Ke Fakapilipili Atu ki te Tino Fakalogologo ki ‵Talo

E SE mafai o fakamatala mai ne te tokoukega kolā e fai mai me e tali‵tonu ki te Atua, a te pogai e maua ei ne latou te fakatuanaki. Io me mafai o fakamatala mai ne latou a te pogai e ma‵sei faeloa i ei a lotu io me ko te pogai e talia ei ne te Atua a logo‵maega. A te mea fua e mafai ne latou o fai, ko te ‵talo atu ki se Atua telā e se malama‵lama latou i ei.

E ui i ei, e mafai eiloa o fakapilipili atu koe ki te Atua i lō te mea tenā. E mafai o ati aka tou fakatuanaki i luga i te malamalama e uiga ki te Atua telā e fai ei ke alofa kae fakatāua ne koe a ia. A te fakatuanaki tonu e fakavae i luga i fakamaoniga. (Epelu 11:1) Kafai e tauloto koe ki te munatonu e uiga ki te Atua, ka mafai o iloa ne koe a ia kae faipati atu ki a ia e pelā me se taugasoa. Ke mafau‵fau tatou ki tala o nisi tino kolā ne masani sāle o ‵talo faitalia te fakalotolotolua o latou me isi se Atua io me seai.

◼ Patricia, telā ne taku mai i te mataupu i te kamataga. “I te aso e tasi ne nofo atu au i se potukau o oku taugasoa e tokosefulu i te taimi ne kamata ei o sau‵tala ki mea fakalotu. Ne fai atu au ki a latou i au ne fano ki tua mo te fale ke sē lagona ne au a te sau‵talaga e fai ne toku tamana telā e se talitonu ki te Atua, mo se tokotasi o Molimau a Ieova telā ne āsi mai ki te motou fale. ‘Kāti la e tonu a te Molimau a Ieova,’ ko pati a toku taugasoa e tokotasi.

Muna a te suā tino, “‘Kaia e se olo ei tatou ki se fakatasiga e tasi a latou ko te mea ke iloa ne tatou?’ Kae tenā eiloa te mea ne fai ne matou. E tigā eiloa ne fakalotolotolua matou, ne tumau eiloa a nisi o matou i te ‵kau ki fakatasiga ona ko te lasi o te mata fia‵fia o Molimau a Ieova.

“E ui i ei, ne lagona ne au i te Aso Sa e tasi se mea telā ne ‵fuli ei aku faifaiga. Ne fakamatala mai ne te failauga te pogai e logo‵mae ei a tino. Ne seki loto fakafetai lele au me i te tagata ne faite ke ‵lei kātoatoa kae ko te agasala mo te mate ne kamata ne te tagata e tokotasi kae faka‵solo fakamuli atu ki tino katoa. Ne fakamatala mai foki ne te failauga te pogai e fetaui ‵lei ei a te mate o Iesu ke toe faka‵foki atu a tino ki te tulaga telā ne galo i te tagata muamua.a (Loma 5:12, 18, 19) Seki leva, malamalama ei au i mea katoa. Ne mafaufau ifo penei, ‘E isi eiloa se Atua telā e tausi mai ki a tatou.’ Ne tumau eiloa au i te sukesuke ki te Tusi Tapu kae seki leva, iloa ei ne au me ko mafai au o ‵talo atu ki se tino tonu, mō te taimi muamua eiloa i toku olaga.”

◼ A Allan, telā foki ne taku mai i te mataupu kamata. “I te aso e tasi ne āsi mai ei a Molimau a Ieova ki te mā fale, kae ‵kami latou ne taku avaga ki loto ona fua ko ia e fiafia ki fakamatalaga a latou e uiga ki te ola se-gata-mai i te lalolagi. Au ne kaitaua eiloa. Tenā, tiakina ei a Molimau ke ‵nofo i te potu ki mua, kae fai atu au ki taku avaga ke vau ki te umu ‵kuka kae faipati atu au ki tou fafine, ‘Sa fakavalevale. E se ‵tau o sōna talitonu fua koe penā!’

“‘Ko ‵lei la, fano fua ki ‵ko kae fakatalitonu atu ki Molimau a Ieova i a lāua e ‵se,’ ne tali atu tou fafine.

“E tonu, e se mafai ne au o fakatalitonu atu se mea. Kae ko oko eiloa latou i te mata a‵lofa kae ne tuku mai ki a au se tusi e uiga ki te ola, me e mata, ne maua e auala i mea ne faite io me ne māfua aka loa i a ia eiloa. E manino ‵lei a te ‵tonu o te mea tenā kae e isi foki ne fakamaoniga ki ei, tenā ne fakaiku aka ei ne au me e ‵tau o uke atu a mea e iloa ne au e uiga ki te Atua. Ne kamata au o suke‵suke fakatasi mo Molimau ki te Tusi Tapu, kae ne iloa aka ne au me e ‵kese ‵ki eiloa a mea kolā e fai mai i ei mo mea katoa kolā ne mafaufau au ki ei e uiga ki lotu. A koi tauloto au e uiga ki a Ieova, ne kamata au o fakapitoa aku ‵talo e fai atu ki a ia. E isi ne aku nisi amioga masani e se na lō ko ‵lei, tenā ne ‵talo ei au mō se fesoasoani. E talitonu au me ne tali mai eiloa a Ieova ki aku ‵talo.”

◼ A Andrew, telā ne ola i Egelani. “E tigā eiloa e ma‵losi oku lagonaga kae fiafia ki mea fakasaienisi, ne talitonu au ki te akoakoga ko te evolusione ona fua ko nisi tino e fai mai me ko oti ne fakatalitonu aka. Ne ‵teke atu au ki te talitonu ki te Atua ona ko mea ma‵sei katoa kolā e ‵tupu.

“E ui i ei, i nisi taimi ko mafaufau au penei: ‘Kafai e isi se Atua, e fia malamalama au i te uiga o te ola. Kaia ko uke ‵ki ei a taua mo te soli tulafono?’ Kafai ko oko ki tulaga faiga‵ta, ko ‵talo au i nisi taimi mō se fesoasoani, kae e se iloa ne au me ko oi e ‵talo au ki ei.

“Mai tua ifo ne tuku atu ne se tino ki taku avaga se tamā pepa telā ne ‵lomi ne Molimau a Ieova telā e fakaulutala penei: Will This World Survive? Ko leva ne mafaufau sāle au ki te fesili eiloa tenā. Ne fai ne te tamā pepa ke mafaufau au e uiga ki te Tusi Tapu, ‘E mata, e tāua ke mafaufau ki tali i ei?’ Fakamuli ifo, i te taimi koi malōlō ei au, ne tuku mai ne se tino a te tusi ko The Bible​—God’s Word or Man’s? ki a au. I te iloaga ne au me e fetaui ‵lei a te Tusi Tapu mo mea fakasaienisi, ne oko mai a te lagonaga me e manakogina ke tauloto au ki mea e uke atu e uiga ki te Tusi Tapu. Tela la, i te faimaiga o se tokotasi Molimau a Ieova ke a‵koga māua i te Tusi Tapu, ne talia ne au. I te taimi ko malamalama ei au i te fuafuaga a Ieova, ne oko mai a te lagonaga me ko iloa ne au a ia e pelā me se tino tonu, se tino telā ko mafai o faipati atu au ki ei i te ‵talo.”

◼ Jan, telā ne tupu aka e pelā me se Poletesano i Lonitona. “A te amio fakaloiloi mo te lauiloa o logo‵maega ne iku atu ki te fakagata o toku fano ki lotu. Ne fakagata foki toku fano ki akoga ma‵luga kae kamata o usuusu kae tātā kitala ke maua a tupe. E tenā eiloa te taimi ne fetaui ei au mo Pat. Ne puti aka tou tagata e pelā me se Katolika kae ne fai mo tino sē talitonu pelā mo au.

“Ne ‵nofo fakatasi matou mo nisi tamaliki kolā ko sē olo ki akoga kae e fia‵fia ki lotu kolā e fai i te feitu ki te Saegāla i se fale e seai ne tino i ei. I valuapo, e sau‵tala eiloa matou me se a te uiga o te olaga i se fia o itula. E tigā eiloa e se tali‵tonu māua mo Pat ki te Atua, ne ma‵natu aka māua me e ‵tau o isi se ‘malosi telā e fakaolaola ne ia te ola.’

“Mai tua o te mā ologa ki Egelani ki matū o ‵sala galuega i ei e pelā me ne tino usuusu, ne fanau ei te mā tama tagata. I te po e tasi ne masaki ei tou tagata, kae poi aka au i au ko ‵talo ki te Atua telā e se talitonu au ki ei. Mai tua malie ifo, ne gasolo o masei a te va fesokotaki o māua mo Pat, kae ne puke ne au te mā pepe kae tiakina tou tagata. Ne toe ‵talo atu au mō se fesoasoani, e se iloa la e isi se tino e fakalogologo mai. Ne sē iloa ne au me ne fai foki ne Pat a te mea tenā.

“Fakamuli ifo i te aso tenā, ne tukituki atu se tokolua Molimau a Ieova i te mataloa o Pat kae fakaasi atu ki tou tagata a nisi fakatakitakiga aoga mai te Tusi Tapu. Ne telefoni mai a Pat kae fesili mai me fiafia au ke a‵koga tasi māua mo Molimau ki te Tusi Tapu. Ne iloa aka ne māua me i te fakafiafia atu ki te Atua, e ‵tau ke avaga māua mai lalo i te tulafono. E foliga mai pelā me se mea faigata i te kilo atu ki te sē mautinoa o te mā fesokotakiga.

“Ne fia iloa ne māua a mea e uke atu e uiga ki te fakataunuga o valoaga i te Tusi Tapu, te pogai e maua ei a logo‵maega, mo te uiga o te Malo o te Atua. Ne iloa aka ne māua me e atafai mai te Atua, kae ne ma‵nako māua o fai a mea kolā e loto a ia ki ei. Ne avaga ei māua. Ne fesoasoani mai a te poto mai te Muna a te Atua ke puti aka ne māua a mā tamaliki e tokotolu. E mautinoa i a māua me ne fakalogologo mai eiloa a Ieova ki mā ‵talo.”

Iloilo a Fakamaoniga i a Koe Eiloa

E pelā mo te fia miliona o nisi tino, a latou kolā ne fakaasi mai i te mataupu tenei ne seki fakaloiloigina ne lotu ‵se kae maua aka i ei ne latou a te pogai e talia ei ne te Atua a logo‵maega. E mata, e matea ne koe me mai mea takitasi konā, ko te malamalama tonu i te Tusi Tapu telā ne loto ma‵lie ei a tino taki tokotasi konei me fakalogologo tonu mai eiloa a Ieova ki ‵talo?

E mata, e fia iloilo ne koe me e isi eiloa se Atua? Ka fia‵fia eiloa a Molimau a Ieova o fesoasoani atu ki a koe ke tauloto ki te munatonu e uiga ki a Ieova mo te auala e mafai ei ne koe o fakapilipili atu ki te “Tino Fakalogologo ki ‵talo.”​—Salamo 65:2.

[Fakamatalaga fakaopoopo]

[Ata i te itulau e 10]

“I te taimi ko malamalama ei au i te fuafuaga a Ieova, ne oko mai a te lagonaga me ko iloa ne au a ia e pelā me se tino tonu, se tino telā ko mafai o faipati atu au ki ei i te ‵talo”

[Ata i te itulau e 9]

A te fakatuanaki tonu e fakavae i luga i fakamaoniga mo se manakoga ke iloa a te munatonu e uiga ki te Atua