Ne Ofo Atu a Latou Eiloa mo te Loto Fiafia i Norway

I nāi tausaga ko ‵teka, ne ola fia‵fia eiloa a Roald mo Elsebeth, se tauavaga telā ko taki 40 tupu lā tausaga, i Bergen, te lua o fa‵kai ‵lasi o Norway. Fakatasi mo te lā tamaliki tagata mo te tamaliki fafine, ko Isabel mo Fabian, ne fakamaoni eiloa latou o fai a galuega a te fakapotopotoga. Ne tavini a Roald e pelā me se toeaina kae ko Elsebeth e pelā me se paenia, kae ne ma‵losi eiloa a Isabel mo Fabian e pelā me ne tino talai.

Kae i a Setema 2009, ne fakaiku aka ne te kāiga ke fai ne latou se mea fakaa‵tea​—ke talai i se koga ‵mao mō se vaiaso e tasi. Tela la, ne faima‵laga a Roald mo Elsebeth fakatasi mo Fabian telā ko 18 ana tausaga ki Nordkyn, se kogā koga i Finnmark, mai luga o te Arctic Circle. I konā, i te fa‵kai o Kjøllefjord, ne talai latou i ei fakatasi mo nisi taina mo tuagane kolā ne o‵mai foki o talai i te koga tenā. “I te kamataga o te vaiaso tenā,” e masaua ne Roald, “ne lotomalie au me ne mafai ne au o fakatoka aku mea e fai ko te mea ke mafai o aofia au i te galuega fakapitoa tenei mō te vaiaso kātoa.” Kae fakamuli ifo i te vaiaso eiloa tenā, ne kamata o sē ‵lei a lagonaga o Roald. Se a la te mea ne tupu?

SE FESILI E SEKI FAKAMOEMOEGINA

E fai mai a Roald, “e poi au i a Mario, se paenia e galue i Finnmark, ko fesili mai me e fia‵fia matou o olo ki se fa‵kai foliki i Lakselv o fesoasoani ki te fakapotopotoga e toko 23 a tino talai i ei.” Ne poi ‵ki eiloa a Roald i te fesili tenā. E fakamatala mai tou tagata: “Ne mafau‵fau māua mo Elsebeth ke tavini atu i koga kolā ne lasi te manakoga i ei​—kae ka fai fakamuli a te mea tenā māfai ko tiakina ne tamaliki a te fale.” Ke oko foki ki nāi aso kolā ne talai atu ei tou tagata i te koga tenā, ne lavea ne Roald me i tino e loto fia‵fia o tauloto e uiga ki a Ieova. E manakogina ne latou se fesoasoani i te taimi nei​—e sē se taimi fakamuli ifo. “Ne fakalavelave mai a te fesili tenā ki toku mafaufau kae fai ei ke sē to taku moe i te fia o po,” e masaua ne ia. Tenā, ne ave ei ne Mario a Roald mo tena kāiga ki Lakselv, kāti se 150 maila (240 km) ki saute o Kjøllefjord. Ne manako a Mario ke lavea ne latou konei a te fakapotopotoga foliki i konā.

Ne fakaasi atu ne Andreas, se tokotasi mai i toeaina e tokolua i Lakselv, ki a latou konei a te kogā koga tenā mo te Kingdom Hall. Ne tali fiafia latou ne te fakapotopotoga kae ne fai atu ki a Roald mo Elsebeth me ka fia‵fia eiloa latou māfai e o‵mai te lotou kāiga o fesoasoani ki te galuega o te Malo i konā. Ne fakamisikata atu a Andreas kae fai atu me ko oti ne fakatoka ne ia ke fai se fakasau‵talaga e uiga ki se galuega ‵togi mō Roald mo Fabian! Ne a mea ka fai ne latou konei?

SE A TE FAKAIKUGA E ‵TAU O FAI?

E tenei te tali muamua a Fabian: “Au e se manako o vau ki konei.” E se fiafia a ia ki te manatu ke tiakina ana taugasoa pili kolā ne ‵tupu tasi aka mo ia i tena fakapotopotoga mua kae vau o nofo i se fa‵kai foliki. E seki oti foki ana akoga ke fai pelā me se tino e galue i mea tau iti. E ui i ei, i te taimi ne fesili atu ei ki a Isabel (ko 21 ana tausaga i te taimi tenā) me se a tena manatu ki te olo atu o latou ki konā, ne pakalaga mai tou fafine: “E tenā eiloa te mea ko leva ne manako au o fai!” Kae oti aka, fai mai ei a Isabel: “Kafai au e mafaufau ‵mafa ki ei, ko manatu aka au penei, ‘E mata, a te mea tenei se manatu ‵lei eiloa? E mata, ka solopū au ki oku taugasoa? E mata, e se ‵tau fua au o nofo i taku fakapotopotoga telā e faigofie kae mautinoa a mea e maua i ei?’” Se a te tali a Elsebeth ki te ‵kamiga? “Ne manatu aka au me ko oti ne tuku mai ne Ieova se galuega ki te motou kāiga,” muna a tou fafine, “kae ne mafaufau foki au ki te motou fale telā ne fatoa fakafou mo mea katoa i ei kolā ne maua ne matou i te 25 tausaga ko ‵teka.”

I te otiga o te vaiaso fakapito tenā, ne toe ‵foki ei a Roald mo tena kāiga ki Bergen, kae ne seki gata eiloa te mafau‵fau o latou ki olotou taina mo tuagane Kelisiano i Lakselv, kāti se 1,300 maila (2,100 km) te ‵mao. “E uke a ‵talo ne fai atu ne au ki a Ieova,” muna a Elsebeth, “kae ne tumau eiloa au i te fesokotaki atu ki taugasoa kolā ne fetaui mo matou mai te aveavega o ata mo tala.” Muna a Roald: “E manakogina ke lava se taimi ko te mea ke talia ne au a te manatu ke olo atu ki konā. E ‵tau foki o mafaufau au ki te tausiga o matou. Ka mafai pefea ne matou o tausi a matou eiloa? Ne ‵talo malosi atu au ki a Ieova kae sau‵tala fakatasi mo toku kāiga mo taina ma‵tua faka-te-agaga.” Ne masaua ne Fabian: “Ko te uke o taimi e mafaufau ei au ki ei, ko te uke foki o pogai e iloa ne au me e se ‵tau eiloa o sē talia ne au a te mea tenā. Ne ‵talo faeloa au ki a Ieova, kae ne gasolo aka eiloa o malosi a te manakoga ke na olo atu matou.” Kae ko Isabel? Ke fakatoka a ia mō te malaga, ne kamata tou fafine o paenia i tena fa‵kai mua. Mai tua o te ono masina ne paenia ei a ia, ko te taimi foki tenā ne fakamāumāu ne ia i te faiga o sukesukega totino ki te Tusi Tapu, ne toka ‵lei ei a ia o fai tena malaga.

TAUMAFAIGA KE TAUNU OLOTOU FAKAMOEMOEGA

I te gasolo aka o lasi a te manakoga ke tavini atu i koga e lasi te manakoga i ei, ne fai ne te kāiga a taumafaiga ke taunu olotou fakamoemoega. Ne maua ne Roald se galuega ‵togi ‵lei telā ne fiafia a ia ki ei, kae ne fakamolemole atu a ia ke mafai o malōlō a ia i se tausaga e tasi. E ui i ei, ne fai atu tena pule ki a ia ke galue eiloa e pelā me se tino sē galue tumau​—e lua vaiaso galue kae ono vaiaso malōlō. “Ne foliki ‵ki eiloa toku ‵togi, kae ne ‵lei eiloa,” ko pati a Roald.

E fai mai a Elsebeth: “Ne fakamolemole mai taku avaga ki a au ke taumafai o ‵sala aka se fale i Lakslev kae ke ‵togi i masina te motou fale i Bergen. Ne uke a taimi mo taumafaiga ne fai ki ei, kae ne iku manuia eiloa matou. Fakamuli ifo, ne maua ne tamaliki ne galuega sē tumau,” ne faopoopo mai tou fafine, “kae ne fesoasoani mai lāua ki te ‵togiga o mea‵kai mo mea e oloolo i ei matou.”

Muna a Isabel: “Ona la ko te fa‵kai telā e olo matou ki ei e foliki, a te ‵toe mea faigata ki au ko te ‵salaga o se galuega ke fesoasoani mai ki a au e pelā me se paenia. E foliga mai i nisi taimi me ko seai se mea e mafai o fai.” Kae mai te talia o so se galuega ‵togi sē tumau, ne maua ei ne Isabel a galuega e iva i te tausaga muamua kae ne mafai ei ne ia o ‵togi a mea kolā e manakogina ne ia. Kae e pefea la a Fabian? “Ke fakaoti aku akoga e pelā me se tino galue i te iti, koi manakogina eiloa ke galue au e pelā me se tino fakaakoako. Ne galue au penā i Lakselv. Fakamuli ifo, ne iku manuia aku sukega kae ne maua ne au se galuega ‵togi sē tumau e pelā me se tino galue i te iti.”

TE AUALA NE FAKALAUEFA ATU EI NE NISI TINO TE LOTOU TAVINIGA

Ne ma‵nako foki a Marelius mo tena avaga ko Kesia o ga‵lue i koga kolā ne lasi te manakogina o tino talai i ei. Muna a Marelius telā ko 29 nei ana tausaga: “Ne fakamalosi mai a lāuga mo fakasau‵talaga i fono e uiga ki te galuega fakapaenia ke mafaufau au ki te auala e mafai ei o fakalauefa atu taku taviniga.” Kae, mō Kesia telā ko 26 nei ana tausaga, a te manatu ke tiakina te kāiga ko fai pelā me se fakalavelave. “Au e mataku ma nofo ‵mao mai tino kolā e alofa au ki ei,” muna a tou fafine. E se gata i ei, ne galue tumau eiloa a Marelius ko te mea ke ‵togi te kaitalafu o te lā fale. Muna a tou tagata: “Mai te fesoasoani o Ieova mo ‵talo e uke kolā ne fakamolemole atu māua mō tena fesoasoani ke fai a ‵fuliga, ne mafai ei ne māua o ga‵sue.” Muamua la, ne fakamāumāu ne lāua a taimi e uke i te faiga o akoga faka-te-Tusi Tapu. Oti aka, ‵togi atu ei te lā fale ki tua, tiakina a lā galuega ‵togi, kae olo atu ki te fa‵kai lasi o Alta i te feitu ki matū o Norway, i a Aokuso 2011. I konā, ne galue a Marelius i mea tau tupe kae ko Kesia e galue i se sitoa ke fesoasoani atu ki a lāua e pelā me ne paenia.

A Knut mo Lisbeth, se tauavaga kolā ko taki 30 tupu nei lā tausaga, ne fakamalosi aka ne tala i te Yearbook e uiga ki a latou kolā ne tavini atu i koga kolā e lasi te manakogina o tino talai o te Malo i ei. “Ne fai ne tala konei ke mafau‵fau māua ki te taviniga i se fenua fakaa‵tea,” ko pati a Lisbeth, “kae ne fakatalave au ona ko au ne fakalotolotolua me i te mea tenei se mea telā e se mafai ne se tino penei mo au o fai.” E tigā te feitu tenā, ne taumafai eiloa lāua ke fakataunu te lā fakamoemoega. Muna a Knut: “Ne ‵togi ne māua ki tua a te mā koga ‵nofo kae olo o ‵nofo tasi mo toku mātua ko te mea ke ‵teu aka ne tupe. Fakamuli ifo, ne olo māua o ga‵lue i te fakapotopotoga i te ‵gana palagi i Bergen mō se tausaga e tasi, kae ne ‵nofo tasi matou mo te mātua o Lisbeth.” Ne seki leva, ko Knut eiloa mo Lisbeth ko toka ke olo ki Uganda. I loto i te tausaga e tasi, e ‵foki mai lāua ki Norway o ga‵lue mō se lua masina. I te auala tenā, e mafai ei o maua ne lāua ne tupe e lava mo lā ola kae talai i Uganda i te tausaga kātoa.

“TOFOTOFO AKA KAE KA ILOA EI NE KOE I A IEOVA E ‵LEI”

E a la tino ga‵lue loto finafinau konei? Muna a Roald: “Ko lasi atu nei te taimi e ga‵lue fakatasi ei matou e pelā me se kāiga i te kogā koga ‵mao tenei i lō te mea ne fai ne matou i Bergen. Ko gasolo eiloa o ‵pili a te motou kāiga. A te lavea atu o te ga‵solo ki mua o mā tamaliki i te feitu faka-te-agaga ne fai pelā me se fakamanuiaga.” Ne toe fai mai tou tagata: “Ko faigofie atu foki nei a te motou kilokiloga ki kope faka-te-foitino. Ko sē tāua malosi ki a matou e pelā mo te mea ne mafau‵fau matou ki ei.”

Ne matea ne Elsebeth a te manakoga ke tauloto ki te suā ‵gana. Kaia? Me e aofia i koga kolā e ga‵lue ki ei te fakapotopotoga i Lakselv ko te fa‵kai foliki o Karasjok, se kogā koga i te feitu ki matū o Norway, Sweden, Finland, mo Lusia, kolā e ‵nofo i ei a te kau Sami. Tela la, ke faigofie te talai atu ki tino konei, ne akoga a Elsebeth ki te ‵gana Sami. Nei la, ko mafai ne tou fafine o fai a sau‵talaga faigofie i te ‵gana tenā. E mata, e fiafia tou fafine ki tena koga talai fou? E faipati fiafia mai tou fafine: “E ono aku akoga faka-te-Tusi Tapu. Au ko oko eiloa i te fiafia o galue i konei!”

E fai mai a Fabian, telā ko tavini nei e pelā me se paenia kae se tavini fesoasoani foki, me ne fesoasoani atu lāua mo Isabel ki talavou e tokotolu i te lā fakapotopotoga fou kolā e ma‵nako ki fakamalosiga ke ‵kau malosi atu ki galuega a te fakapotopotoga. Ko oko eiloa te ma‵losi nei o talavou e tokotolu i te galuega talai. A te tonuga loa, e tokolua mai i a latou ko oti ne papatiso kae tavini atu e pelā me ne paenia lagolago i a Mati 2012. Ne fakafetai atu a te talavou e tokotasi telā ne kamata o vāivāi i te munatonu ki a Fabian mo Isabel mō te fesoasoani atu ki a ia ke “toe malosi aka.” Muna a Fabian: “Ne fiafia ‵ki toku loto i te faimaiga ne tou fafine a pati konā. Se mea fakafiafia a te fesoasoani atu ki se tino!” E fai mai a Isabel: “I te galuega tenei, au ne ‘tofotofo tonu ki ei kae iloa aka i a Ieova e ‵lei.’” (Salamo 34:8, NW) Ne toe fai mai tou fafine: “I tafa o te mea tenā, a te galue i konei se mea fakafiafia ‵ki!”

Ko maua nei ne Marelius mo Kesia se olaga faigofie kae aoga. A te fakapotopotoga i Alta telā ne olo atu lāua ki ei, ko nofo nei ki te 41 o tino talai i ei. Muna a Marelius: “Kafai au e mafaufau ki taimi ko ‵teka, ko oko eiloa i te fakamalosi loto ke lavea atu a te lasi o te ‵fuliga o mā olaga. E fakafetai māua ki a Ieova me ne mafai ne māua o tavini atu ki a ia e pelā me ne paenia i konei. E seai aka foki se mea e fakamalie loto atu i lō te mea tenei.” Ne toe faopoopo mai a Kesia: “Ne tauloto au ke momea aka toku loto talitonu ki a Ieova, kae ne tausi faka‵lei mai eiloa a ia ki a māua. Ne iloa aka foki ne au me i te nofo ‵mao mai i kāiga e fesoasoani mai ke momea aka te fakatāua ne au a te taimi e māfuta fakatasi ei māua. Ne seki salamō lele eiloa au i te mā fakaikuga.”

Kae e a la a Knut mo Lisbeth i Uganda? E fai mai a Knut: “E tai leva eiloa te taimi ne manakogina ke fakamasani māua ki tu mo te olaga i te koga fou tenā. E maua faeloa ne māua a fakalavelave ki vai, iti, mo te ‵mae o te tinae, kae ne mafai ne māua o fai akoga faka-te-Tusi Tapu i te uke telā e ma‵nako māua ki ei!” Muna a Lisbeth: “E isi ne koga i tafa o te koga telā e ‵nofo māua i ei, kāti se āfa itula māfai e olo ki ei, e seki talai aka eiloa i ei a te tala ‵lei. E ui i ei, i te taimi ne olo atu ei māua ki konā, ne maua aka ne māua i tino e fai‵tau ki te Tusi Tapu, kae fakamolemole mai ke akoako atu latou. A te akoako atu o vaegā tino loto mau‵lalo penā ki te fekau i te Tusi Tapu se mea fakafiafia ‵ki eiloa!”

Ko oko eiloa i te fiafia o te ‵tou Takitaki, ko Keliso Iesu, māfai e onoono mai i te lagi ki te auala e fai ei a te galuega talai telā ne kamata ne ia i kogā koga e uke o te lalolagi! Ao, ki tino katoa o te Atua, se mea fakafiafia loto ke ofo atu a latou eiloa ke fakataunu a te fakatonuga a Iesu ke “olo atu . . . ki fenua katoa o fai a tino i ei mo fai a soko.”​— Mataio 28:19, 20.