Ke Fai A Fakamasauaga A Ieova Mo Fiafiaga O Tou Loto

1. (a) I auala fea e ‵saga atu ei a tino ki fakamasauaga, kae kaia? (e) E pokotia pefea te kilokiloga a se tino ki pati fakatonutonu ona ko te fakamatamata?

E KESE‵KESE auala e ‵saga atu ei a tino ki se fakatakitakiga. Kāti e talia mo te fiafia se fakamasauaga mai i se tino pule, kae kāti e ‵teke katoatoa atu ki pati fakatonutonu mai i se taugasoa io me se pule lagolago. E kese‵kese foki a lagonaga o tino ki pati polopoloki mo pati fakatonutonu. Kāti e fanoanoa io me ‵ma a nisi tino kae ko nisi e ma‵losi kae faiga‵ta olotou lagonaga. Kaia e ‵kese ei? E tasi te pogai ko te fakamatamata. Ao, e mafai ne te uiga fakamatamata o faka‵numi a te fakaikuga a se tino, ko fai ei ke sē talia a pati fakatonutonu kae sē maua a fakatakitakiga aoga. ​—Faata. 16:18.

2. Kaia e loto fakafetai ei a Kelisiano tonu ki fakatakitakiga mai i te Muna a te Atua?

² I te suā feitu, e loto fakafetai a Kelisiano ‵tonu ki fakatakitakiga aoga, maise eiloa māfai e fakavae ki te Muna a te Atua. E tuku mai i fakamasauaga a Ieova a mainaga tāua, e akoako ei tatou kae fesoasoani mai ke ‵kalo kea‵tea tatou mai i matasele pelā mo te manako ki kope, faifaiga fakatauavaga sē tau, mo te fakaaoga ‵se o vailakau tapu io me ko meainu ma‵losi. (Faata. 20:1; 2 Koli. 7:1; 1 Tesa. 4:3-5; 1 Timo. 6:6-11) E se gata i ei, e fia‵fia tatou ki “te tulaga ‵lei o te loto” telā e iku mai i te faka‵logo ki fakamasauaga a te Atua.​—Isa. 65:14, NW.

3. Se a te kilokiloga masani a te faisalamo e ‵lei ke fakaakoako tatou ki ei?

³ Ke tausi faka‵lei ‵tou fesokotakiga tāua mo te ‵tou Tamana faka-te-lagi, e ‵tau o fakaaoga faeloa ne tatou a akoakoga ‵poto a Ieova i ‵tou olaga. Ko oko eiloa i te ‵lei māfai e fakaasi atu i ‵tou kilokiloga masani a mea kolā ne tusi ne te faisalamo: “Au fakatonuga ko aku mea totino ki te se-gata-mai.”! (Sala. 119:111) E mata, e fia‵fia foki tatou ki fakatonuga a Ieova, io me e ‵kilo atu tatou ki ei e pelā me ko tō ‵mafa i nisi taimi? Kafai foki e se fia‵fia tatou ki nisi pati fakatonutonu kolā e maua ne tatou i nisi taimi, e se ‵tau o fanoa‵noa tatou i ei. E mafai o ati aka ne tatou se loto talitonu fakamaoni ki te poto tafasili i te maluga o te Atua! Ke mafaufau tatou ki auala e tolu.

KE ATI AKA TE TALITONU FAKAMAONI E AUALA I ‵TALO

4. Se a te mea e tasi telā ne tumau faeloa i te olaga o Tavita?

⁴ E uke a mea ‵lei mo mea ma‵sei ne fai ne te tupu ko Tavita i tena olaga, kae e tasi eiloa te mea telā ne tumau faeloa​—ko tena talitonu katoatoa ki tena Mafuaga. Ana muna: “Te Aliki [Ieova], au e ‵talo atu ki a koe; a koe ko toku Atua e fakatuaga au ki ei.” (Sala. 25:1, 2) Se a te mea ne fesoasoani atu ki a Tavita ke ati aka se loto talitonu penā ki tena Tamana faka-te-lagi?

5, 6. Se a te mea e fakaasi mai i te Muna a Atua ki a tatou e uiga ki te fesokotakiga o Tavita mo Ieova?

⁵ A te tokoukega o tino e ‵talo atu fua ki te Atua māfai ko pokotia latou i fakalavelave. Kae e a māfai e ‵sala atu fua se taugasoa io me se kāiga ki a koe i te taimi e manako ei a ia ki tupe io me se manakoga totino? I se taimi, kāti ko kamata koe o fakafesili te pogai e ‵sala mai ei ki a koe. Kae ko Tavita ne seki fai penā. Ne fakaata mai i tena fesokotakiga mo Ieova a tena fakatuanaki mo te alofa ki tena Atua i tena olaga ​—i taimi ‵lei mo taimi ma‵sei.—Sala. 40:8.

⁶ Onoono ki pati tavae kae fakafetai a Tavita ki a Ieova: “Te Aliki [Ieova] te motou Aliki, e matea ne te lalolagi kātoa tou ‵malu! E ‵fonu te lagi i ou vikiga mo tavaega!” (Sala. 8:1) E mata, e se matea ne koe a te ‵pili o te fesokotakiga o Tavita mo tena Tamana faka-te-lagi? Ne fakamalosi aka a Tavita ne tena loto fakafetai ki mea fakaofoofogia kae ‵malu a te Atua ke fakamaluga ne ia a Ieova i “te aso kātoa.”​—Sala. 35:28, T.T.Tauloto.

7. E aoga pefea ki a tatou a te fakapili‵pili atu ki te Atua e auala i ‵talo?

⁷ E pelā mo Tavita, e ‵tau o fesokotaki faeloa tatou ki a Ieova ko te mea ke ati aka ne tatou a te talitonu fakamaoni ki a ia. E fai mai te Tusi Tapu: “Fakapilipili atu ki te Atua, kae ka fakapilipili mai a ia ki a koutou.” (Iako. 4:8) A te fakapilipili atu ki te Atua e auala i ‵talo se auala tāua e maua ei ne tatou a te agaga tapu.​—Faitau 1 Ioane 3:22.

8. Kaia e ‵tau ei o ‵kalo tatou kea‵tea mai te faiga o ‵talo kolā e fakafoki‵foki faeloa a pati i ei?

⁸ E mata, e fakafoki‵foki faeloa ne koe au pati io me e fakaaoga faeloa a tugāpati konā māfai koe e ‵talo? Kafai e penā, fakamāumāu muamua ne nāi minute o mafaufau ki mea kolā e manako koe o fai atu i tau ‵talo, a koi tuai koe o ‵talo. Kafai e fai‵pati atu tatou ki se taugasoa io me se kāiga kae fakafoki‵foki faeloa a pati konā i taimi katoa e fai‵pati atu ei tatou ki a ia, e mata, e ‵tagi gali ki a ia? E mafai o sē fia fakalogo mai tou tagata ki a tatou. E tonu, e se ‵teke lele eiloa a Ieova ki se ‵talo a se tavini alofa fakamaoni e tokotasi a ia telā e fai atu mo te loto kātoa. Kae se mea ‵lei ke ‵kalo tatou kea‵tea mai i te fakafoki‵foki faeloa ‵tou pati māfai e fesokotaki atu ki a ia.

9, 10. (a) Ne a mea e mafai o aofia ne tatou i ‵tou ‵talo? (e) Se a te mea e mafai o fesoasoani mai ki a tatou ke ‵talo atu tatou mo te loto kātoa?

⁹ E manino ‵lei, me e se ‵tau o sōnafai a ‵tou ‵talo māfai e ma‵nako tatou o fakapili‵pili atu ki te Atua. Kafai e fakaasi katoatoa atu ne tatou a mea i ‵tou loto ki a Ieova, ka ‵pili malosi atu tatou ki a ia kae ka momea aka a te tali‵tonu fakamaoni o tatou ki a ia. Ne a la mea e ‵tau o aofia i ‵tou ‵talo? E tali mai te Muna a te Atua: “Ke tuku atu a mea katoa kolā e ma‵nako koutou ki ei ki te Atua fakatasi mo otou fakafetai e auala i otou talosaga.” (Fili. 4:6) A te tonuga loa, so se mea telā e pokotia ei ‵tou fesokotakiga mo te Atua io me ko ‵tou olaga e pelā me se tokotasi o ana tavini, se mataupu ‵lei tenā ke aofia i ‵tou ‵talo.

¹⁰ E tauloto ne tatou a mea e uke mai i ‵talo a tāgata mo fāfine fakamaoni kolā ne tusi i loto i te Tusi Tapu. (1 Samu. 1:10, 11; Galu. 4:24-31) E aofia i Salamo a ‵talo mo pese kolā e avatu ki a Ieova mo te loto kātoa. Ne fakaasi mai i ‵talo mo pese konei a lagonaga o tino katoa mai te tigāina ki te fiafia tonu. A te iloiloga o tugāpati konā ne fai ne tino a‵lofa fakamaoni e mafai o fesoasoani mai ki a tatou ke ofo atu a ‵talo aoga ki a Ieova.

MAFAUFAU ‵LOTO KI FAKAMASAUAGA A TE ATUA

11. Kaia e ‵tau ei mo tatou o mafaufau ‵loto ki fakatonuga mai i te Atua?

¹¹ Ne fai mai a Tavita: “A fakatonuga [io me ko fakamasauaga] foki a te Aliki [Ieova] e fakatuagagina, e aumai ne ia te poto ki a latou kolā e va‵lea.” (Sala. 19:7) Ao, kafai foki tatou e va‵lea, e mafai o ‵poto tatou māfai e faka‵logo ki fakatonuga a te Atua. A nisi fakatonuga mai i Tusitusiga Tapu e manakogina ke mafaufau ‵loto ki ei ko te mea ke maua katoatoa ne tatou a mea aoga mai i ei. E pelā mo te tausiga o ‵tou fakamaoni māfai e tofotofogina tatou i te akoga io me ko ‵tou galuega, te fakamalugaga o tulaga o te Atua e uiga ki te toto, te tumau i te sē kau ki se feitu, mo te fakagaluegaga o fakatakitakiga fakavae mai i te Tusi Tapu e uiga ki gatu mo teuga. A te mauaga ne tatou a te mafaufau o te Atua i mea penā ka fesoasoani mai ke lavea ‵mao ne tatou a fakalavelave. Ko mafai ei o fakaiku aka ne tatou i ‵tou loto a te mea e ‵tau o fai māfai e sae aka se fakalavelave. A te mafaufau mo te fakatokatoka muamua penā e mafai o puipui ei tatou mai i mea faka‵mae loto e uke.​—Faata. 15:28.

12. Se a te mea e mafai o fesoasoani mai ki a tatou ke tausi a fakamasauaga a te Atua māfai e mafau‵fau ki ei?

¹² A koi fakatali‵tali tatou ki te fakataunuga o mea kolā ne tauto te Atua ki ei, e mata, e fakaasi atu i vaegā olaga e ola ei tatou me e ala faeloa tatou i te feitu faka-te-agaga? Pelā me se fakaakoakoga, e mata, e tali‵tonu eiloa tatou i Papelonia te Sili ko pili fua o fakaseai? E mata, a fakamanuiaga i te taimi mai mua, pelā mo te ola se-gata-mai i se lalolagi palataiso, koi fai eiloa pelā me se mea tonu ki a tatou i te taimi nei e pelā mo te taimi muamua ne fatoa tauloto tatou ki ei? E mata, ko oti ne fakatumau ne tatou a ‵tou loto finafinau ki te galuega talai i lō te talia o manakoga totino ke tulaga muamua i ‵tou olaga? Kae e a te fakamoemoega ki te toe‵tuga, te faka‵maluga o te igoa o Ieova, mo te fakamalugaga o tena pulega? E mata, koi tāua eiloa a mea konā ki a tatou? Kāti ka fesoasoani mai a te mafaufau ‵loto ki fesili penā ke fai tatou pelā mo pati a te faisalamo, ke tausi a fakatonuga io me ko fakamasauaga a te Atua e pelā me ne “mea totino ki te se-gata-mai.”​—Sala. 119:111, T.T.Tauloto.

13. Kaia ne faigata ei ke malama‵lama a Kelisiano i te senitenali muamua i nisi mea? Tuku mai se fakaakoakoga.

¹³ Kāti e isi ne mea ne taku mai i te Tusi Tapu e se mafai o malamalama katoatoa tatou i ei i te taimi nei me e seki oko ki te taimi tonu o Ieova ke fakamaina mai a mea konā. Ne fai atu faeloa a Iesu ki ana apositolo me e ‵tau mo ia o logo‵mae kae tamate. (Faitau te Mataio 12:40; 16:21.) Kae ne seki malama‵lama a te kau apositolo i te mea ne fakauiga a ia ki ei. Ne fatoa maina latou mai tua o tena mate kae toetu i te taimi ne ‵fuli ei a ia ki se foitino tagata, sae atu ki se fia o soko, kae “fakamaina faka‵lei atu ne ia ki a latou te uiga o Tusitusiga Tapu ko te mea ke malamalama ‵lei latou i ei.” (Luka 24:44-46; Galu. 1:3) E penā foki loa, ne seki malamalama a soko o Keliso i te Malo o te Atua e ‵tau o fakatu i te lagi, ke oko loa ki te taimi ne ‵ligi ifo ei te agaga tapu ki luga i a latou i te Penitekoso 33 T.A.​—Galu. 1:6-8.

14. I te kamataga o te 20 senitenali, se a te fakaakoakoga ‵lei ne fai ne taina e tokouke faitalia te sē malamalama faka‵lei o latou e uiga ki aso fakaoti?

¹⁴ I se auala tai ‵pau, i te kamataga o te 20 senitenali, ne tai isi eiloa ne fakamoemoega se ‵tonu ne pokotia i ei a Kelisiano ‵tonu e uiga ki “aso fakaoti.” (2 Timo. 3:1) Pelā me se fakaakoakoga, i te tausaga e 1914, ne mafau‵fau a nisi tino me ko pili fua latou o ave ki te lagi. I te taimi ne seki taunu ei te lotou fakamoemoega, ne matea atu i ei mai i se sukesukega māea ne fai ki Tusitusiga Tapu me e isi se galuega talai lasi ‵ki e ‵tau o fai. (Male. 13:10) Tela la, i te 1922, ne fai atu a J. F. Rutherford, telā ne takitaki ne ia te galuega talai, ki tino kolā ne maopoopo i te fono i atufenua i Cedar Point, Ohio, U.S.A., penei: “Kiloke, a te Tupu ko pule! A koutou ko ana tino fakasalalau. Tela la, ke fakasalalau, fakasalalau, fakasalalau atu, a te Tupu mo tena malo.” Mai te taimi tenā o fano ki mua, ne fai a te talaiga o “te tala ‵lei o te Malo” mo fai se iloga o tavini a Ieova i aso nei.​—Mata. 4:23; 24:14.

15. E aoga pefea ki a tatou a te mafaufau ‵loto ki faifaiga a te Atua ki ana tino?

¹⁵ Ka lasi atu te tali‵tonu o tatou me e mafai ne ia o fakataunu a tena loto mo tena fuafuaga i te taimi mai mua, māfai e mafaufau ‵loto tatou ki faifaiga fakaofoofogia a Ieova ki ana tino i taimi ko ‵teka mo taimi nei. I te taimi foki tenā, e fesoasoani mai a fakamasauaga a te Atua ke masaua faeloa ne tatou i ‵tou mafaufau mo ‵tou loto ana valoaga kolā e seki fakataunu. E mautinoa ‵lei i a tatou i te faiga penā ka fesoasoani mai ki a tatou ke ati aka a te loto talitonu ki ana tautoga.

KE ATI AKA A TE LOTO TALITONU E AUALA I FAIFAIGA O TE TAPUAKIGA

16. Ne a fakamanuiaga e maua mai i te fakalavelave faeloa i te galuega talai?

¹⁶ A ‵tou Atua ko Ieova, se Atua malosi, se Atua e gasuesue. “Ko oi e malosi pelā mo koe, e Ieova?” ko te fesili a te faisalamo. Ne toe fai mai a ia: “A tou lima e malosi, a tou lima fakaatamai e fakamalugagina.” (Sala. 89:8, 13, NW) E ‵tusa mo te mea tenā, e amanaia kae fakamanuia ne Ieova a taumafaiga e fai ne tatou ke fakamuamua a mea o te Malo. E lavea ne ia i ana tavini​—me se tagata io me se fafine, e foliki io me matua—e se saga‵saga fua o ‵kai i “mea‵kai a te paie.” (Faata. 31:27, T.P.Samoa) I te fakaakoako ki ‵tou Mafuaga, e fakalave‵lave faeloa tatou i galuega a te fakapotopotoga. A te tavini atu ki te Atua mo te loto kātoa e maua i ei ne tatou taki tokotasi te taui, kae ka fai ei ke fiafia malosi a Ieova o fakamanuia mai a ‵tou galuega talai.​—Faitau te Salamo 62:12.

17, 18. Kaia e fai aka ei tatou me e mafai ne galuega o te fakatuanaki o fesoasoani mai ke ati aka ne tatou a te talitonu fakamaoni ki pati fakatonutonu a Ieova? Tuku mai se fakaakoakoga.

¹⁷ I te auala fea ne fesoasoani mai ei a galuega o te fakatuanaki ke ati aka ne tatou a te talitonu fakamaoni ki a Ieova? Ke mafaufau ki te tala o te uluatuga o te kau Isalaelu ki loto i te Fenua o te Folafolaga i Tusitusiga Tapu. Ne fakatonu atu a Ieova ki faitaulaga kolā e amo ne latou a te pusa o te feagaiga ke māti ki loto i te Vaitafe o te Iolitana. Kae i te taimi ko pili atu ei a tino, lavea ei ne latou i te vaitafe e ‵fonu maligiligi ne fai ne vaiua. Se a te mea ka fai ne te kau Isalaelu? Faka‵tu olotou faleie i tafatafa o te vaitafe kae faka‵tali i ei i te fia o vaiaso io me leva atu ke fanaifo a te vai ki lalo? Ikai, ne tali‵tonu katoatoa latou ki a Ieova kae tau‵tali i ana fakatakitakiga. Se a te ikuga? E faitau penei a te tala: “I te taimi eiloa ne pa‵tele ei a vae o faitaulaga ki te vai, ne gata te ‵tafe o te vai, . . . kae ko faitaulaga ne ‵tu i te kogaloto o te takele papa malō o te vaitafe e pili ki Ieliko a koi solo a nisi tino katoa ki te suā feitu.” (Iosu. 3:12-17, Contemporary English Version) Mafaufau ki te fakamalosi loto ke lavea atu a vai ko sē ‵tafe! E tonu, ne fakamalosi aka a te fakatuanaki o te kau Isalaelu ki a Ieova me ne tali‵tonu fakamaoni latou ki ana fakatakitakiga.

¹⁸ E tonu, e se fai ne Ieova a vavega penā mō ana tino i aso nei, kae e fakamanuia ne ia olotou galuega e fai ona ko te fakatuanaki. E fakamalosi aka latou ne te malosi galue o te Atua ke fakataunu a te galuega ne tuku mai ko te talaiga o te fekau o te Malo i te lalolagi kātoa. Kae ko te Molimau tafa sili a Ieova, ko Keliso Iesu telā ne toetu aka, ne taku tonu atu ki ana soko me ka ‵lago atu a ia ki latou i te galuega tāua tenei: “Tela la, olo atu koutou ki fenua katoa o fai a tino i ei mo fai a soko . . . Au e fakatasi faeloa mo koutou i aso katoa ke oko eiloa ki te gataga o te olaga tenei.” (Mata. 28:19, 20) E tokouke a Molimau kolā ne tai ‵ma io me ma‵taku ne mafai o fakaasi tonu atu ne latou me ne tuku atu ne te agaga tapu o te Atua ki a latou a te malosi ke fai‵pati atu latou ki tino fakaa‵tea i te galuega talai.​—Faitau te Salamo 119:46; 2 Kolinito 4:7.

19. E tigā eiloa e isi ne ‵tou tapulā, se a te fakatalitonuga e maua ne tatou?

¹⁹ E isi ne tapulā o nisi taina mo tuagane ona ko masaki io me ko te tulaga matua. E ui i ei, e mautinoa i a latou me e malamalama a “te Tamana o te alofa fakamagalo mo te Atua o fakamafanafanaga katoa” i fakanofonofoga o Kelisiano ‵tonu taki tokotasi. (2 Koli. 1:3) E amanaia a ia ki mea katoa e fai ne tatou ke ‵lago atu ki mea o te Malo. E ‵tau o masaua ne tatou katoa me ko ‵tou fakatuanaki ki te togiola a Keliso e ola ei tatou a koi fai ne tatou a te mea e mafai ne tatou o fai e ‵tusa mo ‵tou fakanofonofoga.​—Epe. 10:39.

20, 21. Ne a nisi auala e fakaasi atu ei ne tatou a te talitonu fakamaoni ki a Ieova?

²⁰ E aofia i ‵tou tapuakiga a te fakamāumāuga o taimi, malosi mo kope faka-te-foitino ki te mea e mafai ne tatou o fai. Ao, e ma‵nako tatou o “fai te galuega a te tino talai” mo ‵tou loto kātoa. (2 Timo. 4:5) A te tonuga loa, e fia‵fia eiloa tatou o fesoasoani atu ki nisi tino “ke iloa ne latou a te munatonu.” (1 Timo. 2:4) E manino ‵lei, me i te faka‵maluga mo te tavaega o Ieova e fai ei ke mau‵mea tatou i te feitu faka-te-agaga. (Faata. 10:22) Kae e fesoasoani mai foki ke ati aka ne tatou se loto talitonu telā e se mafai o gata ki ‵tou Mafuaga.​—Lo. 8:35-39.

²¹ E pelā mo mea ne sautala tatou ki ei, a te talitonu fakamaoni ki fakatakitakiga ‵poto a Ieova e se tupu fakafuasei i a ia eiloa; e manakogina ke ga‵lue tatou ke maua te loto talitonu tenā. Tela la, e mautinoa ‵lei me e ‵tau o fakalagolago tatou ki a Ieova e auala i ‵talo. Mafaufau ‵loto ki te auala ne fakataunu ei ne Ieova a tena loto i taimi ko ‵teka mo te auala ka fai ne ia i te taimi mai mua. Kae tumau i te atiakaga o te talitonu fakamaoni ki a Ieova e auala i faifaiga o te tapuakiga. E tonu, ka tumau a fakamasauaga a Ieova ki te se-gata-mai. E mafai foki koe o fai penā!