Fakafesagai Atu Ki Fakalavelave Faiga‵ta O Aso Nei Mo Te Loto Malosi

“A te Atua ko te lafiga mo te malosi o tatou, e toka faeloa a ia o fesoasoani ki a tatou i taimi o puapuaga.”​—SALAMO 46:1.

E MAFAI NE KOE O TALI MAI?

E mafai pefea o sē ‵fiu tatou i fakalavelave faiga‵ta?

Ne a pogai e ‵tau ei o fakaasi atu ne tatou a te loto malosi?

Ne a fesoasoani ko oti ne fai ne Ieova ke fesoasoani mai ki a tatou ke fakafesagai atu ki fakalavelave faiga‵ta?

1, 2. Ne a fakalavelave faiga‵ta ne fe‵paki mo tino e tokouke, kae se a te manakoga o tavini a te Atua?

KO OLA tatou i se taimi faigata. Ko ‵fonu te lalolagi i fakalavelave ‵tupu fakafuasei. Ko oti ne fai ne mafuie, tsunami, afi, lofiaga, mauga ‵ka, vaeosio, mo matagi ma‵losi a fakamaseiga ‵lasi ki tino. I tafa i ei, ko maua ne tino a te mataku mo te fanoanoa ona ko fakalavelave i kāiga mo fakalavelave totino. E tonu eiloa me i “mea ‵tupu i taimi e seki fakamoemoegina” e oko mai ki a tatou katoa.​—Failauga 9:11.

² Ko oti ne fakafesagai atu a tavini a te Atua ki vaegā tulaga faiga‵ta penā. Kae e ma‵nako foki tatou ke toka o fakafesagai atu ki so se fakalavelave e fepaki mo tatou i te taimi mai mua e ‵tusa loa mo te pili atu o te olaga tenei ki tena fakaotiga. E mafai pefea o tumau tatou i te tavini atu mo te fiafia ki te Atua māfai e isi ne mea ma‵sei e ‵tupu ki a tatou? Se a te mea ka fesoasoani mai ke fakafesagai atu tatou mo te loto malosi ki fakalavelave faiga‵ta o aso nei?

TAULOTO MAI I A LATOU KOLĀ NE FAKAASI MAI TE LOTO MALOSI

3. E pelā mo te mea e fakaasi mai i te Loma 15:​4, se a te mea e mafai o fakamafanafana mai māfai e fe‵paki tatou mo tulaga fakafanoa‵noa?

³ E ui eiloa e tokouke atu nei a tino e pokotia i tulaga faiga‵ta i lō taimi mua, e se fou ki tino a fakalavelave faiga‵ta. Ke onoono aka tatou me ne a mea e mafai o tauloto ne tatou mai nisi tavini a te Atua kolā ne iku manuia i te fakafesagai atu mo te loto malosi ki te olaga i taimi ko ‵teka.​—Loma 15:4.

4. Ne a fakalavelave faiga‵ta ne kufaki a Tavita i ei, kae se a te mea ne fesoasoani atu ki a ia?

⁴ Mafaufau ki nisi mea ne kufaki a Tavita i ei. Ne manako te tupu ko Saulo o tamate a ia. Ne taua atu ana fili kae puke ana avaga. Ne fakatogafiti a ia ne nisi tino o tena kautau mo nisi tino o tena kāiga tonu mo taugasoa. Ne oko ki a ia te loto mafatia i nisi taimi. (1 Samuelu 18:​8, 9; 30:​1-5; 2 Samuelu 17:1-3; 24:​15, 17; Salamo 38:​4-8) E fakaasi manino mai i te Tusi Tapu a te logo‵mae o Tavita ona ko fakalavelave konei. Kae ne seki fakavāivāi ne mea ma‵sei konei a tena fakatuanaki ki a Ieova. Ne fai mai a ia mo te fakatuanaki: “A Ieova ko te ‵pui malosi o toku olaga. Ko oi e ‵tau o mataku au ki ei?”​—Salamo 27:​1, NW; faitau te Salamo 27:​5, 10.

5. Se a te mea ne fesoasoani atu ki a Apelaamo mo Sala ke fakafesagai atu ki se olaga faigata?

⁵ Ne ola a Apelaamo mo Sala i faleie i te ukega o taimi e pelā me ne tino fakaa‵lofa i koga kolā e se masani lāua ki ei. Ne seki faigofie faeloa te olaga o lāua. E ui i ei, ne mafai eiloa lāua o fakafesagai atu ki te oge mea‵kai mo mea fakama‵taku mai atufenua i tafa o lāua. (Kenese 12:10; 14:​14-16) Ne mafai pefea o fai ne lāua te mea tenei? E fai mai te Muna a te Atua me i a Apelaamo “ne fakatalitali . . . ki se fa‵kai telā e isi ne ana fakavae ‵tonu, kae telā ne fakatoka kae fakatu eiloa ne te Atua.” (Epelu 11:​8-10) Ne seki fakavāivāi a Apelaamo mo Sala ne te lalolagi i lā tafa, kae ne tumau eiloa i te ‵saga tonu atu ki mea mai mua.

6. E mafai pefea o fakaakoako atu tatou ki a Iopu?

⁶ Ne fepaki a Iopu mo fakamalosiga faiga‵ta. Mafaufau ki ana lagonaga ki te sē oloolo tonu o mea katoa e fai i tena olaga. (Iopu 3:​3, 11) Kae masei atu la, me ne seki malamalama kātoatoa a ia i te pogai e ‵tupu ei a mea katoa konei ki a ia. Kae ne seki loto vāivāi eiloa a ia. Ne ‵mautakitaki eiloa a tena fakamaoni mo tena fakatuanaki ki te Atua. (Faitau te Iopu 27:5.) Se fakaakoakoga ‵lei ‵ki ke tau‵tali tatou i ei!

7. Ne a mea ne fe‵paki mo Paulo i te taimi ne tavini atu ei ki te Atua, kae se a te mea ne fesoasoani atu ki a ia ke tumau eiloa tena taviniga?

⁷ Ke mafaufau foki ki te fakaakoakoga a te apositolo ko Paulo. Ne fepaki a ia mo ‘mea fakama‵taku i fa‵kai ‵lasi, i te togavao, i te tai.’ E faipati foki a ia ki te ‘fiakai mo te fiainu, te mokotia kae seai ne gatu.’ E taku mai foki ne Paulo me ne tapeapea a ia i te ‘moana ‵poko i te po mo te ao,’ ona ko te vaka e tasi ne fano a ia i ei ne apulu. (2 Kolinito 11:​23-27) Faitalia a mea katoa konā, onoono ki te kilokiloga ne fakaasi mai ne ia mai tua o te taimi ne moi mate ei a ia ona ko te taviniga ki te Atua: “Ne tupu te mea tenei ko te mea ke se tali‵tonu matou ki a matou eiloa, kae ke tali‵tonu matou ki te Atua telā ka faka‵tu aka ne ia a tino ‵mate.” (2 Kolinito 1:​8-10) E se tokouke a tino ne fe‵paki mo mea ma‵sei e uke e pelā mo Paulo. E tigā te feitu tenā, e mafai o oko mai ki te tokoukega o tatou ana lagonaga kae fakamafanafana mai a tena fakaakoakoga fakamalosi loto.

KE MO A E ‵FIU ONA KO FAKALAVELAVE

8. E pokotia pefea tatou i fakalavelave o aso nei? Fakamatala mai.

⁸ E tokouke a tino ko ‵fiu ona ko te lalolagi i aso nei ko ‵fonu i fakalavelave mo tulaga faiga‵ta e fakafesagai atu ki ei. E oko foki ki nisi Kelisiano a te lagonaga tenā. E fai mai a Lani,a telā ne fia‵fia fakatasi mo tena avaga i te taviniga tumau i Ausetalia, me i te taimi ne iloa aka ei me ko kenisa tena ū, ne masei ‵ki a te mea tenā kae fakapoi mai e pelā eiloa me se ‵lapaga o se uila. Muna a tou fafine, “Ne fai ne togafiti ki toku masaki ke masaki malosi au, kae ko seai ei se loto talitonu i au.” I te taimi foki tenā, e ‵tau o tausi atu tou fafine ki tena avaga telā ne ‵tipi tena ivi tua. Kafai e oko tatou ki se tulaga penā, se a te mea e mafai o fai ne tatou?

9, 10. (a) Se a te mea e se ‵tau o talia ne tatou ke fai ne Satani? (e) E mafai pefea o fakafesagai atu tatou ki puapuagā e uke kolā ne taku mai i te Galuega 14:22?

⁹ Se mea ‵lei ke masaua ne tatou me i a Satani e manako o fakaaoga a fakalavelave e logo‵mae tatou i ei ke fakavāivāi mai ki ‵tou fakatuanaki. Tela la, ke mo a e talia ne tatou ke ave kea‵tea ne tou tagata a ‵tou fiafia i te auala tenei. E fai mai te Faataoto 24:10: “Kafai koe e vaivai i te taimi e tupu ei se fakalavelave, ko tena uiga a koe e vaivai eiloa.” Ka fesoasoani mai a te mafaufau ‵loto ki fakaakoakoga faka-te-Tusi Tapu, e pelā mo mea ne sau‵tala muamua ki ei, ke ati aka te loto malosi o fakafesagai atu ki fakalavelave.

¹⁰ Se mea ‵lei foki ke masaua ne tatou me e se mafai ne tatou o fakaseai a fakalavelave katoa. A te tonuga loa, e fakamoe‵moe tatou me e oko mai a fakalavelave. (2 Timoteo 3:12) E fai mai te Galuega 14:22: “E ‵tau mo tatou o ulu atu ki loto i te Malo o te Atua e auala i puapuaga e uke.” I lō te loto vāivāi, kaia e se ‵kilo atu ei ki fakalavelave konā e pelā me ne avanoaga ke fakaasi atu te loto malosi telā e fakavae ki tou fakatuanaki me mafai ne te Atua o fesoasoani atu ki a koe?

11. E mafai pefea o sē fakavāivāi tatou ne fakalavelave o te olaga?

¹¹ E manakogina ke mafau‵fau faeloa tatou ki mea ‵lei i ‵tou olaga. E fai mai te Muna a te Atua: “A te loto fiafia e tupu mai i ei te mata fiafia” kae ko “te loto fanoanoa” e fai ei ke fanoa‵noa tatou. (Faataoto 15:​13, Tusi Paia, Samoa) Ko leva ne iloa ne tokita a te tāua o te mafaufau ki mea ‵lei i te faka‵leiga o masaki. Ko oti ne maua ne tino ma‵saki e tokouke kolā ne tuku ki ei a fuaga o te suka (placebos) se fakatapūga ona fua ko te mafau‵fau i a latou e olo o ‵lei. Kae kafai se tino masaki e mafaufau me i fuaga kolā e inu ne ia e fai ei a ia ke masaki, ka ma‵sei ‵ki eiloa ana lagonaga. A te mafaufau faeloa ki mea kolā e se mafai ne tatou o ‵fuli ka fai fua i ei ke loto vāi‵vai tatou. E se tuku mai ne Ieova a “fuaga o te suka.” Kae tuku mai ne ia a te fesoasoani tonu, ke oko foki eiloa ki taimi o fakalavelave, e auala i fakamalosiga kolā e maua i tena Muna, te ‵lago mai o ‵tou kautaina, mo te malosi telā e tuku mai ne te agaga tapu. A te mafaufau ki mea konei ka fakamalosi aka ei tatou. I lō te mafaufau faeloa ki mea sē ‵lei i tou olaga, fai te mea e mafai ke fakafesagai atu ki fakalavelave takitasi kae saga atu fua ki mea ‵lei kolā ko maua ne koe.​—Faataoto 17:22.

12, 13. (a) Se a te mea ne fesoasoani atu ki tavini a te Atua ke kufaki i ikuga o fakalavelave ‵tupu fakafuasei? Fakamatala mai. (e) I taimi o fakalavelave ‵tupu fakafuasei, e manino ‵lei pefea a te ‵toe mea tāua i te olaga o se tino?

¹² I taimi fakamuli nei, ko oti ne ‵tupu a fakalavelave ‵tupu fakafuasei matagā i nisi atufenua. E mafai tatou o tauloto mai te auala ne kufaki ei ‵tou taina i tulaga konā faitalia me e se faigofie ki a latou ke fai penā. I te kamataga o te 2010, ne fakamasei ne se mafuie malosi mo te tsunami a fale mo mea a ‵tou taina e tokouke i Chile. Faitalia te mea tenei, ne tumau eiloa ‵tou taina i te ma‵losi i te feitu faka-te-agaga. Ne fai mai a Samuelu telā ne fakamasei kātoatoa tena fale: “Ke oko foki ki tulaga ma‵sei konei, ne seki fakagata eiloa te ‵kau atu o māua mo taku avaga ki fakatasiga mo te galuega talai. E talitonu au me ne fesoasoani mai a faiga masani konei ke mo a e loto vāi‵vai māua.” Ne seki talia ne lāua fakatasi mo nisi tino e tokouke ke fakavāivāi atu a te fakalavelave ki a latou kae ne tumau eiloa i te galuega a Ieova.

¹³ I a Setema 2009, e silia atu mo te 80 pasene o kogā koga o Manila, i Filipaina ne lofia. Ne fai mai se tagata maumea telā ne uke ana mea ne ‵galo: “Ne pokotia a tino katoa i te lofiaga kae ne māfua mai i ei a logo‵maega mo tulaga faiga‵ta ki tino mau‵mea mo tino ma‵tiva.” E fakamasaua mai a te mea tenei ki a tatou e uiga ki te fakatakitakiga poto a Iesu: “Kae fakaputu ne otou koloa i te lagi, me e se oko ki ei a anufe mo te pala kae e se oko foki ki ei a tino o kaisoa ne latou.” (Mataio 6:20) A te atiakaga o te olaga o se tino i mea faka-te-foitino kolā e vave ‵galo atu, e maua faeloa i ei a ikuga fakafanoanoa. Se mea poto ke fakavae ‵tou olaga ki ‵tou fesokotakiga mo Ieova, telā e mafai o tumau faitalia me ne a mea e ‵tupu i ‵tou tafa!​—Faitau te Epelu 13:​5, 6.

POGAI E ‵TAU EI O FAKAASI ATU TE LOTO MALOSI

14. Ne a pogai e ‵tau ei o fakaasi atu ne tatou a te loto malosi?

¹⁴ Ne fakailoa atu ne Iesu me ka isi ne fakalavelave i te taimi o tena fakatasi mai, kae ne fai mai a ia: “Ke mo a e ma‵taku koutou.” (Luka 21:9) E maua ne tatou a pogai ‵lei e ‵tau ei o fakaasi atu ne tatou a te loto malosi me i te ‵tou Tupu mo te Māfuaga o te lagi mo te lalolagi e ‵lago mai ki a tatou. Ne fakamalosi atu a Paulo ki a Timoteo: “Me ne seki tuku mai ne te Atua ki a tatou te agaga o te mata mataku, kae ko te ‵mana mo te alofa mo te mafaufau ‵lei.”​—2 Timoteo 1:7.

15. Tuku mai a fakaakoakoga o te loto tali‵tonu o tavini a te Atua, kae fakamatala mai te auala e mafai ei o maua ne tatou se loto malosi tai ‵pau.

¹⁵ Onoono ki nisi tugāpati kolā e fakaasi mai i ei a te lasi o te loto tali‵tonu o tavini a te Atua. Muna a Tavita: “A te Aliki e puipui kae fakalafi ne ia au; au e talitonu ki a ia. Ne fesoasoani mai a ia ki a au, kae fakafiafia foki ne ia a au.” Ne fakaasi mai foki ne Paulo a tena loto talitonu: “E manumalo katoatoa tatou i mea katoa konei e auala i a ia telā ne alofa mai ki a tatou.” (Loma 8:37) E penā foki i te taimi ne sae aka ei se mea fakamataku, ne fai atu ne Iesu a pati kolā ne seki fakalotolotolua i ei a tino fakalogo‵logo e uiga ki te pili o tena fesokotakiga mo te Atua, ana muna: “Au e se nofo tokotasi me e ‵nofo fakatasi māua mo toku Tamana.” (Ioane 16:32) Se a te mea e fakaasi manino mai i tugāpati konei? E fakaasi mai i mea takitasi konei a te talitonu kātoatoa ki a Ieova. A te atiakaga o se loto talitonu penā ki te Atua e tuku mai ei ki a tatou a te malosi ke fakafesagai atu ki so se fakalavelave i aso nei.​—Faitau te Salamo 46:​1-3.

KE MAUA A MEA AOGA MAI FESOASOANI E TUKU MAI NE TE ATUA

16. Kaia e tāua ei ki a tatou a te sukesuke ki te Muna a te Atua?

¹⁶ A te loto malosi faka-Kelisiano e se maua mai i te fakalagolago o te tino ki a ia eiloa, kae maua mai i te iloa ‵lei ne tatou te Atua kae fakalagolago ki a ia. E mafai o fai ne tatou a te mea tenei mai te sukesuke ki tena Muna, ko te Tusi Tapu. E fakamatala mai ne se tuagane a te mea telā ne fesoasoani atu ki tena loto māfatia, “E fakafokifoki faeloa taku faitau maise loa ki fuaiupu fakamafanafana loto.” E mata, ko oti ne fakagalue aka ne tatou a te fakatakitakiga ke fai se taimi tumau mō te tapuakiga a kāiga? Kafai e fai a mea konei, ka fesoasoani mai ke maua ne tatou a te kilokiloga a te faisalamo telā ne fai mai: “Au ko oko eiloa i te fiafia ki au tulafono! E mafaufau au ki ei i te aso kātoa.”​—Salamo 119:97.

17. (a) Se a te suā auala e fesoasoani mai ei a Ieova ke maua ne tatou te loto malosi? (e) Tuku mai se fakaakoakoga me ne fesoasoani atu pefea se tala i loto i ‵tou tusi ki a koe.

¹⁷ Te lua o mea, e maua ne tatou a tusi faka-te-Tusi Tapu kolā e maua i ei a fakamatalaga kolā e fakamalosi aka i ei ‵tou loto tali‵tonu ki a Ieova. Ko oti ne maua ne taina e tokouke a te fesoasoani mai tala e uiga ki olaga o tino i ‵tou mekesini. Ne fiafia se tuagane e tokotasi i Asia telā ne maua ne te masaki o te mafaufau (bipolar mood disorder) i te taimi ne faitau ei tou fafine ki te tala o se taina misionale mua telā ne iku manuia i te fakafesagai atu ki te masaki foki eiloa tenā. Ne tusi mai tou fafine, “Ne fesoasoani mai a te mea tenā ke malamalama au i toku fakalavelave totino kae tuku mai ei se fakamoemoega ki au.”

18. Kaia e ‵tau ei o fakaaoga ne tatou a te auala fesoasoani ko te faiga o ‵talo?

¹⁸ Te tolu o fesoasoani ko te ‵talo. E mafai o fesoasoani mai a te mea tenei i feitu katoa. Ne faka‵mafa mai ne te apositolo ko Paulo a te tāua o te fesoasoani tenei, penei: “Ke mo a ma manava‵se koutou ki so se mea, kae ke tuku atu a mea katoa kolā e ma‵nako koutou ki ei ki te Atua fakatasi mo otou fakafetai e auala i otou talosaga; a ko te filemu o te Atua telā e sili fakafia atu i mea katoa kolā e malamalama i ei a tino ka puipui ne ia otou loto mo otou mafaufau e auala i a Keliso Iesu.” (Filipi 4:​6, 7) E mata, e fakaaoga kātoatoa ne tatou a te auala fesoasoani tenei ke maua ne tatou te malosi i taimi o fakalavelave faiga‵ta? Ne fai mai a Alex, se taina i Peletania telā ko leva ne māfatia: “A te mea telā ne fesoasoani malosi mai ki a au ko te faipati atu ki a Ieova i te ‵talo kae fakalogologo ki a ia e auala i te faitau ki tena Muna.”

19. E ‵tau o pefea ‵tou kilokiloga ki te ‵kau ki fakatasiga faka-Kelisiano?

¹⁹ A te fa o fakatokaga tāua ke fesoasoani mai ki a tatou ko fakatasiga. Ne tusi mai se faisalamo: “Ko oko eiloa toku fia nofo . . . i loto i te fale o te Aliki [Ieova].” (Salamo 84:2) E a, e penā foki ‵tou lagonaga? E fakamatala mai ne Lani, telā ne taku atu muamua, a tena kilokiloga ki fakatasiga faka-Kelisiano: “A te kau ki fakatasiga e sē se mea ke filifili ki ei. E ‵tau eiloa o nofo atu au i konā māfai e fakamoemoe au ke fesoasoani mai a Ieova ki a au ke fakafesagai atu ki fakalavelave.”

20. Ka fesoasoani mai pefea ki a tatou a te kau faeloa ki te galuega talai?

²⁰ A te lima o fesoasoani ko te galue faeloa i te galuega talai o te Malo. (1 Timoteo 4:16) E fai mai se tuagane telā ne fepaki mo fakalavelave e uke: “A te talai ko te toe mea tafa lalo eiloa ne manako au o fai, kae ne ‵kami au ne se toeaina ke olo fakatasi mo ia. Ne fano eiloa au. Kāti ne fesoasoani mai eiloa a Ieova; me i taimi katoa ne kau ei au ki te galuega talai, ne lagona ne au te fiafia lasi.” (Faataoto 16:20) Ko iloa ne tino e tokouke me i te fesoasoani atu ki nisi tino ke ati aka te fakatuanaki ki a Ieova, e fakamalosi aka foki i ei olotou fakatuanaki. I te faiga tenā, ko sē mafau‵fau ei latou ki olotou fakalavelave totino kae ko ‵saga atu fua ki mea kolā e sili atu i te tāua.​—Filipi 1:​10, 11.

21. Se a te fakatalitonuga e maua ne tatou e uiga ki mea faiga‵ta e fakafesagai atu tatou ki ei?

²¹ Ko oti ne fakatoka ne Ieova a fesoasoani e uke ke mafai o fakafesagai atu tatou mo te loto malosi ki fakalavelave faiga‵ta o aso nei. Mai te fakaaoga kātoatoa o fesoasoani konei kae mai te mafaufau ‵loto ki ei kae tau‵tali i fakaakoakoga ‵lei o te loto ma‵losi o tavini a te Atua, e fakapa‵tonu mai i ei me e mafai eiloa o fakafesagai atu tatou mo te manuia ki mea faiga‵ta. E tigā eiloa kāti koi uke a fakalavelave ka fe‵paki mo tatou ona ko te pili atu o te olaga tenei ki tena fakaotiga, e mafai eiloa o ‵pau ‵tou lagonaga mo Paulo, telā ne fai mai penei: “E ‵pei ‵tuki matou ki lalo, kae e se fakamaseigina. . . . Tela la, e se ‵fiu matou.” (2 Kolinito 4:​9, 16) Mai te fesoasoani o Ieova, e mafai eiloa o fakafesagai atu tatou mo te loto ma‵losi ki fakalavelave faiga‵ta i aso nei.​—Faitau te 2 Kolinito 4:​17, 18.

[Fakamatalaga fakaopoopo]

[Ata i te itulau e 14]

Kafai e fakafesagai atu koe ki se fakalavelave faigata, fakaaoga a te fesoasoani telā ko oti ne fakatoka ne Ieova