E Mata, e Fiafia Malosi Koe ki Akoakoga Mai i a Ieova?
“Au e fakalogo ki au akoakoga; e fiafia au ki ei mo toku loto katoa.”—SALAMO 119:167.
1. Se a te tusi e maua mai i ei a fakamatalaga kolā e fakamasaua mai faeloa ki a tatou a akoakoga mai i a Ieova?
E MANAKO a Ieova ke fiafia ana tino. Kae ke maua te fiafia tonu, e ‵tau mo tatou o sa‵sale i auala o te Atua kae faka‵logo ki ana fakatonuga. Tenā te pogai e toe fakamasaua mai ne Ieova ana akoakoga ki a tatou. E fakafokifoki mai faeloa a akoakoga konā i te Tusi Tapu, kae maise eiloa i te Salamo 119 telā kāti ne ‵fatu aka ne te pelenise foliki mai Iuta, ko Hesekia. E fakatomua te pese gali tenā ki pati konei: “Amutia latou kola e ‵ma faeloa olotou olaga, a latou e ola i te olaga pela eiloa mo tulafono a te Aliki. Amutia latou kola e tau‵tali i ana fakatonuga, a latou e faka‵logo mo olotou loto katoatoa ki a ia.”—Salamo 119:1, 2.
2. E iku atu pefea a akoakoga mai i te Atua ki te fiafia?
2 E faka‵logo tatou ki ‘tulafono a Ieova’ māfai e maua faeloa ne tatou te iloaga tonu mai tena Muna kae fakaaogā foki ne tatou te Muna tenā i te olaga nei. Ona ko te ‵tou tulaga sē ‵lei katoatoa e manakogina ke fakamasaua mai faeloa ki a tatou a akoakoga a Ieova. A te ‵fuliga o te pati Epelu ki “akoakoga” e fakasino atu i ei ki te faiga a te Atua ke toe fakamasaua mai ki a tatou ana tulafono, fakatonuga tonu mo akoakoga. (Mataio 10:18-20) Ka tumau tatou i te fiafia māfai e talia faeloa ne tatou a akoakoga konā, me e fesoasoani mai i ei ki a tatou ke ‵kalo keatea mai te pakū atu ki mea ‵se i te feitu faka-te-agaga kolā e iku atu ei ki fakalavelave mo te fanoanoa.
‵Piki ‵Mau ki Akoakoga Mai i a Ieova
3. Ona ko te fakamatalaga i te Salamo 119:60, 61, se a te mea e mafai ne tatou o tali‵tonu ki ei?
3 Ne fiafia malosi te tino faisalamo ki akoakoga kolā e toe taku mai ne te Atua kae ne usu atu a ia penei: “Au e vave o fakalogo ki au tulafono. Ko oti ne fakatoka ne tino ma‵sei se malei mo oku, kae e se puli eiloa i au au tulafono.” (Salamo 119:60, 61) E fesoasoani mai ki a tatou a akoakoga kolā e toe fakamasaua mai ne Ieova ke kufaki i fakasauāga me e tali‵tonu katoatoa tatou me e mafai ne ia o ave keatea a fakatapūga kolā e fai ne fili ki te ‵tou galuega. E ave keatea ne ia a fakalavelave i te taimi tonu ko te mea ke mafai ei ne tatou o fai te galuega talai e uiga ki te Malo.—Maleko 13:10.
4. Se a te kilokiloga e ‵tau o maua ne tatou e uiga ki akoakoga mai te Atua?
4 I nisi taimi e polopoloki tatou ne Ieova e auala i akoakoga kolā e toe fakamasaua mai ne ia. Ke talia faeloa ne tatou a polopolokiga konā, e pelā mo te fiafia o te tino faisalamo ki ei. Ne talo atu ei a ia ki te Atua penei: “Au fakatonuga e fakafiafia ei au . . . Ka ko au e fiafia ki au fakatonuga.” (Salamo 119:24, 119) E uke atu nei a akoakoga mai i te Atua e maua ne tatou i lō akoakoga kolā ne maua ne te tino faisalamo. E fakamasaua mai ki a tatou a te fia selau o tusi siki mai Tusitusiga faka-Epelu kolā e siki mai i Tusitusiga faka-Eleni, a fakatonuga a Ieova ki ana tino kolā ne ‵nofo mai i lalo i te Tulafono kae e fakamasaua foki i ei ana fuafuaga mō te fakapotopotoga Kelisiano. Kafai e manatu aka te Atua me e ‵tau o fakamasaua mai ne ia ana tulafono ki a tatou, e fia‵fia malosi tatou ki vaegā fakatonuga penā. Kae mai te ‘ ‵piki mau ki akoakoga mai i a Ieova,’ e ‵kalo keatea tatou mai i fakaosoosoga kolā e iku atu ki te faiga o agasala kae e fakafanoanoa atu ki te Atua kae e fai foki i ei tatou ke se fia‵fia.—Salamo 119:31, NW.
5. E mafai pefea ne tatou o fia‵fia malosi ki akoakoga mai i a Ieova mo tou loto katoa?
5 E ‵tau o pefea te lasi o ‵tou fiafia ki akoakoga mai i a Ieova? “Au e fakalogo ki au akoakoga; e fiafia au ki ei mo toku loto katoa.” (Salamo 119:167, i ā matou a mataimanu ‵kese.) Ka fia‵fia malosi tatou ki akoakoga mai i a Ieova māfai e ma‵natu aka tatou ki ei e pelā me ne fakatonuga mai te ‵tou Tamana telā e atafai tonu mai ki a tatou. (1 Petelu 5:6, 7) E ‵tau o maua ne tatou ana akoakoga, kae ka tupu aka ‵tou fiafia ki ei māfai ko lavea atu te auala e aogā ei a akoakoga konā ki a tatou.
Pogai e ‵Tau ei o Toe Fakamasaua Mai a Akoakoga Mai i te Atua
6. Se a te pogai e tasi e ‵tau ei o maua ne tatou a akoakoga mai i a Ieova, kae se a te mea ka fesoasoani mai i ei ke toe manatua a akoakoga konā?
6 E tasi te pogai e ‵tau ei o toe fakamasaua mai ne Ieova a akoakoga me e puli faeloa i a tatou a mea. E fai mai te World Book Encyclopedia: “Se uiga masani o puli sāle i tino a fakamatalaga e uke i te tekāga o taimi. . . . Kāti ne ‵tupu ki a koe te fakalavelave me e galo i a koe te igoa o se tino io me se isi fakamatalaga aka telā toeitiiti kae masaua ne koe. . . . Kafai e puli se mea mō se taimi toetoe fua, e fai pelā me e se mafai o manatua. E fakatusa ne saienitisi te mea tenā ki te taumafai o se tino ke maua se mea e galo i loto i se potu telā e gaogaoā. . . . E tasi te auala e mafai ei ne koe o masaua faeloa se fakamatalaga ko te sukesuke faeloa ki ei māfai ko oti ne tauloto koe ki ei.” Ka fesoasoani mai ki a tatou a te sukesuke ‵loto ke toe manatua a akoakoga mai i te Atua kae ke faka‵logo foki ki ei ko te mea ke aogā ki a tatou.
7. Kaia e manakogina malosi ei a akoakoga mai i te Atua i aso nei i lō so se isi taimi aka?
7 E sili atu te manakomia ne tatou a akoakoga mai i a Ieova i aso nei i lō so se isi taimi me ko oko atu a amioga ma‵sei a tino ki se tulaga telā seki oko atu muamua ki ei. Kafai e faka‵logo katoatoa tatou ki akoakoga mai te Atua, e maua ne tatou te malamalama tonu ki mea kolā e ‵tau o fai ne tatou ke mo a ma tosina atu tatou ki auala ma‵sei o te lalolagi. Ne fai mai te tino faisalamo penei: “E sili atu a te mea e iloa ne au i lo oku faiakoga katoa, me e maua oku mafaufauga mai i au fakatonuga. E poto atu au i lo toeaina, me i a au e fakalogo ki au fakatonuga. Ne seki fai ne au a amio masei katoa, me i a au e manako o fakalogo ki tau muna.” (Salamo 119:99-101) Kafai e faka‵logo tatou ki akoakoga mai te Atua, e mafai ei ne tatou o ‵kalo keatea mai ‘amioga masei katoa’ kae ka se fai tatou e pelā mo te tokoukega o tino kolā “e ‵nofo foki olotou mafaufau i te pouliga. E seai foki se lotou vaega o te ola ne tuku mai ne te Atua, i te mea ko oko eiloa i te va‵lea mo te loto make‵ke.”—Efeso 4:17-19.
8. E mafai pefea o iloa aka a auala ke manumalo ei tatou i tofotofoga ki te ‵tou fakatuanaki?
8 E‵tau o maua ne tatou a akoakoga mai te Atua me e fakamalosi mai ki a tatou ke kufaki i tofotofoga faiga‵ta i te taimi o te “gataga o te lalolagi.” (Tanielu 12:4) Kafai e se maua ne tatou a akoakoga konā ka fai tatou e pelā me ne tino kolā e ‘fakalogologo fua kae ko puli i ei.’ (Iakopo 1:25) Kae e mafai ne tatou o manumalo i tofotofoga ki te ‵tou fakatuanaki māfai e fai ne tatou a sukesukega totino e pelā foki mo sukesukega i te fakapotopotoga ki te Tusi Tapu fakatasi mo tusi kolā e tuku mai ne “te tavini fakamaoni kae poto.” (Mataio 24:45-47) E fesoasoani mai a fakatokaga faka-te-agaga konā ke iloa ne tatou a mea kolā e ‵tau o fai ne tatou ke fakafiafia atu ki a Ieova māfai ko oko atu tatou ki se tulaga faigata.
Te Pogai Taūa o Fakatasitasiga
9. Ko oi a “tino” kolā e fai pelā me ne “meaalofa,” kae e fesoasoani atu pefea latou ki taina talitonu?
9 E fetaui ‵lei te manakomia ne tatou a fakamasauaga mai te Atua mo mea kolā e maua ne tatou i fakatasiga Kelisiano me e tuku mai i ei ne taina tofia a akoakoga. Ne tusi mai te apositolo ko Paulo me i te taimi ne “fanake [ei] a ia ki koga pito sili i te maluga, e tokouke a pagota ne puke ne ia ke olo mo ia, ne tuku atu foki ne ia a tino e pelā me ne meaalofa.” Kae ne fakaopoopo mai foki a Paulo penei: “Ne tofi foki ne ia a nisi ke fai mo apositolo, a nisi ke fai mo pelofeta, a nisi ke fai mo tino talai te tala ‵lei, a nisi ke fai mo faifeau, ka ko nisi ke fai mo faiakoga. Ne fai ne ia penei o fakatoka a tino o te Atua, mo te galuega faka-Kelisiano, o ati ake a te foitino o Keliso.” (Efeso 4:8, 11, 12, NW) E pefea te loto fakafetai o tatou ki “tino” kolā e fai pelā me ne “meaalofa”—ko toeaina tofia—ke fakamalosi mai ki a tatou ke saga atu ki akoakoga mai i a Ieova māfai e maopoopo fakatasi tatou i te ‵tou tapuakiga!
10. Se a te manatu tāua i te Epelu 10:24, 25?
10 Ka fakamalosi aka ne te ‵tou loto fakafetai ki mea kolā e tuku mai ne te Atua ke ‵kau sāle atu tatou ki fakatasiga e lima a te fakapotopotoga i vaiaso takitasi. Ne faka‵mafa ne Paulo te manatu me e ‵tau o maopoopo faeloa tatou. Ne tusi mai a ia penei: “Ke mafaufau te sua tino ki te sua tino, ke fakatau fesoasoani foki koutou o fakaasi te alofa mo te fai mea ‵lei. Ke tumau faeloa te maopoopo sale o tatou, e pela eiloa mo te mea e masani ei a nisi tino o koutou. A te mea sili ke fakatau fakamalosi eiloa ne tatou o‵tou loto; i te mea ko iloa ne koutou i te Aso o te Aliki ko pili mai.”—Epelu 10:24, 25.
11. E aogā pefea ki a tatou a fakatasiga takitasi?
11 E mata, e fiafia koe ki mea aogā kolā e maua ne tatou i ‵tou fakatasiga? E fakamalosi aka ne te Sukesukega ki Te Faleleoleo Maluga telā e fai i vaiaso katoa, a te ‵tou fakatuanaki, e fesoasoani foki i ei ke fakafetaui aka ‵tou olaga mo akoakoga mai i a Ieova, kae e fakamalosi tatou ke ‵teke atu ki te “agaga o te lalolagi.” (1 Kolinito 2:12; Galuega 15:31) E tuku mai ne taina kolā e fai ne latou a te Lauga mō Tino Katoa a fakatonuga mai te Muna a te Atua, kae e aofia i ei a akoakoga mai i a Ieova pelā foki mo muna fakamalie loto a Iesu e uiga ki “te ola se gata mai.” (Ioane 6:68; 7:46; Mataio 5:1–7:29) E fakamata aka ne te Akoga Seokalatika mo te Galuega Fakafaifeau a te ‵tou atamai i te akoako atu. E taūa ‵ki te Fakatasiga mō te Taviniga ke fesoasoani mai ki a tatou ke faka‵lei aka ‵tou fakamatalaga i te talaiatuga o te tala ‵lei mai fale ki fale, toe asiga, mo akoga faka-te-Tusi Tapu mo nisi vaega o te ‵tou galuega. E isi foki ne nisi avanoaga e uke kolā e maua ne tatou mai te kau atu ki te Sukesukega a te Fakapotopotoga ki Tusi ke fai a fakamatalaga totino e uiga ki akoakoga mai i te Atua.
12, 13. Ne fakaasi atu pefea ne nisi tino o te Atua mai i se fenua e tasi i Asia te lotou fia‵fia ki fakatasiga faka-Kelisiano?
12 A te ‵kau faeloa ki fakatasiga a te fakapotopotoga e fakamasaua sāle mai ki a tatou a tulafono a te Atua kae e fesoasoani mai foki i ei ki a tatou ke tumau i te malosi i te feitu faka-te-agaga māfai e fakafesagai tatou mo taua, fakalavelave i mea tautupe, mo nisi tofotofoga aka ki te ‵tou fakatuanaki. Ne malamalama ‵lei a Kelisiano e toko 70 mai se fenua e tasi i Asia ki te tāua o fakatasiga i te taimi ne ‵tuli keatea ei latou mai i olotou fale kae ne ‵tau o ‵nofo latou i te vao. Ne toe foki atu latou ki te lotou fa‵kai, telā ne fai ei te taua, kae ne tapalepale aka ne latou a lakau mai i mea kolā ne ‵toe mai te lotou Kingdom Hall, kae ne toe faite te lotou Kingdom Hall i te vao me ne fatuaki ne latou olotou loto ke tumau faeloa i te ‵kau fakatasi.
13 I se isi fa‵kai, i te fenua foki eiloa tenā, telā ne fai ei te taua i te fia o tausaga, koi tavini atu a tino o Ieova mo te loto finafinau. Ne fesili atu ki se toeaina mai te kogā koga tenā penei: “Se a te mea telā ne fesoasoani malosi ki te kau taina ke ‵kau fakatasi faeloa latou?” Se a tena tali ki ei? “I tausaga e 19 ne fai ei a fakatasiga ne seki ‵galo eiloa matou i ei. I nisi taimi e se mafai o oko atu a nisi taina ki te koga telā e fai ei te fakatasiga me ne faka‵to sāle a paula i ei kae ne seki ai lele eiloa se taimi ne taofi aka ei te faiga o fakatasiga.” Ne fakatāua malosi ne taina mo tuagane pele konā a te manatu ke ‘tumau faeloa te maopoopo sāle o latou.’
14. Se a te mea e mafai ne tatou o fakaakoako ki ei mai faifaiga masani a te lōmatua ko Ana?
14 Ne “seki tiaki eiloa” ne Ana, te fafine telā ne mate tena avaga kae ko 84 ana tausaga, “te Fale Tapu i te taeao mo te afiafi.” Tenā la, ne nofo tonu atu a ia i te taimi ne aumai ei a Iesu, ki te Fale Tapu mai tua malie ifo o tena fanaumaiga. (Luka 2:36-38) E a, ko oti ne fatuaki ne koe tou loto ke se galo i se fakatasiga e tasi? E a, e fakaoti ne koe ou mafi ke kau atu ki vaega katoa o fono fo‵liki mo fono ‵lasi? E fakamaoni mai ne maopoopoga konā me e atafai mai a te ‵tou Tamana faka-te-lagi ki ana tino me e tuku mai i ei a fakatonuga faka-te-agaga kolā e aogā ‵ki. (Isaia 40:11) E fakalasi foki ne vaegā maopoopoga penā ‵tou fiafia, kae e fakaasi atu foki i ei te ‵tou fiafia ki akoakoga mai i a Ieova māfai e ‵kau atu tatou ki ei.—Neemia 8:5-8, 12.
Ko ‵Tu Kese Tatou Ona ko Akoakoga Mai i a Ieova
15, 16. Kafai e fakalogo tatou ki akoakoga mai i a Ieova, ne a amioga ka ‵kalo kea‵tea tatou mai i ei?
15 E ‵tu kese tatou mai te lalolagi masei tenei māfai e faka‵logo tatou ki akoakoga mai te Atua. E pelā me se fakaakoakoga, kafai e fakalogo tatou ki akoakoga mai te Atua ka se fai ne tatou a amioga fakatauavaga se ‵tau. (Teutelenome 5:18; Faataoto 6:29-35; Epelu 13:4) E se taka‵vale tatou i fakaosoosoga ke pati loi, ke sē fakamaoni, io me ke kaisoa māfai e faka‵logo tatou ki akoakoga mai te Atua. (Esoto 20:15, 16; Levitiko 19:11; Faataoto 30:7-9; Efeso 4:25, 28; Epelu 13:18) Kafai e faka‵logo tatou ki akoakoga mai i a Ieova ka puipui ei tatou mai i te taui ma sui, te ita fakamoemoe, io me ko te fatufatu tino.—Levitiko 19:16, 18; Salamo 15:1, 3.
16 Kafai e faka‵logo tatou ki akoakoga mai te Atua, ko fakatapu tatou mō te Atua io me ko ‵tu ‵kese tatou ke tavini atu ki a ia. Kae e pefea foki la te tāua ke ‵tu kese tatou mai te lalolagi tenei! I te ‵toe po telā ne ola ei a Iesu i te lalolagi nei, ne ‵talo atu a ia ki a Ieova kae ne akai atu penei ki a ia: “Ne taku atu ne au tau muna, kae ne takalialia ki ei te lalolagi, me se ne muna o te lalolagi, i a au e se se tino o te lalolagi. Au e se ‵talo atu ke ave ne koe latou keatea mai te lalolagi, ka ko au e ‵talo atu ke tausi latou ne koe mai te Tino Masei. E se ne tino o te lalolagi latou, e penei foki mo au e se se tino o te lalolagi. Ke fakatapu ne koe latou ki te munatonu; i tau muna se munatonu.” (Ioane 17:14-17) Ke na fakatāua faeloa ne tatou te Muna a te Atua, telā e fai ei tatou ke ‵tu ‵kese o tavini atu ki a ia.
17. Ne a mea e mafai o ‵tupu māfai e se ‵saga atu tatou ki akoakoga mai te Atua, kae ne a ‵tou mea e tau o fai?
17 E fia tumau tatou e pelā me ne tavini a Ieova kolā e talia ne ia. E mafai fua o taka‵vale tatou i te agaga o te lalolagi nei, e auala i pati, tusi, fakafiafiaga mo amioga māfai e fakata‵mala tatou i te faka‵logo ki akoakoga a te Atua. Kae e se fia fai tatou e pela me ne tino kolā e ma‵nako ki tupe, e kaima‵nako, e fakamata‵mata, e se loto fakafetai, e se fakamaoni, e mata kaitaua, e fia ma‵luga, ko ‵fete i te fakamata‵mata, io me e sili te lotou fia‵fia ki manakoga o te foitino i lō te Atua—ke taku mai fua i ei a nāi uiga o tino kolā e nofo ‵mao mai te Atua. (2 Timoteo 3:1-5) Me ko nofo atu tatou i te ‵toe vaitaimi o aso fakaoti o te fakanofonofoga masei tenei, ke na ‵talo atu faeloa tatou ke maua te fesoasoani mai te Atua ko te mea ke tumau tatou i te faka‵logo ki akoakoga mai i a Ieova kae ‘fakalogo ki ana tulafono.’—Salamo 119:9.
18. Ne a faiga mautinoa ka fai ne tatou māfai e faka‵logo tatou ki akoakoga mai te Atua?
18 E se gata fua i te fakailoa mai a mea kolā e ‵tau o fai ne tatou, a te faka‵logo ki akoakoga mai i a Ieova ka fakagasuesue aka ei tatou ke fai a faiga mautinoa, kae fakaosofia ei tatou ke fakalago‵lago katoatoa atu ki a Ieova kae ke alofa atu foki ki a ia mo ‵tou loto kātoa, ‵tou ola kātoa, ‵tou mafaufau kātoa mo ‵tou malosi kātoa. (Teutelonome 6:5; Salamo 4:5; Faataoto 3:5, 6; Mataio 22:37; Maleko 12:30) E fakamalosi foki ne akoakoga mai te Atua a tatou ke a‵lofa ki ‵tou tuakoi. (Levitiko 19:18; Mataio 22:39) E fakaasi ‵tonu atu ne tatou te ‵tou alofa ki te Atua mo ‵tou tuakoi māfai e fai ne tatou te loto o te Atua kae fakailoa atu foki ki nisi tino “te poto mai te Atua” telā e aumai ei te ola.—Faataoto 2:1-5.
Te Faka‵logo ki Akoakoga Mai i a Ieova e Iku Atu ki te Ola!
19. E mafai pefea ne tatou o fakaasi atu ki nisi tino me e fetaui ‵lei kae e aogā foki ke faka‵logo tatou ki akoakoga mai i a Ieova?
19 Kafai e faka‵logo tatou ki akoakoga mai i a Ieova kae e fesoasoani atu ki nisi tino ke fai foki penā, ka faka‵sao ne tatou a tatou eiloa, pelā foki mo latou kolā e faka‵logo mai ki a tatou. (1 Timoteo 4:16) E mafai pefea ne tatou o fakaasi atu ki nisi tino me e fetaui ‵lei mo te olaga nei kae e aogā foki ke faka‵logo ki akoakoga mai i a Ieova? Māfai e fakaaogā ne tatou a fakatakitakiga fakavae mai i te Tusi Tapu i ‵tou olaga totino. Ka maua ne tino “kola ko oti ne filifilia mō te ola se gata mai” a fakamaoniga me i te auala telā e fakaasi atu ne te Atua i tena Muna ko te toe auala sili ke tau‵tali tatou ki ei. (Galuega 13:48) Ka lavea atu foki ne latou i ei me ‘e tonu eiloa i te Atua e i konei i a tatou’ kae e fakamalosigina ei latou ke ‵kau fakatasi mo tatou i te tapuaki atu ki te Aliki Sili ko Ieova.—1 Kolinito 14:24, 25.
20, 21. Ne a mea e mafai ne tatou o fai ona ko te fesoasoani mai o akoakoga a te Atua mo tena agaga?
20 Ka kamata o fia‵fia malosi tatou ki akoakoga mai i a Ieova māfai e sukesuke sāle tatou ki te Tusi Tapu, fakaaogā a mea kolā e tauloto tatou ki ei i ‵tou olaga kae fakaaogā foki a fakatokaga faka-te-agaga mai i a ia. Kafai e faka‵logo tatou ki akoakoga konā, ka fesoasoani malosi mai ki a tatou a fakamasauaga konei ke “pei ki te foitino fou, tela ne faite i foliga o te Atua i te amiotonu mo te ‵malu.” (Efeso 4:20-24) E mafai ne tatou o fakaasi te alofa, te fiafia, te filemu, te kufaki, te mataalofa, te ‵lei, te fakamaoni, te loto malalo mo te loto pulea—ko vaegā uiga kolā e se maua i te lalolagi telā e pule Satani ki ei—ona ko akoakoga mai i a Ieova mo tena agaga tapu! (Kalatia 5:22, 23; 1 Ioane 5:19) Tela la, e mafai ne tatou o maua te loto fakafetai māfai e fakamasaua mai ki a tatou a nisi tulafono a Ieova kolā e maua mai i ‵tou sukesukega totino ki te Tusi Tapu, mai toeaina tofia io me mai i ‵tou fakatasiga, fono fo‵liki pelā foki mo fono ‵lasi.
21 E tiga eiloa e logo‵mae tatou me e ola tatou i se olaga amiotonu e mafai ne tatou o fia‵fia māfai e faka‵logo tatou ki akoakoga mai i a Ieova. (Luka 6:22, 23) E fakalago‵lago atu tatou ki te Atua ke faka‵sao ne ia a tatou mai i tulaga fakama‵taku. E tāua ‵ki te mea tenā me ko ‵luku fakatasi a tupu katoa o te lalolagi ki “te taua i te aso lasi o te Atua e o ia te Malosi Katoatoa,” ko Amaketo.—Fakaasiga 16:14-16.
22. Se a te mea e ‵tau o fatuaki ‵tou loto ki ei ke na fai e uiga ki akoakoga mai i a Ieova?
22 Kafai e fia maua ne tatou te meaalofa telā e tuku mai ne Ieova ona ko tena alofa tauanoa, ko te ola se-gata-mai, e ‵tau o fia‵fia malosi tatou ki akoakoga mai i a Ieova kae faka‵logo ki ei mo ‵tou loto kātoa. Ke ‵pau ‵tou lagonaga mo te lagonaga o te tino faisalamo telā ne usu mai penei: “Au fakatonuga e tonu faeloa ki te se gata mai; tuku mai te malamalama i au tulafono, ke ola ei au.” (Salamo 119:144) Ke na fatuaki ne tatou ‵tou loto e pelā mo mea kolā e fakaasi mai i pati a te tino faisalamo penei: “Au e kalaga ki a koe; fakasao mai au kae ka tausi ne au au tulafono.” (Salamo 119:146) E auala i pati mo faiga, ke na fakaasi atu ne tatou me e fia‵fia tonu tatou ki akoakoga mai i a Ieova mo te loto kātoa.
Ka Tali Mai Pefea ne Koe?
• Se a te kilokiloga a te tino faisalamo ki akoakoga mai i a Ieova?
• Kaia e manakomia ei a akoakoga a te Atua?
• Ne a mea aogā e maua ne tatou i fakatasiga e uiga ki akoakoga mai i te Atua?
• E ‵tu kese pefea tatou mai te lalolagi ona ko akoakoga mai i a Ieova?
[Ata i te itulau e 25]
Ne fiafia te tino faisalamo ki akoakoga mai i a Ieova mo tena loto kātoa
[Ata i te itulau e 27]
I te tautali atu ki te fakaakoakoga a Ana, e mata, ne taumafai malosi koe ke se galo i fakatasitasiga?
[Ata i te itulau e 28]
Kafai e faka‵logo tatou ki akoakoga mai i a Ieova, e tu ‵kese tatou e pelā me ne tino ‵ma kae ko fakatapu tatou ke tavini atu ki a ia