E Fesili Mai ‵Tou Kau Fai‵tau . . .

Kaia e talai ei a Molimau a Ieova mai fale ki fale?

▪ I loto i te Tusi Tapu, e maua ne tatou a te fakatonuga tenei a Iesu ki ana soko: “Tela la, olo atu koutou ki fenua katoa o fai a tino i ei mo fai a soko, . . . akoako atu latou.” (Mataio 28:19, 20) E mata, e fakauiga a te mea tenei ki Kelisiano katoa? Ne malama‵lama a soko muamua o Iesu me e fakauiga eiloa ki ei. E pelā me se fakaakoakoga, ne fai mai a te apositolo ko Petelu: “Ne fakatonu mai foki a ia [Iesu] ki a matou ke talai atu ki tino kae ke tuku atu se molimau maea.” (Galuega 10:42) Kae ne tusi mai a te apositolo ko Paulo: “Me se mea eiloa e ‵tau o fai ne au. Kae kalofa eiloa au māfai e se folafola atu ne au a te tala ‵lei!”—1 Kolinito 9:16.

E se ko Paulo fua mo Petelu kae ko Kelisiano foki i te senitenali muamua ne faka‵logo ki te fakatonuga a Iesu. Ne fakamuamua ne latou te galuega talai i olotou galuega katoa. (Galuega 5:28-32, 41, 42) E taumafai foki a Molimau a Ieova i aso nei o fai penā. E talai atu foki ne latou a te fekau telā ne talai ne Iesu, telā ko “te malo o te lagi.”—Mataio 10:7.

Ko oi e ‵tau o talai atu ki ei a te fekau o te Malo? Ne fakaasi mai ne Iesu me e ‵tau o talai atu ki tino katoa i so se koga. Ne fai atu a ia ki ana soko: “Ka fai koutou mo molimau ki a au . . . ke oko eiloa ki toe koga ‵mao i te lalolagi.” (Galuega 1:8) Ne folafola mai foki ne ia me koi tuai o oko mai a te gataga o te fakanofonofoga tenei, a “te tala ‵lei tenei o te Malo ka talai atu ki te lalolagi nofoaki kātoa mo fai se molimau ki atufenua katoa.” (Mataio 24:14) Ke fakataunu te fakatonuga tenei, ne taumafai a Kelisiano i te senitenali muamua o fai‵pati ki tino katoa, e se ko tino fua kolā e masani mo latou io me ko tino taki tokotasi kolā e seai ne olotou lotu. (Kolose 1:23; 1 Timoteo 2:3, 4) E taumafai foki penā a Molimau a Ieova i aso nei ke oko atu ki so se tino.a

Se a te ‵toe auala magoi ke fakasalalau atu ei a te fekau o te Malo? A Iesu, telā ne iloa ne ia te auala ke oko atu ki tino e tokouke, ne uga atu ne ia ana soko ki fa‵kai ‵lasi, fa‵kai fo‵liki, mo fale o tino. (Mataio 10:7, 11, 12) Mai tua o te mate mo te toetu o Iesu, ne tumau eiloa ana soko i te talai atu “mai fale ki fale.” (Galuega 5:42) E pelā mo te mea ne fai ne Iesu, ne talai atu foki latou i taimi seki fuafuagina mo so se koga e fetaui ei latou mo tino. (Ioane 4:7-26; 18:20; Galuega 17:17) I aso nei, e fakaaoga foki ne Molimau a Ieova a auala konā ke talai atu ki tino katoa.

Ne fakaasi mai ne Iesu me e se ko tino katoa ka faka‵logo mai. (Mataio 10:14; 24:37-39) E mata, e ‵tau o faka‵tuka atu a te mea tenā ki Kelisiano ke mo a e talai? Mafaufau ki te fakatusaga tenei: Kafai koe e aofia i se potukau faka‵sao tino mai tua o te pokoga o se mafuie malosi ‵ki, e mata, ka fakagata tau salasalaga ki tino me ne nāi tino fua ne maua i te salasalaga mō se taimi tai mata leva? Ikai, ka tumau eiloa koe mo te fakamoemoega ke fakasao se tino e tokotasi. Ne fakatonu atu a Iesu ki ana soko ke tumau eiloa i te salasala mo te fakamoemoega ke maua ne tino kolā ka fia‵fia ki te tala ‵lei e uiga ki te Malo o te Atua. (Mataio 10:23; 1 Timoteo 4:16) E auala i te salasala atu ki vaegā tino penā mai fale ki fale, e fakaasi atu ei ne Molimau a Ieova a te lotou a‵lofa ki te Atua mo olotou tuakoi kolā e fakalagolago olotou ola ki te lagona mo te talia o te fekau o te Malo.—Mataio 22:37-39; 2 Tesalonia 1:8.

A te mekesini tenā e faitau ne koe e fakaoko atu i ei a te fekau tenā mai te Tusi Tapu. Ke maua a fakamatalaga e uke atu, fakamolemole, fai‵pati mo Molimau a Ieova i te suā taimi e āsi mai ei latou, io me tusi atu ki te koga e ‵lomi ei a te mekesini tenei.

[Fakamatalaga fakaopoopo]