Ke Talitonu me ko Fakamagalo Koe ne Ieova

1-2. Ne a lagonaga e mafai o maua ne tino agasala kolā e salaˋmo tonu? (Onoono foki ki te ata i te ˋkava.)

NE ILOA ne te tupu ko Tavita a lagonaga sē ˋlei o se tino ona ko agasala ne fai ne ia i aso mua. (Sala. 40:12; 51:3; fakamatalaga mai luga) Ne fai ne ia a nisi agasala matagā i tena olaga. Kae ne fakaasi atu ne ia te salamō tonu, kae ne fakamagalo ne Ieova a ia. (2 Samu. 12:13) Ona ko te mea tenā, ne malamalama foki a Tavita i te fiafia telā e maua māfai ko fakamagalo ne Ieova a koe.—Sala. 32:1.

² E pelā mo Tavita, e mafai foki o maua ne tatou a te fiafia māfai ko fakamagalo tatou ne Ieova. Se fakamafanafanaga ke iloa atu me toka a Ieova o fakamagalo ˋtou agasala—ke oko foki loa ki agasala matagā—māfai e salaˋmo tonu tatou, fakaasi atu ˋtou agasala, kae fai te ˋtoe mea e mafai ke se toe fai! (Faata. 28:13; Galu. 26:20; 1 Ioa. 1:9) Kae e fakatalitonu mai ki a tatou me kafai e fakamagalo katoatoa ne ia a ˋtou agasala, e pelā eiloa me ne seki tupu a te mea tenā!—Eseki. 33:16.

3-4. Ne pefea lagonaga o se tuagane e tokotasi i te otiga ne papatiso, kae ne a mea ka sauˋtala tatou ki ei i te mataupu tenei?

³ Kae i nisi taimi, e faigata ki nisi tino ke taliˋtonu me ko oti ne fakamagalo latou ne Ieova. Mafaufau ki te mea ne tupu ki a Jennifer, telā ne tupu aka i loto i te munatonu. E pelā me se talavou, ne fai ne ia a amioga maˋsei kae ola i se olaga magalua. I tausaga fakamuli ifo, ne toe foki mai a ia ki a Ieova kae toka ˋlei ke papatiso. Ne fai mai a ia: “I aso mua, ne aofia faeloa au i amioga fakatauavaga sē ˋtau, konā, uiga kaitaua kae ˋsala atu ki tupe e uke. I toku mafaufau, ne iloa ne au me i te taimi ne akai atu au mō se fakamagaloga kae salamō, ne fai ne te taulaga a Keliso ke ˋmā au. Kae e se mafai eiloa o talitonu katoatoa toku loto me ko oti ne fakamagalogina au.”

⁴ E mata, e faigata ke fakatalitonu ne koe i tou loto me ko oti ne fakamagalo ne Ieova au mea ˋse i aso ko ˋteka? E manako a Ieova ke maua ne tatou se lagonaga tokagamalie ona ko tena fakamagaloga, e pelā eiloa mo lagonaga o Tavita i te otiga ne fakamagalo ne ia. I te mataupu tenei, ka sauˋtala tatou ki pogai ke taliˋtonu me ko oti ne fakamagalo tatou ne Ieova mo mea e mafai o fesoasoani mai ke fai tatou penā.

TE TĀUA KE TALIˋTONU KI TE FAKAMAGALOGA A IEOVA

5. Ne a mea e manako a Satani ke taliˋtonu tatou ki ei? Taku mai se fakaakoakoga.

⁵ Mai te taliˋtonu me ko oti ne fakamagalo tatou ne Ieova, e mafai o ˋkalo keaˋtea tatou mai te tosina atu ki se tasi o malei a Satani. Masaua me ka fai eiloa ne Satani so se mea e mafai ne ia o fai ke taofi aka ei tatou mai te tavini atu ki a Ieova. Ke manuia ana taumafaiga, e taumafai a Satani o fai ke taliˋtonu tatou me e se mafai o fakamagalogina ˋtou agasala. Mafaufau ki te tala o te tagata i Kolinito telā ne tapale keaˋtea mai te fakapotopotoga, ona ko amioga fakatauavaga sē ˋtau ne fai ne ia. (1 Koli. 5:​1, 5, 13) Fakamuli ifo, ne salamō a ia, kae ne manako a Satani ko tino i te fakapotopotoga ke sē loto fakamagalo—kae ke se talia ne latou a tou tagata ki te fakapotopotoga. Ne manako foki a Satani ke mafaufau a te tagata telā ko oti ne salamō me e se mafai a ia o fakamagalogina—ke “silia tena loto vāivāi ona ko te lasi o te fanoanoa” telā ka fai ei ke fakagata tena taviniga ki a Ieova. E seki mafuli eiloa a taumafaiga io me ko togafiti maˋsei a Satani. Kae e “maina ˋlei tatou i ana togafiti.”—2 Koli. 2:​5-11.

6. E mafai pefea o maua ne tatou se fakatapūga mai lagonaga sē ˋlei?

⁶ Mai te taliˋtonu me ko oti ne fakamagalo tatou ne Ieova, e mafai o maua ne tatou se fakatapūga mai lagonaga sē ˋlei. Kafai ko agasala tatou, e masani o maua ne tatou a lagonaga fanoaˋnoa. (Sala. 51:17) Se mea ˋlei eiloa tenā. Ka fakamalosi aka tatou ne ˋtou loto lagona ke gaˋsue o fakaˋtonu aka a ˋtou auala. (2 Koli. 7:​10, 11) Kae kafai koi maua eiloa ne tatou a lagonaga sē ˋlei faitalia me ko leva ne salaˋmo tatou ki ˋtou agasala, e mafai eiloa o tofotofogina tatou ke ˋfiu vave. Kafai e taliˋtonu tatou me ko oti ne fakamagalo ne Ieova tatou, e mafai eiloa o fakagata ne tatou a lagonaga sē ˋlei kolā ne maua ne tatou, ko mafai ei o tavini atu tatou ki a Ieova i te auala telā e manako a ia ki ei mo se loto lagona ˋma mo te fiafia lasi. (Ko. 1:​10, 11; 2 Timo. 1:3) Kae e mafai pefea o fakatalitonu ne tatou i ˋtou loto me ko oti ne fakamagalo ne te Atua tatou?

MEA E FESOASOANI MAI KE TALIˋTONU KI TE FAKAMAGALOGA A IEOVA

7-8. Ne fakamatala atu pefea ne Ieova a ia eiloa ki a Mose, kae se a te mea e mautinoa i a tatou? (Esoto 34:​6, 7)

⁷ Mafaufau ki te auala ne fakamatala atu ne Ieova a mea e uiga ki a ia eiloa. Mafaufau ki ana pati ne fai atu ki a Mose i te mauga o Sinai.a (Faitau te Esoto 34:​6, 7.) E tiga eiloa e uke a uiga ˋgali o Ieova, ne fai atu a ia ki a Mose me i a ia “se Atua alofa fakamagalo kae alofa atafai.” E mata, ka se fakamagalo ne se vaegā Atua penā, se tino tapuaki telā ne salamō tonu ki tena agasala? Ikai! A te mea tenā se faifaiga sē alofa kae masei—ko uiga kolā e se mafai o fakaasi mai ne Ieova.

⁸ E mafai o taliˋtonu tatou me kafai e fai mai a Ieova i a ia e alofa fakamagalo, a te mea tenā se mea tonu, me e se loi a ia. (Sala. 31:5) Tela la, e mafai o taliˋtonu tatou ki ana pati. Kafai e faigata ke fakapuli ne koe a lagonaga sē ˋlei ona ko agasala ne fai ne koe i aso ko ˋteka, ke fesili ifo penei: ‘E mata, e talitonu au me i a Ieova se Atua e alofa fakamagalo kae alofa atafai telā ka fakamagalo ne ia so se tino agasala telā e salamō? Tela la, e mata, e se ˋtau mo au o talitonu me ko oti ne fakamagalo ne ia au?’

9. Se a te mea e fakaasi mai i te Salamo 32:5 e uiga ki te auala e fakamagalo ne Ieova ˋtou agasala?

⁹ Mafaufau ˋloto ki pati a tino kolā ne fakaosofia ne Ieova ke tusi te Tusi Tapu, e uiga ki tena alofa fakamagalo. E pelā me se fakaakoakoga, mafaufau ki te auala ne fakamatala mai ne te tino tusitala o te Tusi Tapu ko Tavita, a te alofa fakamagalo o Ieova. (Faitau te Salamo 32:5.) Ne fai mai a Tavita: “Ne fakamagalo ne koe taku mea ˋse mo aku agasala.” A te pati Epelu telā ne ˋfuli ki te “fakamagalo” i fuaiupu konei, e fakauiga foki ki te “sau aka ki luga” io me “ave keaˋtea.” Tela la, i te fakamagaloga ne Ieova a Tavita, e pelā eiloa me ne sau aka ne ia ana agasala kae ave keaˋtea ne ia. Tenā ne maua ei ne Tavita se fakatapūga mai te amoga ˋmafa telā ne amo ne ia ona ko ana mea ˋse ne fai. (Sala. 32:​2-4) E mafai foki o maua ne tatou a lagonaga fiaˋfia penā. Kafai ko salaˋmo tonu tatou ki ˋtou mea ˋse ne fai, e se ˋtau eiloa o amo faeloa ne tatou a lagonaga sē ˋlei ona ko ˋtou agasala ne fai, me ko oti ne sau aka kae ave keaˋtea ne Ieova a agasala konā mai i a tatou.

10-11. Se a te mea e fakaasi mai i te pati ko te “toka o fakamagalo” e uiga ki a Ieova? (Salamo 86:5)

¹⁰ Faitau te Salamo 86:5. Ne fakasino atu a Tavita i ana pati konei me i a Ieova e “toka o fakamagalo.” E uiga ki te tugapati tenei, e fakamatala mai i se tusi faka-te-Tusi Tapu a mea e uiga ki a Ieova: “[A ia] se ‘tino fakamagalo’—ko tena ‘uiga’ eiloa tenā.” Kaia e uiga fakamagalo i ei a Ieova? E fakamatala mai te mea tenā i te suā vaega o te suā fuaiupu: “A koe e ˋfonu i te alofa fakamaoni ki a latou katoa kolā e kaˋlaga atu ki a koe.” E pelā mo mea ne tauloto ne tatou i te mataupu mai mua, e fakamalosi aka ne te alofa fakamaoni a Ieova ke ati aka ne ia se fesokotakiga ˋpili kae tumau mo ana tino tapuaki fakamaoni. Ona ko tena alofa fakamaoni, ka “toka a ia o fakamagalo” a tino agasala loto salaˋmo katoa. (Isa. 55:​7, fml.) Kafai e faigata ki a koe ke talitonu me ko oti ne fakamagalo koe ne te Atua, e mafai o fesili ifo koe penei: ‘E mata, e talitonu au me i a Ieova se Tino Fakamagalo—telā e toka o fakamagalo a tino salaˋmo katoa kolā e ˋsala atu ki a ia mō se fakamagaloga? Tela la, e mata, e se ˋtau o talitonu au me ko oti ne fakamagalo ne ia au, i te taimi ne tagi atu au ki a ia mō se fakamagaloga?’

¹¹ E mafai o maua ne tatou a fakamafanafanaga mai te iloa atu me e malamalama katoatoa a Ieova i ˋtou tulaga agasala. (Sala. 139:​1, 2) Ke onoono nei tatou ki pati a Tavita i te suā salamo, mo te auala e mafai o fesoasoani mai ei ki a tatou ke taliˋtonu me e manako a Ieova o fakamagalo tatou.

SA PULI A MEA KOLĀ E MASAUA NE IEOVA

12-13. Se a te mea e masaua ne Ieova kae e pefea ana faifaiga ki a tatou? (Salamo 103:14)

¹² Faitau te Salamo 103:14. Ne faipati a Tavita me i a Ieova e “masaua ne ia i a tatou ne ˋpefu.” Mai pati konā, ne fakamatala mai ne Tavita se pogai e tasi e toka ei a Ieova o fakamagalo a tino tapuaki loto salaˋmo: E iloa ˋlei ne ia a ˋtou tulaga agasala. Ke malamalama fakaˋlei i te mea tenei, ke onoono fakaˋlei tatou ki uiga o pati a Tavita.

¹³ E fai mai a Tavita me i a Ieova e “iloa ˋlei ne ia te auala ne faite ei tatou.” Ne faite ne ia a Atamu “mai te ˋpefu o te laukele” kae e iloa ˋlei ne ia me isi ne tapulā o tino ˋlei—e pelā me se fakaakoakoga, e manakogina ke ˋkai, ˋmoe kae māˋnava. (Kene. 2:7) Kae i te taimi ne agasala ei a Atamu mo Eva, ne toe fakaopoopo atu a nisi mea ki a lāua e pelā me ne ˋpefu. E pelā me ne tamaˋliki a lāua, ne faˋnau mai tatou mo te tulaga agasala, telā e fai ei ke fai ne tatou a mea ˋse. E iloa ˋlei ne Ieova a te mea tenā; kae i te taimi ne fai mai ei a Tavita me e “masaua” ne Ieova i a tatou ne faite mai te ˋpefu, ne fakauiga foki a ia me e iloa ne Ieova a ˋtou tulaga agasala, kae ka fakaasi mai faeloa ne ia te alofa atafai. E mafai o fakamatala atu ne tatou a uiga o pati a Tavita i te auala tenei. E iloa ne Ieova me ka fai ne tatou a mea ˋse i nisi taimi, kae kafai e lavea ne ia me e salaˋmo tonu tatou, e fakaasi mai ne ia te alofa fakamagalo, kae fakamagalo tatou.—Sala. 78:​38, 39.

14. (a) Ne fakamatala mai pefea ne Tavita te lasi o te alofa fakamagalo o Ieova? (Salamo 103:12) (e) Ne fakaasi mai pefea ne te fakaakoakoga a Tavita a te katoatoa o te alofa fakamagalo o Ieova? (Onoono ki te pokisi “Te Auala e Fakamagalo Kae Fakapuli ne Ieova a Agasala.”)

¹⁴ E pefea te lasi o te alofa fakamagalo o Ieova? (Faitau te Salamo 103:12.) E fai mai a Tavita me kafai e fakamagalo ne Ieova tatou, e ave keaˋtea ne Ia a ˋtou agasala “e pelā mo te ˋmao o te saegala mai te togala.” A te saegala ko te ˋtoe koga ˋmao eiloa mai te togala, e se mafai o fetaui a te avā feitu konei. Se a te mea e fakaasi mai i ei e uiga ki agasala kolā e fakamagalo ne Ieova? Ne fakatusa ne se tusi e tasi a te mea tenā i te auala tenei: “Kafai ko ave keaˋtea a te agasala tenei ke ˋmao ˋki, ko mautinoa ei i a tatou me i te manogi, so se māka io me ko mea e uiga ki te agasala tenā, ka ˋgalo katoatoa atu.” Mafaufau la—e mafai o masaua ne tatou se mea i aso mua ona ko tena manogi. Kae kafai e fakamagalo ne Ieova tatou, e pelā eiloa me ko seai se māka mo se manogi o te agasala tenā ka toe masaua ne ia ke fakasala ki ei tatou.—Eseki. 18:​21, 22; Galu. 3:19.

15. Ne a mea e mafai ne tatou o fai māfai koi tauave eiloa ne tatou a lagonaga sē ˋlei ona ko ˋtou agasala i aso ko ˋteka?

¹⁵ E fesoasoani mai pefea a pati a Tavita i te Salamo 103 ke taliˋtonu tatou me ko oti ne fakamagalo ne Ieova tatou? Kafai koi tumau eiloa i te tauave ne tatou a lagonaga sē ˋlei ona ko agasala ne fai i aso ko ˋteka, e mafai o fesili ifo tatou penei: ‘E mata, ko puli i a au a mea e masaua ne Ieova—ko puli i a au me e iloa ˋlei ne ia toku tulaga agasala kae ka fakamagalo ne ia se tino agasala loto salamō e pelā mo au? E mata, e masaua ne au a mea kolā e fakaiku aka ne Ieova ke fakapuli atu—e masaua ne au a agasala kolā ko oti ne fakamagalo ne ia, kae se toe fakasala ne ia au ona ko agasala konā?’ E se tausi ne Ieova a ˋtou agasala ne fai i aso ko ˋteka. E se ˋtau foki o fai tatou penā. (Sala. 130:3) Kafai e taliˋtonu tatou me ko oti ne fakamagalo ne Ieova tatou, ka mafai foki o fakamagalo ne tatou a tatou eiloa ona ko agasala ko ˋteka kae tumau i te gasolo ki mua i te taviniga ki a Ieova mo te fiaˋfia.

16. Taku mai se fakatusaga e uiga ki te fakamataku ke tauave a lagonaga sē ˋlei ona ko agasala ne fai i aso ko ˋteka. (Onoono foki ki te ata.)

¹⁶ Mafaufau ki se fakatusaga. A te tauave faeloa o lagonaga sē ˋlei ona ko agasala ne fai i aso ko ˋteka, e fai eiloa pelā mo te taumafai o fakatele se motoka ki mua kae kilokilo faeloa ki te kilo telā e ˋfuli ki tua. Se mea ˋlei ke kilo sāle ki te kilo, ke mafai o lavea ne koe a mea fakamaˋtaku mai ou tua. Kae ke fakatele fakaˋlei te motoka, e ˋtau o saga tonu atu koe ki te auala mai mua. I se auala tai ˋpau, e aoga foki ke mafauˋfau tatou ki mea ˋse ne fai ne tatou i aso ko ˋteka; e mafai o tauloto ne tatou se mea aoga mai i ei, kae fakamalosi aka foki i ei ˋtou fakaikuga ke mo a e toe fai ne tatou. Kae kafai e tumau faeloa i te mafauˋfau o tatou ki ˋtou mea ˋse ne fai i aso ko ˋteka, ka fai ne lagonaga sē ˋlei konā ke se uke ˋtou mea e fai i te taviniga ki te Atua. I lō te fai penā, ke na ˋsaga tonu atu fua tatou ki te auala i ˋtou mua. Ko olo atu nei tatou i te auala telā ka iku atu ki te ola i te lalolagi fou telā ne folafola mai ne te Atua, telā “ka se toe manatua i te mafaufau” a mea maˋsei kolā ne ˋtupu i aso ko ˋteka.—Isa. 65:17; Faata. 4:25.

KE FAKATALITONU FAELOA ˋTOU LOTO

17. Kaia e ˋtau o fakatalitonu faeloa ne tatou i ˋtou loto a te alofa mo te fakamagaloga a Ieova?

¹⁷ E ˋtau o fakatalitonu aka faeloa ne tatou i ˋtou loto a te alofa mo te fakamagaloga a Ieova. (1 Ioa. 3:​19, fml.) Kaia? Me ka se ˋfiu eiloa a Satani i ana taumafaiga ke fai ke taliˋtonu tatou me e se alofagina io me e se mafai o fakamagalo tatou ne Ieova. E tasi loa tena fakamoemoega—ke taofi te ˋtou taviniga ki a Ieova. E fakamoeˋmoe tatou me ka gasolo aka eiloa a taumafaiga ka fai ne Satani, me e iloa ne ia me ko toetoe tena taimi. (Faka. 12:12) E se ˋtau eiloa o talia ne tatou ke manumalo a ia!

18. Ne a mea e mafai ne koe o fai ke fakatalitonu aka ne koe i tou loto a te alofa mo te fakamagaloga a Ieova?

¹⁸ Ke fakamalosi aka tou loto talitonu ki te alofa o Ieova, fakagalue a manatu fesoasoani ne sauˋtala ki ei i te mataupu mai mua. Ke fakatalitonu aka i tou loto a te fakamagaloga a Ieova, mafaufau ki te auala ne fakamatala mai ne Ieova a mea e uiga ki a ia eiloa. Mafaufau ˋloto ki mea kolā ne fakaosofia ne ia a tino kolā ne tusi ne latou te Tusi Tapu, ke fai atu e uiga ki tena alofa fakamagalo. Ke mo a ma puli me e iloa ˋlei ne ia a tou tulaga agasala kae ka fakaasi atu ne ia te alofa fakamagalo ki a koe. Kae masaua me kafai e fakamagalo ne ia koe, e fakapuli katoatoa atu ne ia a te mea tenā. Kae e pelā mo te loto talitonu telā ne maua ne Tavita ona ko te alofa fakamagalo o Ieova, ka mafai foki o fai atu koe penei, “Fakafetai Ieova, mō te fakamagaloga o ‘aku mea ˋse mo aku agasala’!”—Sala. 32:5.