Te Akoakoga ‵Se Telā e Seai ei se Igoa o te Atua

MEA E TALI‵TONU KI EI A TINO E TOKOUKE “E se lotoma‵lie matou me e mafai o fai‵pati atu matou i ‘te igoa o te Atua, kae kafai e ‵tau o fai penā, se a la te igoa tenā.”​—Ko muna a te polofesa ko David Cunningham, i tena tusi ko te Theological Studies.

TE MUNATONU MAI TE TUSI TAPU

Ne fai mai te Atua: “Au ko Ieova. Tenā toku igoa.” (Isaia 42:8, O le Tusi Paia) A Ieova se igoa faka-Epelu telā e fakauiga ki te “Ka Fai Eiloa ne Au so se Mea e ‵Tau o Fai.”​—Kenese 2:4, te fakamatalaga fakaopoopo, NW.

E manako a Ieova ke fakaaoga ne tatou tena igoa. E fai mai te Tusi Tapu: “Ka‵laga atu ki tena igoa. Fakailoa atu ki tino ana faifaiga. Taku atu me ko oti ne fakamaluga aka tena igoa.”​—Isaia 12:​4, O le Tusi Paia.

Ne fakaaoga ne Iesu te igoa o te Atua. I tena ‵talo, ne fai atu a Iesu ki a Ieova: “Ko oti ne fakailoa atu ne au tou igoa ki a latou kae ka toe fakailoa atu ne au.” Kaia ne fakailoa atu ei ne Iesu a te igoa o te Atua ki ana soko? Ne toe fai atu a ia: “Ko te mea ke maua ne latou te alofa telā ne alofa mai ei koe ki a au ke ‵kau fakatasi foki mo latou.”​—Ioane 17:26.

WHY IT MATTERS

TE POGAI E TĀUA EI “A te tino telā e se iloa ne ia te igoa o te Atua e se iloa ‵lei foki ne ia me i a ia se tino,” ne tusi mai a te tino sukesuke ki te Tusi Tapu ko Walter Lowrie, “kae e se mafai o alofa a ia ki te Atua, māfai e talitonu a ia me se malosi fua.”

E isi se tagata e igoa ki a Victor, telā ne fanatu faeloa ki te lotu i vaiaso katoa, kae ne mafaufau me e se iloa tonu eiloa ne ia te Atua. “Kae oti aka ne tauloto ne au me i te igoa o te Atua ko Ieova, kae ne fai eiloa pelā me se fakamatalaga tonu te mea tenā ki a au,” ko ana muna. “Ne lagona ne au me ne fatoa fetaui eiloa māua mo te Tino telā ne uke a mea ne lagona ne au e uiga ki a ia. Ne fatoa kilo atu au ki a ia e pelā me se Tino tonu kae ati aka foki i ei se va fakataugasoa mo ia.”

Kae ko te ‵tonuga loa, e fakapilipili atu eiloa a Ieova ki tino kolā e fakaaoga ne latou tena igoa. Ne tauto mai a te Atua penei e uiga ki a latou: “Au ka alofa ki a latou e pelā me se tagata e alofa ki tena tama tagata telā e fakalogo ki a ia.” (Malaki 3:​16, 17) Ne taui foki ne te Atua a latou kolā e ka‵laga atu ki tena igoa. E fai mai te Tusi Tapu: “Me ko tino katoa kolā e ka‵laga ki te igoa o Ieova ka ‵sao.”​—Loma 10:13.