TALI KI FESILI MAI TE TUSI TAPU

E mata, e mafai o fakamagalogina a ‵tou agasala?

E ‵tusa mo pati i te Tusi Tapu, a tino katoa ne tino agasala. Ne maua ne tatou a te manakoga ke fai agasala mai te tagata muamua, ko Atamu. Tela la, e fai ne tatou a mea ma‵sei i nisi taimi kae fakamuli ifo, ko sala‵mo ei i mea ne fai ne tatou. Ne ‵togi ‵tou agasala ne te Tama a te Atua, ko Iesu Keliso, me ne mate mō tatou. Ne fai ne tena taulaga togiola ke mafai o maua a te fakamagaloga. A te mea tenā se meaalofa mai te Atua.​—Faitau te Loma 3:​23, 24.

Ne fai ne nisi tino agasala matagā kae mafau‵fau me e mafai ne te Atua o fakamagalo olotou agasala. Se mea fakafiafia me e fai mai te Muna a te Atua: “Ko te toto o tena Tama ko Iesu ka faka‵ma ne ia tatou mai ‵tou agasala katoa.” (1 Ioane 1:7) E loto fiafia a Ieova o fakamagalo ‵tou agasala ke oko ki agasala matagā māfai e sala‵mo tonu tatou.​—Faitau te Isaia 1:18.

Se a te mea e ‵tau o fai ne tatou ko te mea ke fakamagalogina ‵tou agasala?

Kafai e ma‵nako tatou ke fakamagalo tatou ne Ieova te Atua, e ‵tau mo tatou o tauloto e uiga ki a ia​—ke malama‵lama i ana auala, tena takitakiga, mo mea e manako a ia ki ei. (Ioane 17:3) E alofa a Ieova o fakamagalo a latou kolā e sala‵mo ki olotou amioga ma‵sei kae taumafai o ‵fuli.​—Faitau te Galuega 3:19.

E se tō faigata ki a tatou a te mauaga o te taliaga a te Atua. E malamalama a Ieova i ‵tou vāivāiga. A ia e alofa fakamagalo kae atafai. E mata, e se fakamalosi aka koe ne tena alofa atafai ke fia tauloto ki auala e uke kolā e mafai o fakafiafia atu ki a ia?​—Faitau te Salamo 103:13, 14.