Te Malo o te Atua​—Se Mea Tonu Eiloa i Aso Nei

“E mafai pefea o fealofani a fenua kese‵kese e uke kolā e ‵kese ‵ki olotou tuu mo aganuu? Ko oti ne fai mai me e mafai fua o ‵kau fakatasi a tino katoa māfai e taua mai se isi paneta ki te paneta tenei.”​—The Age, se nusipepa i Ausetalia.

SE TAUA mai se isi paneta? Faitalia me fai ne te mea tenā ke ‵kau fakatasi a fenua i te lalolagi me ikai, e fai‵pati loa a valoaga i te Tusi Tapu ki se fakalavelave telā ka ‵kau fakatasi i ei a fenua o te lalolagi. Kae ka fakaoko mai te fakalavelave tenā ne mea ma‵losi mai tua atu o te paneta tenei.

Ne faipati fakapelofeta eiloa a te tupu o Isalaelu ko Tavita ki te tulaga o te lalolagi tenā. Mai lalo i te takitakiga a te Atua, ne tusi mai a ia: “A olotou tupu mo olotou takitaki e ‵kau fakatasi o ‵teke atu ki te Aliki, e ‵teke atu foki latou ki te tupu ne filifili ne ia, ne fai‵pati ake latou pelā, ‘Ke sē faka‵logo tatou ki a la fakatonuga; ke sē ‵saga foki tatou ki a la pulepulega.’” (Salamo 2:​2, 3; Galuega 4:​25, 26) Ke onoono la me ka ‵kau fakatasi a pule o te lalolagi o taua atu ki a Ieova, te Mafuaga o te lagi mo te lalolagi, mo tena tino filifilia, io me ko tena Tupu filifilia, ko Iesu Keliso. Ka tupu pefea te mea tenā?

E ‵tusa mo te fakasologa o mea ‵tupu i te Tusi Tapu mo valoaga kolā ko oti ne fakataunu, ne fakatu aka i te 1914 te Malo o te Atua i te lagi kae ko Iesu Keliso ko te Tupu i ei.a I te vaitaimi tenā, e tasi eiloa te mafaufauga o tino o te lalolagi. I lō te faka‵logo ki te pulega fou o te Malo o te Atua, ne aofia malosi latou i se kinauga e uiga ki se pulega​—ko te Taua Lasi, io me ko te Taua Muamua a te Lalolagi.

Se a te kilokiloga a Ieova te Atua ki faifaiga penā a takitaki o tino? “E katakata te Aliki i tena nofogaaliki i te lagi kae fakatauemu foki a ia ki olotou fuafuaga sē aogā. E faipati atu a ia mo te kaitaua ki a latou, kae fakamatakutaku foki latou ne ia ki tena kaitaua lasi.” Ka oti i ei, ka fai atu a Ieova ki tena Tama, te Tupu filifilia o te Malo: “Kafai e fakatagi mai koe ki a au, ko tuku atu ei ne au ki a koe a malo katoa; ka avatu foki ne au ki a koe a te lalolagi kātoa. Ka pule ne koe latou ki te tokotoko fiti; ka foafoa foki ne koe latou ke malipilipi e pelā me se ulo kele.”​—Salamo 2:​4, 5, 8, 9.

Ka tupu te fakaseaiga fakaoti o fenua ‵teke konā ki te tokotoko fiti i Amaketo. E fakamatala mai i te tusi fakaoti o te Tusi Tapu ko Fakaasiga, a te mea tenei e pelā me ko “te taua i te aso lasi o te Atua e o ia te Malosi Katoatoa,” telā ka fakamaopoopo ki ei a “tupu i te lalolagi kātoa.” (Fakaasiga 16:​14, 16) Mai lalo i fakamalosiga a te kau temoni, ka ‵kau fakatasi i ei a fenua katoa o te lalolagi mō se pogai e tasi​—ke taua atu ki te Atua Malosi Katoatoa.

Ko pili mai fua te taimi telā ka ‵kau fakatasi i ei a tino katoa o taua atu ki te pulega a te Atua. Kae ko te lotou “‵kau fakatasi” tenā ka seai sena aogā mō latou. I lō te fai penā, a olotou faiga konā ko te kamataga fua tenā o te filemu telā ko leva ne fakatali‵tali ki ei a te kaukāiga o tino. E pefea la? I te taua fakaoti tenā, a te Malo o te Atua “ka fakatakavale ne ia a malo [o te lalolagi] katoa konā, kae tumau ki te se gata mai.” (Tanielu 2:44) Ko te Malo eiloa o te Atua, kae e se ko malo o tino, telā ka fakataunu ne ia a te manakoga o tino ke maua te filemu i te lalolagi.

Te Pule o te Malo

Tenā eiloa te Malo ne ‵talo sāle ki ei a tino loto fakamaoni: “Ke oko mai tou Malo, ke fai te mea e loto koe ki ei i lalo nei, e pelā mo te faiga i te lagi.” (Mataio 6:10) I lō te fai fua pelā me se mea se lavea i te loto, a te Malo o te Atua se malo tonu eiloa telā ko oti ne fakataunu mai ne ia a mea ‵gali e uke talu mai te taimi ne fakatu aka i ei i te 1914. Ke onoono nei tatou ki mea kolā e fakamaoni mai i ei me i te Malo o te Atua se mea tonu eiloa telā e gasuesue malosi i aso nei.

Muamua la, e isi sena potukau pule telā e takitakigina ne tena Tupu filifilia, ko Iesu Keliso. I te 33 T.A., ne fai ne Ieova te Atua a Iesu Keliso e pelā me ko te Pule o te fakapotopotoga Kelisiano. (Efeso 1:22) Talu mai te taimi tenā, ne fakagalue aka ne Iesu tena tulaga ko te ulu o te fakapotopotoga, fakaasi atu i ei tena atamai i te faiga o te galuega. E pelā mo te taimi ne poko ei se oge i Iutaia i te senitenali muamua, ne gasuesue eiloa te fakapotopotoga Kelisiano o fesoasoani atu ki olotou taina i konā. Ne fakatoka i konā a galuega e ‵tau o fai, kae ne olo atu i ei a Panapa mo Saulo mai Anitioka mo mea kolā ne fakatoka.​—Galuega 11:​27-30.

E ‵tau o fakamoe‵moe tatou ki mea e uke atu kolā ka fai ne Iesu Keliso i te taimi ko galue nei i ei a te Malo o te Atua. I so se taimi e poko i ei se mafuie, oge, lofiaga, alikeni, matagi ma‵losi, io me ko mauga ‵ka​—e saga fakavave atu a te fakapotopotoga Kelisiano o Molimau a Ieova o fesoasoani atu ki taina tali‵tonu mo nisi tino foki. E pelā mo mafuie ‵lasi kolā ne ‵poko i El Salvador i a Ianuali mo Fepuali i te 2001, ne fai a fakatokaga i te fenua kātoa ke tuku atu se fesoasoani, kae ne fakatoka foki ne Molimau a Ieova i Kanata, Guatemala mo te Iunaite Sitete ke fesoasoani atu. Ne toe faite aka i ei a olotou fale tapuaki e tolu mo nisi fale ‵nofo e 500 i se taimi toetoe fua.

Tino Kolā ka ‵Nofo Mai Lalo o te Malo o te Atua

Talu mai te taimi ne fakatu aka ei i te 1914, ko oti ne fakamaopoopo kae fakatoka ne te Malo faka-te-lagi a tino i te lalolagi kātoa kolā ka ‵nofo mai lalo i tena pulega. A te mea tenei ko te fakataunuga fakaofoofogia o te valoaga telā ne tusi i te Isaia: “I aso mai mua nei, a te mauga telā e tu ei te Faletapu [ko tena tapuakiga tonu telā ka fakamaluga aka] ka maluga atu i mauga katoa. E uke a malo ka o‵mai ki ei.” E fakaasi mai i te valoaga tenei me tokouke a tino ka olo atu ki te mauga tenā kae ka talia ne latou a fakatonuga mo akoakoga a Ieova.​—Isaia 2:​2, 3.

Ko oti ne iku atu a te mea tenei ki te mauaga o te ‵toe potukau tāua i aso nei​—ko te kau taina o Kelisiano i te lalolagi kātoa telā e silia atu i te toko 6,000,000 i fenua e silia atu i te 230. E ofo sāle a tino ‵fou kolā e ‵kau atu ki fono ‵lasi a Molimau a Ieova i te alofa, te fealofani mo te ‵kau fakatasi telā e maua atu i tino e tokouke mai fenua, tuu mo aganuu mo ‵gana kese‵kese. (Galuega 10:​34, 35) E mata, e se lotomalie koe me i te malo telā e mafai ne ia o fai ke ‵kau fakatasi a te fia selau o potukau mai matakāiga kese‵kese i te filemu mo te fealofani, ko ia eiloa telā e magoi kae e tokagamālie​—kae tonu foki?

Te Malo o te Atua mo Mea Tau Akoakoga

E isi ne manakoga o malo takitasi kolā e ‵tau o tau‵tali atu ki ei a tino kolā e ‵nofo mai lalo i ei, kae ko tino katoa kolā e fia ola mai lalo i te malo tenā e ‵tau o faka‵logo ki manakoga konā. E penā foki a te Malo o te Atua, e isi ne ana manakoga kolā e ‵tau o tau‵tali atu ki ei a tino katoa kolā e ma‵nako o ola mai lalo i ei. Kae, e lasi ‵ki te galuega e ‵tau o fai ke mafai o ‵nofo a tino e tokouke mai matakāiga kese‵kese kae ke tau‵tali foki ki manakoga kolā ko oti ne fakatoka. Tenei eiloa a te suā fakamaoniga ki te ‵tonu o te Malo o te Atua​—ko te magoi o tena polokalame o akoakoga telā e se ‵fuli fua i ei a te mafaufau kae pelā foki mo te loto.

E fakataunu pefea ne te Malo tenei a te galuega faigata tenei? Mai te faiga o te galuega a te kau apositolo ko te talai atu ‘mai fale ki fale’ mo te akoako atu o te Muna a te Atua ki tino taki tokotasi. (Galuega 5:42; 20:20) E pefea te magoi o te vaegā akoakoga tenei? Ne tusi mai a Jacques Johnson, se faifeau Katolika, i se mekesini i Kanata e uiga ki ana taumafaiga ke faka‵tuka atu ki se fafine e tokotasi ke mo a ma suke‵suke mo Molimau a Ieova. “Ne ‵numi masei au ke iloa aka me ne aofia au i se kinauga telā e se mafai o manumalo au i ei,” ko ana pati. “Ne iloa aka ne au i masina fakamuli ifo me ko oti ne maua ne fāfine Molimau konei se fesokotakiga aogā mo te mātua ‵pili tenei. Ne mafai o masani latou mai te fesoasoani atu ki a ia, fai taugasoa mo ia, se fesokotakiga telā e māfua mai i te loto. Ne seki leva kae fai tou fafine mo fai se tino malosi i te la lotu kae ne seki mafai ne au o fai se mea ke fakagata aka ei te mea tenā.” E pelā eiloa mo te galue o te fekau i te Muna a te Atua telā ne akoako atu ne Molimau a Ieova i te loto o se tino Katolika mua fakatasi mo la amioga faka-Kelisiano, e penā foki te otia o loto o te fia miliona o tino i te lalolagi kātoa.

A vaegā akoakoga penei​—ko akoakoga o te Malo​—e fakavae eiloa ki te Tusi Tapu, kae e ‵lago atu eiloa ki ana tulaga ma‵luga i mea tau amioga. E akoako atu i ei ki tino ke fakatau a‵lofa kae fakatau āva faitalia a fenua ne ‵tupu aka ei latou. (Ioane 13:​34, 35) E fesoasoani atu foki i ei ke ‵saga tonu atu a tino ki pati polopoloki konei: “Ke sē amio fakatasi koutou mo te lalolagi nei, ka ke ‵fuli koutou i te fakafouga otou mafaufau, ko te mea ke fakatalitonu ne koutou me se a te loto o te Atua, te mea ‵lei, te mea e logomalie mo te gali.” (Loma 12:2) I te tiakinaga o olotou olaga mua kae ‵fuli atu mo te fia‵fia ki tulafono mo fakatakitakiga o te Malo o te Atua, ko oti ne maua ne te fia miliona te filemu mo te fiafia i aso nei e pelā foki mo te fakamoemoega mautinoa mō aso mai mua.​—Kolose 3:​9-11.

E tasi te fesoasoani aogā ke maua ei te fealofani tenei i te lalolagi kātoa, ko te mekesini tenei, ko Te Faleleoleo Maluga. E auala i fakatokaga ‵fulitusi kolā ne fakatoka faka‵lei mo mea faigaluega ke ‵lomi ei a tusi i ‵gana kese‵kese, ko mafai ei o ‵lomi a mataupu tāua i Te Faleleoleo Maluga i ‵gana e 135 i te taimi eiloa e tasi, kae e silia atu i te 95 pasene o tino fai‵tau i te lalolagi kātoa e mafai o suke‵suke ki mataupu konā i olotou ‵gana eiloa i te taimi e tasi.

Ne fai ne se tino lotu Mamona se fakasologa o lotu kolā ne manuia olotou taumafaiga i tafa o tena lotu. Ne fakaasi mai ne ia me i mekesini ko The Watchtower mo te Awake! ko toe mekesini ‵lei eiloa i te folafolaatuga o te tala ‵lei, i ana pati konei: “E seai se tino e mafai o ‵losi atu ki te Watchtower io me ko te Awake! e uiga ki te manatu māmā​—i lō te fai penā, e fakamalosi aka ne laua ke matapula‵pula a tino, se mea telā e faigata o lavea atu i tusi a nisi lotu. E fakamalosi loto a te Watchtower mo te Awake! i mea ‵tonu, sukesukega ‵loto kolā e fakavae ki ei a mea i loto i ei.”

E lava kae ‵toe a fakamaoniga me i te Malo o te Atua se mea tonu telā e galue malosi nei. E folafola atu ne Molimau a Ieova mo te loto malosi kae fiafia a “te Tala ‵Lei tenei e uiga ki te Malo” ki olotou tuakoi, kae ‵kami foki latou ke fai pelā me ne tino kolā ka ola mai lalo i tena pulega. (Mataio 24:14) E mata, e fakafiafia atu te fakamoemoega tenā ki a koe? E mafai o maua ne koe a fakamanuiaga konā mai te ‵kau fakatasi mo tino kolā e akoakogina ki ei kae taumafai foki ke ola e ‵tusa mo manakoga o te Malo tenā. Kae sili atu i ei, e mafai foki o maua ne koe te fakamoemoega ke ola mai lalo i te pulega a te Malo tenā i te lalolagi fou telā ko oti ne folafola mai me “e nofo i ei a te amiotonu.”​—2 Petelu 3:13.

[Fakamatalaga mai lalo]

[Ata i te itulau e 5]

Ne aofia a atufenua i te taua a te lalolagi i te 1914

[Ata i te itulau e 6]

A fakatokaga ke fesoasoani atu i taimi o fakalavelave ‵tupu fakafuasei se fakamaoniga o te alofa faka-Kelisiano i te vaitaimi nei

[Ata i te itulau e 7]

E maua ne Molimau a Ieova i te lalolagi kātoa a mea aogā mai te polokalame e tasi o akoakoga e tasi