Ke Amio e Pelā me ne Tino Tonu o te Malo!

“Ko otou amioga fua ke fetaui mo te tala ‵lei.”​—FILIPI 1:27.

KA TALI MAI PEFEA NE KOE?

Ko oi e mafai o fai mo tino tonu o te Malo o te Atua?

Ne a mea e manakogina ke fai ne tatou e uiga ki te ‵gana, tala fakasolopito, mo tulafono o te Malo o te Atua?

E fakaasi atu pefea ne tino tonu o te Malo o te Atua me e a‵lofa latou ki tulaga o te Atua?

1, 2. Kaia e isi ei se fakauigaga fakapitoa o te polopolokiga a Paulo ki te fakapotopotoga i Filipi?

NE FAKAMALOSI atu te apositolo ko Paulo ki te fakapotopotoga i Filipi, penei: “Ko otou amioga fua ke fetaui mo te tala ‵lei.” (Faitau te Filipi 1:27.) A te tugāpati Eleni telā ne fakaaogā ne Paulo ki te pati “amioga” kāti e fakauiga foki ki te “‵kau ki galuega e fai ne tino tonu.” E isi se fakauigaga fakapitoa o te tugāpati tenā mō te fakapotopotoga i Filipi. Kaia? E foliga mai i Filipi se fa‵kai e tasi i fa‵kai kolā ne filifili ke tuku atu ki tino i ei a te avanoaga ke fai pelā me ne tino tonu o te malo o Loma. Ne fakamata‵mata a tino Loma i Filipi mo te malo o Loma ki te lotou tulaga kae ne fia‵fia ki te puipuiga fakapito e maua ne latou mai lalo i te tulafono a Loma.

² E isi se pogai tai ‵lei atu e ‵tau ei o fakamata‵mata a tino i te fakapotopotoga i Filipi. Ne fakamasaua atu a Paulo ki a latou e pelā me ne Kelisiano fakaekegina, me i te lotou fenua tonu e maua loa “i te lagi.” (Filipi 3:20) A latou ne tino tonu, e se i se malo o tāgata, kae i te Malo eiloa o te Atua. Ka fia‵fia eiloa latou ki te puipuiga mo mea aoga kolā e se maua ne latou i se isi koga aka.​—Efeso 2:19-22.

3. (a) Ko oi e maua ne latou a te avanoaga ke fai pelā me ne tino tonu o te Malo? (e) Ne a mea ka mafau‵fau tatou ki ei i te mataupu tenei?

³ A te polopolokiga a Paulo “ko otou amioga fua ke fetaui mo te tala ‵lei” e fakasino tonu eiloa ki a latou kolā ka pule fakatasi mo Keliso i te lagi. (Filipi 3:20) Kae e mafai foki o fakasino atu ki a latou kolā ka ola i te lalolagi mai lalo i te pulega a te Malo o te Atua. Kaia? Me e tavini atu foki a Kelisiano tukugina atu katoa ki te Tupu eiloa tenā, ko Ieova, kae ‵pau foki a tulaga e ‵tau o ola latou i ei. (Efeso 4:4-6) I aso nei, e tokouke a tino e ga‵lue malosi ke fai latou e pelā me ne tino tonu o se atufenua maumea. Kae e tāua atu la a te avanoaga ke fai pelā me se tino tonu o te Malo! Ko te mea ke momea aka te ‵poko o te ‵tou loto fakafetai ki te tauliaga tenā, ke mafau‵fau aka tatou ki nisi mea kolā e tai ‵pau ei a mea e manakogina ke fai mo fai se tino tonu o se malo o tāgata mo te fai mo fai se tino tonu o te Malo o te Atua. Ka suke‵suke nei tatou ki mea e tolu kolā e ‵tau o fai māfai e ma‵nako tatou ke fai pelā me ne tino tonu o te Malo.

MEA E MANAKOGINA KE FAI PELĀ ME SE TINO TONU O TE FENUA

4. Se a te ‵gana ‵ma, kae se a te auala e “faipati” atu ei ne tatou?

⁴ Tauloto te ‵gana. E ma‵nako a nisi malo o tāgata ke fai‵pati a tino kolā e ma‵nako ke fai pelā me ne tino tonu o te fenua ki te ‵gana telā e fakaaogā i te atufenua. Kafai foki loa ko oti ne talia a te nofo tumau, kāti koi taumafai eiloa a nisi tino ke fai‵pati faka‵lei ki te ‵gana fou. Kāti ka tauloto vave ne latou a tulafono o te ‵gana kae e manakogina ke lava se taimi e tauloto ei ki te fakaleoga tonu o pati. I se auala tai ‵pau, e manakogina foki a tino tonu o te Malo o te Atua ke tauloto ki te mea telā e taku i te Tusi Tapu ko te “‵gana ‵ma.” (Faitau te Sefanaia 3:9, Tusi Paia, Samoa.) Se a te ‵gana tenā? Ko te munatonu e uiga ki te Atua mo ana fuafuaga kolā e maua i te Tusi Tapu. E “fai‵pati” tatou ki te ‵gana ‵ma māfai e fetaui ‵tou amioga mo tulafono mo fakatakitakiga a te Atua. Kāti ka vave o tauloto ne tino tonu o te Malo o te Atua a akoakoga fakavae i te Tusi Tapu kae papatiso. Kafai foki ko oti ne papatiso latou, e ‵tau o momea aka faeloa te ‵lei o te lotou “fai‵pati” atu ki te ‵gana ‵ma. I te auala fea? E manakogina ke fakagalue aka ne tatou taki tokotasi i ‵tou olaga a mea kolā e iloa ne tatou e uiga ki fakatakitakiga i te Tusi Tapu.

5. Kaia e ‵tau ei o tauloto tatou ki te mea e mafai ne tatou e uiga ki te tala fakasolopito o te fakapotopotoga a Ieova i aso nei?

⁵ Sukesuke ki te tala fakasolopito. A te tino telā e manako ke fai mo fai se tino tonu o se malo o tāgata e ‵tau o tauloto ki te tala fakasolopito o te malo tenā. A latou foki kolā e ma‵nako ke fai mo fai ne tino tonu o te Malo e ‵tau o tauloto faka‵lei ki te mea e mafai ne latou e uiga ki te Malo o te Atua. Ke mafau‵fau ki te fakaakoakoga ne fai ne tama tā‵gata a Kola, kolā ne tavini atu i te faletapu i Isalaelu mua. Ne fia‵fia malosi latou ki Ielusalema mo tena koga tapuaki kae sau‵tala ki te tala fakasolopito o te fa‵kai tenā. E se ko fatu mo te mea telā e fakapikipiki ki ei e fia‵fia malosi latou ki ei kae ko te mea telā e sui mai ne te fa‵kai mo te koga tapuaki tenā. A Ielusalema ko “te fa‵kai o te Tupu sili,” ko Ieova, me ko te laumua o te tapuakiga ‵ma. E tenā te koga ne akoako i ei a te Tulafono a Ieova. Ne fakaasi atu ne Ieova a tena alofa kaimalie ki tino kolā e pule ne te tupu o Ielusalema. (Faitau te Salamo 48:1, 2, 9, 12, 13.) E mata, e manako koe o sukesuke kae sau‵tala ki te tala fakasolopito o te vaega faka-te-lalolagi o te fakapotopotoga a Ieova, e pelā mo latou? Ko te lasi o te tauloto o koe e uiga ki te fakapotopotoga a te Atua mo te auala e ‵lago atu ei a Ieova ki ana tino, ko te momea aka o te ‵tonu o te Malo o te Atua ki a koe. Ka fakamalosi aka ne te mea tenei a ‵tou manakoga ke folafola atu a te tala ‵lei o te Malo.​—Ielemia 9:24; Luka 4:43.

6. Kaia e fakamoe‵moe ei tatou me manako a Ieova ke tauloto kae faka‵logo tatou ki tulafono mo fakatakitakiga o te Malo?

⁶ Ke iloa a tulafono. E ma‵nako a malo o tāgata ke tauloto kae faka‵logo olotou tino ki tulafono o te fenua. Tela la, e fakamoe‵moe foki tatou me e manako a Ieova ke tauloto kae faka‵logo a tino tonu katoa o tena Malo ki ana tulafono mo fakatakitakiga. (Isaia 2:3; Ioane 15:10; 1 Ioane 5:3) E isi faeloa ne mea ‵se i tulafono a tāgata kae kāti e se ‵lei foki. E ‵kese mai i ei, “e ‵tonu kātoatoa te tulafono a te Aliki [Ieova].” (Salamo 19:7) E mata, e fia‵fia tatou ki te tulafono a te Atua kae fai‵tau ki tena Muna i aso takitasi? (Salamo 1:1, 2) A te auala fua e tasi e mafai ei o tauloto tatou ki te tulafono a te Atua ko te sukesuke ki ei i a tatou eiloa. E seai se isi tino aka e mafai o fai ne ia a te mea tenei mō tatou.

E A‵LOFA A TINO TONU O TE MALO KI TULAGA O TE ATUA

7. Se a te tulaga tai maluga atu e ola i ei a tino tonu o te Malo?

⁷ Ke tumau e pelā me ne tino tonu o te Malo, e se manakogina ke iloa fua ne tatou a te Atua kae ke a‵lofa foki ki ei. E fai mai a tino tonu e tokouke o malo o tāgata me e lotoma‵lie latou ki tulaga mo tulafono o te atufenua telā e ‵nofo latou i ei. E tigā te feitu tenā, kafai e se fia‵fia latou ki se tulafono kae ma‵natu aka me e seai se tino e kilokilo mai, ko ofa ei ne latou a te tulafono. E pelā mo te masani, a vaegā tino penei e “fakafiafia atu fua ki tino.” (Kolose 3:22) A tino tonu o te Malo e ola i se tulaga e tai maluga atu. E faka‵logo eiloa tatou mo te fia‵fia ki tulafono a te Atua, māfai foki loa e seai se tino e kilokilo mai. Kaia? Me i a tatou e a‵lofa ki te Tino Fai Tulafono.​—Isaia 33:22; faitau te Luka 10:27.

8, 9. E mafai pefea o iloa ne koe me e alofa tonu koe ki tulafono a Ieova?

⁸ E mafai pefea o iloa ne koe me e alofa tonu koe ki tulafono a te Atua? Ke iloilo aka ne koe au faifaiga māfai ko polopoloki koe i se mea telā e manatu aka koe me se fakaikuga totino​—kāti se mea e uiga ki gatu mo teuga. Koi tuai koe o fai mo fai se tino tonu o te Malo, kāti ne fiafia koe o pei sāle ki gatu palau‵lau io me ko gatu kolā e fai ei ke ma‵sei a mafaufauga o nisi tino. I te taimi ko tupu aka ei tou alofa ki te Atua, ko iloa ne koe o fai ou gatu i se auala telā e fakaāva atu ki a ia. (1 Timoteo 2:9, 10; 1 Petelu 3:3, 4) Kāti ko manatu aka nei koe me ko fai faka‵lei ou gatu. Kae e a māfai e fai atu se toeaina ki a koe me i te tokoukega o tino i te fakapotopotoga e mafau‵fau me i ou gatu e se ‵lei? Ka pefea au faifaiga ki ei? E mata, ka fai sau fakamasakoga, kaitaua, io me loto makeke koe? A te tulafono fakavae e tasi mai i tulafono o te Malo o te Atua ko te fakaakoako o tino tonu katoa o te Malo ki a Keliso. (1 Petelu 2:​21) E uiga ki te fakaakoakoga a Iesu, ne tusi mai te apositolo ko Paulo: “Ke fakafiafia atu a tino taki tokotasi ki olotou tuakoi mō te lotou ‵lei mo te lotou faiga ke ga‵solo ki mua. Me ne seki fakafiafia foki ne Keliso a ia eiloa.” (Loma 15:2, 3) Ko te mea ke fakatumau a te filemu i loto i te fakapotopotoga, e ‵tau mo se Kelisiano matua o ‵kalo faeloa keatea mai te faiga o mea kolā e fakamasei atu ki loto lagona o nisi tino.​—Loma 14:19-21.

⁹ Mafaufau ki mea tāua e lua konei ke ‵saga ki ei: ko ‵tou faifaiga ki te ‵moe fakatauavaga mo ‵tou kilokiloga e uiga ki te avaga. Kāti ka talia ne latou kolā e seki fai pelā me ne tino tonu o te Malo o te Atua a faifaiga i va o te tagata ki te tagata mo te fafine ki te fafine, e mafau‵fau latou me e seai se fakalavelave i te onoono ki ata ma‵sei, kae ma‵natu aka me i te mulilua mo te ‵talaga o avaga ne mea totino eiloa. Kae ko oti ne tauloto a tino tonu o te Malo ke mafau‵fau ki olotou mea e fai mo te auala e pokotia ei a nisi tino i olotou faifaiga. E tigā eiloa ne ola muamua a Kelisiano e tokouke i se olaga faivalevale, ko ‵kilo atu nei latou ki te ‵moe fakatauavaga mo te avaga e pelā me ne meaalofa mai te Atua. E fakatāua ne latou a tulaga ma‵luga o Ieova kae loto ma‵lie me e se ‵tau o fai a latou kolā e tumau i te faiga o amioga fakatauavaga se ‵tau mo fai ne tino tonu o te Malo. (1 Kolinito 6:9-11) E ui i ei, e iloa foki ne latou me i te loto ko ia eiloa ko fakaloiloi tino. (Ielemia 17:9) Tela la, e loto fakafetai latou ki faka‵pulaga kolā e fesoasoani atu ki a latou ke tumau i tulaga ma‵luga i mea tau amioga.

E LOTO FAKAFETAI A TINO TONU O TE MALO KI FAKA‵PULAGA

10, 11. Ne a faka‵pulaga e tuku mai ne te Malo o te Atua i te taimi tonu, kae pefea ou lagonaga e uiga ki vaegā faka‵pulaga penā?

¹⁰ Kāti e tuku atu ne malo o tāgata ne faka‵pulaga ke fakaeteete e uiga ki meakai mo vailakau. E manino ‵lei, me e se ko mea‵kai katoa mo vailakau e ma‵sei. Kae kafai e isi loa se mea telā e mafai o fakamataku, kāti ko tuku atu ne te malo ne faka‵pulaga ke puipui ei ana tino. Kafai e se fai penā ne te malo, ka taia eiloa a ia i te sē saga tonu atu ki ei. I se auala tai ‵pau, e tuku atu foki ne te Malo o te Atua a faka‵pulaga i te taimi tonu e uiga ki te sē faka‵logo ki tulafono a Ieova kae fakamasei i ei a ‵tou fesokotakiga mo ia. E pelā me se fakaakoakoga, a te Itaneti se auala aoga e maua ei ne tatou a fesokotakiga, akoakoga, mo fakafiafiaga. E fakaaoga ne te fakapotopotoga a te Atua a te Itaneti kae uke a mea ‵lei e maua i ei. Kae e tigā te feitu tenā, e uke a fakatuātusi i te Itaneti e fakamataku ki te tulaga o mea tau amioga mo te feitu faka-te-agaga. E manino ‵lei a te fakamataku o fakatuātusi kolā e fakamalosi aka i ei a ata ma‵sei ki te ma‵losi faka-te-agaga o tino tonu o te Malo. Ko oti ne fakailoa mai ne te potukau o te tavini fakamaoni ki a tatou e uiga mo vaegā fakatuātusi penā i te fia sefulu tausaga ko ‵teka. Ko oko eiloa i te fakafetai o tatou ki vaegā faka‵pulaga konei!

¹¹ I tausaga fakamuli nei, ne gasolo aka o lauiloa a te suā fakatuātusi i loto i te Itaneti​—se mea telā e mafai o aoga māfai e fakaaoga mo te fakaeteete. Kae ko fakatuātusi konei, e taku pelā me ko fakatuātusi mō so se tino, kae e isi foki se fakamaseiga e maua i ei. E mafai ne fakatuātusi konei o tuku faka‵sau atu se tino ki taugasoa ma‵sei. (1 Kolinito 15:33) E setioa eiloa o tuku mai ne te fakapotopotoga a te Atua ne faka‵pulaga paleni e uiga ki te fakaaogāga o vaegā fakatuātusi penā. Kai faitau aka loa koe ki tusi katoa kolā ne ‵lomi fakamuli mai ne te tavini fakamaoni e uiga ki te fakaaogāga o fakatuātusi kolā e mafai o ulu ki ei so se tino? Se mea valea ke fakaaoga a vaegā fakatuātusi penā e aunoa mo te faitau ki tusi!a E ‵pau eiloa a te mea tenā mo te inu ki se vailakau malosi e aunoa mo te faitau ki te faka‵pulaga i te tua o te fagu.

12. Kaia e fai ei me se mea valea a te ‵teke atu ki faka‵pulaga?

¹² A latou kolā e ‵teke ki faka‵pulaga e tuku mai ne te tavini fakamaoni, e fai fua ke logo‵mae latou mo olotou tino pele. A nisi tino ko umiti ki te onoono ki ata ma‵sei io me ko oti ne fai ne latou a amioga ma‵sei kae oti aka, ko mafau‵fau pelā me e se lavea ne Ieova a mea e fai ne latou. Ma‵faga o mea valea ke tali‵tonu me mafai o ‵funa ‵tou amioga mai i a Ieova! (Faataoto 15:3; faitau te Epelu 4:13.) E manako te Atua o fesoasoani ki vaegā tino penā kae fakamasaua atu ki ana sui i te lalolagi ke taumafai o fesoasoani atu ki a latou. (Kalatia 6:1) E tigā te feitu tenā, ka sē talia ne Ieova a latou kolā e tumau i te ‵teke atu ki ana tulaga ke fai mo ana tino e pelā mo te sē talia ne se malo o tāgata, se tino solitulafono mo fai se tino tonu o te malo.b (1 Kolinito 5:11-13) Kae e tigā eiloa te feitu tenā, e alofa fakamagalo eiloa a ia. A latou kolā e sala‵mo kae ‵fuli olotou amioga e mafai o toe maua se tulaga ‵lei i mua o Ieova kae tumau e pelā me ne tino tonu o te Malo. (2 Kolinito 2:5-8) Se matugā tauliaga gali eiloa ko maua ne tatou ke tavini atu ki se vaegā Tupu alofa penā!

E FAKATĀUA NE TINO TONU O TE MALO A AKOAKOGA

13. E fakaasi mai pefea ne tino tonu o te Malo o te Atua me e fakatāua ne latou a akoakoga?

¹³ E ga‵lue malosi a te ukega o malo o tāgata ke akoako olotou tino. E fakatoka ne latou a akoga kolā e fakamalosi i ei a te faitau mo te tusitusi kae akoako atu a poto i te faiga o galuega. E amanaia a tino tonu o te Malo o te Atua ki akoga konei kae tauloto malosi ke iloa ne latou o fai‵tau kae tusitusi, ko te mea ke ‵lago atu ki a latou i feitu tau tupe. Kae sili atu la te fakatāua ne latou a akoakoga kolā e maua ne latou e pelā me ne tino tonu o te Malo o te Atua. E auala i te fakapotopotoga Kelisiano, e fakatāua ne Ieova a te faitau. E fakamalosigina a mātua ke faitau atu a lōmiga pelā mo te Taku Tusi o Tala Mai i te Tusi Tapu ki olotou tamaliki fo‵liki. I masina takitasi, e ‵lomi ne te tavini fakamaoni se fia itulau o mataupu faka-te-Tusi Tapu i loto i Te Faleleoleo Maluga mo te ­Awake! Kafai e faitau ne koe se fia itulau fua i aso takitasi o te masina, e olo tasi eiloa koe mo te fakatokaga tāua tenei e maua mai i ei akoakoga o te Malo o te Atua.

14. (a) Ne a akoakoga e maua ne tatou? (e) Ne a fakatakitakiga mō te faiga o Tapuakiga a Kāiga i afiafi ne fiafia koe o fakagalue?

¹⁴ I vaiaso takitasi, e maua ne tino tonu o te Malo o te Atua a akoakoga i olotou fakatasiga. E pelā me se fakaakoakoga, ko silia atu mo te 60 tausaga ne fesoasoani atu ei a te Akoga mō Tino Talai ki tino a‵koga ke fai pelā me ne faiakoga apo o te Muna a te Atua. E a, e kau koe i te akoga tenei? I tausaga fakamuli nei, ko oti ne fakamalosi aka ne te tavini fakamaoni a Tapuakiga a Kāiga i afiafi i vaiaso katoa. E fakamalosi ne te fakatokaga tenei a kāiga. E mata, ko oti ne fakagalue aka ne koe a fakatakitakiga kolā ne ‵lomi i loto i ‵tou tusi?c

15. Se a tauliaga sili e tasi mai nisi tauliaga e maua ne tatou?

¹⁵ E taumafai a tino o malo o tāgata ke ‵lago atu ki se potukau fakapolitiki, e oko foki loa ki te olo ki fale o tino ke fai penā. I se auala e lasi fakafia atu, a tino tonu o te Malo e ‵lago atu mo te manumalo ki te Malo o te Atua mai te talai atu mai fale ki fale mo auala. A te tonuga loa, e pelā mo te mea e taku mai i te mataupu mō sukesukega mai mua atu, a Te Faleleoleo Maluga telā e faka‵pula atu i ei a te Malo o Ieova, ko te ‵toe tusi lasi eiloa te tufatufaatuga i te lalolagi! Se tauliaga sili e tasi e maua ne tatou ko te fai‵pati atu ki nisi tino e uiga ki te Malo o te Atua. E a, e kau atu koe mo te loto finafinau ki te galuega talai?​—Mataio 28:19, 20.

16. E mafai pefea o fakatalitonu atu ne koe i a koe se tino ‵lei o te Malo o te Atua?

¹⁶ E se leva nei kae ka pule mai fua te Malo o te Atua ki te lalolagi. Ka pule mai ki feitu katoa o te olaga i aso takitasi, e se i te feitu faka-te-agaga fua kae penā foki i mea tau tulafono. E a, ka fai koe mo fai se tino ‵lei o te Malo o te Atua i te taimi tenā? E tenei eiloa te taimi ke fakatalitonu atu me ka fai eiloa koe penā. A fakaikuga katoa e fai ne koe i aso takitasi, ke fai katoa mō vikiga o Ieova kae e fakatalitonu atu i ei me e amio eiloa koe e pelā me se tino ‵lei o te Malo o te Atua.​—1 Kolinito 10:31.

[Fakamatalaga fakaopoopo]

[Ata i te itulau e 21]

E mata, e fakalogo koe ki faka‵pulaga i te Tusi Tapu e uiga ki te Itaneti?

[Ata i te itulau e 19]

E pelā mo tama ta‵gata a Kola, e mata, e fiafia koe ki te tapuakiga tonu mo tena tala fakasolopito?

[Ata i te itulau e 22]

E uke a mea e mafai o fai ne te Tapuakiga a Kāiga i afiafi ke fai koe mo tou kāiga e pelā me ne tino tonu o te Malo o te Atua