FESILI MAI TINO FAI‵TAU

E mata, se mea ‵lei ke saga‵saga fakatasi a mātua Kelisiano mo se tamaliki ne fakatea i fakatasiga a te fakapotopotoga?

E seai se pogai ke sona manavase ki te koga e sagasaga ei te tino fakatea i te Kingdom Hall. Ko oti ne taumafai malosi a te mekesini tenei o fakamalosi a mātua Kelisiano ke tuku atu a te fesoasoani faka-te-agaga ki olotou tamaliki faka‵tea kolā koi ‵nofo i te fale māfai e ‵lei ke fai penā. E pelā mo te mea ne fakaasi mai i The Watchtower, Novema 15, 1988 i te itulau e 19 mo te 20, i mātua e mafai foki o suke‵suke fakatasi ki te Tusi Tapu mo se tamaliki fakatea telā e nofo eiloa i te fale. A te fakamoemoega ko te tamaliki ke maua ne ia a fakamalosiga kolā e manakogina ke fakatonu aka a tenaolaga.a

Kafai ko saga‵saga i te Kingdom Hall, e seai se fakalavelave māfai a te tamaliki fakatea e sagasaga filemu fakatasi mo ana mātua. Ona ko te tino fakatea e se ‵tau o sagasaga i te koga i tua o te hall, e seai se mea masei māfai a te tamaliki fakatea e sagasaga i tafa o ana mātua i so se koga e saga‵saga ei latou. E pelā mo mātua e tausi atu ki te feitu faka-te-agaga o te lā tamaliki, e ma‵nako tonu lāua ke maua ne ia a mea aoga e uke mai i fakatasiga. A te saga‵saga fakatasi o lāua mo te tamaliki e fesoasoani atu ki ei i lō te tuku tiaki i so se koga.

Kae e a māfai a te tamaliki fakatea ko sē ‵nofo fakatasi mo ana mātua? E mata, e isi se ‵kese i ei? I taimi ko ‵teka, ne fakaasi manino mai i te mekesini tenei a te kilokiloga tonu e ‵tau o taumafai se Kelisiano ke maua e uiga ki te fesokotaki ki se kāiga fakatea telā e se nofo i te fale.b E ui i ei, a te sagasaga filemu o se tino fakatea i se nofoaga i tafa o ana kāiga i te taimi o te fakatasiga e ‵kese ‵ki mo te taumafai o kāiga o fesokotaki atu ki a ia. Kafai e maua ne tino fakamaoni o te kāiga a te kilokiloga tonu ki te lotou kāiga fakateakae taumafai latou o tau‵tali i pati fakatonutonu mai Tusitusiga Tapu e uiga ki te fesokotaki atu ki a ia, e seai se pogai ke manava‵se ki ei​—1 Koli. 5:11, 13; 2 Ioa. 11.

Tela la, faitalia me sagasaga a te tino fakatea i tafa o se tino o te kāiga io me ko so se tino o te fakapotopotoga, e se ‵tau o tō manavase ki ei māfai e ‵lei ana mea e fai. A te fakataputapu o te koga e sagasaga ei se tino e mafai o māfua aka i ei a fakalavelave kese‵kese, e fakalagolago ki luga i fakanofonofoga. Kafai e taumafai a tino katoa, e aofia i ei a tino fakamaoni o te kāiga, o āva ki fakatakitakiga fakavae mai te Tusi Tapu e uiga ki tino faka‵tea, kae sē fai mo mea e pa‵ku ei a taina, e se ‵tau o manava‵se tatou ki te saga‵saga o tino kolā e ‵kau ki fakatasiga a te fakapotopotoga.c