Fakatumau A Te Agaga Tonu O Te Fakapotopotoga

“Ke ga‵lue tasi te alofa tauanoa o te Aliki ko Iesu Keliso mo te agaga telā e fakaasi mai ne koutou.”​—FILIPI 4:23.

E MAFAI PEFEA O FAKAMALOSI AKA NE TATOU SE AGAGA MALOSI ‵LEI I LOTO I TE FAKAPOTOPOTOGA . . .

i te taimi e ‵kaufakatasi ei mo ‵tou taina?

e auala i ‵tou toaga i te galuega talai?

e auala i te lipotiatuga o mea ‵se kae matagā?

1. Ne a pogai ne fakamālō atu ei ki fakapotopotoga i Filipi mo Tuatila?

NE MA‵TIVA i te feitu faka-te-foitino a Kelisiano kolā ne ‵nofo atu i Filipi i te senitenali muamua. Kae e tiga eiloa te feitu tenā, ne kaima‵lie latou kae fakaasi atu foki te alofa lasi ki olotou taina tali‵tonu. (Filipi 1:3-5, 9; 4:15, 16) I te fakaotiga o tena tusi fakaosofia ki a latou, ne tusi atu a te apositolo ko Paulo: “Ke ga‵lue tasi te alofa tauanoa o te Aliki ko Iesu Keliso mo te agaga telā e fakaasi mai ne koutou.” (Filipi 4:23) Ona ko te mea ne fakaasi mai foki se agaga tai ‵pau ne Kelisiano i Tuatila, ne fai atu ei a Iesu Keliso ki a latou: “E iloa ne au au mea ne fai, mo tou alofa, mo tou fakatuanaki mo tau taviniga mo tou kufaki, kae e uke atu au mea ne fai fakamuli nei i lō au mea ne fai i aso mua.”—Fakaasiga 2:19.

2. Se a te tusaga e fai ne tatou i te atiakaga o te agaga telā e fakaasi atu ne ‵tou fakapotopotoga?

² E fakaasi atu foki ne fakapotopotoga takitasi o Molimau a Ieova i aso nei se agaga penā io me se faifaiga fia pule. E lauiloa a nisi fakapotopotoga mai te fakaasiatuga o te agaga alofa. Kae ‵tu ‵kese eiloa te ‵lago mālō atu mo te loto finafinau o nisi fakapotopotoga ki te galuega talai o te Malo mo te fakatāua malosi o te taviniga tumau. Kafai e ati aka ne tatou taki tokotasi se agaga tonu, e fesoasoani atu tatou ki te ‵kaufakatasi o te fakapotopotoga kae fakalauefa atu i ei a tena gasolo ki mua i te feitu faka-te-agaga. (1 Kolinito 1:10) I te sua feitu, kafai e ati aka se agaga fakaatea e fesoasoani atu fua tatou ki te ‵numi i te feitu faka-te-agaga, se faifaiga pelā mo te vai mafanafana, ke oko foki eiloa ki te taliaga o mea ‵se e fai i loto i te fakapotopotoga. (1 Kolinito 5:1; Fakaasiga 3:15, 16) Se a te agaga e maua i tau fakapotopotoga? E mata, e mafai ne koe o fesoasoani atu i a koe eiloa ke fakamaluga aka te agaga tonu i te fakapotopotoga?

FAKAMALOSI AKA SE AGAGA TONU

3, 4. E mafai pefea ne tatou o ‘viki atu ki a [Ieova] i mua o te fakapotopotoga’?

³ Ne usu mai te fai-salamo penei: “Au e fakafetai ki a koe [Ieova] i mua o te fakapotopotoga o ou tino, e ‵viki atu foki au ki a koe i mua o latou katoa.” (Salamo 35:18) Ne seki taofi aka ne te fai-salamo a te ‵viki atu ki a Ieova i te taimi ne ‵nofo fakatasi ei a ia mo nisi tavini a te Atua. I fakatasiga a te fakapotopotoga i vaiaso katoa, e aofia i ei a te Sukesukega ki te Faleleoleo Maluga, e tuku mai i ei a avanoaga ‵gali ke fakaasi atu ne tatou a te loto finafinau māfai e fai ‵tou tali kae fakaasi atu i ei a te fakatuanaki. Kāti se mea ‵lei ke fesili ifo ki a tatou eiloa: ‘E mata, e fakaaoga katoatoa ne au a te tauliaga ke fai oku manatu i fakatasiga? E mata, e fakatoka faka‵lei au ki ei kae fai a tali aoga? E pelā me se ulu o te kāiga, e mata, e fesoasoani atu au ki aku tama‵liki ke fakatoka olotou tali kae akoako atu ke fai olotou tali i olotou pati eiloa?’

⁴ Ne tuku fakatasi ne te fai-salamo a te ‵mautakitaki o ‵tou loto mo te usuga o pese. “Te Atua, au e talitonu katoatoa ki a koe! Au ka usu pese atu o tavae ki a koe!” (Salamo 57:7) A pese kolā e fakaaoga i fakatasiga Kelisiano e tuku mai i ei ki a tatou se avanoaga ke “usu pese atu o tavae” ki a Ieova mo te loto e ‵mautakitaki. Kafai e se ‵mau tatou i nisi pese, kaia e se fakaakoako ei ki pese konā i te taimi e fai ei a Tapuakiga a Kāiga i afiafi? Ke na fakaiku aka ne tatou ‘ke pese atu ki te Aliki i ‵tou olaga kātoa; i aso katoa e ola ei au, ka tavae atu faeloa au ki toku Atua.’​—Salamo 104:33.

5, 6. Se a te auala e mafai ei o fai tatou e pelā me ne tino kaima‵lie kae uiga talimalo, kae se a te mea e fakamalosi aka i loto i te fakapotopotoga māfai e fai penā?

⁵ A te talimalo ‵lei ki ‵tou taina mo tuagane ko te suā auala ke fakamalosi aka ei a te agaga alofa i loto i te fakapotopotoga. I te ‵toe mataupu o tena tusi ki te kau Epelu, ne fakaaofia ne Paulo a te fakamalosiga tenei: “Ke na fakatumau te otou a‵lofa fakataina. Sa puli i a koutou te uiga talimalo.” (Epelu 13:1, 2) A te fakatokaga o se ‵kaiga ma ovasia faima‵laga mo olotou avaga io me ko tavini ga‵lue tumau i te fakapotopotoga se auala tafasili i te ‵lei ke fakaasi atu i ei a te uiga talimalo. Ke mafau‵fau foki ki fāfine ko ‵mate olotou avaga, kāiga kolā e taki tokotasi a mātua i ei, io me ko tino taki tokotasi kolā e mafai o maua ne latou a mea aoga mai te ‵kaufakatasi mo tatou i se ‵kaiga io me ko te tapuakig a te ‵tou kāiga.

⁶ Ne fakatonu atu a Paulo ki a Timoteo ke fakamalosi atu ki nisi tino “ke ga‵lue ki mea ‵lei, ke mau‵mea i te faiga o galuega ‵lei, ke kaima‵lie, ke toka o fetufaaki olotou mea, ko tausi ei mō latou eiloa se fakavae ‵lei i aso mai mua, ko te mea ke puke ‵mau latou ki te ola tonu.” (1 Timoteo 6:17-19) E fakamalosi mai a Paulo ke ati aka ne ana taina tapuaki a te agaga kaimalie. Ke oko foki eiloa ki tulaga faiga‵ta o te maumea, e mafai eiloa ne tatou o fakamaluga aka a te agaga kaimalie. A te auala ‵lei ke fai ei a te mea tenei ko te fesoasoani atu ki a latou kolā e seai ne mea fakatele‵tele i te taimi e olo ei i te galuega talai mo taimi o fakatasiga. Kae ne a mea e ‵tau o fai ne latou kolā e fakaasi atu ki ei a faifaiga o te alofa kaimalie? Ka fakamalosi aka ne latou a te agaga tonu i loto i te fakapotopotoga māfai e fakaasi atu ne latou a te loto fakafetai, kāti mai i te tuku atu o se mea e mafai ne latou o fesoasoani ke fakafoliki aka ei a te ‵togi ‵mafa o penitini. E se gata i ei, e mata, e se fakamalosi atu ki lagonaga o ‵tou taina mo tuagane faka-te-agaga me i a latou e manakogina kae alofagina māfai e fakatoka a taimi e lava ke fakatasitasi mo latou? Kafai e fai ne tatou a mea ‵lei “ki a latou kolā e kāiga tatou i te tapuakiga tonu” kae toka ke fakaaoga fakatasi ne tatou mo latou a ‵tou taimi mo mea kolā e maua ne tatou, e se fai fua i ei ke lasi te ‵tou a‵lofa ki a latou kae e fesoasoani atu foki ke ati aka se agaga tonu i loto i te fakapotopotoga.—Kalatia 6:10.

7. E fesoasoani atu pefea a te tausiga o mea ‵funa a nisi tino ke fakatumau aka ei se agaga ‵lei i loto i te fakapotopotoga?

⁷ Ke mafau‵fau foki ki nisi feitu kolā e fakamalosi aka ei a te alofa telā e fusi fakatasi ei a ‵tou taina tapuaki: te fai taugasoa mo te tausiga o mea ‵funa. (Faitau te Faataoto 18:24.) E tausi ne taugasoa ‵tonu a mea totino ke sē iloa ne te suā tino. Kafai e fakaasi mai ne ‵tou taina olotou mafaufauga mo lagonaga ‵loto ki a tatou kae tali‵tonu me ka seai eiloa se tino e iloa ne ia, ka gasolo aka eiloa o malosi atu a te fusi o te alofa telā ko leva ne maua ne tatou. Ke na fakamalosi aka ne tatou se agaga alofa, e pelā me se kāiga i loto i fakapotopotoga e auala i te fai mo fai se taugasoa fakatuagagina telā e mafai o tausi ne ia a mea ‵funa.—Faataoto 20:19.

KE LOTO FINAFINAU I TE GALUEGA TALAI

8. Se a te polopolokiga ne maua ne te kau Laotikaia, kae kaia?

⁸ I te taimi ne faipati ei e uiga ki te fakapotopotoga i Laotikaia, muna a Iesu: “E iloa ne au au mea ne fai, me i a koe e se ‵moko kae e se ‵vela foki. Au e manako ke na ‵moko io me ke na ‵vela koe. Tela la, ka luaki atu ne au a koe mai i toku gutu me i a koe e mafanafana fua, e se ‵vela kae e se ‵moko foki.” (Fakaasiga 3:15, 16) Ne seki lava te loto finafinau o te kau Laotikaia ki te galuega faka-Kelisiano. Ne pokotia foki olotou fesokotakiga totino ona ko vaegā faifaiga konā. Tela la, ne polopoloki atu a Iesu mo te alofa: “E polopoloki kae fakasala foki ne au a tino katoa kolā e alofa au ki ei. Tela la, ke na loto finafinau koutou kae sala‵mo.”—Fakaasiga 3:19.

9. E pokotia pefea a te agaga o te fakapotopotoga i ‵tou faifaiga e uiga ki te galuega talai?

⁹ Ko te mea ke tai fakamalosi aka se agaga tonu kae malosi ‵lei i loto i te fakapotopotoga, e ‵tau mo tatou o ‵saga tonu kae loto finafinau i te galuega talai. Ne fakatoka a te fakapotopotoga mō te galuega ki te ‵salaga o tino taki tokotasi e pelā me ne mamoe i te koga talai kae ke puti aka latou i te feitu faka-te-agaga. Tela la, e ‵tau o safe te matagi i te olo atu o tatou o fai a soko e pelā mo te mea ne fai ne Iesu. (Mataio 28:19, 20; Luka 4:43) Ko te lasi o ‵tou loto finafinau mō te galuega talai, ko te momea aka foki o te ‵kaufakatasi o tatou e pelā me “e ga‵lue fakatasi mo te Atua.” (1 Kolinito 3:9) Kafai e ‵kilo atu tatou ki nisi tino kolā e olo i te galuega talai e puipui ne latou te lotou fakatuanaki kae fakaasi atu te loto fakafetai ki mea faka-te-agaga, e fakaosofia ei tatou ke a‵lofa kae āva malosi atu ki a latou. E penā foki loa, a te ga‵lue “tuauma ki tuauma” i te galuega talai e maua mai i ei a te agaga ‵kaufakatasi i loto i te fakapotopotoga.—Faitau te Sefanaia 3:9, NW.

10. E aoga pefea ki nisi tino i loto i te fakapotopotoga a ‵tou taumafaiga ke tai ‵lei atu te ‵tou galuega talai?

¹⁰ A ‵tou taumfaiga ke tai ‵lei atu te ‵tou galuega talai e aoga foki ki nisi tino. Kafai e ‵saga tonu atu tatou ki tino kolā e fetaui mo tatou kae taumafai ke momea aka te apo o tatou i te fakaokoatuga o mea ki loto o ‵tou tino fakalogo‵logo, ka gasolo aka eiloa ki luga a ‵tou loto finafinau mō te galuega talai. (Mataio 9:36, 37) E mafai eiloa o oko atu a te loto finafinau ki ‵tou taugasoa. Ne uga atu ne Iesu ana soko ke olo taki tokolua o talai i lō te olo taki tokotasi. (Luka 10:1) E se tuku mai fua i te faiga tenei a fakamalosiga mo akoakoga kae e fakamalosi aka foki i ei a te loto finafinau o latou i te galuega talai. E mata, e se fia‵fia tatou o ga‵lue fakatasi mo tino talai loto finafinau o te Malo? E fakama‵losi aka tatou ne te lotou loto finafinau ke ‵kau atu ki te galuega talai.—Loma 1:12.

FAKAETEETE I TE MUIMUI MO TE FAIGA O MEA ‵SE

11. Se a te vaegā uiga ne ati aka ne nisi tino Isalaelu i aso o Mose, kae se a te ikuga ne maua ne latou mai i ei?

¹¹ I loto fua i ne nāi vaiaso ne fai ei latou e pelā me se fenua fou, ne kamata ei a tino Isalaelu o mui‵mui kae fa‵meo. Ne iku atu i ei ki te ‵teke atu ki a Ieova mo ana sui. (Esoto 16:1, 2) E mu‵tana fua a tino Isalaelu kolā ne tiakina ne latou a Aikupito ne ola ke lavea ne latou a te Fenua o te Folafolaga. Ke oko foki eiloa ki a Mose, e seki talia ke ulu atu ki loto i te fenua tenā ona ko ana faifaiga ne fai ki amioga sē ‵lei o te fakapotopotoga o Isalaelu! (Teutelonome 32:48-52) Ne a mea e mafai o fai ne tatou i aso nei ke mo a e ‵to atu tatou ki fakamalosiga ma‵sei?

12. E mafai pefea o fakaeteete tatou i te atiakaga o te uiga tenei ko te fameo?

¹² E ‵tau o fakaeteete tatou ke mo a e ati aka se uiga muimui. E tiga eiloa e fesoasoani mai ki a tatou a te atiakaga o te loto maulalo mo te āva ki tino pule, e manakogina foki ke ‵saga tonu atu tatou ki tino kolā e fai taugasoa tatou ki ei. Ka maua eiloa ne tatou a ikuga sē ‵lei māfai e se ‵lei a te filifiliga o fakafiafiaga io me ko tō uke a taimi e fakamāumāu ki tino kolā e ga‵lue tasi mo tatou io me ko taugasoa i te akoga kolā e se āva ki fakatakitakiga amio‵tonu. Ka ‵poto eiloa tatou māfai e fakatapulā a ‵tou fesokotakiga mo tino kolā e ‵kese olotou kilokiloga io me kolā e fakamaluga aka a te uiga fia tutokotasi.—Faataoto 13:20.

13. Ne a nisi fakamaseiga faka-te-agaga i loto i te fakapotopotoga e mafai o maua mai fakamalosiga ma‵sei o te loto muimui?

¹³ A fakamalosiga ma‵sei o te loto muimui e mafai o iku atu ki nisi fakamaseiga i te feitu faka-te-agaga. E pelā me se fakaakoakoga,e mafai ne te muimui o fakamakosu a te ‵kaufakatasi mo te filemu o te fakapotopotoga. E se gata i ei, a te fakaasi atu o ‵tou fameo ki ‵tou taina talitonu e se faka‵mae atu fua ki a latou kae mafai foki o fai a te agasala ko te gutu fatufatu mo te takalialia. (Levitiko 19:16; 1 Kolinito 5:11) A nisi tino mui‵mui o te fakapotopotoga i te senitenali muamua ne “takalia‵lia ki pulega kae muna ma‵sei ne latou a tino ‵malu.” (Iuta 8, 16) E manino ‵lei me ka sē talia ne te Atua se vaegā muimuiga ‵teke penā ki luga i tāgata tofia i loto i te fakapotopotoga.

14, 15. (a) Se a te mea ka pokotia i ei a te fakapotopotoga kātoa māfai e tumau eiloa te sē ‵saga atu ki mea ‵se? (e) Se a te mea e ‵tau o fai ne tatou māfai e iloa aka ne tatou me isi se tino e aofia i se agasala ‵funa?

¹⁴ E a māfai e iloa aka ne tatou me isi se tino ko aofia i se agasala ‵funa, kāti ko fakaaoga ‵se a meainu ma‵losi, e onoono ki ata ma‵sei, io me ola i se olaga fai amioga sē ‵tau? (Efeso 5:11, 12) A te sē ‵saga atu o tatou ki mea ‵se matagā, e mafai o faka‵lave ne ia a te galue ‵lei o te agaga tapu o Ieova kae fakamakosu foki i ei a te filemu o te fakapotopotoga. (Kalatia 5:19-23) E pelā mo te tapalega o mea ma‵sei ne Kelisiano mua i Kolinito, e ‵tau foki o tapale kea‵tea mai loto i te fakapotopotoga i aso nei so se fakamalosiga masei ko te mea ke fakatumau a te agaga malosi kae tonu i ei. Ne a mea e mafai o fai ne koe ke ‵lago atu ki te filemu o te fakapotopotoga?

¹⁵ E pelā mo te fakailoaatuga muamua, se mea tāua ke fakatumau a te tausi atu ki mea ‵funa e uiga ki nāi mea, kae maise loa māfai e fakaasi mai ne nisi tino a olotou lagonaga mo mafaufauga. Ko oko eiloa i te ‵se mo te faka‵mae loto māfai e faipati atu ne koe a mea ‵funa e uiga ki se tino! Kafai foki ko oti ne fai se agasala matagā, e ‵tau o fakailoa atu ki toeaina i loto i te fakapotopotoga—ko latou kolā ko oti ne ‵tofi aka ke fakatoka a mea e ‵tusa mo tulaga o te Tusi Tapu. (Faitau te Levitiko 5:1.) Tela la, kafai e iloa ne tatou me e isi se taina io me se tuagane ko fai ne ia se mea ‵se penā, e ‵tau o fakamalosi atu tatou ki ei ke fano ki toeaina ke maua ne ia se fesoasoani mai i a latou. (Iakopo 5:13-15) Kafai e se gasuesue tou tagata io me ko tou fafine i loto i te vaitaimi ne tuku atu ki ei, ke lipoti la ne tatou a te mea ‵se tenā.

16. E fesoasoani atu pefea a te lipotiga o mea ‵se kae matagā ki te fakatumauga o te agaga o te fakapotopotoga?

¹⁶ A te fakapotopotoga Kelisiano se koga faka-te-agaga, tela la, e ‵tau o puipui ne tatou mai te lipoti atu o mea ‵se matagā kolā e fai. Kafai ne fesoasoani atu a toeaina ki te tino agasala ke lavea ne ia a tena mea ne fai kae talia ne ia mo te loto salamō a polopolokiga mo fakatonutonuga, ka sē toe fai a ia mo mea fakamataku ki te agaga o te fakapotopotoga. Kae e a māfai e se salamō a te tino telā ne fai ne ia se agasala matagā kae sē talia ne ia a polopolokiga a‵lofa a toeaina? A tena fakatea mai te fakapotopotoga e iku atu ki “te fakaseaiga” io me ko te tapalega o te mea masei mai i a tatou kae fakatumau i ei a te agaga o te fakapotopotoga. (Faitau te 1 Kolinito 5:5.) Ao, a te fakatumauga o te agaga o te fakapotopotoga e manakogina ko tatou taki tokotasi ke gasue‵sue faka‵lei, ga‵lue fakatasi mo te potukau o toeaina, kae puipui a te ola ‵lei o taina tali‵tonu.

FAKAMALOSI AKA A “TE TASI O TE AGAGA”

17, 18. Se a te mea ka fesoasoani mai ke fakatumau ne tatou a “te tasi o te agaga”?

¹⁷ E auala i “te ‵saga tonu atu ki akoakoga a te kau apositolo,” ne fesoasoani atu a soko mua o Iesu ki te atiakaga o te agaga o te ‵kaufakatasi i loto i te fakapotopotoga. (Galuega 2:42) Ne fakatāua ne latou a polopolokiga mo fakatakitakiga faka-te-Tusi Tapu kolā ne maua mai i tāgata ma‵tua. E fakamalosi atu kae fesoasoani atu ki tino katoa i loto i te fakapotopotoga ke tumau i te ‵kaufakatasi ona ko te ga‵lue fakatasi o toeaina i aso nei mo te potukau o te tavini fakamaoni kae poto. (1 Kolinito 1:10) Kafai e faka‵logo tatou ki fakatonuga faka-te-Tusi Tapu kolā e maua mai te fakapotopotoga a Ieova kae tau‵tali i fakatakitakiga a toeaina, e fakatalitonu atu i ei ne tatou a te ‵tou “taumafai malosi ke fakatumau . . . te tasi o te agaga telā ko te fusi o te filemu.”—Efeso 4:3.

¹⁸ Tela la, ke na ga‵lue nei tatou ke fakatumau se agaga tonu kae malosi ‵lei i loto i te fakapotopotoga. Kafai e fai ne tatou penā, ka fakatalitonu aka ne tatou me e ‘ga‵lue tasi te alofa tauanoa o te Aliki ko Iesu Keliso mo te agaga telā e fakaasi mai ne koutou.’—Filipi 4:23.

[Ata i te itulau e 24]

E mata, e fesoasoani atu koe ki te fakatumauga o se agaga tonu mai te fakatokaga o tali aoga?

[Ata i te itulau e 25]

Fesoasoani atu ke fakatumau se agaga tonu e auala i te fakamasani ki ‵tou pese