MATAUPU I TE ‵KAVA: MEA KOLĀ E TAULOTO NE TATOU MAI I A MOSE
Ko oi a Mose?
Se a te mea e masaua ne koe māfai e lagona ne koe a te igoa o Mose? E mata, e mafaufau koe ki se . . .
pepe telā ne faka‵muni ne tena mātua i se ato i loto i te Vaitafe o te Naila?
tamaliki tagata telā ne puti aka i te maumea o Aikupito ne te tamaliki fafine a Falao kae ne seki puli lele i a ia se tino Isalaelu?
tagata telā ne ola e pelā me se tausi mamoe i Mitiana i tausaga e 40?
tagata telā ne sau‵tala mo Ieovaa i mua o se lakau ‵ka ulaula?
tagata telā ne fakamolemole atu mo te loto toa ki te tupu o Aikupito ke fakasaoloto te kau Isalaelu mai te ‵nofo pologa?
tagata telā ne fakailoa atu ne ia mai i te fakatonuga a te Atua, a Mala e Sefulu kolā ka oko atu ki Aikupito māfai a tena tupu e ‵teke atu ki te Atua tonu?
tagata telā ne ‵taki atu ne ia te kau Isalaelu i se malaga loa mai i Aikupito?
tagata telā ne fakaaoga i te ‵vaega o te Tai ‵Kula?
tagata telā ne tuku atu ne ia ki te kau Isalaelu a Tulafono e Sefulu mai i te Atua?
NE FAI ne Mose a mea katoa konei. E setioa eiloa o āva malosi te kau Kelisiano, te kau Iutaia, mo te kau Muslim ki te tagata fakamaoni tenei!
E manino ‵lei, me i a Mose se pelofeta telā ne fakaasi mai ne ia a “mea fakama‵taku.” (Teutelonome 34:10-12) Ne talia ne tou tagata ke fakaaoga a ia ne te Atua i se auala lasi. E ui i ei, a Mose se tino eiloa penei mo tatou. E pelā mo te pelofeta ko Elia, telā ne sae aka i tafa o Mose i se fakaasiga i te taimi ne fai ei te galuega a Iesu i te lalolagi, a Mose se tagata “e isi ne ana lagonaga e penei eiloa mo tatou.” (Iakopo 5:17; Mataio 17:1-9) Ne fakafesagai a Mose mo fakalavelave foki eiloa kolā ne fe‵paki mo tatou, kae ne manumalo a ia i ei mo te manuia.
E fia iloa ne koe te auala ne manumalo ei a ia? Ke mafaufau ki uiga e tolu kolā ne fakaasi mai ne Mose mo mea kolā e mafai o tauloto ne tatou mai i tena fakaakoakoga.
[Fakamatalaga fakaopoopo]
a A Ieova ko te igoa o te Atua e pelā mo te mea e fakaasi mai i te Tusi Tapu. Onoono ki te fakamatalaga mai lalo i te Esoto 3:14 i te Tusi Tapu Tauloto.