“Ko maua tonu eiloa ne au te saolotoga tonu”

TOKU OLAGA MUA:

Ne fanau au i Moundsville, se fa‵kai telā e tu tokotasi i tafa o te vaitafe ko Ohio i te feitu ki matū o West Virginia, U.S.A. E tokofa te motou taufanauga a ko au ko te tamaliki i te tokolua, kae tokotolu matou tama‵liki tāgata, tela la, e faigata eiloa o se logoa te motou fale. A oku mātua ne tino e ga‵lue malosi, kae fakamaoni kolā e a‵lofa malosi ki nisi tino. E se uke omotou tupe, kae e maua eiloa ne matou a mea kolā e manakogina mō te olaga. E pelā me ne Molimau a Ieova, e taumafai malosi oku mātua o fakamalosi aka i loto i a matou a akoakoga mai te Tusi Tapu talu mai i te taimi koi fo‵liki ei matou.

I te taimi ko talavou ei au, ko oti ne kamata o tapeapea keatea toku loto mai mea kolā ko oti ne akoako au ki ei. Ne fakafesili aka ne au a te mafai o maua ne se tino se olaga ‵lei kae fiafia mai te tautali atu ki fakatakitakiga mai te Tusi Tapu. Ne mafaufau au me i te auala fua e tasi ke maua ei ne se tino te fiafia tonu ko te mauaga ne ia te saolotoga katoatoa. E seki leva, kae ne seki toe kau atu eiloa au ki fakatasiga faka-Kelisiano. Ne ‵kau mai foki a toku taina mo toku tuagane ki te faifaiga ‵teke a aku tenā. Ne fai ne omotou mātua a toe mea e mafai ne lāua o fai ke fesoasoani mai ki a matou, kae ne ‵teke ne matou a lā taumafaiga.

E se iloa eiloa ne au me i te saolotoga telā ne manako malosi au ki ei ka takitaki atu ne ia au ke umiti malosi ki faifaiga sē ‵lei. I te aso e tasi, i te taimi ne sasale atu ei au ki te fale mai te akoga, ne tuku mai ne toku taugasoa se sikaleti ki a au. Mai te taimi tenā o fano ki mua, ne talia faeloa ne au a nisi faifaiga ma‵sei. Fakamuli ifo, ne fakaaoga ‵se ne au a vailakau tapu mo mea inu ma‵losi, kae ola foki i se olaga sē ‵ma. I se fia tausaga mai tua ifo, ne tofotofo au ki nisi vaegā vailakau tapu tai ma‵losi atu kae ne nofo pologa faeloa au ki mea konā. Ne gasolo aka faeloa toku umiti malosi ki mea konā, kae ne iku atu ei ki te ‵togi atu ne au ki tua a vailakau tapu ke tausi ei toku olaga.

Ne taumafai malosi au o fakagalo a te loto lagona i loto i a au telā e musumusu mai faeloa ki a au me e se tonu te olaga e ola i ei au. Kae ne mafaufau au me ko seai se mea koi mafai o fai ke ‵fuli aka ei toku olaga. E tiga eiloa ne ‵kau fakatasi au mo tino i patī mo koniseti, kae ne seki fiafia eiloa au kae loto mafatia foki. I nisi taimi, e mafaufau sale au ki te ‵gali o faifaiga mo uiga o oku mātua mo te ‵mao o toku tapeapea atu keatea.

TE AUALA NE ‵FULI EI TOKU OLAGA NE TE TUSI TAPU:

E tiga eiloa ne mafaufau au me ko seai se fakamoemoega ke toe ‵fuli toku olaga, kae e se penā loa a nisi tino. I te tausaga e 2000, ne ‵kami au ne oku mātua ke kau atu ki te fono i te atufenua a Molimau a Ieova. Ne kau atu fua au ki ei o fakaaoga te ‵kamiga. Ne poi masei au me ne ‵kau atu foki a toku taina mo toku tuagane.

I te taimi o te fono, ne masaua aka ne au me ko oti foki ne oko atu au ki te koga tenā e fai ei te fono, i taku fanatuga o onoono i se koniseti i se tausaga mai mua atu i ei. Ne otia malosi toku loto i te ‵kese o mea ne lavea ne au i ei. I te taimi ne fai ei te koniseti, ne ‵fonu a te koga tenā i kaiga mo ausaga o sikaleti. A te tokoukega o tino kolā ne ‵kau atu ki te koniseti e se mata kata‵kata, kae ko pese fakatagi‵tagi i ei ne pese sē aoga. Kae i te taimi o te fono, ne ‵fonu eiloa te koga tenā i tino kolā e maua ne latou te fiafia tonu​—kae tali faka‵lei ne latou au, faitalia me ko fia tausaga ne seki fetaui eiloa matou. Ne ‵ma ‵ki a te koga tenā, kae ko te fekau i ei ne tuku mai ei se fakamoemoega gali mō aso mai mua. Ne lavea ne au a te aoga o muna‵tonu mai te Tusi Tapu, kae ne mafaufau au me kaia ne ‵teke ei ne au a mea konā!​—Isaia 48:17, 18.

Mai tua eiloa o te fono tenā, ne fakaiku aka ne au ke toe foki atu au ki te fakapotopotoga Kelisiano. Ne otia malosi foki a loto o toku taina mo toku tuagane i mea ne lavea ne lāua i te fono, kae ne fakaiku aka ke toe ‵foki mai foki lāua. Ne talia ei ne matou tokotolu ke fai omotou akoga faka-te-Tusi Tapu.

E tasi te tusi siki ne otia malosi toku loto i ei ko te Iakopo 4:8, telā e fai mai penei: “Fakapilipili atu ki te Atua, kae ka fakapilipili mai a ia ki a koutou.” Ne iloa ne au me kafai e manako au ke fakapilipili atu au ki te Atua, e ‵tau o faka‵ma muamua ne au toku olaga. E aofia i nisi ‵fuliga ne fai ne au ko te taofi aka o taku ‵pusi mo te fakaaogaga ‵se o vailakau tapu mo meainu ma‵losi. ​—2 Kolinito 7:1.

Ne fakagata ne au oku fesokotakiga mo oku taugasoa mua kae sui ki taugasoa ‵fou​— mai tino kolā e tapuaki ki a Ieova. Ne lasi ‵ki te fesoasoani ne maua ne au mai te toeaina Kelisiano telā ne fai ne ia taku akoga faka-te-Tusi Tapu. Ne telefoni mai faeloa a ia ki a au, kae āsi mai sāle foki ki a au i te fale. Ke oko mai ki te aso nei, a ia se tokotasi o oku toe taugasoa pili.

I te taimi o te ‵tau mafanafana i te 2001, ne fai ei taku tukuatuga ki a Ieova e auala i te papatisoga ki te vai, kae penā foki loa a toku taina mo toku tuagane. Ke mafaufau la ki te fia‵fia o oku mātua mo te motou taina foliki telā ne tumau eiloa i te fakamaoni, me ko ‵kau fakatasi te motou kāiga kātoa ki loto i te tapuakiga a Ieova.

MEA AOGA NE MAUA NE AU:

Ne mafaufau sale au me ko tō ‵mafa a fakatakitakiga mai te Tusi Tapu, kae nei la ko lavea ne au me e fai a mea konā e pelā me se puipuiga tāua ‵ki eiloa. Ne fakamalosi aka au ne te Tusi Tapu ke se toe fakaaoga ne au kae ‵togi atu foki ki tua a vailakau tapu, kae nei la ko fai au mo fai se tino e isi soku aoga.

Ko maua ne au te tauliaga ke aofia au i te kautaina o tino tapuaki a Ieova. A tino konei e fakatau a‵lofa i a latou eiloa, kae e ‵kaufakatasi latou i te lotou taviniga ki te Atua. (Ioane 13:34, 35) Kae mai te kautaina tenā, ne maua ne au mai i ei se fakamanuiaga gali ‵ki​—ko taku avaga ko Adrianne, telā e alofa malosi kae āva au ki ei. E fia‵fia eiloa māua ke tavini fakatasi atu ki te mā Mafuaga.

I lō te salasala atu ki se olaga telā e manako au ki ei, e galue fakavolenitia nei au e pelā me se tino talai tumau, i te akoako atu o nisi tino ke maua foki ne latou a mea aoga mai te Muna a te Atua. Ko maua nei ne au a te fiafia lasi ona ko te galuega tenei e fai ne au. E mafai ne au o fai atu mo te loto talitonu me i te Tusi Tapu ne ‵fuli eiloa ne ia toku olaga. Ko maua tonu eiloa ne au a te saolotoga tonu.