tasi o se tino telā ne saga atu faeloa ki te fakamoemoega mai te Atua, ko Mose. E pelā me ko “te tama a te tama fafine a Falao,” ne mafai o maua ne Mose te malosi, te takutakua, mo te maumea o Aikupito. E mata, ne kausaki atu a ia ki mea konei, io me ne tavini atu ki a Ieova? Ne filifili ne Mose mo te loto toa a te mea fakamuli. Kaia? Me ne “fakamoemoe eiloa a ia ki te taui ‵lei ka oko mai.” (Epelu 11:​24-​26) E tonu, ne seki manatu māmā a Mose e uiga ki te fakamoemoega telā ko oti ne fakailoa atu ne Ieova ki a ia.

12. Kaia e fai ei te fakamoemoega faka-Kelisiano e pelā me se puloutau?

¹² Ne fakatusa ne te apositolo ko Paulo a te fakamoemoega ki se puloutau. E puipui ne te ‵tou puloutau fakatusa a te malosi o te mafaufau, telā e fai i ei ke mafai ne tatou o fai a fakaikuga ‵lei, mea ‵lei kolā e ‵tau o fakamuamua, mo te fakatumauga o te fakamaoni. (1 Tesalonia 5:⁠8) E mata, e pei faeloa koe ki tou puloutau fakatusa i taimi katoa? Kafai e penā loa, ko fai eiloa koe pelā mo Mose mo Paulo mai te fakavae ne koe o tou fakamoemoega e se “ki mea e gata i lalo nei te lotou aogā, ka ke tuku atu olotou fakamoemoega ki te Atua, telā e alofa o tuku mai ne ia a mea katoa e manuia ei tatou.” E tonu, e manakogina te loto toa ke ‵teke atu ki faifaiga lauiloa mai te fulitua atu ki mea se aogā, kae e aogā ‵ki eiloa ke fai penā! A te tonuga loa, kaia e fia maua ei ne koe se isi mea aka i lō te mauaga o “te ola tonu,” telā e fakatalitali mai ki tino kolā e fakamoe‵moe kae a‵lofa ki a Ieova?​​—⁠1 Timoteo 6:​17, 19.

“E se Tiakina Lele Eiloa ne au Koutou”

13. Se a te fakatalitonuga e tuku mai ne Ieova ki ana tavini fakamaoni?

¹³ A tino kolā e fakamoe‵moe ki mea i te olaga nei e ‵tau o mafaufau faka‵lei mo te ma‵taku ki te aso a taeao mo mea matagā kolā ka fe‵paki mo latou i te taimi e gasolo aka ei o ma‵sei atu a “puapuagā” i te lalolagi. (Mataio 24:⁠8) Kae ko tino kolā e fakamoe‵moe ki a Ieova e se ma‵taku penā. Ka tumau latou ‘i te ola i te saogalemū, kae ka se fakamanavase atu ki a latou a te fakama‵taku o fakalavelave.’ (Faataoto 1:​33) Ona ko te lotou fakamoemoega e se fakavae ki mea o te olaga nei, e ‵saga atu latou mo te fia‵fia ki pati polopoloki a Paulo: “Ke faka‵mao koutou mai te matatupe, kae loto ma‵lie ki mea ko maua ne koutou. Me ne muna mai te Atua, ‘E se tiakina lele eiloa ne au koutou, e se tuku tiaki lele eiloa ne au a koutou.’ ”​​—⁠Epelu 13:​5.

14. Kaia e se ‵tau ei mo Kelisiano o sōna manava‵se ki olotou manakoga faka-te-foitino?

¹⁴ E fakamaoni mai i te fuaiupu tenei te seai o se fakalotolotolua me e atafai mai te Atua ki a tatou. E fakamautinoa mai foki a Iesu e uiga ki te atafai tonu mai o te Atua, i ana pati: “Ke mua koutou o ‵sala tena Malo mo tena amiotonu; kae ka fakaopoopogina atu a mea katoa konā [ko mea e aogā tonu ki te olaga] ki a koutou. Ia, ke se manava‵se la koutou ki te aso a taeao, me manavase eiloa te aso a taeao ki ana mea.” (Mataio 6:​33, 34) E iloa ne Ieova me se mea faigata ki a tatou ke tumau i te loto finafinau mō tena Malo kae ke panaki katoatoa foki mo tatou te tiute ke tausi ki ‵tou manakoga faka-te-foitino. Tela la, ke na tali‵tonu katoatoa tatou ki tena mafai mo tena manakoga ke tausi mai ki ‵tou manakoga.​​—⁠Mataio 6:​25-​32; 11:​28-​30.

15. E fai pefea ne Kelisiano ke ‘fakafaigofie te lotou ‵kilo’?

¹⁵ E fakaasi atu ne tatou te ‵tou fakalago‵lago ki a Ieova mai te ‘fakafaigofie aka o te kilo o ou mata.’ (Mataio 6:​22, 23, NW) A te tino telā e faigofie tena kilo e kilo faeloa ki mea ‵lei, e ‵ma ana lagonaga, kae e saoloto mai i fakamoemoega o te kaimanako. E se fakauiga i ei a te faigofie o te kilo ki te ola i se olaga mativa io me ko te fakatamala o tausi ki ‵tou tiute faka-Kelisiano. E ‵kese mai i ei, e fakauiga eiloa ki te fakaasiatuga o te “mafaufau ‵lei” i te taimi e fakamuamua ei ne tatou te ‵tou taviniga ki a Ieova.​​—⁠2 Timoteo 1:​7, NW.

16. Kaia e manakogina i ei a te fakatuanaki mo te loto toa ke maua ei se kiloga faigofie?

¹⁶ E manakogina foki a te fakatuanaki mo te loto toa ke maua i ei se kiloga faigofie. E pelā me se fakaakoakoga, kafai e manako malosi tou pule ke galue faeloa koe i taimi kolā e fai ei a fakatasiga faka-Kelisiano, e mata, ka fakamuamua ne koe ou manakoga faka-te-agaga mo te loto toa? Kafai e fakalotolotolua se tino e uiga ki te fakataunu ne Ieova o Tena folafolaga ke tausi atu ki Ana tavini, e mafai o fakamalosi aka ei ne Satani a faka‵tukaga konā kae kāti ka fakagata te kau atu o te tino tenā ki fakatasiga. E tonu, a te se lava o te ‵tou fakatuanaki e tuku atu ei ki a Satani se avanoaga ke pule ne ia tatou, ko te mea ke fai ne ia a mea kolā e ‵tau o fakamuamua ne tatou i lō Ieova. Ko tafaga te matagā o te mea tenā!​​—⁠2 Kolinito 13:⁠5.

‘Ke Fakamoemoe ki a Ieova’

17. E maua pefea ne tino kolā e tali‵tonu ki a Ieova a fakamanuiaga i aso nei?

¹⁷ E fakaasi fakafia mai i te Tusi Tapu me i tino kolā e fakamoe‵moe kae tali‵tonu ki a Ieova ka se mafai o taka‵vale. (Faataoto 3:​5, 6; Ielemia 17:⁠7) E tonu, i nisi taimi kāti e ‵tau o lotoma‵lie latou ki nāi mea faka-te-foitino e maua ne latou, kae e ‵kilo atu latou ki te mea tenei e pelā me se taulaga foliki fua māfai e faka‵tusa ki fakamanuiaga e uke kolā ko oti ne fakatoka mō latou. Tela la, e fakaasi atu i ei te lotou ‘fakamoe‵moe ki a Ieova’ mo te lotou tali‵tonu me ka tuku atu ne ia ki ana tino fakamaoni a mea ‵lei katoa kolā e ma‵nako latou ki ei i se taimi fakamuli. (Salamo 37:​4, 34) Tenā te pogai e fia‵fia ei latou i te vaitaimi nei. “A te fakamoemoega o tino amio ‵lei e iku ki te fiafia, ka ko tino amio ma‵sei e seai se mea e fakamoe‵moe ki ei.”​​—⁠Faataoto 10:⁠28.

18, 19. (a) Se a te fakatalitonuga alofa e tuku mai ne Ieova ki a tatou? (e) E tausi pefea ne tatou a Ieova i ‵tou “feitu fakaatamai”?

¹⁸ Kafai e pikilima kae sa‵sale fakatasi se tamaliki tagata mo tena tamana, e lagona ne ia te tokagamalie. E penā foki tatou i te ‵tou sa‵sale fakatasi mo ‵tou Tamana faka-te-lagi. “Sa ma‵taku,” ko pati a Ieova ki Isalaelu, “au e fakatasi mo koe! . . . Ka fesoasoani atu au ki a koe . . . Au ko te Aliki te otou Atua [“e puke i tou lima fakaatamai,” NW]; e fakamalosi ne au koutou kae fai atu penei, ‘Sa mataku; au e fesoasoani atu ki a koutou.’ ”​​—⁠Isaia 41:​10, 13.

¹⁹ Ma‵faga o ata gali o te fakaasiga o te alofa​​—⁠e puke ne Ieova te lima o se tino! “E fakatu ne au a Ieova i oku mua i taimi katoa,” ko pati a Tavita. “Me e tu a ia i toku feitu fakaatamai, e se mafai o takavale au.” (Salamo 16:​8, Tusi Paia, Samoa) E tausi pefea ne tatou a Ieova i ‵tou “feitu fakaatamai”? E fai ne tatou penā i feitu e lua. Muamua la, e talia ne tatou ke takitaki tatou ne tena Muna i vaega katoa o ‵tou olaga; kae ko te lua, e ‵kilo atu tatou ki te fakailoga tafasili i te gali telā ko oti ne fakatoka ne Ieova mō tatou. Ne usu mai te faisalamo ko Asafo, penei: “Au e fakapilipili faeloa ki a koe, kae ne taofi ‵mau ne koe toku lima [“fakaatamai,” NW]. Ne takitaki atu au ne koe ki tau fakatonuga, kae fakamuli ko talia ei au ne koe mo te fakaaloalo.” (Salamo 73:​23, 24) Mai vaegā fakamasauaga penā, ko mafai ei o ‵kilo atu tatou mo te loto talitonu ki aso mai mua.

“Ko Pili Mai te Otou Fakaolataga”

20, 21. Se a te fakamoemoega mō aso mai mua e ‵nofo fakatalitali ki ei a tino kolā e fakamoe‵moe ki a Ieova?

²⁰ I aso takitasi, e gasolo aka faeloa te tāua o te fakatu ne tatou a Ieova i ‵tou feitu fakaatamai. I se taimi pili mai mua nei, e kamata mai i te fakaseaiga o lotu ‵se, ka pokotia ei a te lalolagi a Satani i se fakalavelave telā ne seki fepaki aka eiloa mo ia i aso mua. (Mataio 24:21) Ka ma‵taku valevale ei a tino sē fakamaoni. Kae i te vaitaimi o te fakalavelave tenā, ka fia‵fia eiloa a tavini loto ‵toa a Ieova ki te lotou fakamoemoega! “Kafai ko kamata o oko mai a mea konei,” ko pati a Iesu, “tu kae ‵kilo ki luga, me ko pili mai te otou fakaolataga.”​​—⁠Luka 21:⁠28.

²¹ Tela la, ke na fia‵fia eiloa tatou ki ‵tou fakamoemoega mai te Atua kae ke mo a ma takitaki ‵se tatou io me ‵to atu ki togafiti ma‵sei a Satani. I te taimi foki eiloa tenā e ‵tau ei o ga‵lue malosi tatou ke ati aka te fakatuanaki, te alofa mo te mataku ki te Atua. Mai te faiga penā, ka maua ei ne tatou te loto toa ke faka‵logo ki a Ieova mai lalo i so se fakanofonofoga kae ke ‵teke atu ki te Tiapolo. (Iakopo 4:​7, 8) E tonu, ‘ke loto ‵toa kae loto ‵lasi, koutou katoa kolā e fakamoe‵moe ki a Ieova.’​​—⁠Salamo 31:⁠24.

[Fakamatalaga mai lalo]

E Mafai o Tali Mai ne Koe?

• I te auala fea ne aogā ei te fakamoemoega o Iesu ki tena loto toa?

• E fetaui pefea a te fakatuanaki mo te fakamoemoega?

• E tuku atu pefea ne te fakamoemoega fakatasi mo te fakatuanaki a te loto toa ki se Kelisiano ke fakatoka ne ia a mea kolā e ‵tau o fakamuamua i te olaga?

• Kaia e mafai ei o ‵kilo atu a tino kolā e ‘fakamoe‵moe ki a Ieova’ ki aso mai mua mo te loto talitonu?