KE FAKAPILIPILI ATU KI TE ATUA

“E Lavea Faka‵lei Atu Ana Uiga sē Lavea”

E mata, e talitonu koe ki te Atua? Kafai koe e talitonu, e mafai ne koe o fakatalitonu mai me e isi eiloa se Atua? A te tonuga loa, e sikomia tatou ne fakamaoniga o se Mafuaga telā e poto, e malosi, kae alofa. Se a te fakamaoniga tenei, kae e fakamalosi loto pefea? Ke maua te tali, mafaufau ki pati a te apositolo ko Paulo kolā ne tusi i tena tusi ki Kelisiano i Loma.

Muna a Paulo: “E lavea faka‵lei atu ana uiga sē lavea talu mai te faitega o te lalolagi, me e mafai o lavea atu i ana mea ne faite, ke oko eiloa ki tena ‵mana telā e seai sena gataga mo tena tulaga e pelā me ko te Atua. Tela la, e seai se lotou fakamasakoga ki ei.” (Loma 1:20) E ‵tusa mo pati a Paulo, ne lavea faka‵lei a tugālima o te Mafuaga i ana mea ne faite. Ke mafau‵fau malie aka tatou ki pati a Paulo.

E fai mai a Paulo i uiga o te Atua ne mafai o lavea faka‵lei “talu mai te faitega o te lalolagi.” I te fuaiupu tenei, a te pati Eleni telā e ‵fuli ki te “lalolagi” e se fakauiga ki te paneta ko te Lalolagi. E fakauiga eiloa ki tino.a Tela la, e faipati a Paulo me ko te taimi eiloa ne faite ei a tino, ne mafai o lavea ne latou a fakamaoniga o uiga o te Mafuaga i mea ne faite ne ia.

E lavea atu i ‵tou tafa a fakamaoniga katoa konā. E se galo i te natula kae e “lavea faka‵lei.” Mai te ‵toe mea lasi ki te ‵toe mea foliki eiloa, e fakaasi manino mai i ei me e isi se Mafuaga kae e isi foki ne ana uiga fakaofoofogina. E mata, e se fakaasi manino mai ki a tatou a te poto o te Atua i te fakaofoofogina o te faitega o mea i te natula? E mata, e se fakaasi mai tena malosi i fetu o te lagi mo galu ‵fati o te tai? E mata, e se fakaasi mai a tena alofa ki tino mai i meakai kese‵kese kolā e fakamalie ei tou tinae mo te gali o te saeakaga mo te tōga o te la?—Salamo 104:24; Isaia 40:26.

E pefea te manino ‵lei o te fakamaoniga? Ko oko eiloa i te manino, tela la, a latou kolā e se lavea ne latou kae kolā e ita ma tali‵tonu ki te Atua “e seai ne olotou fakamasakoga ki ei.” E fakamatala mai penei te tino akoga e tokotasi: Fakaataata i tou mafaufau se tino fakateletele e se tautali i te fakailoga telā e fai mai penei “‵Pale ki te Fakamaui.” E fakatu tou tagata ne se pulisimani kae tusi a tena sala ki te pepa. E taumafai a te tino fakateletele o kinau me ne seki lavea ne ia te faka‵pulaga. Kae ne seki fakalogo te pulisimani ki ei i te faka‵pulaga e lavea ‵lei eiloa, kae ko mata o te tino fakateletele e se ma‵sei. I tafa i ei, i o te tino fakateletele te tiute ke kilokilo ki faka‵pulaga penā kae tautali i ei. E penā foki a fakamaoniga e uiga ki te Atua i mea o te natula. E lavea faka‵lei eiloa a te “fakailoga” tenā. E pelā me ne tino loto malamalama, e mafai eiloa o ‵kilo tatou ki ei. E seai se fakamasakoga ke ‵teke tatou ki ei.

E tonu, e fakaasi mai i mea ne faite a mea e uke e uiga ki ‵tou Mafuaga. Kae e isi aka foki se tusi telā e fakaasi mai i ei a mea e uke fakafia atu e uiga ki a ia—ko te Tusi Tapu. E mafai o tauloto tatou ki te tali o te fesili tāua tenei i loto i ei: Se a te fuafuaga a te Atua mō ‵tou lalolagi mo tino kolā e ‵nofo i ei? A te tauloto ki te tali o te fesili tenā e mafai o fesoasoani atu ki a koe ke fakapilipili malosi atu ki te Atua telā “e lavea faka‵lei atu ana uiga sē lavea” i te lalolagi i ‵tou tafa.

Faitauga faka-te-Tusi Tapu Mō Aokuso

Loma 1-16

[Fakamatalaga fakaopoopo]

[Ata i te itulau e 11]

Ne lavea atu a tugālima o te Mafuaga i ana mea ne faite