Ko oi te Tino Fakalogologo ki ‵Talo?

KAFAI e isi se Tino Fakalogologo ki ‵talo, e ‵tau a ia ko te Māfuaga. Ko oi foki i tafa o te Tino telā ne faite ne ia te fāiai o te tino e mafai o faitau ki ou mafaufauga? Ko oi foki e mafai o tali ki ‵talo kae tuku atu ki tino a te fesoasoani telā e manakogina ne latou? Kae kāti ka mafaufau aka koe, ‘E mata, se faiga poto ke talitonu ki se Māfuaga?’

E mafau‵fau a tino e tokouke me i te talitonu ki se Māfuaga, ko ‵teke ne koe a fakamaoniga o mea fakasaienisi i aso nei. Kae ko te manatu tuku taumate me i te talitonu ki te Atua e se fetaui lele mo mea fakasaienisi e se tonu. Mafaufau ki mea konei mai lalo.

◼ I se sukesukega ne fai fakamuli nei ki polofesa i mea fakasaienisi e 1,646 o toe akoga ma‵luga eiloa e 21 i te Iunaite Sitete, ne maua aka i ei me e tokotasi fua mai te tokotolu o tino e fai mai ne latou a te fuaiupu tenei “Au e se talitonu ki te Atua” ke fakamatala mai i ei olotou kilokiloga.

A te tonuga loa, e fakaasi mai i ei me i te fia o saienisi e tali‵tonu me e isi eiloa se Atua.

Fakamaoniga o se Māfuaga

E mata, e ‵tau o talia ne tatou me e isi eiloa se Tino Fakalogologo ki ‵talo e aunoa mo fakamaoniga? Ikai. A te manatu me i te fakatuanaki e fakauiga ki te talitonu e aunoa mo fakamaoniga e se tonu. E fakamatala manino mai i te Tusi Tapu a te fakatuanaki e pelā me “ko te fakaasiga manino o mea ‵tonu kolā e se lavea ki mata.” (Epelu 11:1) E pelā me se fakaakoakoga, e se mafai o lavea ne koe a radio waves (mea kolā e aumai ei a te leo), kae e fakaasi manino mai ne tau letio a te ‵tonu o mea konā e aumai ei a te leo; tela la, ko talia ne koe me e isi eiloa ne vaegā mea penā. I se auala tai ‵pau, e tigā eiloa e se mafai o lavea ne tatou a te Tino fakalogologo ki ‵talo, e mafai eiloa o toe onoono tatou ki fakamaoniga matea kolā e mafai o tuku mai i ei ki a tatou a fakatalitonuga me e ola eiloa a ia.

E maua i fea ne tatou a fakamaoniga me e isi eiloa se Atua? E ‵tau fua o ‵kilo atu tatou ki ‵tou tafa. E fakasakosako mai penei a te Tusi Tapu: “Se mea tonu me i fale katoa ne faite ne se tino, kae ko te tino telā ne faite ne ia a mea katoa ko te Atua.” (Epelu 3:4) E mata, e loto malie koe ki te fuaiupu tenā? E se taumate kafai e mafaufau koe ki te fakatokaga o te lagi mo te lalolagi, te māfuaga o te ola, io me ko te faitega o te ‵toe mea fakaofoofogia eiloa kae faigatā ke malamalama i ei i mea katoa ne faite i te lalolagi, te fāiai o te tino, ka fai mai koe me e isi eiloa se mea telā e sili fakafia atu i tino e ‵tau o ola.

Kae e isi se tapulā ki te mea e mafai ne te natula o akoako mai ki a tatou e uiga ki te Atua. A te malamalama i fakamaoniga e uiga ki te Atua i mea ne faite e ‵pau eiloa mo te fakalogologo ki laga o se tino e vau mai tua o se mataloa e ‵pono. E iloa ne koe me e isi se tino i tua, kae ko oi la? Ke iloa ne koe, e manakogina ke ‵tala te mataloa ke matala. E ‵tau o fai ne tatou se mea tai ‵pau ko te mea ke iloa aka me ko oi te Tino ne faite ne ia a mea katoa.

A te Tusi Tapu ko te mataloa ki te iloaga e uiga ki te Atua. Kafai e ‵tala ne koe a te mataloa tenā kae mafaufau ki nisi valoaga mo te auala ne fakataunu i ei, ka maua ne koe i ei a fakamaoniga me e isi eiloa se Atua.a Kae sili atu la i te mea tenā, e fakaasi mai i tala e uiga ki faifaiga a te Atua ki tino me ko te Tino fakalogologo ki ‵talo se vaegā Atua pefea.

A te Tino Fakalogologo ki ‵Talo se Vaegā Tino Pefea?

E fakaasi mai i te Tusi Tapu me i te Tino fakalogologo ki ‵talo se tino e mafai o iloa ne koe. E mautinoa ‵lei me ko te tino fua e mafai o fakalogo mo te malamalama. Ko oko eiloa i te fakamalie loto ke fai‵tau penei: “Te Tino fakalogologo ki ‵talo, e olo atu ki a koe a tino katoa.” (Salamo 65:2, Tusi Paia, Samoa) E lagona ne ia a latou kolā e ‵talo atu ki a ia i te fakatuanaki. Kae e isi sena igoa. E fai mai te Tusi Tapu: “Kafai e ‵talo a tino amio ‵lei, te Aliki [Ieova] e fakalogologo ki olotou ‵talo, kae e se saga ki tino amio ma‵sei.”​—Faataoto 15:29.

E isi ne lagonaga o Ieova. A ia ko “te Atua o te alofa” kae e taku foki ko “te Atua fiafia.” (2 Kolinito 13:11; 1 Timoteo 1:11) E uiga ki ana faifaiga i se taimi telā ne ma‵sei ‵ki ei a amioga a tino, e fai mai te Tusi Tapu: “Ko oko eiloa i tena fanoanoa.” (Kenese 6:5, 6) A te fakamatalaga telā ne fai me ne fakamāfua ne te Atua a logo‵maega ko te mea ke tofotofo aka ei a tino, e se tonu. Muna a te Tusi Tapu: “E ‵mao mo te Atua ke fai a amioga ma‵sei.” (Iopu 34:10, NW) E tigā eiloa te feitu tenā, kāti ka fai aka koe, ‘Kafai e isi se Māfuaga malosi kātoatoa, kaia e talia ei ne ia a logo‵maega ke tumau?’

Ko oti ne tuku atu ne Ieova ki tino a te saolotoga ke fai te mea e ‵loto ki ei, kae e fakaasi mai i ei ki a tatou me ko te Atua se vaegā tino pefea. E mata, e se fakatāua ne tatou a ‵tou saolotoga ke filifili aka me ka ola pefea tatou? Kae se mea fakafanoanoa, me ko oti ne fakaaoga ‵se ne te tokoukega o tino te lotou saolotoga kae fakamāfua aka i ei a te logo‵mae o latou eiloa e pelā foki mo nisi tino. Nei la, e tenei te fesili telā e tāua ke mafaufau ‵mafa kae mafaufau ‵loto foki ki ei: E mafai pefea o fakaseai ne te Atua a logo‵maega māfai e se tapale kea‵tea a te saolotoga o te tagata? Ka suke‵suke loa tatou ki te fesili tenei i te suā mataupu.

[Fakamatalaga fakaopoopo]

[Pokisi i te itulau e 5]

E Mata, e Fakalotolotolua Koe Ona ko Mea e Fai ne Lotu?

Se mea fakafanoanoa, me ko te lotu eiloa ne fai ne ia a te tokoukega ke fakalotolotolua me isi se Atua alofa telā e fakalogologo ki ‵talo. A te aofia o lotu i taua, amioga takafia‵toa, mo te taliaga o te maneaneaga o tamaliki ne iku atu i ei ki te fai mai o tino foki eiloa kolā e ‵talo sāle penei, “Au e se talitonu ki te Atua.”

Kaia e masani sāle ei o fai ne lotu a mea ma‵sei? Kāti e mafai fua o fai atu penei: Ko oti ne fai ne tino ma‵sei a mea ma‵sei i te igoa o lotu. Ne folafola mai i te Tusi Tapu me ka pule atu a nisi malosi ki te kau Kelisiano kae fakaaoga latou i se auala telā e se fetaui mo te loto o te Atua. Ne fai atu te apositolo ko Paulo ki ovasia Kelisiano: “Ka ‵sae mai foki mai loto eiloa i a koutou a tāgata kolā ka ‵fuli faka‵kotua ne latou a mea ke ‵futi atu ei a soko ki a latou.”​—Galuega 20:29, 30.

E takalialia te Atua ki lotu ‵se. A te tonuga loa, e ‵losi atu te Muna a te Atua, ko te Tusi Tapu, ki lotu ‵se mō “toto o . . . latou katoa kolā ne tamate i te lalolagi.” (Fakaasiga 18:24) Ona ko te fakata‵mala o lotu ‵se o akoako a tino e uiga ki te Atua tonu, telā ko te alofa, a lotu konā e pisipisia i toto o tino i te kilokiloga a te Atua.​—1 Ioane 4:8.

Ko oko eiloa i te alofa o te Tino Fakalogologo ki ‵talo ki tino kolā e fai fakamasei ne lotu. Ko pili fua o fakamasino ne te Atua a tino ‵lotu amio fakaloi‵loi katoa ona ko tena alofa ki tino. Muna a Iesu: “E tokouke a tino ka fai mai ki a au i te aso tenā: ‘Te Aliki, te Aliki, e a, e seki ‵valo atu matou i tou igoa?’ . . . Kae ka fai ‵tonu atu au ki a latou: E se iloa lele ne au koutou! Olo kea‵tea mai i a au, tino amio ma‵sei.”​—Mataio 7:22, 23.