Se Vaegā Agaga Pefea E Fakaasi Atu Ne Koe?

“Ke i luga i a koutou te alofa tauanoa o te Aliki ko Iesu Keliso i te agaga telā e fakaasi mai ne koutou.”​—FILEMONI 25.

E MAFAI NE KOE O TALI?

Kaia e ma‵nako ei tatou o ‵saga tonu ki te vaegā agaga e fakaasi atu ne tatou?

Ne a kilokiloga e ‵tau o ‵kalo kea‵tea tatou mai i ei, kae e mafai pefea o fai ne tatou?

Ne a mea e mafai o fai ne tatou ke fakaasi atu se agaga ‵lei i te fakapotopotoga?

1. Se a te fakamoemoega o Paulo ne fai atu ne ia i te taimi ne tusi atu ei ki taina tali‵tonu?

I TE taimi ne tusi atu ei ki taina tali‵tonu, ne fai atu faeloa a te apositolo ko Paulo me e fakamoemoe a ia me ka talia ne te Atua mo Keliso a te agaga telā ne fakaasi atu ne fakapotopotoga. Pelā me se fakaakoakoga, ne tusi atu tou tagata ki te kau Kalatia: “Ke i luga i a koutou a te alofa tauanoa o te ‵tou Aliki ko Iesu Keliso i te agaga telā e fakaasi mai ne koutou, e oku taina, Amene.” (Kalatia 6:18) Se a te mea ne fakauiga a ia ki ei e uiga ki “te agaga telā ne fakaasi mai ne koutou”?

2, 3. (a) I te fakaaogaga o te pati “agaga,” ne fakasino atu a Paulo ki te a i nisi taimi? (e) Ne a fesili e fesili ifo ne tatou ki a tatou eiloa e uiga ki te agaga e fakaasi atu ne tatou?

² A te fakaaogāga ne Paulo a te pati “agaga” i konei e fakasino atu eiloa ki te malosi telā e fai ei tatou ke fai‵pati atu io me fai a mea i se auala mautinoa. Kāti e maua ne se tino e tokotasi a te mataalofa, atafai, agamalu, kaimalie, io me loto fakamagalo. E fai mai te Tusi Tapu me se mea ‵lei ke maua “te agaga filemu” me i “tino kolā e filemu e lasi te mea e iloa ne latou.” (1 Petelu 3:4; Faataoto 17:27) I te suā feitu, kāti e fai atu ne te suā tino a pati e faka‵mae ei a loto o nisi tino, e manako malosi ki mea faka-te-foitino, e ita vave, io me e se manako ke fai atu ne se tino ki a ia a te mea e ‵tau o fai. Kae masei atu la me e isi ne tino kolā e fakaasi atu se agaga ‵teke, sē ‵ma, kae sē faka‵logo.

³ Tela la, i te fakaaogāga ne Paulo a tugāpati pelā “ke fakatasi atu te Aliki ki te agaga telā e fakaasi mai ne koe,” ne fakamalosi atu tou tagata ki ana taina ke fakaasi mai se agaga telā e fetaui ‵lei mo te loto o te Atua mo uiga o Keliso. (2 Timoteo 4:22; faitau te Kolose 3:​9-12.) I aso nei, se mea ‵lei ke fesili ifo ki a tatou eiloa: ‘Se vaegā agaga pefea e fakaasi atu ne au? E mafai pefea o momea aka te fakaasi kātoatoa atu ne au se agaga telā e fakafiafia atu ki te Atua? E mata, e mafai ne au o fakamalosi atu a nisi tino i loto i te fakapotopotoga ke maua se agaga telā e fakafiafia atu ki te Atua?’ Pelā me se fakaakoakoga, i loto i se malae pulalakau, e fesoasoani atu a pulalakau takitasi ki te gali saukātoa o te malae pulalakau. E mata, a tatou se tasi o “pulalakau” telā e fesoasoani atu ki te gali saukātoa o te fakapotopotoga? E mautinoa ‵lei me e ‵tau o taumafai malosi tatou ke fai penā. Ke onoono aka la tatou me ne a nei a mea e mafai o fai ne tatou ke fakaasi atu se agaga telā e fakafiafia atu ki te Atua.

‵TEKE ATU KI TE AGAGA O TE LALOLAGI

4. Se a “te agaga o te lalolagi”?

⁴ E fai mai te Tusi Tapu ki a tatou: “Ne seki talia ne tatou te agaga o te lalolagi, kae ko te agaga telā ne aumai ne te Atua.” (1 Kolinito 2:12) Se a “te agaga o te lalolagi”? Ko te agaga foki telā e taku mai i te Efeso 2:​2, telā e fai mai penei: “Ne sa‵sale mua koutou i ei i te olaga masani o te lalolagi tenei, e ‵tusa mo te pule a te takitaki o te ea, ko te agaga telā e galue nei i tino kolā e se faka‵logo ki te Atua.” A te “ea” tenei ko te agaga o te lalolagi, io me ko mafaufauga o tino o te lalolagi, kae fakatamilo i a tatou e pelā mo te ea telā e ma‵nava tatou ki ei. E oko ki so se koga. E masani o fakaasi mai te ea tenā i uiga masani o tino e tokouke i aso nei, penei: ‘E seai se tino e fai mai ki a au te mea e ‵tau o fai,’ io me ‘E ‵tau o taua atu koe mō tou saolotoga.’ A latou ko tino o te lalolagi a Satani “kolā e se faka‵logo ki te Atua.”

5. Se a te agaga masei ne fakaasi mai ne nisi tino i Isalaelu?

⁵ E se ‵fou a vaegā uiga masani konā. I taimi o Mose, ne ‵teke atu a Kola ki tino kolā e takitaki ne latou te kau Isalaelu. Ne faipati ‵teke atu a ia maise loa ki a Alona mo ana tama tāgata, kolā e tavini atu e pelā me ne faitaulaga. E se taumate ne lavea ne tou tagata a te sē ‵lei kātoatoa o latou. Io me kāti ne mafaufau a ia i a Mose e fāpito​—e tuku atu a tauliaga ki ana kāiga. Faitalia me se a te mea tenā, e manino ‵lei me ko kamata o kilo atu a Kola ki mea e fai i te kiloga a te tagata kae faipati ‵teke atu mo te sē āva ki a latou kolā ne filifili ne Ieova, penei: “Ko to silia katoa te lua mea tenei e fai . . . ai a e fia pule ei [koulua] i luga o te fenua kātoa?” (Numela 16:3) I se auala tai ‵pau, ne fāmeo foki a Tatano mo Apilamo ki a Mose kae fai atu me i a ia ‘ko manako foki ke fai mo aliki o latou.’ I te taimi ne fakamolemole atu ei a Mose ke fetaui latou, ne tali mai lāua mo te fakamata‵mata: “Māua sē olo atu!” (Numela 16:​12-14) E manino ‵lei me ne sē fiafia Ieova ki te uiga ‵teke o latou. Ne tamate ne ia tino ‵teke katoa.​—Numela 16:​28-35.

6. Ne fakaasi mai pefea ne nisi tāgata i te senitenali muamua me ne maua ne latou se kilokiloga masei, kae kāti se a te pogai?

⁶ Ne kamata foki a nisi tāgata i te senitenali muamua o fāmeo ki a latou kolā e pulepule i te fakapotopotoga. (Iuta 8) Kāti e se lotoma‵lie a tāgata konei ki olotou tauliaga kae taumafai o fakama‵losi a nisi tino ke ‵teke atu ki tāgata kolā ne tofia ke fai olotou tiute mai te Atua mo olotou loto kātoa.​—Faitau te 3 Ioane 9, 10.

7. I te auala fea e ‵tau ei o isi se fakaeteete i loto i te fakapotopotoga i aso nei?

⁷ E mautinoa ‵lei me e seai se avanoaga mō se vaegā kilokiloga penā i loto i te fakapotopotoga Kelisiano. E tenā te pogai e ‵tau ei o fakaeteete tatou i te mea tenei. A toeaina i loto i te fakapotopotoga e se ‵lei kātoatoa, e pelā eiloa mo tāgata ma‵tua i aso o Mose mo taimi o te apositolo ko Ioane e se ‵lei kātoatoa. Kāti e fai ne toeaina a mea ‵se kolā e pokotia a tatou taki tokotasi i ei. Kafai e tupu se mea penā, e se ‵tau o fakaasi atu ne so se tino o te fakapotopotoga a te agaga o te lalolagi mai te fai atu, e ‵tau o fai te “mea tonu” io me “e ‵tau o fai se faiga ki te taina tenei”! Masaua me e mafai o filifili a Ieova ke sē kilo atu ki mea ‵se fo‵liki penā. E mata, e se mafai foki o fai tatou penā? Ona ko mea ‵se kolā e lavea ne latou i toeaina, ko ita ei a tino taki tokotasi kolā ne fai ne latou agasala matagā i loto i te fakapotopotoga ma saga‵saga fakatasi mo se komiti o toeaina telā ne ‵tofi aka ke fesoasoani atu ki a latou. E mafai o faka‵tusa a te mea tenei ki se tino masaki telā ko sē maua ne ia a mea aoga mai se togafiti ki te masaki me e isi se mea e se fiafia ei a ia ki te tokitā.

8. Ne a tusi siki e fesoasoani mai ke fakatumau ne tatou se kilokiloga tonu ki a latou kolā e fai ne latou te takitakiga i te fakapotopotoga?

⁸ Ke ‵teke atu ki te vaegā kilokiloga tenā, e ‵tau o masaua ne tatou me ne fakaata mai i te Tusi Tapu a Iesu e puke ne ia “a fetu e fitu i tena lima fakaatamai.” A “fetu” ne fakauiga loa ki ovasia fakaekegina kae, ne fakasino atu foki i se auala tai lasi atu, ki toeaina katoa i loto i fakapotopotoga. E mafai ne Iesu o fakatonutonu a “fetu” i tena lima fakaatamai i so se auala e mafaufau a ia me e ‵tau. (Fakaasiga 1:​16, 20) Tela la, e pelā me ko te Ulu o te fakapotopotoga Kelisiano, e pule katoatoa atu a Iesu ki te potukau o toeaina. Kafai e ‵tau eiloa o fakatonutonu se toeaina, ka fakamautinoa aka ne te Tino telā e fai “ana mata e pelā me se afi ‵ka ulaula” ke fai a te mea tenei i te taimi mo te auala tonu o Ia. (Fakaasiga 1:14) I te taimi tenā, ke tumau eiloa tatou i te āva atu ki a latou kolā ne filifili ne te agaga tapu, me ne tusi mai a Paulo: “Ke faka‵logo koutou ki a latou kolā e fai ne latou te takitakiga i a koutou kae ke ‵lago atu ki ei, me e puipui ne latou otou ola kae e tuku atu ne latou se tala ki te Atua e uiga ki ei; ko te mea ke fai ne latou te mea tenā mo te fiafia kae se mo te fi‵ta, me e fakamasei atu i ei ki a koutou.”

9. (a) Se a te tofotofoga e fepaki mo se Kelisiano māfai e fakatonutonu aka a ia io me polopoloki? (e) Se a te ‵toe auala ‵lei ke kilo atu ki te polopolokiga?

⁹ Kāti e tofotofogina foki te kilokiloga a se Kelisiano māfai e fakatonutonu aka a ia io me tapale a tauliaga i loto i te fakapotopotoga. Ne polopoloki faka‵lei ne toeaina se taina talavou e tokotasi me ne tafao i tafaoga fakasauā i te vitio. Se mea fakafanoanoa me ne seki talia ne ia te polopolokiga. Tela la, ko ‵tau o tapale kea‵tea te tauliaga e pelā me se tavini fesoasoani me ko sē fetaui a mea e fai ne ia mo manakoga o te Tusi Tapu. (Salamo 11:5; 1 Timoteo 3:​8-10) Fakamuli ifo, ne kamata te taina o faipati atu ki nisi tino me ne seki lotomalie a ia ki te ikuga a toeaina. Ne tusi faeloa ne ia a tusi e fakamasei ei te kau toeaina ki te ofisa lagolago kae fakamalosi atu foki ki nisi tino i loto i te fakapotopotoga ke fai penā. Kafai e fai ne tatou a fakamasakoga mō ‵tou mea ‵se ne fai, ko fai fua ne tatou a te filemu o te fakapotopotoga kātoa ke tu i se tulaga fakamataku, kae e se fesoasoani atu a te mea tenei ki so se tino. Tela la, kafai ko polopoloki tatou, e sili atu te ‵lei ke ‵kilo atu ki ei e pelā me se avanoaga ke tauloto ne tatou ‵tou vāivāiga kolā e seki iloa ne tatou, ko talia ei a te polopolokiga.​—Faitau te Tagiga a Ielemia 3:​28, 29.

10. (a) Se a te mea e akoako mai ki a tatou i te Iakopo 3:​16-18 e uiga ki te kilokiloga tonu mo te kilokiloga sē tonu? (e) Ne a ikuga e mafai o maua mai te fakaasi atu o “te poto mai te lagi”?

¹⁰ E akoako mai ki a tatou i te Iakopo 3:​16-18 a te kilokiloga tonu mo te kilokiloga sē tonu e ‵tau o fakaasi atu ne se tino i loto i te fakapotopotoga. E fai mai penei: “Me ko te koga telā e ‵nofo i ei te loto masei mo kinauga, e maua foki i ei te faivalevale mo mea ma‵sei katoa. Kae ko te poto mai te lagi e tulaga muamua i te ‵ma, e filemu, e loto malamalama, e toka o fakalogo, e ‵fonu i te alofa fakamagalo mo fuataga ‵lei, e se fakailoga tino, e se amio ‵pelo. E se gata i ei, a fuataga o te amiotonu e ‵toki mai lalo i fakanofonofoga o te filemu i va o tino kolā e tausi ki te filemu.” I te ga‵lue tasi o tatou mo “te poto mai te lagi,” ko fakatau fakamalosi ei te suā tino ki te suā tino i te fakaasiatuga o te kilokiloga tonu, ko maua ei te filemu i loto i te fakapotopotoga.

FAKAASI ATU SE KILOKILOGA ĀVA I TE FAKAPOTOPOTOGA

11. (a) A te fakatumauga o se kilokiloga tonu ka fesoasoani mai ke ‵kalo kea‵tea tatou mai te a? (e) Se a te mea e tauloto ne tatou mai te fakaakoakoga a Tavita?

¹¹ E ‵tau o masaua ne tatou me ne ‵tofi ne Ieova a toeaina “ke fai mo . . . tausi mamoe o te fakapotopotoga a te Atua.” (Galuega 20:28; 1 Petelu 5:2) Tela la, ko matea ne tatou me i te auala poto e ‵tau o fai ko te āva ki te fakatokaga a te Atua, faitalia me maua ne tatou a te tauliaga ke tavini atu e pelā me ne toeaina io me ikai. A te fakatumau o se kilokiloga tonu e fesoasoani mai ke mo a e to fakatāua ne tatou a te mauaga o se tauliaga io me se tulaga. I te taimi ne kamata ei o mafaufau a te tupu o Isalaelu ko Saulo me e mafai o fai a Tavita mo tupu i lō ia, ne “lamalama faeloa a Saulo ki a Tavita.” (1 Samuelu 18:​9, Tusi Paia Samoa) Ne maua ne te tupu se kilokiloga masei kae ne manako foki o tamate a Tavita. I lō te manavase malosi ki tulaga e pelā mo Saulo, e sili atu te ‵lei ke fai tatou e pelā mo Tavita. Faitalia te uke o faiga sē ‵tonu ne fai atu ki a ia, ne tumau eiloa te tamataene i te āva atu ki tino kolā ne filifili ne te Atua ke fai ne latou te takitakiga.​—Faitau te 1 Samuelu 26:23.

12. Se a te mea ka fesoasoani atu ki te ‵kaufakatasi o tino i loto i te fakapotopotoga?

¹² A te kese‵kese o manatu e mafai o pogai mai i ei a te ita o te suā tino ki te suā tino i loto i te fakapotopotoga​—ke oko foki ki toeaina. Kae e mafai o fesoasoani mai ki a tatou a te fakatakitakiga i te Tusi Tapu i te feitu tenei: “Ke mua o fakaasi atu te āva o te suā tino ki te suā tino” kae, “Sa fia ‵poto koutou.” (Loma 12:​10, 16) I lō te fai atu faeloa me ‵tonu tatou, e ‵tau o iloa ne tatou me e isi faeloa se isi auala aka e ‵lei atu ke ‵kilo atu ki se fakalavelave. Kafai e taumafai tatou ke malamalama i manatu o nisi tino, ko fesoasoani atu eiloa tatou ke fakatumau a te ‵kaufakatasi o te fakapotopotoga.​—Filipi 4:5.

13. Se a te mea e ‵tau o fai māfai ko oti ne fakaasi atu ne tatou se manatu, kae se a te fakaakoakoga i te Tusi Tapu e fakaasi mai i ei a te mea e ‵tau o fai ne tatou?

¹³ E mata, e fakauiga i ei me se mea ‵se a te fakaasi atu o se manatu māfai e lavea ne tatou se mea telā e manakogina ke fakatonu aka i loto i te fakapotopotoga? Ikai. I te senitenali muamua, ne sae aka se mea telā ne lasi te kinauga ki ei. Ne fai ne taina “ke uga atu a Paulo, Panapa mo nisi o latou ki te kau apositolo mo toeaina i Ielusalema e uiga ki te kinauga tenei.” (Galuega 15:2) E mautinoa ‵lei me e isi eiloa ne manatu o taina konā e uiga ki te mataupu mo te mea ‵lei telā e ‵tau o fai ki ei. E ui i ei, i te taimi e fakaasi atu ei ne tino taki tokotasi a tena manatu kae fai a te ikuga mai lalo i te takitakiga a te agaga, ne seki toe avaka ne taina olotou manatu totino. Mai tua o te okoatuga o te tusi fakatasi mo te ikuga ki fakapotopotoga, “fia‵fia ei latou ona ko pati fakamalosi ne maua mai i ei” kae ne “‵mautakitaki a te fakatuanaki” o latou. (Galuega 15:31; 16:​4, 5) E penā foki i aso nei, kafai e fakaasi atu ne tatou ki te kau toeaina se mea telā e manava‵se tatou ki ei, e ‵tau o tali‵tonu tatou me ka ‵saga tonu atu latou ki ei kae mafau‵fau me se a te mea e ‵tau o fai ki ei.

FAKAASI ATU SE KILOKILOGA TONU I FESOKOTAKIGA TOTINO MO NISI TINO

14. E mafai pefea o fakaasi atu ne tatou se kilokiloga tonu i ‵tou fesokotakiga mo nisi tino.

¹⁴ I ‵tou fesokotaki atu ki nisi tino, e uke ‵ki avanoaga e maua ne tatou ke fakaasi atu se kilokiloga tonu. E uke a mea ‵lei e mafai o fai ne tatou taki tokotasi māfai e fakaasi atu ne tatou se loto fakamagalo māfai e fai mai ne nisi tino se mea e ita ei tatou. E fai mai te Muna a te Atua: “Ke fakatau fa‵ki faeloa koutou i a koutou eiloa kae fakatau fakamagalo atu te suā tino ki te suā tino māfai e isi se pogai e fameo ei se tino ki te suā tino. E pelā eiloa mo te fakamagaloga o koutou ne Ieova, e ‵tau foki mo koutou o fai penā.” (Kolose 3:13) E fakaasi mai i te tugāpati “māfai e isi se pogai e fameo ei se tino ki te suā tino” me e isi ne pogai ‵lei ke ita tatou ki nisi tino i nisi taimi. E ui i ei, i lō te saga malosi atu ki vāivāiga o nisi tino kae fakamakosu i ei a te filemu o te fakapotopotoga, e ‵tau o taumafai malosi tatou o fakaakoako atu ki a Ieova mai te loto fia‵fia o fakamagalo ‵tou taina kae tumau i te tavini fakatasi mo latou.

15. (a) Ne a mea e mafai o tauloto ne tatou e uiga ki te loto fakamagalo mai i a Iopu? (e) E fesoasoani mai pefea te faiga o ‵talo ke fakaasi atu se kilokiloga tonu?

¹⁵ E mafai ne tatou o tauloto mai i a Iopu e uiga ki te loto fakamagalo. Ne fai atu ne tāgata e tokotolu kolā ne ‵tau o fakamafanafana atu ki a ia a pati sē a‵lofa e uke ki a ia. Kae tigā te feitu tenā, ne loto fakamagalo eiloa a Iopu. E pefea la? Ne “talo a Iopu mō ona taugasoa.” (Iopu 16:2; 42:10) A te ‵talo atu mō nisi tino e mafai o ‵fuli i ei ‵tou faifaiga e fai ki a latou. A te ‵talo atu mō ‵tou taina mo tuagane katoa e fesoasoani mai ke ati aka ne tatou se kilokiloga e pelā mo te kilokiloga a Keliso. (Ioane 13:​34, 35) E ‵tau foki o ‵talo atu tatou mō te agaga tapu. (Luka 11:13) Ka fesoasoani mai te agaga o te Atua ke fakaasi atu ne tatou a uiga tonu o te Kelisiano i ‵tou faiga e fai ki nisi tino.​—Faitau te Kalatia 5:​22, 23.

A TAU KILOKILOGA ‵LEI E AOGA KI TE FAKAPOTOPOTOGA KĀTOA

16, 17. E uiga ki ‘te agaga telā e fakaasi atu ne tatou,’ se a te mea e fakaiku aka ne koe ke fai?

¹⁶ Ka maua eiloa ne te fakapotopotoga kātoa a ikuga fakafiafia māfai e taumafai a tino taki tokotasi o fakatumau se kilokiloga ‵lei i loto i te fakapotopotoga! Mai tua o te mafaufauga ki mea konei, kāti ko fakaiku aka ne tatou me e mafai eiloa o fakaasi atu ne tatou se kilokiloga e tai ‵lei atu kae fakamalosi loto. Kafai e penā, ke na talia te Muna a te Atua ke fakaasi atu ki a koe te auala e mafai ei ne koe o fai a ‵fuliga. (Epelu 4:12) Ne fai mai a Paulo telā ne manako ke fai mo fai se fakaakoakoga ‵lei i loto i te fakapotopotoga: “Me e se iloa ne au se mea masei e uiga ki a au. Kae e se fai ne te mea tenei ke amiotonu au, me i te tino telā e fakamasino ne ia au ko Ieova.”​—1 Kolinito 4:4.

¹⁷ I te taumafai o tatou o ga‵lue tasi mo te poto mai te lagi, mai te sē fakatāua malosi o tatou eiloa io me ko ‵tou tulaga, e mafai eiloa o fakatau fakamalosi te suā tino ki te suā tino ke fakatumau se kilokiloga ‵lei i loto i te fakapotopotoga. Kafai e vave o fakamagalo ne tatou a nisi tino kae mafaufau tonu e uiga ki a latou, ka maua eiloa ne tatou se fesokotakiga filemu mo ‵tou taina mo tuagane. (Filipi 4:8) I te fai ne tatou a mea konei, e tali‵tonu tatou me ka fia‵fia eiloa a Ieova mo Iesu ‘i te agaga telā e fakaasi atu ne tatou.’​—Filemoni 25.

[Ata i te itulau e 20]

E pokotia pefea a te auala e tali atu ei tatou ki polopolokiga i te mafaufau ‵loto ki te tulaga o Iesu?