Mō Latou Kolā e A‵lofa ki a Ieova, “E Seai se Mea e ‵Siga i Ei”

1. E fakaasi mai pefea i te kilokiloga a se tino tele me e se ‵tau o ‵fiu vave tatou?

A MARY DECKER koi talavou fua i te taimi ne kamata ei o tele i fakatautelega. I te 1984, ne fai pelā me e ‵tau o maua ne ia te pine aulo i te ‵tele i te 3,000 mita i te Summer Olympics. E ui i ei, ne seki mafai o oko tou fafine ki te laina. Ne ‵lave a ia i te vae o te suā tino tele kae siga ki lalo. Ona ko te mea ko pakia tou fafine kae tagi, sau ei a ia ki tua. A Mary e se ko te tino telā e ‵tuka vave tena loto. E seki kātoa te tausaga, kae ko toe foki tou fafine o tele kae ne fakatu ne ia se tapulā fou mō fafine o te lalolagi i te fakatautele i te maila e tasi i te 1985.

2. Se a te fakatautelega e ‵tele i ei a Kelisiano ‵tonu, kae se a te mea e ‵tau o ‵saga tonu tatou ki ei?

² A ‵tou olaga e pelā me ne Kelisiano e faka‵tusa ki se fakatautelega ki te ola se-gata-mai. E ‵tau o ‵saga tonu tatou o ‵tele ko te mea ke ‵sili tatou. A ‵tou fakatautelega e sē se fakatautelega toetoe telā e ‵tau ei o makini ‵ki te tino ke sili a ia. Kae e se ko te teletele malie foki telā e mafai o mānava malie ei koe i se taimi. E mafai o fakatusa ki se tele loa ‵ki telā e manakogina i ei te loto mau ke maua te manumalo. Ne fakaaoga ne te apositolo ko Paulo se tugāpati e uiga ki se tino tele i te fakatautelega i tena tusi ki Kelisiano i Kolinito, se fa‵kai telā ne lauiloa i te faiga o tafaoga fakatau‵fai. Ne tusi mai tou tagata: “E a, e se iloa ne koutou me e tokouke a tino e ‵tele i se fakatautelega, kae e tokotasi fua e maua ne ia te failoga? ‵Tele la i se auala telā ka maua ei ne koutou te failoga.”​—1 Koli. 9:24.

3. E mafai pefea o ‵sili a tino katoa kolā e ‵tele i te fakatautelega ki te ola se-gata-mai?

³ E fai mai te Tusi Tapu ke ‵tele tatou i te fakatautelega tenei. (Faitau te 1 Kolinito 9:25-27.) A te ola se-gata-mai i te lagi ko te failoga mō Kelisiano fakaekegina io me ko te lalolagi mō te vaitino tokouke. E ‵kese mo tino ta‵fao e tokouke kolā e fakatau‵fai, a tino katoa kolā e ‵tele i te fakatautelega tenei kae loto‵mau ke oko ki te fakaotiga, e maua ne latou te failoga. (Mata. 24:13) A tino ‵tele e ‵to fua ki tua mo te fakatautelega māfai e se ‵tele e ‵tusa mo tulafono io me fakagata aka te lotou ‵tele a koi tuai o oko atu ki te laina fakaoti. E se gata i ei, tenei fua te fakatautelega e failoga ki te ola se-gata-mai.

4. Se a te mea e fakafaigata ei a ‵tou ‵tele i te fakatautelega ke maua a te ola se-gata-mai?

⁴ E se faigofie ke oko atu ki te laina fakaoti. E manakogina te loto pulea mo te mautinoa o te fakamoemoega. E tokotasi eiloa te tino​—ko Iesu Keliso—ko oti ne oko ki te laina fakaoti kae seki siga aka eiloa. Kae ne tusi mai a te soko ko Iakopo me i soko katoa o Keliso ne “‵siga i taimi e uke.” (Iako. 3:2) E tonu ‵ki eiloa! E fakavāivāi mai a te ‵tou tulaga sē ‵lei katoatoa ki a tatou katoa mo nisi tino. Kāti e ‵siga tatou i nisi taimi, takasese malie, kae oti aka ko ‵galo atu ei ‵tou malosi. Kāti e pa‵ku foki tatou i nisi taimi, kae e ‵tu aka tatou ki luga kae tumau eiloa i te fakatautele. A nisi tino ne pa‵ku ma‵sei eiloa kae ne fesoasoani atu ki a latou ke toe ‵foki mai ki loto i te fakatautelega ko te mea ke oko atu latou ki te laina fakaoti. Tela la, e mafai eiloa o ‵siga io me pa‵ku tatou i nisi taimi.​—1 Tupu 8:46.

KAFAI KOUTOU E ‵SIGA, ‵NOFO LOA I LOTO I TE FAKATAUTELEGA

5, 6. (a) E mafai pefea o “seai se mea e siga i ei” se Kelisiano, kae se a te mea ka fesoasoani atu ki a ia ke ‘toe tu’ aka ki luga? (e) Kaia e se toe ‵tu aka ei ki luga a nisi tino kolā ne ‵siga?

⁵ E se taumate ko oti ne fakaaoga ne koe a te pati “siga” mo te “pakū” ke fakamatala mai i ei se tulaga faka-te-agaga. E mafai kae e se ‵pau faeloa a te fakauigaga o tugapati konei i te Tusi Tapu. Onoono ki pati i te Faataoto 24:16: ‘Faitalia me pakū fakafitu taimi a te tino amiotonu, kae mautinoa eiloa me ka toe tu aka a ia ki luga; kae ko te tino amio masei ka fai eiloa ke siga i fakalavelave.’

⁶ Ka sē talia ne Ieova ke ‵siga io me pa‵ku a latou kolā e tali‵tonu ki a ia​—ke oko ki se tulaga faigata io me taofi aka te lotou tapuakiga​—māfai e se mafai o toe faka‵lei aka latou. E tali‵tonu tatou me ka fesoasoani mai a Ieova ki a tatou ke ‘toe ‵tu’ aka ko te mea ke tumau faeloa tatou i te tuku atu ki a ia a te ‵toe mea e mafai ne tatou o fai. Ko oko eiloa i te fakamafanafana o te mea tenā ki tino katoa kolā e a‵lofa tonu ki a Ieova mai olotou loto! E se ma‵nako a tino amio ma‵sei ke toe ‵tu aka latou. E se ‵sala atu a latou ki te fesoasoani o te agaga tapu o te Atua mo ana tino, io me e se ma‵nako ke tuku atu a te fesoasoani tenā ki a latou. E ‵kese mai i ei, e seai eiloa se mea e mafai o faka‵siga ne ia a latou kolā e ‘fia‵fia ki tulafono a Ieova’ ke ‵to ki tua mo te fakatautelega ki te ola.​—Faitau te Salamo 119:165.

7, 8. E mafai pefea o “pakū” se tino kae tumau eiloa i te taliaga a te Atua?

⁷ E fai sāle ne nisi tino a agasala fo‵liki ona ko nisi vāivāiga. Kae koi kilo atu eiloa a Ieova ki a latou e pelā me e amio‵tonu māfai e ‘toe ‵tu’ aka latou, ko tena uiga, ke sala‵mo tonu kae taumafai o toe tavini atu mo te fakamaoni. E lavea ne tatou a te mea tenā i faifaiga a te Atua ki te fenua mua o Isalaelu. (Isa. 41:9, 10) I te Faataoto 24:16 telā ne siki muamua mai, e se faka‵mafa mai i ei a mea ne ‘pa‵ku’ ei tatou, kae e fakaasi mai i ei me ka fesoasoani mai a ‵tou Atua alofa fakamagalo ki a tatou ke toe ‘‵tu ki luga.’ (Faitau te Isaia 55:7.) Ne fakaasi mai ne Ieova te Atua mo Iesu Keliso a te lā loto tali‵tonu ki a tatou mai te fakama‵losiga o tatou ke toe “‵tu aka ki luga.”​—Sala. 86:5; Ioa. 5:19.

⁸ Kafai foki e siga io me pakū se tino tele i te ‵tele loa, e lava eiloa te taimi ke toe tu aka kae fakaoti faka‵lei a te telega māfai e gasue fakavave a ia. I ‵tou fakatautelega ke maua te ola se-gata-mai, e se iloa ne tatou a “te aso mo te itula” ka gata ei a te fakatautelega. (Mata. 24:36) Ko te mu‵tana o taimi e ‵siga ei tatou, ko te faigofie ke tumau tatou i te ‵tele i te fakatautelega kae fakaoti faka‵lei mo te manuia. Tela la, e mafai pefea o fai tatou ke se ‵siga?

MEA KOLĀ E MAFAI O ‵SIGA I EI TATOU

9. Ne a mea e mafai o ‵siga tatou i ei kolā ka sau‵tala tatou ki ei?

⁹ Ke mafau‵fau tatou ki mea e lima kolā e mafai o ‵siga tatou i ei​—‵tou vāivāiga totino, ko manakoga o te foitino, faifaiga sē ‵tonu a taina mo tuagane, fakalavelave io me ko fakasauaga, mo te tulaga sē ‵lei katoatoa o nisi tino. Kafai ne ‵siga tatou, masaua i a Ieova e loto kufaki. E se kilo fakavave mai a ia ki a tatou e pelā me ne tino e se a‵lofa fakamaoni.

10, 11. Se a te vāivāiga totino ne taua atu a Tavita ki ei?

¹⁰ Kāti e fai a ‵tou vāivāiga totino e pelā me ne fatu e ‵to i loto i te auala. Kafai e ‵kilo tatou ki mea ne ‵tupu ki olaga o te tupu ko Tavita mo te apositolo ko Petelu, e lavea ne tatou i ei a feitu e lua e vāivāi ei lāua​—ko te se lava o te loto pulea mo te mataku ki tino.

¹¹ Ne fakaasi mai ne te tupu ko Tavita a tena vāivāi o fakagalue a te loto pulea, e pelā mo te mea ne tupu ki a ia mo Patisepa. Kae i te taimi ne pati ‵toko ei tou tagata ne Napalu, toeitiiti kae taua atu a ia ki ei. E tonu, e vāivāi a tena loto pulea, kae e tumau eiloa tou tagata i te taumafai o fakafiafia a Ieova. Mai te fesoasoani o nisi tino, ne mafai ei ne ia o toe fakapaleni aka i te feitu faka-te-agaga.​—1 Samu. 25:5-13, 32, 33; 2 Samu. 12:1-13.

12. Faitalia me ne siga tou tagata, ne tumau pefea a Petelu i te fakatau‵telega?

¹² Ne fakaasi mai ne Petelu a te mataku ki tino, siga ei a ia i nisi taimi; kae ne tumau eiloa tou tagata i te alofa fakamaoni ki a Iesu mo Ieova. Pelā me se fakaakoakoga, ne fakafiti ne tou tagata a tena Matai i mua o tino, e se fakatasi fua, kae fakatolu taimi. (Luka 22:54-62) Fakamuli ifo, ne fakatamala foki a Petelu o fakaasi atu a uiga faka-Kelisiano, me ne fai ne ia a tino tali‵tonu mai fenua fakaa‵tea me e se ‵lei pelā mo Kelisiano Iutaia kolā ko oti ne pilitome. E ui i ei, ne lavea ‵lei ne te apositolo ko Paulo a te mea tenā​—e seai se fakakese‵kesega o tino i loto i te fakapotopotoga. Ne ‵se ‵ki eiloa te kilokiloga a Petelu. A koi tuai o faka‵mae ne te amioga a Petelu a te kautaina, ne polopoloki ‵tonu atu eiloa a Paulo ki mata o Petelu. (Kala. 2:11-14) E mata, a te pakiakia masei o te loto o Petelu i te fakamatamata ne fakagata aka i ei a tena tele ke maua a te ola? Ikai. Ne mafaufau ‵loto tou tagata ki te polopolokiga a Paulo, fakagalue aka ne ia, kae tumau eiloa i te fakatautelega.

13. E mafai pefea o fai a masaki o te foitino e pelā me se mea e ‵siga i ei tatou?

¹³ I nisi taimi, a ‵tou vāivāiga totino e fakalagolago ki te malosi o ‵tou foitino. E mafai foki o fai a te mea tenei e pelā me se mea e ‵siga i ei tatou. Kāti e fakalavelave mai ki te ga‵solo o tatou ki mua i te feitu faka-te-agaga kae fai foki ei tatou ke takase‵se kae fi‵ta. E pelā me se fakaakoakoga, e 17 tausaga ne masaki malosi ei se tuagane i Tiapani i te otiga ne papatiso. Ona ko tena masaki, ne gasolo ifo ei tou fafine o vāivāi i te feitu faka-te-agaga. Ne seki leva, kae mate a ia i te feitu faka-te-agaga. Ne āsi atu ki tou fafine a toeaina e tokolua. Ona ko fakamalosiga ne maua ne ia mai i lā pati atafai, ne kamata ei tou fafine o toe kau mai ki fakatasiga. E fai mai a ia, “au ne tagi ona ko taina ne fakafetaui mai ki a au mo te atafai.” Ko toe tele foki nei a ‵tou tuagane i te fakatautelega.

14, 15. Ne a mea e ‵tau o fai ne tatou māfai e oko mai a manakoga ma‵sei? Tuku mai se fakaakoakoga.

¹⁴ E tokouke a tino ko oti ne ‵siga i manakoga o te foitino. Kafai ko fakaosoosogina tatou i te auala tenei, e ‵tau o ma‵losi tatou o tausi ‵tou mafaufau, amioga ‵lei, mo te feitu faka-te-agaga ke ‵ma. Masaua a pati a Iesu ke “‵pei kea‵tea” i se auala fakatusa so se mea telā e mafai o ‵siga tatou i ei, ke oko foki ki ‵tou mata io me ko ‵tou lima. E mata, e se aofia i ei a mafaufauga mo faifaiga ma‵sei kolā ne fai ei ke ‵to a nisi tino ki tua mo te fakatautelega?​—Faitau te Mataio 5:29, 30.

¹⁵ Ne tusi mai te taina e tokotasi telā ne puti aka i se kāiga Kelisiano me e masaua ne ia tena taumafaiga ke fakatakavale a tena vāivāiga ko te fiafai ki tāgata. Ana muna: “Ne ma‵sei faeloa oku lagonaga. Ne foliga mai i a au e ‵kese ‵ki eiloa.” I te taimi ko 20 ei ana tausaga, ne fai a ia mo fai se paenia tumau kae se tavini fesoasoani i te fakapotopotoga. I te taimi tenā ne siga masei eiloa tou tagata, polopoloki ‵mafa, kae fesoasoani atu a toeaina ki tou tagata. E auala i te ‵talo atu, sukesuke ki te Muna a te Atua, kae saga tonu o fesoasoani atu ki nisi tino, ne mafai ei o toe tele tou tagata i te fakatautelega. I tausaga fakamuli ifo, ne fai tonu mai tou tagata: “I nisi taimi koi oko mai eiloa ki a au a lagonaga konā, kae e se talia eiloa ne au ke takavale au i ei. Ko oti ne iloa ne au me ka se talia ne Ieova ke fakaosoosogina koe ke silia atu i te mea e mafai ne koe o agai ki ei. Tela la, au e talitonu me mafaufau te Atua me mafai ne au o manumalo i ei.” Ne toe fai mai te taina tenei: “A mea katoa kolā ne kufaki au i ei ka taui mai i te lalolagi fou. Tenā te mea e manako au ki ei! Ke oko atu ki te taimi tenā, ka tumau eiloa au i te taua.” Ne fakaiku aka ne tou tagata ke tumau eiloa a ia i te fakatautelega.

16, 17. (a) Se a te mea ne fesoasoani atu ki se taina e tokotasi telā ne manatu aka me ne se ‵tonu a faifaiga ne fai atu ki a ia? (e) Ko te mea ke se ‵siga tatou, se a te mea e ‵tau o ‵saga tonu tatou ki ei?

¹⁶ A faifaiga se ‵tonu e fai ne taina mo tuagane e mafai o fai pelā me ne mea e ‵siga ei tatou. I Falani, ne talitonu se toeaina mua me ne se ‵tonu a faifaiga ne fai atu ki a ia, kae ne kaitaua i ei tou tagata. A ko te ikuga, ne fakagata tena ‵kaufakatasi mo te fakapotopotoga kae vāivāi i te feitu faka-te-agaga. Ne āsi atu a toeaina e tokolua ki tou tagata kae fakalogo‵logo mo te loto malamalama ki tena fakamatalaga e uiga ki te mea telā ne tupu. Ne fakama‵losi atu lāua ki tou tagata ke tuku ki a Ieova a te mea telā e ‵mafa ki a ia kae faka‵mafa atu ne lāua me i te ‵toe mea tāua ko te fakafiafia atu ki te Atua. Ne talia faka‵lei ne tou tagata kae toe foki mai ki te fakatautelega kae ko malosi ‵ki i mea fai a te fakapotopotoga.

¹⁷ E ‵tau mo Kelisiano katoa o ‵saga tonu atu ki te Ulu o te fakapotopotoga telā ne filifili aka, ko Iesu Keliso, kae e se ko tino sē ‵lei katoatoa. A Iesu, telā e fai ana mata e pelā me “se afi ‵ka ulaula,” e malamalama ‵lei atu i mea kolā e ‵tupu i loto i te fakapotopotoga i lō tatou. (Faka. 1:13-16) Pelā me se fakaakoakoga, e iloa ne ia a te mea telā e foliga mai pelā me se faifaiga sē tonu ne fai ki a tatou, kāti e pogai mai fua ona ko te sē malamalama o tatou io me fakauiga ‵se ne tatou. Ka faka‵tonu aka ne Iesu a fakalavelave i te fakapotopotoga i te auala ‵lei katoatoa kae i te taimi tonu. Tela la, e se ‵tau o talia ne tatou a faifaiga io me ko fakaikuga mai i so se taina io me se tuagane ke fakavāivāi mai kia tatou.

18. E mafai pefea o tumau tatou i te fakamaoni i taimi o fakalavelave mo fakasauaga?

¹⁸ A nisi mea e lua kolā e mafai o ‵siga tatou i ei ko fakalavelave io me ko fakasauaga mo te tulaga sē ‵lei katoatoa o nisi tino i te fakapotopotoga. I tena tala fakatusa e uiga ki te tino ‵toki fuaga, ne fakaasi mai i ei ne Iesu me ka ‵siga a nisi tino i “fakalavelave mo fakasauaga” ona ko te muna. Faitalia me e māfua mai i fea te fakasauaga tenā​—mai i kāiga, tuakoi, io me ko tino pule i te malo​—kāti e pokotia eiloa i ei a te tino telā “e seai ne ana aka ne ‵lave ki lalo,” telā e vāivāi a tena feitu faka-te-agaga. (Mata. 13:21) Kae kafai e fakaiku aka ne tatou ke tumau i te munatonu, ka fesoasoani mai a fuaga o te Malo ke ‵lave ki lalo a aka o ‵tou fakatuanaki. Kafai e fepaki koe mo tofotofoga, taumafai o mafaufau ‵loto i te faiga o ‵talo e uiga ki mea kolā e maua mai i ei a vikiga. (Faitau te Filipi 4:6-9.) Ka tuku mai ne Ieova a te malosi ki a tatou ke tumau i te fakamaoni i taimi o tofotofoga ko te mea ke se ‵siga tatou.

19. Kafai e fai ne se tino se mea e ita ei tatou, e mafai pefea o sē ‵siga tatou i ei?

¹⁹ Se mea fakafanoanoa me ne talia ne nisi tino a te tulaga se ‵lei katoatoa o nisi tino ke fai ei latou ke ‵to ki tua mo te fakatautelega i te fia o tausaga. Ne ‵siga a nisi tino ona ko te kese‵kese o olotou loto lagona. (1 Koli. 8:12, 13) Kafai e fai ne se tino se mea e ita ei tatou, e mata, ka talia ne tatou a te mea nei ke fai pelā me se mea lasi? E fakatonu mai te Tusi Tapu ki Kelisiano ke fakagata te fakamasino atu, ke fakamagalo atu a nisi tino, kae ke mo a e saga ifo ki a koe eiloa. (Luka 6:37) Kafai e fepaki koe mo se mea penā, fesili ifo ki a koe eiloa: ‘E mata, e fakamasino fua ne au a nisi tino e ‵tusa mo te mea telā e manako au ki ei? Ona ko te mea e iloa ne au i oku taina e se ‵lei katoatoa, e mata, ka talia ne au a te tulaga se ‵lei katoatoa o se tino ke tapale ei au kea‵tea mai te fakatautelega ki te ola?’ E mafai o fesoasoani mai a te alofa ki a Ieova ke se talia ne tatou so se mea e fai mai ne te suā tino ke faka‵lave aka ei tatou mai te oko atu ki te laina fakaoti.

TELE MO TE KUFAKI ​—KE MO A E SIGA

20, 21. Se a te mea e fakaiku aka ne koe ke fai i te fakatautelega ki te ola se-gata-mai?

²⁰ E mata, e manako koe o “tele i te fakatautelega ki te fakaotiga”? (2 Timo. 4:7, 8) Ko tena uiga, a te sukesukega totino se mea e ‵tau o fai. Fakaaoga te Tusi Tapu mo ‵tou lōmiga ke fesoasoani atu ki a koe o fai au sukesukega, mafaufau ‵loto, kae fai ke iloa ne koe a mea kolā e mafai o siga koe i ei. Akai atu ki te agaga tapu ke tuku atu ki a koe a te malosi faka-te-agaga e manakogina ne koe. Masaua, e seai se tino tele e malaia i te fakatautelega ki te ola ona fua ko ia e siga sāle io me pakū i nisi taimi. E mafai eiloa ne ia o tu ki luga kae toe tele i te fakatautelega. Kāti e mafai foki o tauloto a ia mai mea kolā ne siga ei a ia, ko te mea ke mafai a ia o tele faka‵lei i te fakatautelega.

²¹ E fakamatala mai i te Tusi Tapu me i tino kolā e ‵kau i te fakatautelega ki te ola se-gata-mai e ‵tau o ma‵losi kae sē ‵pafu. E se ‵pau mo te sopo fua ki luga i se pasi telā e ave ne ia a tino i ei ke ‵sili. E ‵tau mo tatou o ‵tele i te fakatautelega ki te ola i a tatou eiloa. I te taimi e ‵tele ei tatou, ka fai a te “filemu” mai i a Ieova e pelā me se matagi mai i ‵tou tua. (Sala. 119:165) Ka tumau eiloa a ia o fesoasoani mai ki a tatou i te taimi nei kae tuku mai a fakamanuiaga se-gata-mai ki tino katoa kolā e fakaoti faka‵lei a te fakatautelega.​—Iako. 1:12.