Fakaakoako ki a Ieova te Atua sē Fakailoga Tino

“I te Atua e sē fakailoga tino.”​—⁠LOMA 2:⁠11.

NE FAKALOGO‵LOGO faka‵lei a te kau Isalaelu ki a Mose i te taimi ne ‵nofo ei latou i te Koga Laugatasi o Moapi i te 1473 T.L.M. Ne fakafesagai atu latou ki se fakalavelave faigata i te suā feitu o te vaitafe ko te Iolitana. Ne folafola atu ne Mose te fuafuaga a Ieova me ka fakatakavale ne Isalaelu a malo ma‵losi e fitu o Kanana i te Fenua o te Folafolaga. Ko oko loa i te fakamalosi loto a pati a Mose, konei: “Kafai ko takavale a tino o fenua konā i a koutou mai i te fesoasoani o te Aliki te otou Atua, masaua me e ‵tau o tamate katoa ne koutou a tino o fenua konā”! E sē ‵tau mo te kau Isalaelu o fai se feagaiga mo latou io me faka‵sao ne latou ne tino mai i ei.​—⁠Teutelonome 1:​1; 7:⁠1, 2.

² Kae ne faka‵sao ne Ieova se kāiga e tasi mai te fa‵kai muamua telā ne fakamasei ne te kau Isalaelu. Ne maua foki ne nisi tino mai nisi fa‵kai e fa a te puipuiga a te Atua. Kaia ne fai ei ne ia te mea tenei? Se a te akoakoga e maua ne tatou mai te faka‵saoga o te kau Kanana konei ne Ieova? Kae e mafai pefea o fakaakoako atu tatou ki a ia?

Faifaiga a Nisi Tino Ona ko te Takutakua o Ieova

³ Ne puipui kae ne taua atu faeloa a Ieova mō ana tino i te 40 tausaga ne ‵nofo atu ei latou i te koga lavaki a koi tuai o ulu atu latou ki te Fenua o te Folafolaga. Ne taua atu te kau Isalaelu ki te tupu o Kanana ko Alata i te feitu ki saute o te Fenua o te Folafolaga. Ona ko te fesoasoani o Ieova, ne fakatakavale ei ne te kau Isalaelu a te tupu tenā fakatasi mo ana tino i Holema. (Numela 21:​1-3) Fakamuli ifo, ne ui atu te kau Isalaelu i tafatafa o Etoma kae faima‵laga atu ki te feitu ki mātū saegala o te Tai ‵Mate. Ne ‵nofo atu muamua i te kogā fenua tenā a tino Moapi kae ko ‵nofo atu nei i ei a tino Amoli. Ne seki talia ne te tupu o Amoli ko Sekono ke ui atu te kau Isalaelu i loto i te lotou fenua. Tenā ne taua ei latou i Iasa i te feitu ki mātū o te Vaitafe o Alinona, kae ne mate atu i ei a te tupu ko Sekono. (Numela 21:​23, 24; Teutelonome 2:​30-​33) E tai momea atu ki te feitu ki mātū, ko te fenua ko Pasana telā e pule i ei ne Oko a nisi tino Amoli. E ui eiloa a Oko se tino mafi ‵ki, ne seki mafai eiloa o fakatakavale ne ia a Ieova. Ne mate atu a Oko i Etelei. (Numela 21:​33-​35; Teutelonome 3:​1-3, 11) Ne fakamataku a tala o manumaloga konei fakatasi mo te faka‵saoga o te kau Isalaelu mai Aikupito ki tino kolā ne ‵nofo atu i Kanana.a

⁴ I te taimi ne ulu muamua atu ei a te kau Isalaelu ki Kanana i te otiga ne olo atu ki te suā feitu o te Iolitana, ne faka‵tu olotou faleie i Kilikala. (Iosua 4:​9-​19) E se ‵mao mai i konā ko te fa‵kai o Ieliko telā ne ‵pui faka‵lei. Ne fakamalosi atu a tala konā ne lagona ne Lahapa e uiga ki faifaiga a Ieova ke fakatuanaki ei ki a ia. Tela la, ne fakasao ne Ieova a Lahapa mo tena kāiga i te taimi ne fakamasei ei te fa‵kai ko Ieliko.​—⁠Iosua 2:​1-​13; 6:​17, 18; Iakopo 2:⁠25.

⁵ Fakamuli ifo, ne olo atu te kau Isalaelu ki te kogāloto o te fenua. Mai te faka‵logo ki fakatonuga a Ieova ne fakaaogā ne Iosua a auala faitogafiti kae ‵funa ke taua atu ki te fa‵kai ko Ai. (Iosua, mataupu e 8) Ona ko te manumalo o te kau Isalaelu i te fa‵kai ko Ai ne fakatokatoka ei a tupu e tokouke o Kanana ke taua atu. (Iosua 9:​1, 2) Kae ‵kese te mea ne fai ne tino Kipeona mai i Hivi telā e pili atu ki ei. E fai mai te Iosua 9:​4, penei: “Ne mafau‵fau ei latou o fakaloiloi a Iosua.” E pelā mo Lahapa, ne ‵logo foki latou i te faka‵saoga o te kau Isalaelu mai Aikupito mo te lotou manumalo i a Sekono mo Oko. (Iosua 9:​6-​10) Ne iloa ne te kau Kipeona me seai se aogā ke taua atu latou. Telā ne uga atu ei ne latou se potukau​—⁠e pelā me ne sui o tino Kipeona mo nisi fa‵kai ‵pili mai e tolu ko Kafila, Pelota mo Kiliata Iealima​—⁠ki a Iosua i Kilikala kae ‵pei ki gatu masae‵sae kae fakaloiloi atu i a latou ne aumai mai se koga ‵mao ‵ki. Ne aogā eiloa te lotou faifaiga tenā. Ne fai ne Iosua se feagaiga mo latou kae ne faka‵sao ei latou. I te tolu o aso mai tua ifo ne iloa aka ne Iosua mo te kau Isalaelu me ne fakaloiloi fua latou ne tino konā. Kae ne ‵tau o tausi latou ki te lotou feagaiga telā ne fai i te igoa o Ieova. (Iosua 9:​16-19) E mata, ne talia ne Ieova te mea tenā?

⁶ Ona ko te mea tenā ne ‵kati faeloa ne te kau Kipeona a fafie kae āsu a vai mō tino Isalaelu pelā foki mo “te fatafaitaulaga a te Aliki” i te faletapu. (Iosua 9:​21-​27) E se gata i ei, i te taimi ne fakamatakutaku ei a te kau Kipeona ne tupu e tokolima mai Amoli ne puipui ne Ieova latou i se auala fakaofoofogia. E tokouke atu a fili o latou ne ‵mate i te vaiua fatu i lō te kau a Iosua. Ne tali atu foki a Ieova ki te fakamolemole a Iosua ke sē fakagasue a te la mo te masina ko te mea ke fakaoti faka‵lei te lotou taua. Ne fai mai Iosua, penei: “E seai eiloa se aso penā mai ana mua, e seai foki se aso penā talu mai te aso tenā, ne fakalogo ei te Aliki ki se tino ola. A te Aliki ne kau eiloa ki tino Isalaelu!​—⁠Iosua 10:​1-14.

⁷ Ne ma‵taku a Lahapa mo tena kāiga, e penā foki te kau Kipeona ki a Ieova kae ne gasue‵sue fakavave latou i ei. Ne fakaasi faka‵lei mai ne mea kolā ne ‵tupu ki a latou a te ‵tonu o pati a te apositolo Kelisiano ko Petelu, penei: “I te Atua e sē fakailoga tino. So se tino o so se fenua e mataku ki te Atua, kae amiotonu foki, e talia faeloa a ia ne te Atua.”​—⁠Galuega 10:​34, 35.

Ana Faifaiga ki a Apelaamo mo te Kau Isalaelu

⁸ Ne fakaasi mai ne te soko ko Iakopo a te alofa kaimalie o te Atua i Ana faifaiga ki a Apelaamo mo tena gafa. Ne fai a Apelaamo e pelā me ‘se taugasoa o Ieova’ ona ko tena fakatuanaki kae sē ona ko tena gafa. (Iakopo 2:23) Mai tena fakatuanaki mo tena alofa ki a Ieova ne maua i ei ne tena gafa a fakamanuiaga. (2 Nofoaiga Tupu 20:⁠7) Ne folafola atu Ieova ki a Apelaamo, penei: “Telā ko tauto ei au me ka fakatokouke ne au tou gafa ke pelā mo te uke o fetu i te lagi io me ko one i te matafaga.” Kae e fai mai te suā fuaiupu, penei: “Ka ka‵laga mai katoa a malo ki a au ke fakamanuia atu a latou e pelā mo te fakamanuiaga ne au a tou gafa.”​—⁠Kenese 22:​17, 18; Loma 4:​1-8.

⁹ I lō te fakailoga tino, ne fakaasi mai ne Ieova i ana faifaiga ki te kau Isalaelu a mea e mafai o fai ne ia ki tino kolā e faka‵logo ki a ia. E fakaasi mai i ei se fakaakoakoga o te alofa fakamaoni telā e mafai o fakaasi atu ne Ieova ki ana tavini fakamaoni. E ui eiloa ne fai a te kau Isalaelu e pelā me ko “oku tino,” e sē fakauiga i ei me e sē mafai o maua ne nisi tino a mea ‵lei mai i te Atua. (Esoto 19:5; Teutelonome 7:​6-8) E tonu, ne faka‵sao ne Ieova te kau Isalaelu mai te ‵nofo pologa ki te kau Aikupito kae folafola mai a ia, penei: “I malo katoa o te lalolagi, ko koutou fua te fenua e tasi ne tausi kae iloa ‵lei foki ne au.” Kae auala i te pelofeta ko Amosa mo nisi tino, ne folafola mai foki ne Ieova se fakamoemoega gali mō tino i “fenua katoa.”​—⁠Amosa 3:2; 9:​11, 12; Isaia 2:​2-4.

Iesu, te Faiakoga sē Fakailoga Tino

¹⁰ Ne seki fakailoga tino eiloa Iesu, telā ko te sui o tena Tamana, i te faiga o tena galuega i te lalolagi. (Epelu 1:⁠3) A te mea muamua e ‵tau o fai ne ia i te taimi tenā ko te ‵sala atu “ki mamoe ‵galo o te kāiga o Isalaelu.” Kae ne seki fakatalave a ia mai te talai atu ki te fafine Samalia i te vaikeli. (Mataio 15:24; Ioane 4:​7-30) Ne fai foki ne ia se vavega ona ko te fakamolemole a se takitaki o kautau telā e sē se tino Iutaia. (Luka 7:​1-10) Ne fai ne ia a mea konā fakatasi mo te fakaasiatuga o tena alofa e auala i ana faifaiga ki tino o te Atua. Ne talai atu foki a soko o Iesu i fenua ‵mao. Tela la, ne manino mai i ei me e maua ne tatou a fakamanuiaga mai i a Ieova ona ko ‵tou faifaiga kae sē ko te fenua ne o‵mai ei tatou. Ne ‵saga atu a tino loto maulalo kae fakamaoni ki te tala ‵lei o te Malo. E ‵kese mai i ei, ne takalia‵lia a tino fakamata‵mata kae fia‵sili ki a Iesu mo tena fekau. Ne folafola mai Iesu, penei: “Toku Tamana, te Aliki o te lagi mo te lalolagi! Au e fakafetai atu ki a koe, i te mea ko fakaasi ne koe ki tino seki akoakogina, a mea kolā ne ‵funa ne koe mai tino ‵poto mo tino kolā ne a‵koga. Tamana, e tonu ne fai ne koe a te mea tenei ki tau filifiliga mō te mea ko loto malie koe ki ei.” (Luka 10:21) Kafai e fai ne tatou a faifaiga ‵lei ki nisi tino ona ko te alofa mo te fakatuanaki e fakaasi atu i ei te sē fakailoga tino me iloa ne tatou me e fiafia a Ieova ki ei.

¹¹ Ne ‵pau eiloa a tino Iutaia mo tino e sē ne Iutaia i te fakapotopotoga Kelisiano i aso mua. Ne fai mai a Paulo, penei: “Ka ko te vikiga, te ‵malu mo te filemu, e o tino katoa kolā e fai mea ‵lei, e muamua te Iutaia kae tafa atu te Eleni. Me i te Atua e sē fakailoga tino.”b (Loma 2:​10, 11) E sē fakavae a te mauaga ne latou te alofa kaimalie o Ieova ki te fenua ne o‵mai ei latou, kae mai te lotou ‵saga tonu atu ki mea kolā ko iloa ne latou e uiga ki a Ieova mo te fakamoemoega telā ne tuku mai e auala i te taulaga togiola a tena tama, ko Iesu. (Ioane 3:​16, 36) Ne tusi mai a Paulo, penei: “A te Iutaia tonu, e sē ko ia telā e lavea atu ki mata, i te mea a te pilitome tonu, se mea fua i tua o te pa‵kili kae lavea foki ki mata. A te Iutaia tonu, ko ia telā e lagona tonu ne ia i tona loto, me i te pilitome tonu se mea tau te loto, se mea faka te Agaga, kae se se mea o te tulafono tusia.” Kae mai te fakaaogāga ne ia o te tugāpati ko te “Iutaia” (telā ko “tino Iuta,” kae fakauiga ki vikiga mo tavaega), ne toe fai mai a Paulo, penei: “A tena vikiga e sē mai i tino kae mai i te Atua.” (Loma 2:​28, 29) E sē fakailoga tino a Ieova i te avatuga ne ia o vikiga. E mata, e fai foki tatou penā?

¹² Fakamuli ifo ne lavea ne te apositolo ko Ioane i se fakaasiga, a Kelisiano fakamaoni kolā ko oti ne fakaekegina e pelā me ko te fenua faka-te-agaga o te 144,000, ‘kolā ne fakamailoga mai matakāiga katoa o Isalaelu.’ Fakamuli ifo, ne lavea foki ne Ioane a te “vaitino tokouke . . . Ne o‵mai katoa mai fenua katoa, matakāiga, tino valevale, ‵gana, kae ‵tu i mua o te nofogaaliki, pelā foki i mua o te Tamā Mamoe, e ‵pei katoa ki gatu ‵kena, kae puke a lau o pāma i olotou lima.” (Fakaasiga 7:​4, 9) Tela la, e maua atu i te fakapotopotoga Kelisiano i aso nei a tino mai potukau mo ‵gana kese‵kese. Ko maua ne tino taki tokotasi mai fenua kese‵kese a te fakamoemoega ke ‵sao i te “fakasauāga lasi” kae ka inu ei latou i te “vai ‵puna o te ola” i te lalolagi fou.​—⁠Fakaasiga 7:​14-17.

Ikuga ‵Lei

¹³ E iloa ‵lei ne Ieova a tatou, e pelā eiloa mo te tamana alofa telā e iloa ne ia ana tama‵liki. I se auala tai ‵pau, kafai e fia‵fia tatou ki tu mo aganū mo te fenua ne o‵mai ei a nisi tino, ka iloa ‵lei ne tatou latou kae e fai ei ke seai se va masei o tatou mo latou. Ka gasolo o ‵lei te va o tatou kae fakamalosi aka ei te fealofani, te alofa penā foki mo te fia ‵kau fakatasi. (1 Kolinito 9:​19-23) E lavea atu ne tatou a te mea tenei mai faifaiga kolā e fai ne misionale i fenua fakaa‵tea kolā e ga‵lue i ei latou. E fia‵fia latou ki tino kolā e ola i fenua konā kae fakamuli ifo ko iloa aka i ei me e mafai o ola fealofani latou mo tino i fakapotopotoga i fenua konā.​—⁠Filipi 2:⁠4.

¹⁴ E lavea atu a ikuga ‵lei o te sē fakailoga tino i fenua e uke. Ne seki fiafia a Aklilu, se tagata Aitiope i te taimi muamua ne fanatu ei a ia ki Lonitona, te laumua o Peletania. Ne momea aka tena sē fiafia ona ko te sē fealofani o tino i ei mo tino mai nisi fenua, se mea telā ko masani ki ei a tino i fa‵kai ‵lasi o Eulopa. Kae ne lavea ne Aklilu te ‵kese o te mea tenā i te taimi ne kau atu ei a ia ki te fakatasiga Kelisiano a Molimau a Ieova i te Kingdom Hall! Ne olo atu a tino katoa i konā o fakatalofa ki a ia kae seki leva ne lagona ne ia te fiafia tonu. Ne gasolo vave atu a ia ki mua i te fakaasiatuga o tena loto fakafetai ki te Atua. Fakamuli ifo ne ‵sala a ia ki avanoaga ke mafai o kau atu a ia ki te folafolaatuga o te tala ‵lei o te Malo ki nisi tino i te kogā koga tenā. I te aso e tasi, ne fesili atu tena taugasoa telā ne ga‵lue tasi laua i te galuega talai me ne a ana fakamoemoega mō aso mai mua. Ne tali fakavave atu a Aklilu me fakamoemoe a ia ke kau atu ki se fakapotopotoga telā e fai‵pati ki tena ‵gana, telā ko te ‵gana Amharic. I te taimi ne iloa ei ne toeaina o te fakapotopotoga i te ‵gana Palagi a te mea tenā, ne fakatoka fakavave ne latou se lauga faka-te-Tusi Tapu ke fai i te ‵gana a Aklilu. Ne ‵kau mai a tino e tokouke mai nisi fenua pelā foki mo tino loa o te fenua ke fakalogo‵logo ki te lauga muamua telā ne fai i te ‵gana Amharic i Peletania. Nei la, ko ‵kau fakatasi a tino Aitiope mo nisi tino aka i se fakapotopotoga i te ‵gana Amharic. Ko oti ne iloa ne tino e tokouke i konā me seai se mea e taofi aka ei latou mai te fakaasiatuga o te lotou tulaga mō Ieova kae ‵tau o fai penā mai te papatisoga faka-Kelisiano.​—⁠Galuega 8:​26-36.

¹⁵ E kese‵kese a uiga mo tulaga o tino. Kae e sē tenā eiloa te auala ke iloa aka ei te ma‵luga io me ko te ma‵lalo o latou. I te taimi ne fai ei te papatisoga o tavini ‵fou a Ieova i Mileta, ne ‵pau eiloa a te fiafia telā ne maua ne Molimau i konā mo loimata o te fiafia kolā ne ‵sali ifo i mata o tino ‵fou i Peletania. Ne fakaasi kae ne fakamalosi aka ei latou ne te lotou a‵lofa ki a Ieova a te lotou fealofani faka-Kelisiano.​—⁠Salamo 133:1; Kolose 3:14.

Ke Manumalo i te Uiga ko te Takalialia ki Nisi Tino

¹⁶ I te momea aka o te ‵tou a‵lofa ki a Ieova mo taina Kelisiano, e mafai ei o tai fakapili‵pili atu tatou ki a Ieova i ‵tou kilokiloga ki nisi tino. Ko mafai ei o fakaseai ne tatou a te takalialia telā ne ‵nofo muamua mo tatou ki nisi fenua, matakāiga io me ko tu mo aganū. Ke mafau‵fau ki te tala o Alapati telā ne taua atu i te Kautau a Peletania i te Taua i te Lua a te Lalolagi kae ne puke fakapagota ne te kau Tiapani i te taimi ne puke ei ne latou a Singapore i te 1942. Ne galue fakamuli a ia mō tausaga e tolu i te faitega o te auala fakamataku o tuleni i tafa o te piliti telā e tele mai luga o te vaitafe ko te Kwai. I te otiga o te taua ne fakasaoloto ei a ia, kae ne oko atu tena ‵mafa ki te 32 kilo, ne fati tena ivi kauvae mo tena isu, ne maua a ia ne te ‵sanatoto, te lafa mo te malalia. E sili atu te masei o te tulaga ne oko ki nisi pagota; kae ne ‵mate atu i ei a nisi tino e tokouke. Ona ko mea ma‵sei katoa kolā ne lavea kae ne oko atu ki a Alapati, ne foki atu a ia ki tena fenua i te 1945 e pelā me se tagata kaitaua valevale kae sē fiafia lele eiloa ki te Atua io me ko lotu.

¹⁷ Ne fai a te avaga a Alapati ko Irene e pelā me se Molimau a Ieova. Ko te mea ke fakafiafia atu ki tena avaga, ne kau atu sāle a Alapati ki fakatasiga a te fakapotopotoga a Molimau a Ieova. Ne āsi atu a Paulo, se talavou Kelisiano telā e galue i te taviniga tumau, ki a Alapati ke suke‵suke fakatasi laua ki te Tusi Tapu. Ne iloa fakamuli ei ne Alapati me e kilo atu a Ieova ki tino taki tokotasi e ‵tusa mo mea i olotou loto. Ne tuku atu ne ia tena ola ki a Ieova kae ne papatiso i ei a ia.

¹⁸ Fakamuli ifo ne fano a Paulo ki Lonitona, ne tauloto ki te ‵gana Tiapani kae kau atu ki te fakapotopotoga telā e fai‵pati ki te ‵gana Tiapani. I te taimi ne fai atu ei a ia ki Molimau i Tiapani ke āsi atu ki tena fakapotopotoga mua, ne masaua ne taina konā a te lasi o te takalialia o Alapati ki tino Tiapani. Talu mai te taimi ne foki atu ei a ia ki Peletania, ne seki fia fetaui eiloa a Alapati mo so se tino Tiapani, tela la, ne mafau‵fau a taina me ka fakafesagai atu pefea a ia ki a latou. Ne seki ‵tau o manava‵se latou​—⁠ne talimālō faka‵lei ne Alapati latou e pelā eiloa me ne ana taina.​—⁠1 Petelu 3:​8, 9.

‘Fakalauefa Atu Tou Alofa’

¹⁹ Ne tusi mai a te Tupu ko Solomona, penei: “A te fapito se mea masei.” (Faataoto 28:21) Se mea faigofie ke momea aka te ‵pili o ‵tou va mo tino kolā e masani ‵lei tatou. I nisi taimi e sē fia fai‵pati atu tatou ki tino kolā e sē iloa ‵lei ne tatou. E sē ‵tau o fakailoga tino a tavini a Ieova. Tela la, e ‵tau o tau‵tali atu tatou ki pati polopoloki a Paulo ke ‘fakalauefa atu’​—⁠e tonu, ke fakalauefa atu tou alofa ki nisi Kelisiano mai matakāiga kese‵kese.​—⁠2 Kolinito 6:13.

²⁰ Faitalia me maua ne tatou te tauliaga ke ola i te lagi io me ko te fakamoemoega ke ola i te lalolagi ki te se-gata-mai, ka fia‵fia eiloa tatou o ‵kau fakatasi mo te lafu mamoe e tasi telā e tokotasi tena Tausi Mamoe, māfai e sē fakailoga tino tatou. (Efeso 4:​4, 5, 16) A te fakaakoako atu faeloa ki te uiga sē fakailoga tino o te Atua i te faiga o te galuega faka-Kelisiano, i ‵tou kāiga, i te fakapotopotoga mo feitu katoa o te olaga ka fesoasoani malosi mai ki a tatou. E pefea la? Ka fakamatala mai i te suā mataupu a te mea tenei.

[Fakamatalaga mai lalo]

Se a Tau Tali?

• Ne fakaasi atu pefea ne Ieova te sē fakailoga tino ki a Lahapa mo te kau Kipeona?

• Ne fakaasi atu pefea ne Iesu te sē fakailoga tino i ana akoakoga?

• Se a te mea e fesoasoani mai i ei ke manumalo tatou i te takalialia ki tino mai nisi fenua mo matakāiga?

[Fesili mo te Sukesukega]

1, 2. (a) Se a te fuafuaga a Ieova mō tino Kanana katoa? (e) Ne a mea ne fai ne Ieova, kae ne a fesili e ‵sae aka i ei?

3, 4. Ne ‵saga atu pefea a nisi tino i Kanana ki tala e uiga ki te manumalo o te kau Isalaelu?

5. Se a te mea ne fakamalosi atu ki te kau Kipeona ke fakaloiloi ne latou te kau Isalaelu?

6. Ne saga atu pefea a Ieova ki te feagaiga telā ne fai ne Iosua mo te kau Kipeona?

7. Ne fakaasi faka‵lei mai pefea ne mea kolā ne ‵tupu ki nisi tino Kanana a te ‵tonu o pati a Petelu?

8, 9. E fakaasi mai pefea a te sē fakailoga tino o Ieova i ana faifaiga ki a Apelaamo mo te fenua o Isalaelu?

10. Ne fakaakoako pefea a Iesu ki tena Tamana mai te fakaasi atu o te sē fakailoga tino?

11. Ne fakaasi mai pefea ne te fakapotopotoga Kelisiano i aso mua a te sē fakailoga tino?

12. Se a te fakamoemoega telā e tuku mai i te Fakaasiga 7:9 kae ko oi ka maua ne latou?

13-15. (a) E ‵kalo keatea pefea tatou mai te fia fakakese‵kese ona ko fenua mo tu mo aganū? (e) Ke taku mai ne fakaakoakoga o tino kolā ne maua ne latou a mea aogā mai te fakaasiatuga o te agaga o te fia fai taugasoa.

16-18. Ke fakamatala mai se tala e uiga ki te auala e mafai ei o manumalo i te takalialia ki nisi tino i loto i te fakapotopotoga Kelisiano.

19. Ne a pati polopoloki a te apositolo ko Paulo e mafai o fesoasoani mai māfai e isi se uiga fakailoga tino i a tatou?

20. Ko feitu fea o te olaga e ‵tau ei o fakaakoako atu tatou ki a Ieova, te ‵tou Atua telā e sē fakailoga tino?

[Ata i te itulau e 9]

Ko kamata o taua atu te kau Isalaelu ki Kanana

[Ata i te itulau e 11]

Ne seki fakatalave a Iesu i te talai atu ki te fafine Samalia

[Ata i te itulau e 12]

Se fakatasiga i te ‵gana Amharic i Peletania

[Ata i te itulau e 12]

Ne fesoasoani atu te alofa o Alapati ki a Ieova ke manumalo i te takalialia ki tino