TALI KI FESILI MAI TE TUSI TAPU

E mata, e fakalogo te Atua ki ‵talo katoa?

E fakalogo te Atua ki tino mai i atufenua katoa. (Salamo 145:18, 19) E fakamalosi mai tena Muna ko te Tusi Tapu, ke fai‵pati atu tatou ki a ia e uiga ki so se mea telā e manava‵se tatou ki ei. (Filipi 4:6, 7) Kae e isi eiloa ne ‵talo e se fakafiafia atu ki te Atua. Pelā me se fakaakoakoga, a te fakafoki‵foki o pati o se ‵talo telā e tauloto ki te mafaufau e se fakafiafia atu ki a ia.—Faitau te Mataio 6:7.

E se fiafia foki a Ieova ki ‵talo a tino kolā e ‵teke ki ana tulafono. (Faataoto 28:9) Pelā me se fakaakoakoga, i taimi o te Tusi Tapu, ne seki fia fakalogologo te Atua ki tino Isalaelu kolā e fakasala ona ko te tatino. E manino ‵lei me e manakogina ke fai ne tatou ne mea mautinoa ko te mea ke fakalogologo mai te Atua.—Faitau te Isaia 1:15.

Ne a mea e ‵tau o fai ne tatou ko te mea ke fakalogologo mai te Atua?

E se mafai ne tatou o ‵talo atu ki te Atua e aunoa mo te fakatuanaki. (Iakopo 1:5, 6) E ‵tau o tali‵tonu tatou i a ia e ola kae tausi mai ki a tatou. E mafai ne tatou o fakama‵losi aka a ‵tou fakatuanaki mai te sukesuke ki te Tusi Tapu, i te fakatuanaki tonu e fakavae ki fakamaoniga mo tautoga i te Muna a te Atua.—Faitau te Epelu 11:1, 6.

E ‵tau o ‵talo atu i te fakamaoni mo te loto maulalo. Ke oko foki ki te Tama a te Atua, ko Iesu, ne loto maulalo i te taimi ne ‵talo atu ei a ia. (Luka 22:41, 42) Tela la, i lō te fai atu ki te Atua a te mea e ‵tau o fai, e taumafai tatou ke malamalama i mea kolā e manako a ia ki ei mai te faitau ki te Tusi Tapu. I konā, ko mafai ei tatou o ‵talo atu e ‵tusa mo te loto o te Atua.—Faitau te 1 Ioane 5:14.

Ke maua a fakamatalaga e uke atu, onoono ki te mataupu e 17 o te tusi tenei, What Does the Bible Really Teach?, telā ne ‵lomi ne Molimau a Ieova

Faitau ki nisi tali ki fesili mai te tusi tapu i te www.pr2711.com

[Ata i te itulau e 16]

Kaia e se fakafiafia atu ei a nisi ‵talo ki te Atua?