Tauloto Mai Te Muna A Te Atua

E Mata, ka Aumai ne te Atua se Malo ke Pule ki te Lalolagi Kātoa?

E mafaufau a te mataupu tenei ki fesili kolā ne faka‵sae aka ne koe kae fakaasi atu a te koga e mafai ei koe o faitau ki tali i loto i tau Tusi Tapu. Ka fia‵fia eiloa a Molimau a Ieova o sau‵tala fakatasi mo koe ki tali konei.

1. Kaia e ma‵nako ei a tino ki se malo ke pule ki te lalolagi?

A fakalavelave o tino i aso nei ko salalau i te lalolagi kātoa. I nisi atufenua, a te tokoukega o tino e ma‵tiva kae ola fi‵ta. I nisi koga, e maua ne tino e tokouke a mea e uke atu i te mea e manakogina ne latou. Ko te malo fua telā e pule ki te lalolagi e mafai o vaevae faka‵lei ne ia a mea e maua mai i te lalolagi.​—Faitau te Failauga 4:1; 8:9.

2. Ko oi e mafai o fakatalitonugina ke fai mo malo pule ki te lalolagi?

A te manatu e uiga ki se tino pule i te lalolagi e se taliagofie me e seai se tagata io me se fafine e mafai o fai faka‵lei ne ia a te galuega. E seai se tino e mafai o talia ne tino katoa. E se gata i ei, ko oi e mafai o fakamaoni i te taimi e maua ei te malosi pule? E fakamataku a te mafaufauga ke pule se tino pule fakasaua ki tino katoa.​—Faitau te Faataoto 29:2; Ielemia 10:23.

Ko oti ne filifili ne Ieova te Atua a tena Tama, ko Iesu ke pule ki luga i tino ki te se-gata-mai. (Luka 1:​32, 33) Ko oti ne ola a Iesu i te lalolagi. I tena nofoga i konei, ne faka‵lei ne ia a tino ma‵saki, akoako a tino loto mau‵lalo, kae fakaavanoa a taimi o ‵nofo fakatasi mo tamaliki. (Maleko 1:​40-42; 6:34; 10:​13-16) Tela la, a Iesu ko te ‵toe Pule ‵lei.​—Faitau te Ioane 1:14.

3. E mafai eiloa ne se malo faka-te-lalolagi o pule mai ki te lalolagi?

Ko oti ne filifili ne te Atua ke pule mai tena Tama mai te lagi ki te lalolagi. (Tanielu 7:​13, 14) E pelā mo te tino pule e se ‵tau o nofo atu i fa‵kai katoa kolā e pule atu a ia ki ei, e se ‵tau foki o nofo tonu mai a Iesu i te lalolagi ko te mea ke pule mai ki tino.​—Faitau te Mataio 8:​5-9, 13.

E mata, ka talia ne tino katoa a Iesu e pelā me se Pule? Ikai. Ko tino fua kolā e fia‵fia ki te mea ‵lei ka talia ne latou a ia. Ka ‵fulu faka‵ma ne Ieova a te lalolagi o tino kolā e ‵teke ki te Pule alofa kae amiotonu telā ne filifili ne ia.​—Faitau te Mataio 25:​31-33, 46.

4. Ne a mea ka fai ne te Pule o te lalolagi?

E pelā mo te tausi mamoe e fakamaopoopo ana mamoe, ko leva ne fakamaopoopo ne Iesu a tino loto mau‵lalo mai i atufenua katoa kae akoako latou ki auala a‵lofa o te Atua. (Ioane 10:16; 13:34) Ka ‵lago atu mo te loto finafinau a vaegā tino penā ki a Iesu mo tena pulega. (Salamo 72:8; Mataio 4:​19, 20) E ‵kau fakatasi a tino a‵lofa fakamaoni ki a Iesu i te lalolagi kātoa o folafola atu me i a Iesu ko oti ne fai mo fai te Tupu.​—Faitau te Mataio 24:14.

Ko pili fua o gasuesue a Iesu o fakasaoloto a tino mai malo sē fakamaoni. Ko oti ne filifili ne ia ana nisi soko a‵lofa fakamaoni ke pule fakatasi mo ia e pelā me ne tupu ki luga i te lalolagi. (Tanielu 2:44; 7:27) Ka faka‵fonu ne te Malo o Iesu a te lalolagi ki te iloaga e uiga ki a Ieova kae fakatu aka a te palataiso telā ne galo i te kamataga o te tala fakasolopito o tino.​—Faitau te Isaia 11:​3, 9; Mataio 19:28.

[Ata i te itulau e 11]

Ke maua a fakamatalaga e uke atu, onoono ki te mataupu e 8 o te tusi tenei, Ne a Mea e Akoako ‵Tonu Mai i Te Tusi Tapu?, telā ne ‵lomi ne Molimau a Ieova.