Ke Katoatoa Tou Loto Fakafetai Ki Uiga O Ieova

1. (a) Ne a uiga o Ieova e mafai o mafaufau ki ei se Kelisiano? (e) Ka aoga pefea ki a tatou a te sukesuke ki uiga o te Atua?

KAFAI koe e mafaufau ki uiga totino o Ieova, ne a uiga e mafaufau koe ki ei? E tokouke i a tatou e mafau‵fau ki te alofa, fai mea tonu, poto, mo te malosi. E iloa ne tatou me e uke a nisi uiga fakaofoofogia o Ieova. A te tonuga loa, e silia atu i te 40 o uiga kese‵kese o Ieova ko oti ne sau‵tala tatou ki ei i loto i ‵tou lōmiga. Mafaufau ki te uke o mea ‵tonu e tauloto ne koe e uiga ki a Ieova mai te faiga o ‵tou sukesukega totino io me ko sukesukega a te kāiga! I auala fea e maua ei ne tatou a mea aoga mai i se sukesukega penā? E mafai o fakamalosi aka i ei a ‵tou loto fakafetai ki ‵tou Tamana faka-te-lagi. I te suā feitu, ko te lasi o ‵tou loto fakafetai ki a Ieova, ko te malosi o ‵tou manakoga ke fakapili‵pili atu ki a ia kae fakaakoako ki a ia.—Iosu. 23:8; Sala. 73:28.

2. (a) Fai se faka‵tusaga ki te auala e mafai ei o fakamalosi aka a ‵tou loto fakafetai ki uiga o Ieova. (e) Ne a mea ka mafau‵fau tatou ki ei?

² Se a la te uiga ke “loto fakafetai” ki se mea? I te fakaaogaga ne tatou a te pati i konei, e fakauiga loa ki te fakatāua malosi o se mea. Kāti e fanofano malie eiloa o lasi a te loto fakafetai. Ke fai se fakatusa: A ‵tou loto fakafetai ki se meakai fou e gasolo aka eiloa o malosi māfai e ‵sogi muamua ne tatou a te manogi, ka oti ko tami ei ki vaega takitasi o te meakai, kae i te fakaotiga loa, ko ‵kuka ei ne tatou a te meakai. I se auala tai ‵pau, e fakamalosi aka ne tatou a ‵tou loto fakafetai ki se uiga o Ieova mai te tauloto ki ei, mafaufau ‵loto ki ei, kae fakaakoako ki ei i ‵tou olaga totino. (Efe. 5:1) A te aoga o te mataupu tenei mo mataupu e lua kolā e ‵soko mai ko te fakamalosiga o ‵tou loto fakafetai ki uiga o te Atua kolā e mafau‵fau tatou me e ma‵lalo ifo i ana uiga fakavae. Mai i uiga takitasi konei, ka mafau‵fau tatou ki fesili konei: Se a tena uiga? E fakaasi mai pefea ne Ieova? Kae e mafai pefea o fakaakoako tatou ki a Ieova i te fakaasiga o te uiga tenei?

A IEOVA E UIGA FAIGOFIE

3, 4. (a) E fakamatala atu pefea ne koe a te tino telā e uiga faigofie? (e) E fakatalitonu mai pefea ne Ieova ki a tatou i a ia e uiga faigofie?

³ Ke sau‵tala muamua tatou ki te uiga faigofie. E fakamatala atu pefea ne koe se tino telā e uiga faigofie? Kāti ka fai mai koe, ‘Se tino e mataalofa, e toka faeloa, kae faigofie o faipati ki ei.’ E mafai faeloa o iloa ne koe me ko te tino e uiga faigofie io me ikai mai te fakalogologo ki ana pati e fai kae onoono ki ana tāga, ana mata, mo nisi fakailoga aka.

⁴ E fakaasi mai pefea ne Ieova i a ia e uiga faigofie? E ui eiloa a ia ko te Mafuaga o te ‵tou ma‵tugā iunivesi lasi, e fakatalitonu mai ne Ieova ki a tatou me i a ia e loto fiafia kae loto finafinau o fakalogologo ki ‵tou ‵talo kae tali mai ne ia. (Faitau te Salamo 145:18; Isaia 30:18, 19.) E mafai o fai‵pati atu tatou ki te Atua i te leva telā e ma‵nako tatou ki ei i so se taimi io me i so se koga. E saoloto eiloa tatou o olo atu ki a ia, me iloa ne tatou me ka sē ita lele a ia mā fai tatou penā. (Sala. 65:2; Iako. 1:5) E fakamatala mai te Muna a te Atua e uiga ki a Ieova i tugāpati kolā e malamalama i ei a tino ke fakaasi mai i ei i a ia e manako ke olo atu a tino ki a ia. Pelā me se fakaakoakoga, ne tusi mai a te faisalamo ko Tavita me i “te Aliki [Ieova] e onoono faeloa” ki a tatou kae ko tena “lima e ola ei” tatou. (Sala. 34:15; 63:8) Ne fakatusa ne te pelofeta ko Isaia a Ieova ki se tausi mamoe, penei: “Ka fakamaopoopo mai ne ia a tamā mamoe kae tauave i ona lima; ka takitaki ne ia a mātua o mamoe mo te filemu.” (Isa. 40:11) Fakaataata fua i tou mafaufau! E manako a Ieova ke ‵pili atu tatou ki a ia e pelā me se tamā mamoe e puke i lima o se tausi mamoe alofa. E maua eiloa ne tatou se Tamana uiga faigofie! E mafai pefea o fakaakoako atu tatou ki a Ieova i te feitu tenei?

SE UIGA TĀUA ‵KI

5. Kaia e tāua ei ke uiga faigofie a toeaina?

⁵ Fakamuli nei, ne fesili atu ki Molimau loto finafinau mai koga kese‵kese penei, “Ko te uiga fea e fakatāua malosi ne koe i se toeaina?” Ne tali mai a te tokoukega o latou, “Ko te uiga faigofie.” E tonu, e ‵tau mo Kelisiano taki tokotasi o ati aka a te uiga tenā, kae e tāua atu la ko toeaina ke uiga faigofie. (Isa. 32:1, 2) I tena faipatiga ki te pogai ne mafaufau ei a ia i te uiga tenei e tāua ‵ki, ne fai mai se tuagane e tokotasi: “Ka mafai o maua ne tatou a mea aoga mai i nisi uiga ‵gali o se toeaina māfai fua tou tagata e uiga faigofie.” E lavea ne koe a te ‵tonu o te kilokiloga tenā? Kae se a la te mea e fai ei se tino ke uiga faigofie?

6. Se a te kī ki te uiga faigofie?

⁶ A te kī ki te uiga faigofie ko te fakaasiga o te fiafia tonu ki nisi tino. Kafai e atafai se toeaina ki nisi tino kae loto fiafia o fesoasoani ki a latou, ka lavea eiloa ne ana taina mo tuagane, e aofia i ei tamaliki. Muna a Carlos telā ko 12 ana tausaga: “Au ne nofo o kilokilo ki toeaina e kata‵kata kae matafiafia i te hall, kae ne fiafia au ki a latou ona ko te mea tenā.” E tonu, e se lava fua ke fai mai se toeaina i a ia e uiga faigofie, e ‵tau o fakaasi mai ne ia a te uiga tenā. (1 Ioa. 3:18) E mafai pefea o fai ne ia a te mea tenā?

7. Kaia e kamata sāle ei se sautalaga ona ko te pine o te fono, kae se a te akoakoga etauloto ne tatou mai i ei?

⁷ Mafaufau ki te fakatusaga tenei. Fakamuli nei, ne faka‵mau ne se taina a tena pine o te fono o te atufenua i tena toe fokiga i te vakalele ki tena fenua mai tua o te kauatuga ki se fono o te atufenua i te suā fenua. I te laveaga ne te tino galue o te vakalele a te pine mo pati i ei “Ke Oko Mai te Malo o te Atua!” ne fai atu tou tagata ki te taina, “Ao, fai ke oko mai—e ‵tau ke fai‵pati tāua ki nisi mea e uke e uiga ki te mea tenei.” Fakamuli ifo, ne sau‵tala lāua, kae ne talia fiafia ne te tino galue a ‵tou mekesini. E tokouke i a tatou ko oti ne fe‵paki mo tulaga tai ‵pau penā. Nei la, kaia e kamata sāle ei se sautalaga ona ko te pine o te fono? E pelā me fai atu i ei ki tino: “Fesokotaki mai ki a au. Fesili mai ki te koga e fano au ki ei.” A te pine se fakailoga matea telā e fakailoa atu ne ia ki tino me e loto fia‵fia tatou o fai‵pati atu ki a latou e uiga mo ‵tou talitonuga. I se auala tai ‵pau, e ma‵nako a toeaina Kelisiano o tuku atu se fakailoga matea telā e fakailoa atu ei ki olotou taina mo tuagane: “Sa ma‵taku o fesokotaki mai ki a au.” Ne a nisi fakailoga konā?

8. E fakailoa atu pefea ne toeaina a te lotou fia‵fia tonu ki nisi tino, kae e pokotia pefea a te fakapotopotoga i te mea tenā?

⁸ E kese‵kese a tu o atufenua, kae pelā mo te masani kafai e kata‵kata, fakatalofa, fakafetaui atu tatou ki ‵tou taina mo tuagane, e fakailoa atu ei ne tatou i a tatou e fia‵fia tonu ki a latou. Ko oi a tino e ‵tau o fai muamua ne latou a te mea tenei? Onoono ki te fakaakoakoga ne fai ne Iesu. E li‵poti mai a Mataio me i se maopoopoga fakatasi mo ana soko, “ne fanatu a Iesu kae faipati atu ki a latou.” (Mata. 28:18) E penā foki i aso nei, e ‵tau mo toeaina o mua o fai‵pati atu ki olotou taina mo tuagane. Ka pokotia pefea a te fakapotopotoga i te mea tenā? Muna a se tuagane paenia ko 88 ana tausaga: “A te mata kata‵kata mo pati fakamalosi loto e maua ne au mai i toeaina māfai au e ulu ki te Kingdom Hall, ne fai ei ke fiafia malosi au ki a latou.” Ne fai mai a te suā tuagane fakamaoni: “E mafai o kilo ki ei e pelā me se mea foliki, kae kafai e fakafetaui mai se toeaina ki a au mo te fakamisikata i te fakatasiga, e tāua ‵ki eiloa ki a au a te mea tenā.”

E UIGA FAIGOFIE KAE AVANOA

9, 10. (a) Se a te fakaakoakoga ‵lei e fai ne Ieova? (e) E mafai pefea ne toeaina o fakaavanoa a latou ki nisi tino?

⁹ E manino ‵lei, me e se faigofie ke fai‵pati mai a tino ki a tatou māfai a tatou e se avanoa. Ne fai ne Ieova se fakaakoakoga ‵lei i te feitu tenā. “A ia e se ‵mao mai i a tatou taki tokotasi.” (Galu. 17:27) E tasi te auala e fakaavanoa ei ne toeaina a latou eiloa ki nisi tino, ko te fakamāumāu ne taimi mai mua io me mai tua o fakatasiga a te fakapotopotoga o sau‵tala mo olotou taina mo tuagane—talavou mo tino ma‵tua. Muna a se taina paenia: “Kafai e ‵sili mai se toeaina me e a au kae faka‵tali ki taku tali, e mafaufau au i a au ko amanaiagina.” Ne fai mai se tuagane telā ko tai kātoa te 50 tausaga ne tavini ei ki a Ieova: “A toeaina kolā e fakaavanoa olotou taimi o fai‵pati mai ki a au mai tua o te fakatasiga e fai ei ke mafaufau au i a au e tāua.”

¹⁰ E malama‵lama tatou me e ‵tau foki mo toeaina o tausi atu ki nisi tiute. Kae e ‵tau o fai mo fai se fakamoemoega i fakatasiga ke ‵saga muamua atu ki mamoe.

A IEOVA E SE FAKAILOGA TINO

11, 12. (a) Se a te mea e se aofia i te sē fakailoga tino? (e) E fai pefea a Ieova mo fai se fakaakoakoga o te sē fakailoga tino mō tatou?

¹¹ A te sē fakailoga tino ko te suā uiga fakaofoofogia o Ieova. Se a te uiga ke sē fakailoga tino? E aofia i ei a te faka‵pau o tino katoa, e seai se fāpito io me se fakasino tino. E lua a vaega o te sē fakailoga tino: ko te kilokiloga mo faifaiga. Kaia e manakogina ei a te avā mea konei? Me kafai fua a te tino e se fakailoga tino i tena kilokiloga ka fai ei a ia ke sē fakailoga tino i ana faifaiga e fai ki tino katoa. I loto i Tusitusiga Tapu faka-Eleni, a te tugāpati ko te “e se fakailoga tino” e fakauiga tonu eiloa ki te sē fiafia ki te suā tino me e ‵lei atu i te suā tino. (Galu. 10:34) Tela la, a te tino e se fakailoga tino e fai ana faifaiga ki te tino ona ko ana uiga kae sē ona ko ana foliga i tua io me ko fakanofonofoga.

¹² A Ieova ko te ‵toe fakaakoakoga sili o te sē fakailoga tino. E fai mai a tena Muna me i a ia “e se fakailoga tino” kae “e galo i a ia te loto fakapito.” (Faitau te Galuega 10:34, 35; Teutelonome 10:17.) E fakaasi mai ne se fakalavelave ne sae aka i aso o Mose a te mea tenā.

13, 14. (a) Se a te fakalavelave ne fe‵paki mo tamaliki fa‵fine e tokolima a Selofeata? (e) Ne fakaasi mai pefea ne Ieova a te sē fakailoga tino?

¹³ Mai mua malie eiloa o ulu atu a te kau Isalaelu ki te Fenua o te Folafolaga, ne fe‵paki se tokolima tautāina e seki a‵vaga mo se fakalavelave. Se a te fakalavelave tenā? Ne iloa ne latou me isi se manafa o te lotou kāiga ne tuku ki te lotou tamana, e pelā mo nisi kāiga Isalaelu. (Nume. 26:52-55) E ui i ei, a te lotou tamana ko Selofeata, mai te matakāiga o Manase, ko oti ne mate. E ‵tusa mo te ‵tu, a tino e ‵tau o tuku ki ei a te laukele ko tamaliki ta‵gata a Selofeata, kae ko ana tama ne tamaliki fa‵fine fua. (Nume. 26:33) Ona ko te mea e seai se tamaliki tagata ke tuku ki ei a te laukele, e mata, e ‵tau o tuku a te laukele o te kāiga ki nisi kāiga kae tiakina i ei a tamaliki fa‵fine e aunoa mo se tofi o te kāiga?

¹⁴ Ne olo atu a te tokolima tautaina e seki a‵vaga ki a Mose kae fakamolemole atu ki tou tagata: “E iloa ne matou me e seai ne tama ta‵gata a te motou tamana, kae ai a ka sona ‵solo fua ei tena igoa?” Ne fakamolemole atu latou: “Aumai ne laukele ma matou mai laukele o kāiga o te motou tamana.” E mata, ne saga atu a Mose ki ei kae fai atu, ‘E seai se mea e mafai o fai ke ‵fuli ei a te tulafono tenā’? Ikai, “ne fakaasi atu ne Mose ki te Aliki [Ieova] a te fakatagi tenā a tama fa‵fine konā.” (Nume. 27:2-5) Se a la te ‵tali? Ne fai atu a Ieova ki a Mose: “A te fakatagi a tama fa‵fine a Selofeata se mea tonu; tuku ki a latou ne manafa mai laukele o kāiga o te lotou tamana. A te tofi o Selofeata ke tuku atu ki a latou.” E uke atu foki a mea ne fai ne Ieova. Ne fakatonu atu a ia ki a Mose ke aofia a te mea tenei i te tulafono: “Kafai e mate se tagata kae seai sena tama tagata, ko tena tama fafine e tuku ki ei ana mea.” (Nume. 27:6-8; Iosu. 17:1-6) Mai te taimi tenā o fano ki mua, ne maua ne fāfine Isalaelu katoa kolā e ‵pau olotou fakalavelave se puipuiga.

15. (a) E pefea a faifaiga a Ieova ki ana tino, maise eiloa a latou kolā e ‵tu i se tulaga vāivāi? (e) Ne a nisi tala i te Tusi Tapu e fakamatala mai i ei i a Ieova e se fakailoga tino?

¹⁵ Mafāga o fakaikuga atafai kae sē fakailoga tino! Ne āva a Ieova i ana faifaiga ne fai ki fāfine konei kolā ko ‵tu i se tulaga vāivāi, e pelā mo ana mea ne fai ki te kau Isalaelu. (Sala. 68:5) A te mea tenei se tala fua e tasi mai tala e uke i loto i te Tusi Tapu telā e fakamatala mai i ei i a Ieova e se fakailoga tino i ana faifaiga e fai ki ana tavini katoa.—1 Samu. 16:1-13; Galu. 10:30-35, 44-48.

E MAFAI O FAKAAKOAKO TATOU KI A IEOVA

16. E mafai pefea o ati aka kae fakamalosi ne tatou a ‵tou sē fakailoga tino?

¹⁶ E mafai pefea o fakaakoako atu tatou ki te sē fakailoga tino o Ieova? Masaua, me e lua a vaega o te sē fakailoga tino. Kafai fua e se fakailoga tino tatou ko mafai ei o sē fakailoga tino tatou i ‵tou faifaiga e fai ki nisi tino. E tonu, e ma‵natu aka a tatou katoa me e malamalama tatou i lagonaga o nisi tino kae sē fakailoga tino. Kāti ka lotomalie koe me e se faigofie faeloa ke iloa tonu ne tatou a ‵tou lagonaga totino e uiga ki nisi tino. Tela la, se a te mea e mafai ne tatou o fai ke iloa ne tatou i a tatou e se fakailoga tino? Ko ‵lei la, i te taimi ne fia iloa ei ne Iesu me ne a pati a tino e uiga ki a ia, ne fesili atu a ia ki ana taugasoa fakatuagagina: “Ne a muna a tino me ko oi au?” (Mata. 16:13, 14) Kaia e se tautali ei koe i a Iesu i te feitu tenā? E mafai ne koe o fesili atu ki se taugasoa telā e talitonu koe me ka fakaasi tonu atu ne ia māfai a te sē fakailoga tino se uiga masani o koe. Kafai e taku tonu atu ne ia me isi se fakailoga tino e lavea atu ona ko telega, tulaga, io me ko mea tau tupe, se a te mea e ‵tau o fai ne koe? ‵Talo malosi atu ki a Ieova e uiga ki ou lagonaga, o fakamolemole atu ki a ia ke fesoasoani mai ki a koe ke faka‵tonu aka a tau kilokiloga ko te mea ke fakaasi atu ne koe a tena sē fakailoga tino ki tino katoa.—Mata. 7:7; Ko. 3:10, 11.

17. I auala fea e mafai ei o fakaasi atu ne tatou a te sē fakailoga tino ki nisi tino?

¹⁷ I loto i te fakapotopotoga Kelisiano, e fakaasi atu ne tatou me e ma‵nako tatou o fakaakoako atu ki te sē fakailoga tino o Ieova mai te fakaasiatuga o te āva mo te alofa atafai ki ‵tou taina mo tuagane katoa. Pelā me se fakaakoakoga, e ‵kami ne tatou a taina mo tuagane kese‵kese katoa ke fakaasi atu a te uiga talimalo, e aofia i ei a latou kolā e ‵kese olotou tū mo tatou e penā foki a latou kolā e ma‵tiva, seai ne mātua, io me ko ‵mate olotou avaga. (Faitau te Kalatia 2:10; Iakopo 1:27.) I te galuega talai o te Malo, e talai atu tatou ki vaegā tino kese‵kese katoa, e aofia i ei a latou mai fenua fakaa‵tea. E fia‵fia eiloa tatou me e mafai o maua ne tatou a tusi faka-te-Tusi Tapu i ‵gana e nofo ki te 600. Se fakamaoniga mautinoa eiloa o te sē fakailoga tino!

18. Ka fakaasi atu pefea ne koe i a koe e loto fakafetai ki te uiga faigofie mo te sē fakailoga tino o Ieova?

¹⁸ E tonu, ko te lasi o te mafau‵fau o tatou ki te uiga faigofie mo te sē fakailoga tino o Ieova, ko te lasi o ‵tou loto fakafetai ki a ia. Ko te lasi o ‵tou loto fakafetai, ko te ma‵nako o tatou o fakaakoako katoatoa atu ki uiga o Ieova, kae fakaasi atu i ‵tou faifaiga ki taina mo tuagane mo latou kolā e talai tatou ki ei.