Te Gataga o te Lalolagi e Fakamataku, Fakafiafia Kae Fakafi‵ta

E pefea ou lagonaga e uiga ki te po 21 o Tesema 2012, telā e fai mai te tokoukega o tino me ka mafuli i ei a te lalolagi kātoa? E ‵tusa mo te mea telā ne fakamoemoe koe ki ei, e mafai o tō tau nofo, fanoanoa io me fi‵ta koe me seki ai se mea ne tupu. E mata, a te mea tenei se suā mau sē tonu e uiga ki te gataga o te lalolagi?

Kae pefea la “te gataga o te lalolagi” telā e fakamatala mai i te Tusi Tapu? (Mataio 24:3, Tusi Tapu, Tuvalu) E ma‵taku a nisi tino me ka ‵sunu a te lalolagi ki te afi. A nisi tino e fia lavea ne latou a mea ka ‵tupu i te gataga o te lalolagi. A ko nisi tino ko fi‵ta i te faitali ke na oko mai te gataga. Kae e mata, ne māfua aka a lagonaga o tino konei ona ko mau sē ‵tonu, i lō te mea tonu?

Kāti ka poi koe i pati a te Tusi Tapu e uiga ki te gataga o te lalolagi. E se fakaasi mai fua i te Tusi Tapu a pogai ke olioli ei tatou ke oko mai te gataga, kae e fakailoa mai foki ki a tatou a te fi‵ta e mafai o maua māfai e fui oko mai te gataga. E ‵kami ne matou koe ke iloilo aka ne koe a tali mai te Tusi Tapu ki nisi fesili masani e uiga ki te gataga o te lalolagi.

E mata, ka ‵sunu a te lalolagi ki te afi?

TE TALI MAI TE TUSI TAPU: “Ne fakatu ne [te Atua] te lalolagi ke ‵mautakitaki i luga i ona fakavae, ko te mea ke se toe gasuesue.”​—SALAMO 104:5.

Ka sē fakaseai atu a te lalolagi tenei i se afi io me i se isi auala aka. I lō te fai penā, e akoako mai te Tusi Tapu me i te paneta tenei ko te fale o tino katoa ki te se-gata-mai.​—Salamo 115:16; Isaia 45:18.

I te otiga ne faite ne te Atua a te lalolagi, ne “fiafia malosi” eiloa a ia ki ei, kae konā eiloa ana lagonaga ke oko mai ki te taimi nei. (Kenese 1:31) I lō te mafaufau ke fakaseai ne ia te lalolagi, ne tauto mai a ia ke “fakaseai atu . . . a latou kolā e fakama‵sei ne latou te lalolagi” kae puipui ke mo a e fakaseai katoatoa atu.​—Fakaasiga 11:18.

Kāti ka mafaufau koe e uiga ki te 2 Petelu 3:7. E fai mai te fuaiupu tenā i te Tusi Tapu Tuvalu, penei: “Ka ko te lagi mo te lalolagi konei e iai nei e se tumau eiloa, e ‵sunu ki te afi.” E a, e se fakaasi mai i te fuaiupu tenei me ka ‵sunu eiloa a te lalolagi ki te afi? A te tonuga loa, e fakaaoga sale i te Tusi Tapu a pati ko “lagi,” “lalolagi,” mo te “afi” i se auala fakatusa, e pelā me ne fakailoga. E pelā me se fakaakoakoga, e fai mai te Salamo 96:1, penei: “Usu pese atu ki te Aliki, koutou te lalolagi kātoa,” e fakaaoga i konei te pati “lalolagi” ke fakauiga i ei ki se fakapotopotoga o tino.

E fakaasi mai i te fuaiupu kātoa o te 2 Petelu 3:7 me i lagi, lalolagi mo te afi kolā e ‵sae mai i ei e fai pelā me ne fakailoga. E fakaasi mai i te fuaiupu e 5 mo te 6 se mea tai ‵pau mo te Lolo i aso o Noa. I te taimi tenā, ne fakaseai atu i ei a te lalolagi mua, kae ko ‵tou paneta ne seki galo atu. I lo te fai penā, ne fakamasei i te taimi o te Lolo a tino fakasaua, io me ko te “lalolagi.” Ne fakaseai atu foki i ei a “lagi”​—ko tino kolā ne pule atu ki te lalolagi o tino. (Kenese 6:11) I te auala foki eiloa tenā, ne ‵valo mai i te 2 Petelu 3:7 a te fakaseaiga sē-gata-mai o tino ma‵sei mo olotou malo faivalevale e pelā eiloa me ko fakaseai atu i se afi.

Ne a mea ka ‵tupu i te gataga o te lalolagi?

TE TALI MAI TE TUSI TAPU: “A te lalolagi mo mea katoa i ei kolā e ma‵nako ki ei a tino e palele atu katoa; ka ko te tino telā e fai ne ia a te mea e loto ki ei a te Atua e ola ki te se-gata-mai.”​—1 IOANE 2:17, Tusi Tapu, Tuvalu.

A “te lalolagi” telā ka fakaseai atu e se ko te paneta tenei, kae ko tino katoa i te lalolagi kolā e se ola e ‵tusa mo te loto o te Atua. E pelā eiloa me se tokita tipitipi telā e tapale keatea ne ia se vaega o te foitino telā e maua ne te kenisa, ko te mea ke mafai o ola te tino masaki, e penā foki te Atua, ka “afuli keatea” ne ia a tino amio ma‵sei ko te mea ke mafai o ola a tino ‵lei mo te fia‵fia i te lalolagi. (Salamo 37:9) Ona ko te mea tenā, e fai ei a “te gataga o te lalolagi” e pelā me se mea ‵lei.

E lavea atu a te kilokiloga ‵lei tenei e uiga ki “te gataga o te lalolagi” e auala i ‵fuliga i te Tusi Tapu telā e ‵fuli ei a te tugapati tenei, “te gataga o te olaga,” io me ko “te gataga o te kautama tenei.” (Mataio 24:3; New International Version) Ona ko te mea ka ‵sao atu i te gataga a nisi tino e pelā foki mo te lalolagi, e a, e se fakaasi mai ei me ka isi eiloa se kautama fou, mo se olaga fou telā ka ‵tao mai tua? A te tali a te Tusi Tapu ko te ‘ao,’ me e faipati eiloa ki “te ola se gata mai i aso mai mua.”​—Luka 18:30, Tusi Tapu, Tuvalu.

Ne taku ne Iesu a te vaitaimi i aso mai mua tenā ko “te fakafouga o mea.” I te taimi tenā ka toe fakafoki ne ia te olaga o tino ki te tulaga telā ne manako te Atua ki ei i te kamataga. (Mataio 19:28, NIV) Ka maua ei ne tatou

• A te lalolagi palataiso telā e tokagamalie kae filemu. ​—Isaia 35:1; Mika 4:4.

• A galuega aoga kae fakamalie loto.​—Isaia 65:21-23.

• Te faka‵leiga o masaki katoa.​—Isaia 33:24.

• Te malosi fakatalavou.​—Iopu 33:25.

• Te faka‵tuakaga o tino ‵mate.​—Ioane 5:28, 29.

Kafai e fai ne tatou a te mea telā e “loto ki ei a te Atua,” ko mea kolā e fakamolemole mai a ia ke fai ne tatou, ko se ‵tau ei o ma‵taku tatou ki te gataga o te lalolagi. I lō te fai penā, e olioli eiloa tatou ki ei.

E mata, ko pili ‵ki mai te gataga o te lalolagi?

TE TALI MAI TE TUSI TAPU: “Kafai ko lavea ne koutou a mea konei ko oko mai, ko iloa ei ne koutou me ko pili mai te Malo o te Atua.”​—LUKA 21:31.

I tena tusi ko The Last Days Are Here Again, e tusi mai a te Professor Richard Kyle me “ona ko te uke o ‵fuliga o mea e ‵tupu mo fakalavelave i te lalolagi, e fai ei pelā me se fakamaoniga me e ‵tonu eiloa a mau e uiga ki te gataga o te lalolagi.” E fai penā me ko se mafai ne tino o fakamatala aka te pogai ko uke ei a ‵fuliga mo mea e ‵tupu i te lalolagi.

E ui i ei, ne seki fakaiku aka ne pelofeta i loto i te Tusi Tapu ke fakamatala mai ne latou a te pogai ne ‵tupu ei a mea ma‵sei i olotou aso. I lō te fai penā, ne fakamalosi aka latou ne te agaga o te Atua ke fakamatala mai ne latou a tulaga o te lalolagi kolā e fakaasi mai ei te pili mai o te gataga o te lalolagi. Ke mafaufau ki nai valoaga konā, kae ke fakaiku aka ne koe me ko fakataunu nei a mea konā i ‵tou aso nei io me ikai.

• Taua, oge meakai, mafuie mo masaki ‵pisi kolā e ‵mate ei a tino.​—Mataio 24:7; Luka 21:11.

• Te gasolo aka o amioga solitulafono.​—Mataio 24:12.

• Te fakamaseiga o te lalolagi ne tino.​—Fakaasiga 11:18.

• Tino kolā e a‵lofa ki a latou eiloa, tupe, mo fakafiafiaga kae sē a‵lofa ki te Atua.​—2 Timoteo 3:2, 4.

• Te mavae‵vae o te kāiga. ​—2 Timoteo 3:2, 3.

• Te se fia ‵saga atu ki fakamaoniga o te pili mai o te gataga.​—Mataio 24:37-39.

• Te talaiga o te tala ‵lei o te Malo o te Atua ki te lalolagi kātoa.​—Mataio 24:14.

Ne fai mai a Iesu penei, kafai ko lavea ne koutou a “mea katoa konei” e fakaasi mai ei ki a tatou me ko pili mai a te gataga o te lalolagi. (Mataio 24:33) E tali‵tonu Molimau a Ieova me e ‵tonu eiloa a fakamaoniga konā, kae fakaasi atu ne latou te lotou fakatuanaki ki nisi tino e auala i te talaiga o te tala ‵lei i atufenua e 236.

E mata, e fakaasi mai ne mau sē ‵tonu e uiga ki te gataga me ka se oko mai eiloa te gataga?

TE TALI MAI TE TUSI TAPU: “Ko te taimi eiloa e fai mai ei latou penei: ‘Ko filemu kae tokagamalie!’ ko te taimi foki eiloa tenā e oko fakapoi atu ei te lotou fakaseaiga e pelā eiloa mo te ‵mae o te fafine fanau. E se mafai lele eiloa o ‵sao latou.”​—1 TESALONIA 5:3.

E faka‵pau ne te Tusi Tapu a te fakamaseiga o te lalolagi ki te ‵mae o se fafine faitama telā ko pili o fanau​—e oko mai eiloa kae oko fakapoi mai foki. A te vaitaimi mai mua o te gataga e ‵pau eiloa mo te fafine faitama telā e iloa ne ia a fakailoga māfai ko pili a ia o fanau. E mafai o fakatautau aka ne tena tokita a te po masina ka fanau ei a ia, kae kafai e tuai a ia o fanau kae e mautinoa eiloa i a ia me ko pili eiloa o fanau tena pepe. E penā foki loa mo mau sē ‵tonu e uiga ki te gataga, e se mafai o ‵fuli ne latou a fakailoga me ko ‵nofo eiloa tatou i “aso fakaoti.”—2 Timoteo 3:1.

‘Kafai ko lavea faka‵lei ne tatou a fakailoga me ko ‵nofo tatou i te gataga,’ e mafai o fesili ifo koe penei, ‘kaia e se lavea ei ne tino e tokouke a fakailoga konei?’ E fakaasi mai i te Tusi Tapu, me kafai ko pili mai te gataga, e tokouke a tino ka manatu ma‵ma ki fakamaoniga konā. I lō te tali‵tonu latou ki ‵fuliga kolā ko lavea ne latou i aso fakaoti, e fakatauemu mai latou, penei: “Mai te taimi ne ‵moe ei a ‵tou tupuga i te mate, e seai eiloa se ‵fuliga ne lavea atu ki mea katoa talu mai te taimi ne kamata ei o faite a mea.” (2 Petelu 3:3, 4) I nisi tugapati, ko lavea ‵lei atu a fakailoga o aso fakaoti, kae e se fia ‵saga atu ki ei a tino e tokouke.​—Mataio 24:38, 39.

Ne faipati a te mataupu tenei ki nisi fakamaoniga mai te Tusi Tapu me ko pili mai eiloa te gataga.a E fia iloa ne koe a mea tai uke atu? Kafai e penā loa, ke fesokotaki atu ki Molimau a Ieova kae ke talia ne koe ke fai sau akoga faka-te-Tusi Tapu sē ‵togi. E mafai eiloa o fai a akoga penā i tou fale, i se isi koga telā e ‵lei ki a koe, io me i luga i te telefoni. A te mea fua telā e manakogina mai i a koe ko tou taimi, a ko mea aoga kolā ka maua ne koe mai i ei e tāua ‵ki eiloa.