Ko Oti ne Tali Aka a Fesili e fa e Uiga ki te Gataga

KO OTI ne ‵valo mai ne Iesu Keliso me ka ‘oko mai te gataga’ i se vaitaimi pili mai mua nei. E uiga ki te taimi tenā, ne fai mai a ia: “Me i te fakalavelave e tupu i te taimi tenā, e tafa sili i te masei i fakalavelave katoa ko oti ne ‵tupu mai i te kamataga o te lalolagi, ke oko mai eiloa ki te aso tenā.”​—Mataio 24:14, 21.

A fakamatalaga a Iesu e uiga ki te gataga, fakatasi mo fuaiupu i te Tusi Tapu e uiga ki te mataupu tenei, e ‵sae aka i ei a nāi fesili tāua konei. Kaia e se ‵suke ei tau Tusi Tapu kae faitau atu a tali ki fesili konā?

1 Se a te Mea ka Gata Atu?

E se akoako mai i te Tusi Tapu me ka fakaseai atu a te paneta tenei. Ne tusi mai a te faisalamo: “Ne fakatu ne koe te lalolagi ke ‵mautakitaki i luga i ona fakavae, ko te mea ke se toe gasuesue.” (Salamo 104:5) E se akoako mai foki i te Tusi Tapu me ka fakaseai a ola katoa i se afi i te lalolagi kātoa. (Isaia 45:18) Ne fakaasi mai ne Iesu me ka isi ne tino ka ‵sao i te gataga. (Mataio 24:21, 22) Kae, se a te mea e fai mai i te Tusi Tapu me ka fakagata?

A malo o tagata kolā e se manuia ka gata atu. Ne fakaosofia ne te Atua a te pelofeta ko Tanielu ke tusi mai, penei: “Ka fakatu ne te Atua o te lagi a te malo telā ka se toe gata mai. Ka se toe mafai o takavale a te malo tenā. Ka fakatakavale ne ia a malo katoa konā, kae ka tumau ki te se gata mai.”​—Tanielu 2:44.

Ka fakagata a taua mo fakalailaiga o te lalolagi. E fakamatala mai penei a te Salamo 46:9 e uiga ki mea kolā ka fai ne te Atua: “E fakagata ne ia a taua i te lalolagi kātoa; e fatifati ne ia a kausana, e fakamasei ne ia a tao kae ‵sunu ne ia a talita ki te afi.” E akoako mai foki te Tusi Tapu me ka fakaseai atu ne te Atua a “latou kolā e fakamasei ne latou te lalolagi.”​—Fakaasiga 11:18.

Ka fakagata atu a amioga ma‵sei mo faifaiga sē fakamaoni. E folafola mai a te Muna a te Atua: “A tino amio‵tonu kae fai mea tonu ka ola i te fenua tenei. Ka ko te Atua ka tapale keatea ne ia a tagata amio ma‵sei mai i te fenua, kae unu keatea a tino agasala, e pelā me ne lakau e unu keatea mai i te laukele.”​—Faataoto 2:21, 22.

2 E Oko Mai Mafea a te Gataga?

Ne fakatoka ne Ieova te Atua se ‘taimi tonu’ ke fakaseai ei a amioga ma‵sei kae ke aumai a te pulega o tena Malo. (Maleko 13:33) Kae e fakaasi manino mai i te Tusi Tapu me e se mafai o iloa tonu ne tatou a te taimi o te gataga. Ne fai mai a Iesu: “E seai se tino i te lalolagi io me se agelu i te lagi e iloa ne ia a te aso tenā mo te itula tenā. E penā foki a te Tama, kae na ko te Tamana fua e tokotasi e iloa ne ia.” (Mataio 24:36) Kae ne ‵valo mai eiloa ne Iesu mo ana soko a te tulaga o te lalolagi mai mua o fakaoko mai ne te Atua a te gataga. E pili mai eiloa a te gataga māfai ko ‵tupu a mea katoa i te taimi tenā i te lalolagi kātoa.

Mea fakapolitiki, te enivaelomene, mo fakamafuliga ‵lasi i fakapotopotoga kolā e ‵tupu nei kae seki lavea atu eiloa i tala fakasolopito o tino. Mai tena tali ki fesili a soko e uiga ki te gataga, ne fai atu a Iesu: “E taua te suā malo mo te suā malo. Ka isi ne mafuie i koga valevale, pelā foki mo oge. A mea konei, e fakatusa eiloa ki te ‵mae o te fafine ka fai o fanau.” (Maleko 13:8) Ne tusi mai a te apositolo ko Paulo: “Ke masaua a te mea nei! Ka isi ne taimi faiga‵ta i aso fakaoti. Ko tino ka ma‵natu fakapito, kaima‵nako, fakamata‵mata, fia ma‵luga, pati ma‵sei, se faka‵logo ki olotou mātua, e se loto fakafetai, e se fia‵fia ki lotu, e se kaima‵lie, e se loto a‵lofa, e gutu fatufatu, e faka‵tupu taua, e mata kaitaua, e ita ki te ‵lei, ka fakatupu masei, e se ‵poi i te masei, ko ‵fete i te fakamata‵mata, ka sili te lotou fia‵fia ki manakoga o te foitino i lo te Atua. Ka taofi ‵mau fua latou ki faiga matea o te ‵tou lotu, kae ‵teke ki tona ‵mana. Ke faka‵mao koutou mai tino penā.”​—2 Timoteo 3:1-5.

Te galuega talai telā ko fai nei i ‵gana kese‵kese i te lalolagi kātoa. Ne fai mai a Iesu: “A te Tala ‵Lei tenei e uiga ki te Malo, e fakamatala atu ki te lalolagi kātoa, mo fai te molimau ki tino katoa; ko oko mai ei te gataga.”​—Mataio 24:14.

3 Se a te Mea ka ‵Soko Mai ki te Gataga?

E se akoako mai i te Tusi Tapu me i tino ‵lei katoa ka avatu mai te lalolagi ki te lagi ke ola i ei ki te se-gata-mai. Kae ne akoako mai a Iesu me ka fakataunu a te fuafuaga muamua a te Atua mō tino katoa. Ne fai mai a Iesu: “Ke fia‵fia a tino loto maulalo, me ka maua ne latou a te lalolagi.” (Mataio 5:5; 6:9, 10) Mō tino kolā e ‵mate a koi tuai o oko mai a te gataga, e folafola mai te Tusi Tapu me ka toe‵tu aka i aso mai mua. (Iopu 14:14, 15; Ioane 5:28, 29) Se a te mea ka ‵soko mai ki te gataga?

Ka pule mai a Iesu e pelā me ko te Tupu i te Malo o te Atua mai te lagi. “I te fakaasiga tenā i te po tenā,” ne tusi mai a te pelofeta ko Tanielu, “ne lavea ne au se mea pelā me se tino ola [ko Iesu telā ne toetu]. Ko lavea atu ne au a ia e fakatamilo ne kaumana, kae ne fanatu ki a ia [Ieova te Atua] telā e ola ki te se gata mai, tenā ne ‵taki atu ei ki ona mua. Ne avatu ki a ia [Iesu] te pule, te fakaaloalo, mo te malo fakatupu ko te mea ke tavini atu ki a ia a tino katoa o malo katoa mo ‵gana kese‵kese. A tena pule ka tumau ki te se gata mai mo tena malo ka se toe gata mai.”​—Tanielu 7:13, 14; Luka 1:31, 32; Ioane 3:13-16.

A tino kolā e ‵nofo mai lalo i te Malo o te Atua ka maua ne latou a te malosi ‵lei, se puipuiga ‵lei, mo te ola se-gata-mai. “A tino ka faite olotou fale ko ‵nofo ei i ei,” ne tusi mai a te pelofeta ko Isaia. “Ka ‵toki olotou togāvine kae inu fia‵fia i te uaina mai i olotou togāvine konā, ka se toe inu ne nisi tino fakaa‵tea.” (Isaia 65:21-23) Ne tusi mai a te apositolo ko Ioane e uiga ki taimi konā: “Ko ‵nofo nei mo tino te fale o te Atua! Ka ‵nofo fakatasi a ia mo latou, kae ka fai latou mo ona tino. A te Atua ka fakatasi eiloa mo latou, kae ka fai a ia mo olotou Atua. Ka se toe iai ne loimata i olotou mata. Ka se toe iai se mate se fanoanoa se ‵tagi io me se ‵mae. Ko palele atu a mea mua.”​—Fakaasiga 21:3, 4.

4 Ne a au Mea e ‵Tau o Fai ke Sao ei Koe i te Gataga?

Ne iloa ne te apositolo ko Petelu me i nisi tino kolā e ola i te taimi o te gataga ka fakatauemu ki te manatu me ka sē aofia lele eiloa a te Atua i faifaiga masani a tino kae sē fakagata a amioga ma‵sei i te lalolagi. (2 Petelu 3:3, 4) Tela la, e fakamalosi mai a Petelu ki tino kolā e ola i ‵tou aso nei ke fai a mea konei.

Ke tauloto mai mea ne ‵tupu i aso mua. Ne tusi mai a Petelu: “Ne seki faka‵sao foki ne te Atua a te lalolagi taumua, kae ne aumai ne ia te lolo ki te lalolagi ki tino ma‵sei; ka ko tino kolā ne fakaola ne ia ko Noa tela ne folafola atu ne ia te amiotonu, mo nisi tino ake ei e tokofitu.” (2 Petelu 2:5) E uiga ki tino kolā e fakatauemu, ne fai mai a Petelu: “E fakapuli ne latou a te mea nei: ne faipati a te Atua i aso ko ‵teka, ko te mea eiloa ko iai te lagi mo te lalolagi. A te lalolagi ne tupu ake i te vai kae ne siomia ne te vai, ka ko te vai foki tenā ko te lolo ne fakamasei ne ia a fenuaa o te lalolagi mua. Ka ko te lagi mo te lalolagi konei e iai nei e se tumau eiloa, e ‵sunu ki te afi e alatu i te muna a te Atua. E tuku eiloa penā ke oko ki te aso e fakamasino kae fakamasei ei a tino amio ma‵sei.”​—2 Petelu 3:5-7.

Ke ola e ‵tusa mo tulaga o te Atua i mea tau amioga. A tino kolā e ma‵nako ke ‵sao atu i te gataga ka ‘faka‵malu kae fakatapu olotou olaga mō te Atua,’ ne tusi mai a Petelu. (2 Petelu 3:11) E fakamafa mai ne Petelu i konei me “e ‵tau o faka‵malu kae fakatapu otou olaga mō te Atua.” Kae ne uke atu a mea ne aofia i ei i lo te fai atu me e fakatuanaki koe io me taumafai o fai a mea ‵lei i mua o te Atua i te ‵toe taimi.

Ne a faifaiga mo uiga ‵lei kolā e mafai o talia ne te Atua? Kaia e se fakatusa‵tusa ei a mea ko iloa ne koe mo akoakoga i te Tusi Tapu e uiga ki te mataupu tenei? Ka fia‵fia eiloa a Molimau a Ieova o fesoasoani atu ki a koe. Fai atu ki a latou ke fakaasi atu ki a koe mai tau Tusi Tapu a mea kolā e fakavae ki ei olotou tali. A te faiga tenā ka fesoasoani atu ke mafai o fakafesagai atu koe mo te loto toa mo te loto talitonu ki aso mai mua, faitalia a mea faka‵mataku kolā e lavea atu ne tatou i ‵tou tafa.

[Fakamatalaga fakaopoopo]

[Ata i te itulau e 7]

Ka se fakaseai atu a te paneta tenei, kae ko tino fua kolā e fakamasei ne latou