E Mafai Pefea o Fakapilipili Atu Koe ki te Atua?

1. E mata, e fakalogologo te Atua ki ‵talo katoa?

E ‵kami ne te Atua a vaegā tino katoa ke fakapili‵pili atu ki a ia e auala i ‵talo. (Salamo 65:2) Kae e se fakalogologo io me e talia ne ia a ‵talo katoa. E pelā me se fakaakoakoga, e mafai o se fakalogologo atu te Atua ki ‵talo a se tagata māfai e fakasaua sāle ne ia tena avaga. (1 Petelu 3:7) E penā foki loa, kafai ne tumau a te kau Isalaelu i te faiga o mea ma‵sei, ne ita fitifiti te Atua ma fakalogologo ki olotou ‵talo. E manino ‵lei, me i te ‵talo se tauliaga. E tiga eiloa te feitu tenā, ka talia foki eiloa ne te Atua a ‵talo a tino kolā ne fai ne latou a amioga matagā māfai e sala‵mo tonu latou.​—Faitau te Isaia 1:15; 55:7.

2. E ‵tau o ‵talo atu pefea tatou?

A te ‵talo se vaega o ‵tou tapuakiga, tela la, e ‵tau o ‵talo atu fua tatou ki ‵tou Mafuaga, ko Ieova. (Mataio 4:10; 6:9) Ona foki ko ‵tou tulaga sē ‵lei katoatoa, e ‵tau o ‵talo atu tatou i te igoa o Iesu me ne mate a ia mō ‵tou agasala. (Ioane 14:6) E se manako a Ieova ke fai ne tatou a ‵talo kolā e fakafoki‵foki atu faeloa io me e tusi ki lalo. E manako a ia ke ‵talo atu tatou mai i ‵tou loto.​—Faitau te Mataio 6:7; Filipi 4:6, 7.

E mafai foki o lagona ne te ‵tou Mafuaga a ‵talo kolā e fai lēmū. (1 Samuelu 1:12, 13) E ‵kami ne ia tatou ke ‵talo atu i taimi katoa, e pelā mo te taeao mo te afiafi, i taimi ‵kai, mo taimi e fe‵paki ei tatou mo fakalavelave.​—Faitau te Salamo 55:22; Mataio 15:36.

3. Kaia e maopoopo fakatasi ei a Kelisiano?

A te fakapilipili atu ki te Atua e se faigofie ona ko tatou e ‵nofo atu i va o tino kolā e se lava te lotou fakatuanaki ki te Atua kae fakatauemu foki ne latou tena folafolaga ki te filemu i te lalolagi. (2 Timoteo 3:1, 4; 2 Petelu 3:3, 13) Tela la, e ‵tau o maua ne tatou a fakamalosiga mai i te ‵kau atu ki taina tali‵tonu, kae e manakogina foki ne latou a tatou.​—Faitau te Epelu 10:24, 25.

A te kau atu ki tino kolā e a‵lofa ki te Atua e fesoasoani mai ke fakapili‵pili atu tatou ki te Atua. A fakatasiga a Molimau a Ieova e tuku mai i ei a avanoaga ‵lei ke maua ne tatou a mea aoga mai i te fakatuanaki o nisi tino.​—Faitau te Loma 1:11, 12.

4. E mafai pefea o fakapilipili atu koe ki te Atua?

E mafai ne koe o fakapilipili atu ki a Ieova mai i te mafaufau ‵loto ki mea ko oti ne tauloto ne koe mai tena Muna. Ke mafaufau ‵loto ki ana faifaiga, ana fakatakitakiga, mo ana folafolaga. A te mafaufau ‵loto fakatasi mo te faiga o ‵talo e ati aka ei ‵tou loto fakafetai ki te alofa mo te poto o te Atua.​—Faitau te Iosua 1:8; Salamo 1:1-3.

E mafai o pili koe ki te Atua māfai fua e talitonu kae fakatuanaki foki koe ki a ia. Kae ko te fakatuanaki e fai pelā me se mea ola telā e ‵tau o fagai faeloa. E ‵tau o fagai faeloa ne koe tou fakatuanaki mai i te ‵toe mafaufau ki te fakavae o ou talitonuga.​—Faitau te Mataio 4:4; Epelu 11:1, 6.

5. E mafai pefea o aoga ki a koe a te fakapilipili atu ki te Atua?

E atafai a Ieova ki a latou kolā e a‵lofa ki a ia. E mafai o puipui ne ia latou mai i so se mea telā e mafai o fakamasei ei te lotou fakatuanaki mo te lotou fakamoemoega ki te ola se-gata-mai. (Salamo 91:1, 2, 7-10) E fakailoa mai a ia ke ‵teke atu tatou ki auala kolā e mafai o fakama‵taku ki ‵tou malosi mo te fiafia. E akoako mai ne Ieova ki a tatou a te ‵toe olaga ‵lei.​—Faitau te Salamo 73:27, 28; Iakopo 4:4, 8.