Petelu mo Anania ne ‵Loi—Se a te Akoakoga e mafai o tauloto ne tatou?

E pelā mo te mea e iloa ne koe, a te loi ko te faipati atu o se mea telā e iloa ne koe me e se tonu. Kai loi aka eiloa koe? ​— a A nisi tino ma‵tua kolā ne a‵lofa ki te Atua ne ‵loi. Kāti e iloa ne koe se tino i te Tusi Tapu telā ne loi. A tena igoa ko Petelu, se tokotasi o apositolo e toko sefululua a Iesu. Ke fakalogo‵logo tatou ki te tala me kaia ne loi ei tou tagata.

I te otiga ne puke fakapagota a Iesu, ne ave a ia ki te fale o te faitaulaga sili. Ko leva ‵ki te po. Ne fanatu a Petelu i te matāfale o te fale o te faitaulaga e aunoa mo te iloa ne se tino. Ona ko te mainaga o te afi, matea ei tou tagata ne te pologa fafine a te faitaulaga sili telā ne talia ne ia a Petelu ki loto. “A koe foki ne ‵nofo mo Iesu,” muna a tou fafine. Ona ko te mataku, ne fai atu ei a Petelu, ikai.

E fai mai te Tusi Tapu me fakamuli ifo “ne lavea a ia ne te suā tamafine.” Muna a tou fafine: “A te tagata tenei ne ‵nofo fakatasi mo Iesu.” Ne toe fakafiti foki a Petelu. E seki leva kae olo atu a nisi tino ki a Petelu kae fai atu: “E tonu eiloa, a koe foki se tokotasi o latou.”

Ne mataku a Petelu. Tela la, i te tolu o taimi ne loi ei tou tagata kae fai atu: “E se iloa ne au te tagata tenā!” Ko te moa eiloa ko tagi. Ne kilo atu a Iesu ki a Petelu, kae masaua ne Petelu a pati a Iesu ne fai atu ki a ia i nāi itula mai mua atu: “A koi tuai o tagi te moa, kae ko oti ne fakafiti fakatolu ne koe au.” Ne fano a Petelu kae tagi. Ko oko eiloa i tena fanoanoa!

E mata, e mafai o tupu se mea penā ki a koe?​—Kāti e nofo atu koe i te akoga kae lagona ne koe a tamaliki e fai‵pati e uiga ki Molimau a Ieova. “A latou e se fakaalo ki te fuka,” e fai mai se tamaliki e tokotasi. Kae toe fai mai a te suā tamaliki, “A latou e se taua mō te lotou atufenua.” Ne toe fai mai te suā tino, “A latou e se ne Kelisiano ‵tonu, me e se fakamanatu ne latou te Kilisimasi.” Oti aka, saga atu ei se tokotasi ki a koe kae fesili atu, “A koe se Molimau a Ieova?” Se a tau tali ka fai atu?​—

Koi tuai o tupu se mea penā, e ‵tau mo koe o fakatokatoka faka‵lei ke tuku atu se tali ‵lei. Ne seki toka a Petelu. I te taimi ne oko mai ei a mea faiga‵ta, ne loi tou tagata. E tigā te feitu tenā, ne fanoanoa ‵ki tou tagata i te mea ne fai ne ia, kae ne fakamagalo a ia ne te Atua.

A te suā soko mua o Iesu telā ne loi foki, ko Anania. Kae ne seki fakamagalo a ia io me ko tena avaga ko Safaila, ne te Atua. Ne lotomalie a tou fafine fakatasi mo tena avaga ke pati ‵loi lāua. Ke onoono aka tatou me kaia ne seki fakamagalo ei ne te Atua a Anania mo Safaila.

I te sefulu o aso mai tua o te tiakinaga ne Iesu a te kau apositolo kae toe foki atu ki te Atua i te lagi, e nofo ki te 3,000 a tino ne papatiso i Ielusalema. E tokouke a tino ne o‵mai i fenua ‵mao ki te fakamanatuga o te Penitekoso, kae mai tua o te faiga o latou mo fai ne Kelisiano, ne ma‵nako ei latou o tai ‵nofo malie aka ke tauloto latou ki mea e uke e uiga ki te lotou talitonuga fou. Ne fakaaoga ne nisi soko o Iesu olotou tupe totino ke tausi atu ki a latou.

Ne fakatau atu ne Anania mo tena avaga a nisi kope o lāua ke maua mai ne tupe mo fesoasoani ki tino fou kolā ne fatoa papatiso. I te aumaiga ne Anania a tupe ki te kau apositolo, ne fai atu tou tagata me konā eiloa te aofaki o tupe ne maua i te fakatauatuga o la kope. Kae e se tenā te aofaki! Ne tausi ne ia a nisi tupe ma ia! Ne fai ne te Atua ke iloa ne Petelu a te mea tenei, tenā ne fai atu ei a Petelu ki a Anania: “E seki loi koe ki tino kae ko loi koe ki te Atua.” I konā, ne mate ei a Anania! Kāti se tolu itula mai tua ifo, kae ulu mai a tena avaga. E aunoa mo te iloa me se a te mea ne tupu ki tena avaga, ne loi foki tou fafine kae siga ki lalo me ko mate.

Ko oko eiloa i te tāua a te akoakoga tenei: A te faipati tonu e tāua ‵ki! Ao, e ‵tau mo tatou katoa o tauloto a te akoakoga tenei! E ui i ei, a tatou katoa e fai mea ‵se, maise eiloa māfai tatou koi tamaliki. E mata, e se fiafia koe i a Ieova e alofa atu ki a koe kae ka fakamagalo ne ia koe e pelā mo te fakamagaloga ne ia a Petelu?​—Kae masaua, me e ‵tau mo tatou o fai‵pati tonu. Kae kafai e fai ne tatou a te mea ‵se fulafulaki ko te loi, e ‵tau mo tatou o fakamolemole atu, ao, akai atu ki te Atua ke fakamagalo mai tatou. E tenā eiloa te mea ne fai ne Petelu, kae ne fakamagalo a ia ne te Atua. Kafai e taumafai malosi tatou o sē toe ‵loi, ka fakamagalo foki tatou ne te Atua!