TALI KI FESILI MAI TE TUSI TAPU
Kaia e faigata ‵ki ei o maua a te filemu i te Lalolagi?
E lua a pogai tāua e fakaasi mai i te Tusi Tapu. A te mea muamua, e tigā eiloa ne fai ne tāgata a mea fakaofoofogia, ne seki faite latou ke mafai ne latou o fakatonutonu olotou auala i a latou eiloa. A te lua o mea, ko fuafuaga a tāgata ne seki taunu i “te lalolagi kātoa ko nofo mai lalo i te pule a te tino masei,” ko Satani te Tiapolo. Tela la, ne seki mafai o aumai ne taumafaiga a tāgata a te filemu ki te lalolagi.—Faitau te Ielemia 10:23; 1 Ioane 5:19.
Ne fai foki ne te uiga kaiū mo te fia maluga ke faigata o maua a te filemu i te lalolagi. Ko te malo fua telā e akoako ne ia a tino ke a‵lofa ki te mea tonu kae atafai atu te suā tino ki te suā tino ka aumai ne ia a te filemu ki te lalolagi.—Faitau te Isaia 32:17; 48:18, 22.
Ko oi ka aumai ne ia a te filemu ki te lalolagi?
Ko oti ne tauto a te Atua Malosi Katoatoa ke fakatu se malo ke pule mai ki tino katoa. Ka sui ne ia a malo o tāgata. (Tanielu 2:44) Ka pule mai a te Tama a te Atua, ko Iesu, e pelā me ko te Pelenise o te Filemu. Ka fakaseai ne ia amioga ma‵sei katoa mai te lalolagi kātoa kae akoako ki tino a te auala o te filemu.—Faitau te Isaia 9:6, 7; 11:4, 9.
Mai lalo i te fakatonuga a Iesu, ko leva ne fakaaoga ne te fia miliona o tino i te lalolagi kātoa a te Muna a te Atua, o akoako a tino ki te auala e fealofani ei latou mo nisi tino. Ko pili fua nei o maua a te filemu i te lalolagi.—Faitau te Isaia 2:3, 4; 54:13.